Yoꞌoꞌ kaꞌán David xiinꞌ Ndiosí ña̱ sa̱kakú a̱ ne̱ nduuꞌ kuenta a̱
Ya̱a̱ ña̱ ni̱ xi̱ta̱ David ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ. Na ka̱ta̱ e̱ꞌ ya̱a̱ ña̱ kaꞌán xaꞌa̱ꞌ i̱ta̱ lirio, te̱ xiinꞌ ya̱a̱ kaa̱ꞌ saniaꞌá David xaꞌa̱ꞌ kii̱ꞌ ni̱ ku̱ntaꞌanꞌ ra̱ xiinꞌ te̱ Aram-naharaim xiinꞌ te̱ vi̱ꞌe̱ Aram, te̱ ni̱ ki̱e̱e̱ yo̱soꞌ ña̱ naniꞌ Soba. Te̱ kii̱ꞌ ni̱ na̱ndi̱koꞌ Joab ndii, ni̱ xa̱ꞌni̱ꞌ ra̱ uxi̱ uvi̱ mií te̱ ndieeꞌ nuu̱ꞌ ñu̱ꞌuꞌ Edom yo̱soꞌ miiꞌ yoo ii̱nꞌ.
60
Tákuiꞌe Ndiosí,
yoꞌó ndii,
ni̱ sa̱xi̱o̱o̱ u̱nꞌ nduꞌu̱,
te̱ su̱vi̱ u̱nꞌ ni̱ xa̱a̱ sa̱kanꞌ te̱ kuaꞌa̱ꞌ va̱ te̱ xíinꞌ ndu̱ ni̱ koyo̱ nda̱ꞌaꞌ te̱ ndasiꞌ taꞌanꞌ xiinꞌ ndu̱,
ni̱ na̱saa̱ꞌ u̱nꞌ ni̱ xi̱ni̱ u̱nꞌ ndu̱,
ndisu̱ vi̱ti̱n ndii,
sa̱a̱ u̱nꞌ ña̱ va̱ꞌa̱ te̱ tyi̱ndi̱e̱eꞌ tu̱ku̱u̱ u̱nꞌ ndu̱.
2 Ni̱ ki̱si̱ u̱nꞌ nuu̱ꞌ ñu̱ꞌuꞌ miiꞌ ndieeꞌ ndu̱,
te̱ ni̱ ndata̱ꞌ a̱ ni̱ xa̱a̱ u̱nꞌ.
Te̱ vi̱ti̱n ndii,
sa̱a̱ u̱nꞌ ña̱ va̱ꞌa̱ te̱ nda̱si̱ u̱nꞌ miiꞌ ni̱ ndata̱ꞌ a̱ ja̱a̱nꞌ,
sa̱kanꞌ ña̱ kieeꞌ xiti̱ꞌ va̱ ñu̱ꞌuꞌ ja̱a̱nꞌ.
3 Ni̱ ta̱xi̱ va̱ u̱nꞌ tu̱ndoꞌo̱ꞌ nuu̱ꞌ ndu̱,
ne̱ nduuꞌ kuenta u̱nꞌ,
te̱ sa̱kuuꞌ ña̱ ja̱a̱nꞌ ndii,
nduuꞌ a̱ nuu̱ꞌ ndu̱ nde̱e̱ naa vino,
te̱ xatu̱ va̱,
te̱ ni̱ ku̱vi̱ta va̱ ndu̱ ni̱ xa̱a̱ tu̱ndoꞌo̱ꞌ ja̱a̱nꞌ nde̱e̱ naa kuvita te̱ xiꞌiꞌ vino ja̱a̱nꞌ.
4 Ndisu̱ ni̱ sa̱kakú u̱nꞌ nduꞌu̱,
ne̱ nduuꞌ kuenta u̱nꞌ,
ne̱ xikaꞌ nda̱ku xna̱ꞌa̱ i̱tyiꞌ u̱nꞌ nuu̱ꞌ te̱ ndasiꞌ taꞌanꞌ xiinꞌ ndu̱,
te̱ kä̱ꞌni̱ꞌ ra̱ ndu̱ xiinꞌ kuxi̱,
tunꞌ xatia ra̱.
Selah
5 Sa̱kanꞌ te̱ ku̱vi̱ kaku̱ kiꞌi̱ꞌ nduꞌu̱,
ne̱ nduuꞌ kuenta u̱nꞌ,
ne̱ ndani̱ u̱nꞌ.
Na̱ku̱i̱i̱n kiꞌi̱ꞌ ña̱ kaꞌán ndu̱ xiinꞌ u̱nꞌ,
te̱ sa̱kakú u̱nꞌ ndu̱ xiinꞌ ña̱ ndi̱e̱eꞌ u̱nꞌ.
