Yoꞌoꞌ kaꞌán David ña̱ i̱i̱n nda̱a̱ꞌ Ndiosí ku̱i̱ti̱ꞌ nduuꞌ miiꞌ ku̱vi̱ kaku̱ e̱ꞌ nuu̱ꞌ ña̱ i̱yo̱
Ya̱a̱ ña̱ ni̱ xi̱ta̱ David ña̱ kuaꞌa̱n nda̱ꞌaꞌ Jedutún, te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
62
I̱i̱n xaanꞌ nda̱ꞌaꞌ Ndiosí ku̱i̱ti̱ꞌ niꞌíꞌ i̱ ña̱ nandiee̱ꞌ nimá i̱,
sa̱kanꞌ ña̱ nda̱ꞌaꞌ ña̱ ja̱a̱nꞌ ku̱a̱xi̱ ña̱ sakakú yuꞌu̱.
2 Te̱ i̱i̱n nda̱a̱ꞌ ña̱ ja̱a̱nꞌ ku̱i̱ti̱ꞌ nduuꞌ nde̱e̱ naa vi̱ꞌe̱ yuu̱ꞌ miiꞌ ku̱vi̱ kaku̱ i̱,
te̱ su̱vi̱ tu̱ a̱ nduuꞌ ña̱ sakakú yuꞌu̱,
ña̱ ja̱a̱nꞌ nduuꞌ nde̱e̱ naa miiꞌ ku̱vi̱ kaku̱ i̱,
te̱ köo̱ꞌ kivi̱ꞌ ka̱nandoo te̱ ndasiꞌ taꞌanꞌ xiinꞌ i̱ yuꞌu̱.
3 Sa̱kuuꞌ ndoꞌó,
te̱ ndasiꞌ taꞌanꞌ xiinꞌ i̱ ndii,
kuaꞌa̱ꞌ xa̱va̱ꞌa̱ ndo̱ꞌ,
te̱ yuꞌu̱ ndii,
i̱i̱n nda̱a̱ꞌ i̱ so̱ꞌo̱,
te̱ sa̱kuuꞌ ndo̱ꞌ xikaꞌ kuni ka̱ꞌni̱ꞌ yuꞌu̱.
Nuu̱ꞌ ndoꞌó ndii,
nduuꞌ i̱ nde̱e̱ naa i̱i̱n nama̱ vi̱ꞌe̱ ña̱ xa̱ kuni ndu̱va̱,
uun nde̱e̱ naa nama̱ tyiee̱ ña̱ xa̱ xitoꞌ ndu̱va̱ kuii.
4 Xa̱ nuu̱ꞌ xanini ra̱ sa̱a̱ sa̱a̱ ra̱ te̱ xta̱ꞌniꞌ ra̱ yuꞌu̱ nuu̱ꞌ tei̱ kaꞌnuꞌ miiꞌ nduꞌu̱ꞌ i̱ xaꞌndia tyu̱u̱n i̱,
xtani̱ va̱ ra̱ kaꞌa̱n ra̱ tu̱n vixi̱.
Kii̱ꞌ itaꞌ ra̱ ya̱ti̱n nuu̱ꞌ i̱ ndii,
va̱ꞌa̱ kaꞌán ra̱ xiinꞌ i̱,
ndisu̱ xiinꞌ nimá ra̱ ndii,
sanatyaꞌanꞌ ra̱ yuꞌu̱.
Selah
5 I̱i̱n xaanꞌ nda̱ꞌaꞌ Ndiosí ku̱i̱ti̱ꞌ niꞌíꞌ i̱ ña̱ nandiee̱ꞌ nimá i̱,
sa̱kanꞌ ña̱ nda̱ꞌaꞌ ña̱ ja̱a̱nꞌ ku̱a̱xi̱ ña̱ ndiatuꞌ i̱ni̱ i̱.
6 Te̱ i̱i̱n nda̱a̱ꞌ ña̱ ja̱a̱nꞌ ku̱i̱ti̱ꞌ nduuꞌ nde̱e̱ naa vi̱ꞌe̱ yuu̱ꞌ miiꞌ ku̱vi̱ kaku̱ i̱,
te̱ su̱vi̱ tu̱ a̱ nduuꞌ ña̱ sakakú yuꞌu̱,
ña̱ ja̱a̱nꞌ nduuꞌ nde̱e̱ naa miiꞌ ku̱vi̱ kaku̱ i̱,
te̱ köo̱ꞌ kivi̱ꞌ ka̱nandoo te̱ ndasiꞌ taꞌanꞌ xiinꞌ i̱ yuꞌu̱.
