Yoꞌoꞌ kaꞌán David xiinꞌ Ndiosí te̱ sa̱kakú ña̱ꞌaꞌ a̱ nda̱ꞌaꞌ ne̱ ndasiꞌ taꞌanꞌ xiinꞌ ra̱
Ya̱a̱ ña̱ ni̱ xi̱ta̱ David ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ kii̱ꞌ ni̱ kaꞌa̱n tyuunꞌ Saúl ña̱ ni̱a̱niꞌ te̱ xíinꞌ ra̱ vi̱ꞌe̱ David, te̱ ka̱ꞌni̱ꞌ ña̱ꞌaꞌ ra̱. Na ka̱ta̱ e̱ꞌ ya̱a̱ ña̱ naniꞌ kä̱ꞌni̱ꞌ ña̱ꞌaꞌ ndo̱ꞌ.
59
Tákuiꞌe Ndiosí,
sa̱a̱ u̱nꞌ ña̱ va̱ꞌa̱ te̱ sakakú u̱nꞌ yuꞌu̱ nda̱ꞌaꞌ ne̱ ndasiꞌ taꞌanꞌ xiinꞌ i̱,
te̱ ko̱to̱ u̱nꞌ yuꞌu̱ nuu̱ꞌ ne̱ kuni ka̱ꞌni̱ꞌ yuꞌu̱.
2 Sa̱kakú u̱nꞌ yuꞌu̱ nda̱ꞌaꞌ ne̱ xaaꞌ ña̱ ni̱a̱ꞌa,
te̱ sa̱ndoó ndiká u̱nꞌ yuꞌu̱ nda̱ꞌaꞌ ne̱ xaꞌni̱ꞌ ne̱ yivi̱ꞌ.
3 Sa̱kanꞌ ña̱ ko̱to̱ u̱nꞌ,
xa̱ ndieeꞌ tu̱ꞌva̱ te̱ yivi̱ꞌ xaꞌa̱ꞌ kuꞌu̱ níániꞌ ra̱ yuꞌu̱,
te̱ ni̱a̱ꞌa va̱ nduuꞌ te̱ kuni ka̱ꞌni̱ꞌ yuꞌu̱.
Tákuiꞌe Yahvé,
köo̱ꞌ nde̱e̱ i̱i̱n ña̱ ni̱a̱ꞌa ni̱ xa̱a̱ i̱,
te̱ kuni ku̱u̱n ra̱ yuꞌu̱,
ni̱ nde̱e̱ köo̱ꞌ tu̱ nde̱e̱ i̱i̱n ku̱a̱tyi̱ ni̱ xa̱a̱ i̱.
4 Köo̱ꞌ nde̱e̱ i̱i̱n ña̱ ni̱a̱ꞌa ni̱ xa̱a̱ i̱ xiinꞌ ra̱,
ndisu̱ taxtaꞌanꞌ ra̱,
te̱ yatyi̱ va̱ sa̱kooꞌ tu̱ꞌva̱ xiinꞌ miiꞌ ra̱ te̱ ku̱u̱n ra̱ yuꞌu̱.
Ndo̱to̱ nuu̱ꞌ u̱nꞌ,
te̱ ki̱xi̱n ko̱to̱ u̱nꞌ sa̱kuuꞌ ña̱ ni̱a̱ꞌa ña̱ xaaꞌ ra̱ xiinꞌ i̱,
te̱ tyi̱ndi̱e̱eꞌ u̱nꞌ yuꞌu̱.
5 Tákuiꞌe Ndiosí,
ña̱ xaꞌndia tyuunꞌ nuu̱ꞌ sa̱kuuꞌ ña̱ xíinꞌ ndieeꞌ ndi̱viꞌ,
Ndiosí,
ña̱ xakaꞌnuꞌ nduꞌu̱ꞌ,
ne̱ vi̱ꞌe̱ Israel,
ndo̱to̱ nuu̱ꞌ u̱nꞌ te̱ sa̱ndoꞌoꞌ u̱nꞌ sa̱kuuꞌ ne̱ tukuꞌ,
te̱ kü̱vi̱ta i̱ni̱ u̱nꞌ xaꞌa̱ꞌ nde̱e̱ i̱i̱n ne̱ ni̱a̱ꞌa ja̱a̱nꞌ.
Selah
6 Te̱ kieeꞌ ni̱a̱ ñu̱u kuaaꞌ ni̱a̱ nde̱e̱ naa naya̱ꞌ sanaꞌ,
te̱ xinuꞌniꞌ ni̱a̱ sa̱kuuꞌ ya̱ꞌya̱ ñu̱u̱.
7 Ku̱ni̱ so̱ꞌo̱ u̱nꞌ ña̱ kaꞌán ni̱a̱,
xa̱ mi̱iꞌ ndiꞌiꞌ ña̱ ni̱a̱ꞌa kieeꞌ yu̱ꞌuꞌ ni̱a̱,
te̱ ña̱ kaꞌán ni̱a̱ ja̱a̱nꞌ ndii,
satuxuꞌví a̱ ne̱ yivi̱ꞌ nde̱e̱ naa ityi̱,
te̱ xanini ni̱a̱ ña̱ köo̱ꞌ nde̱e̱ i̱i̱n ne̱ yivi̱ꞌ xini so̱ꞌo̱ ña̱ kaꞌán ni̱a̱ ja̱a̱nꞌ.
