Yoꞌoꞌ kaꞌán David ña̱ va̱ꞌa̱ va̱ kuni ra̱ xini ra̱ Ndiosí
Ya̱a̱ ña̱ ni̱ xi̱ta̱ David nuu̱ꞌ Ndiosí kii̱ꞌ naá ra̱ miiꞌ i̱tyi kaaꞌ nuu̱ꞌ ñu̱ꞌuꞌ Judá.
63
Tákuiꞌe Ndiosí,
yoꞌó nduuꞌ Ndiosí ña̱ xakaꞌnuꞌ i̱.
Xiinꞌ i̱i̱n ka̱niiꞌ nimá i̱ nandukuꞌ i̱ yoꞌó sa̱a̱ ni̱a̱ꞌa̱,
sa̱kanꞌ ña̱ kaꞌán va̱ nimá i̱ ku̱ni̱ i̱ nuu̱ꞌ u̱nꞌ,
te̱ ndi̱e̱eꞌ va̱ nandukuꞌ ñu̱ꞌuꞌ ndeꞌi̱ i̱ yoꞌó nuu̱ꞌ ñu̱ꞌuꞌ i̱tyi va̱ yoꞌoꞌ miiꞌ köo̱ꞌ xa̱tyiꞌ ti̱kui.
2 Te̱ ku̱ni̱ i̱ ña̱ ndi̱e̱eꞌ u̱nꞌ xiinꞌ ña̱ nda̱tu̱nꞌ u̱nꞌ,
nde̱e̱ naa ni̱ xi̱ni̱ i̱ nuu̱ꞌ u̱nꞌ ti̱xi̱n yu̱kunꞌ miiꞌ nduꞌu̱ꞌ u̱nꞌ.
3 Sa̱kanꞌ ña̱ ña̱ va̱ꞌa̱ ka̱ nduuꞌ ña̱ kuvita i̱ni̱ u̱nꞌ xaꞌa̱ꞌ ndu̱ te̱ sa̱kanꞌ ña̱ tiaku ndu̱,
sa̱kanꞌ na kuiiꞌ yuꞌu̱ ndii,
sa̱kaꞌnuꞌ i̱ yoꞌó xiinꞌ yu̱ꞌuꞌ i̱.
4 Xaꞌa̱ꞌ a̱ ja̱a̱nꞌ na vi̱ti̱n ña̱ tiaku i̱ ndii,
sa̱kaꞌnuꞌ i̱ yoꞌó,
te̱ nda̱ni̱ꞌi̱ nda̱ꞌaꞌ i̱ kii̱ꞌ kaꞌán i̱ si̱u̱ꞌunꞌ xiinꞌ u̱nꞌ.
5 Sa̱kanꞌ ña̱ sandaꞌni ka̱ yoꞌó nimá i̱ te̱ sa̱kanꞌ ña̱ xaxi̱ꞌ,
ña̱ asi̱nꞌ va̱,
te̱ va̱ꞌa̱ va̱ kuni i̱ ka̱ta̱ i̱ ya̱a̱ nda̱tu̱nꞌ nuu̱ꞌ u̱nꞌ xiinꞌ yu̱ꞌuꞌ i̱.
6 Te̱ kii̱ꞌ nditoꞌ i̱ kanduꞌu̱ꞌ i̱ nuu̱ꞌ tunꞌ xi̱to̱ i̱ ndii,
nakaꞌanꞌ i̱,
te̱ xanini tu̱ i̱ xaꞌa̱ꞌ u̱nꞌ niiꞌ ñu̱u.
7 Sa̱kanꞌ ña̱ yoꞌó nduuꞌ ña̱ tyindieeꞌ yuꞌu̱,
te̱ va̱ꞌa̱ va̱ kuni i̱ kii̱ꞌ nduꞌu̱ꞌ i̱ miiꞌ xitoꞌ u̱nꞌ yuꞌu̱ xiinꞌ nda̱ꞌaꞌ u̱nꞌ ña̱ nduuꞌ nde̱e̱ naa ndi̱xi̱n sa̱a̱.
8 Nda̱ꞌaꞌ yoꞌó yoo ki̱xinꞌ nimá i̱ te̱ xikaꞌ i̱ i̱i̱n yivi̱ꞌ,
sa̱kanꞌ ña̱ xiinꞌ ña̱ ndi̱e̱eꞌ u̱nꞌ xitoꞌ u̱nꞌ yuꞌu̱.
9 Ndisu̱ ne̱ kuni ka̱ꞌni̱ꞌ yuꞌu̱ ndii,
mi̱iꞌ ni̱a̱ ndo̱ñuꞌuꞌ sa̱a̱ u̱nꞌ,
te̱ ko̱ꞌni̱ ni̱a̱ nde̱e̱ ma̱aꞌ miiꞌ kunu va̱ yavi̱ ñu̱ꞌuꞌ.
10 Ne̱ ja̱a̱nꞌ ndii,
ka̱ꞌni̱ꞌ ña̱ꞌaꞌ te̱ yivi̱ꞌ xiinꞌ ityi̱,
te̱ ka̱xi̱ꞌ ña̱ꞌaꞌ naya̱ꞌ i̱kuꞌ.
11 Ndisu̱ yuꞌu̱,
rey ndii,
na̱ku̱a̱tiaꞌ nimá i̱ ku̱ni̱ i̱ Ndiosí,
te̱ sa̱kuuꞌ ne̱ xakaꞌnuꞌ Ndiosí ndii,
ka̱ta̱ ni̱a̱ ya̱a̱ nuu̱ꞌ a̱.
Sa̱kanꞌ ña̱ sa̱kuuꞌ ne̱ kaꞌán tu̱n vixi̱ ndii,
nda̱si̱ Ndiosí yu̱ꞌuꞌ ni̱a̱.