7 Ndiosí ku̱i̱ti̱ꞌ nduuꞌ nde̱e̱ naa vi̱ꞌe̱ yuu̱ꞌ miiꞌ ku̱vi̱ kaku̱ i̱,
te̱ xaꞌa̱ꞌ ña̱ ja̱a̱nꞌ ku̱i̱ti̱ꞌ kaꞌán ni̱nu̱ i̱.
Te̱ Ndiosí ja̱a̱nꞌ nduuꞌ nde̱e̱ naa vi̱ꞌe̱ yuu̱ꞌ ña̱ xitoꞌ yuꞌu̱,
te̱ su̱vi̱ tu̱ a̱ nduuꞌ nde̱e̱ naa miiꞌ ku̱vi̱ kaku̱ i̱.
8 Ndoꞌó,
ne̱ nduuꞌ ne̱ taꞌanꞌ i̱,
i̱ni̱ ndo̱ꞌ ku̱ni̱ ndo̱ꞌ Ndiosí i̱ꞌi̱n kivi̱ꞌ kuaꞌa̱n,
te̱ kaꞌa̱n ndo̱ꞌ xiinꞌ a̱ sa̱kuuꞌ ña̱ ndoꞌoꞌ nimá ndo̱ꞌ,
sa̱kanꞌ ña̱ ña̱ ja̱a̱nꞌ nduuꞌ nde̱e̱ naa miiꞌ ku̱vi̱ kaku̱ e̱ꞌ.
Selah
9 Ne̱ ndaꞌvi kuuꞌ xiinꞌ ne̱ vika̱ꞌ ndii,
kuäsa̱ꞌ ndiaa yaꞌviꞌ xa̱tyiꞌ ni̱a̱,
te̱ nduuꞌ ni̱a̱ nde̱e̱ naa mi̱ꞌiꞌ ku̱i̱ti̱ꞌ.
Naaꞌ vi̱kuita̱ ingaꞌ sa̱kuuꞌ ni̱a̱ nuu̱ꞌ ka̱a̱ ña̱ xikuꞌún ña̱ꞌa̱ ndii,
kuäsa̱ꞌ vie̱ xa̱tyiꞌ ni̱a̱.
10 Kï̱ꞌi̱n ndo̱ꞌ ña̱ ku̱ti̱a̱ku̱ ndo̱ꞌ nda̱ꞌaꞌ ne̱ yivi̱ꞌ xiinꞌ ña̱ xini xaꞌanꞌ,
ni̱ nde̱e̱ käꞌa̱n ndi̱e̱eꞌ va̱ nimá ndo̱ꞌ ña̱ sa̱kuiꞌnaꞌ ndo̱ꞌ ña̱ꞌa̱ ne̱ yivi̱ꞌ te̱ ku̱ti̱a̱ku̱ ndo̱ꞌ.
Te̱ naaꞌ ku̱kuaꞌa̱ꞌ ña̱ vikaꞌ ndo̱ꞌ ndii,
sä̱na̱nduuꞌ ndo̱ꞌ ña̱ ja̱a̱nꞌ nde̱e̱ naa ndiosí ña̱ xakaꞌnuꞌ ndo̱ꞌ.
11 Ni̱ kaꞌa̱n kaxiꞌ Ndiosí,
te̱ xa̱ kiꞌinꞌ va̱ i̱tyiꞌ ni̱ xi̱ni̱ so̱ꞌo̱ yuꞌu̱ kaꞌán a̱.
Tákuiꞌe Ndiosí,
kuenta mi̱iꞌ yoꞌó nduuꞌ ña̱ ndi̱e̱eꞌ kooꞌ tyukuuꞌ.
12 Te̱ ña̱ ndani̱ u̱nꞌ ne̱ yivi̱ꞌ nde̱e̱ ndiꞌiꞌ ni̱ kivi̱ꞌ,
Tákuiꞌe Ndiosí ndii,
kuenta mi̱iꞌ u̱nꞌ nduuꞌ a̱.
Ña̱ nda̱ku nduuꞌ a̱ ña̱ yoꞌó na̱tyaꞌvi̱ sa̱kuuꞌ ne̱ yivi̱ꞌ xaꞌa̱ꞌ sa̱kuuꞌ ña̱ va̱ꞌa̱ uun ña̱ ni̱a̱ꞌa ña̱ ni̱ xa̱a̱ i̱ꞌi̱n ni̱a̱.