6 Te̱ ni̱ kaꞌa̱n Ndiosí nde̱e̱ yu̱kunꞌ su̱ꞌu̱n miiꞌ nduꞌu̱ꞌ a̱ ndii:
“Vi̱ti̱n ndii,
na̱ku̱a̱tiaꞌ i̱,
te̱ sa̱na̱kuatyiꞌ i̱ ñu̱u̱ Siquem,
te̱ ki̱ꞌi̱n ku̱ꞌva̱ i̱ yo̱soꞌ ña̱ naniꞌ Sucot.
7 Ñu̱ꞌuꞌ miiꞌ xatyuunꞌ Galaad xiinꞌ ñu̱ꞌuꞌ miiꞌ xatyuunꞌ Manasés ndii,
ña̱ꞌa̱ yuꞌu̱ nduuꞌ a̱.
Te̱ Efraín nduuꞌ te̱ tyindieeꞌ ne̱ nduuꞌ kuenta i̱,
te̱ nduuꞌ ra̱ nde̱e̱ naa tiꞌe̱ꞌ nduꞌu̱ꞌ xíniꞌ i̱,
te̱ Judá nduuꞌ te̱ niꞌiꞌ ta̱tunꞌ,
te̱ kaꞌán tuní ra̱ tu̱ꞌu̱n nde̱iꞌ i̱.
8 Ndisu̱ te̱ vi̱ꞌe̱ Moab,
te̱ nduuꞌ te̱ natiaꞌ nda̱ꞌaꞌ i̱ ndii,
te̱ xikaꞌ nuuꞌ nuu̱ꞌ i̱ na̱ndu̱u̱ ra̱,
te̱ te̱ vi̱ꞌe̱ Edom ku̱ndu̱u̱ te̱ ko̱ni̱ꞌi̱ ndixa̱nꞌ kiꞌiꞌ i̱.
Te̱ ku̱ni̱ so̱ꞌo̱ ne̱ vi̱ꞌe̱ filisteo kii̱ꞌ ndeꞌi̱ tiꞌeꞌ i̱ nuu̱ꞌ ñu̱ꞌuꞌ ni̱a̱ ña̱ xa̱ ni̱ ka̱nandoo ña̱ꞌaꞌ i̱”,
ni̱ katyi̱ a̱.
9 ¿Yo̱o̱ kuꞌu̱n ndi̱a̱ka̱ yuꞌu̱ ñu̱u̱ ña̱ ndasi i̱ꞌnu̱ kutu̱ꞌ va̱ xiinꞌ nama̱?
¿Yo̱o̱ niaꞌa̱ yuꞌu̱ i̱tyiꞌ ña̱ kuaꞌa̱n nde̱e̱ ñu̱u̱ Edom?
10 Su̱u̱ yoꞌó ndo̱ꞌ,
Tákuiꞌe Ndiosí,
te̱ ni̱ na̱ko̱o̱ u̱nꞌ ndu̱,
sa̱kanꞌ ña̱ yoꞌó nduuꞌ ña̱ ni̱ niꞌi̱ i̱tyiꞌ nuu̱ꞌ te̱ xíinꞌ ndu̱ kii̱ꞌ kuaꞌa̱n ku̱ntaꞌanꞌ ndu̱,
te̱ kuäsa̱ꞌ ka̱ kuaꞌa̱n u̱nꞌ xiinꞌ ndu̱.
11 Sa̱kanꞌ na kuiiꞌ sa̱a̱ u̱nꞌ ña̱ va̱ꞌa̱ te̱ tyi̱ndi̱e̱eꞌ u̱nꞌ ndu̱,
te̱ ku̱ntaꞌanꞌ ndu̱ xiinꞌ te̱ ndasiꞌ taꞌanꞌ xiinꞌ ndu̱,
sa̱kanꞌ ña̱ tee̱ꞌ ndee kuaꞌa̱ꞌ te̱ yivi̱ꞌ tyi̱ndi̱e̱eꞌ ndu̱ ndii,
kë̱ta̱ va̱ꞌa̱ ndu̱.
12 Te̱ xiinꞌ ña̱ ndi̱e̱eꞌ Ndiosí ndii,
kuaꞌa̱ꞌ tyu̱u̱n kaꞌnuꞌ ku̱vi̱ sa̱a̱ ndu̱,
te̱ xiinꞌ ña̱ ndi̱e̱eꞌ u̱nꞌ ja̱a̱nꞌ kueꞌni̱ ndo̱so̱ꞌ u̱nꞌ suku̱nꞌ te̱ ndasiꞌ taꞌanꞌ xiinꞌ ndu̱ ja̱a̱nꞌ.