Yoꞌoꞌ kaꞌán a̱ xaꞌa̱ꞌ ña̱ xitoꞌ Ndiosí te̱ yivi̱ꞌ, te̱ xaꞌndia tyuunꞌ nda̱ku
Ya̱a̱ ña̱ ni̱ xi̱ta̱ David ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
61
Tákuiꞌe Ndiosí,
sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ ña̱ kaꞌán tiꞌeꞌ i̱ xiinꞌ u̱nꞌ,
te̱ ndi̱xa̱ xna̱ꞌa̱ ku̱ni̱ so̱ꞌo̱ u̱nꞌ si̱u̱ꞌunꞌ ña̱ kaꞌán ndaꞌvi i̱ xiinꞌ u̱nꞌ.
2 Nde̱e̱ miiꞌ xaꞌa̱n ndi̱ꞌi̱ i̱i̱n yivi̱ꞌ iinꞌ i̱ te̱ kanaꞌ i̱ yoꞌó,
sa̱kanꞌ ña̱ kündieni ka̱ nimá i̱ ña̱ ndoꞌoꞌ i̱.
Sa̱a̱ u̱nꞌ ña̱ va̱ꞌa̱ te̱ sa̱kaaꞌ u̱nꞌ yuꞌu̱ xíniꞌ i̱i̱n yuu̱ꞌ ña̱ sukun yaꞌa̱ ka̱ te̱ sa̱kanꞌ yuꞌu̱,
te̱ ku̱vi̱ kaku̱ i̱ nuu̱ꞌ ña̱ i̱yo̱ ña̱ ndoꞌoꞌ i̱ yoꞌoꞌ.
3 Ku̱a̱tyi̱ ndii,
yoꞌó nduuꞌ nde̱e̱ naa miiꞌ ku̱vi̱ kaku̱ i̱ nuu̱ꞌ ña̱ i̱yo̱,
te̱ su̱vi̱ tu̱ u̱nꞌ nduuꞌ nde̱e̱ naa vi̱ꞌe̱ sukun miiꞌ ku̱vi̱ kaku̱ i̱ nuu̱ꞌ te̱ ndasiꞌ taꞌanꞌ xiinꞌ i̱.
4 Sa̱a̱ u̱nꞌ ña̱ va̱ꞌa̱ te̱ ta̱xi̱ u̱nꞌ ku̱nduꞌu̱ꞌ i̱ nde̱e̱ ndiꞌiꞌ ni̱ kivi̱ꞌ ti̱xi̱n yu̱kunꞌ miiꞌ nduꞌu̱ꞌ u̱nꞌ,
te̱ i̱kanꞌ ndii,
köo̱ꞌ a̱ ku̱ndo̱ꞌo̱ i̱,
sa̱kanꞌ ña̱ yoꞌó ko̱to̱ yuꞌu̱ xiinꞌ nda̱ꞌaꞌ u̱nꞌ ña̱ nduuꞌ nde̱e̱ naa ndi̱xi̱n sa̱a̱.
Selah
5 Sa̱kanꞌ ña̱ yoꞌó,
Tákuiꞌe Ndiosí ndii,
ni̱ xi̱ni̱ so̱ꞌo̱ u̱nꞌ kuento i̱ ña̱ ni̱ ta̱xi̱ i̱ nuu̱ꞌ u̱nꞌ,
ni̱ ta̱xi̱ tu̱ u̱nꞌ ñu̱ꞌuꞌ ku̱ndu̱u̱ ña̱ꞌa̱ i̱ naa ña̱ ni̱ ta̱xi̱ u̱nꞌ nda̱ꞌaꞌ i̱nga̱ ka̱ ne̱ nduuꞌ kuenta u̱nꞌ,
ne̱ xakaꞌnuꞌ yoꞌó,
ku̱ndu̱u̱ ña̱ꞌa̱ ni̱a̱.
6 Sa̱a̱ u̱nꞌ ña̱ va̱ꞌa̱ te̱ ta̱xi̱ u̱nꞌ kuaꞌa̱ꞌ kivi̱ꞌ ka̱ka̱ yuꞌu̱,
te̱ nduuꞌ rey i̱i̱n yivi̱ꞌ,
te̱ ka̱ꞌndi̱a̱ tyuunꞌ i̱,
te̱ na ku̱ti̱a̱ku̱ i̱ kuaꞌa̱ꞌ va̱ kuiya̱.
7 Te̱ na ko̱to̱ u̱nꞌ yuꞌu̱ te̱ ka̱ꞌndi̱a̱ tyuunꞌ i̱ nuu̱ꞌ ne̱ nduuꞌ kuenta u̱nꞌ nde̱e̱ ndiꞌiꞌ ni̱ kivi̱ꞌ,
te̱ na köo̱ꞌ kivi̱ꞌ kuꞌu̱n ndi̱koꞌ ña̱ ndani̱ u̱nꞌ yuꞌu̱ xiinꞌ ña̱ xatyuunꞌ nda̱ku u̱nꞌ xaꞌa̱ꞌ i̱.
8 Sa̱kanꞌ te̱ ka̱ta̱ i̱ ya̱a̱ nuu̱ꞌ u̱nꞌ nde̱e̱ ndiꞌiꞌ ni̱ kivi̱ꞌ,
te̱ i̱ꞌi̱n kivi̱ꞌ sa̱xinú i̱ kuento i̱ ña̱ ni̱ ta̱xi̱ i̱ nuu̱ꞌ u̱nꞌ.