8 Ndisu̱ yoꞌó,
Tákuiꞌe Ndiosí ndii,
xakú ndi̱a̱a̱ ku̱i̱ti̱ꞌ ña̱ꞌaꞌ u̱nꞌ,
te̱ xandiꞌiꞌ ku̱i̱ti̱ꞌ u̱nꞌ xiinꞌ ne̱ tukuꞌ,
ne̱ xaaꞌ ña̱ ni̱a̱ꞌa ja̱a̱nꞌ.
9 Yoꞌó taxiꞌ ña̱ ndi̱e̱eꞌ i̱,
ndiatuꞌ i̱ni̱ i̱ ña̱ sakakú u̱nꞌ yuꞌu̱ nda̱ꞌaꞌ ne̱ ndasiꞌ taꞌanꞌ xiinꞌ i̱,
sa̱kanꞌ ña̱ yoꞌó nduuꞌ ña̱ xitoꞌ yuꞌu̱.
10 Ndiosí,
ña̱ kuvita i̱ni̱ xaꞌa̱ꞌ i̱,
ko̱to̱ yuꞌu̱,
te̱ ta̱xi̱ a̱ ña̱ ku̱ni̱ ndu̱tyiꞌ nuu̱ꞌ i̱ kii̱ꞌ ka̱nandoo a̱ sa̱kuuꞌ ne̱ ndasiꞌ taꞌanꞌ xiinꞌ i̱ ja̱a̱nꞌ.
11 Kä̱ꞌni̱ꞌ xa̱tyiꞌ ña̱ꞌaꞌ u̱nꞌ,
Tákuiꞌe Ndiosí,
sa̱kanꞌ te̱ nä̱ndoso̱ꞌ ne̱ ñu̱u̱ i̱ ña̱ ni̱ xa̱a̱ u̱nꞌ ja̱a̱nꞌ,
süu̱ꞌ ja̱a̱nꞌ ndii,
ki̱ku̱ꞌ u̱nꞌ sa̱kuuꞌ ni̱a̱ xiinꞌ ña̱ ndi̱e̱eꞌ u̱nꞌ,
te̱ sa̱kaꞌanꞌ ña̱ꞌaꞌ u̱nꞌ.
Tákuiꞌe Yahvé,
yoꞌó nduuꞌ nde̱e̱ naa ka̱a̱ tiꞌeꞌ ña̱ xitoꞌ nduꞌu̱.
12 Xaꞌa̱ꞌ sa̱kuuꞌ ña̱ ni̱a̱ꞌa ña̱ kaꞌán ni̱a̱
xiinꞌ xaꞌa̱ꞌ sa̱kuuꞌ ña̱ ni̱a̱ꞌa ña̱ kieeꞌ yu̱ꞌuꞌ ni̱a̱ ndii,
sa̱ndoꞌoꞌ ña̱ꞌaꞌ u̱nꞌ xaꞌa̱ꞌ ña̱ ñuñuꞌ ni̱a̱ ja̱a̱nꞌ,
te̱ sa̱kanꞌ tu̱ xaꞌa̱ꞌ a̱ ña̱ sanatyaꞌanꞌ ni̱a̱ ne̱ yivi̱ꞌ,
xiinꞌ xaꞌa̱ꞌ ña̱ kaꞌán ni̱a̱ tu̱n vixi̱.
13 Xaꞌa̱ꞌ a̱ ña̱ xiꞌé va̱ u̱nꞌ xini ña̱ꞌaꞌ u̱nꞌ ndii,
ka̱ꞌni̱ꞌ kiꞌi̱ꞌ ni̱a̱,
ka̱ꞌni̱ꞌ u̱nꞌ sa̱kuuꞌ ni̱a̱ te̱ nä̱ko̱o̱ u̱nꞌ nde̱e̱ i̱i̱n nda̱a̱ꞌ ni̱a̱,
sa̱kanꞌ te̱ ku̱nda̱ni̱ sa̱kuuꞌ ne̱ yivi̱ꞌ i̱i̱n yivi̱ꞌ ña̱ Ndiosí xaꞌndia tyuunꞌ nuu̱ꞌ ne̱ vi̱ꞌe̱ Israel.
Selah
14 Ne̱ ndasiꞌ taꞌanꞌ xiinꞌ i̱ ja̱a̱nꞌ ndii,
kieeꞌ ni̱a̱ ñu̱u kuaaꞌ ni̱a̱ nde̱e̱ naa naya̱ꞌ sanaꞌ,
te̱ xinuꞌniꞌ ni̱a̱ sa̱kuuꞌ ya̱ꞌya̱ ñu̱u̱.
15 Kuaꞌa̱n ku̱a̱xi̱ ni̱a̱ xikaꞌ ni̱a̱ ya̱ꞌya̱ nandukuꞌ ni̱a̱ ña̱ ka̱xi̱ꞌ ni̱a̱,
ndisu̱ xaꞌa̱ꞌ a̱ ña̱ xïxiꞌ ndaꞌni ni̱a̱ ndii,
niiꞌ ñu̱u kuaaꞌ ni̱a̱ ña̱ xiꞌí ka̱ ni̱a̱ so̱ko̱.
16 Ndisu̱ yuꞌu̱ ndii,
ka̱ta̱ i̱ ya̱a̱ nuuꞌ u̱nꞌ xaꞌa̱ꞌ a̱ ña̱ ndi̱e̱eꞌ u̱nꞌ,
te̱ sa̱a̱ ni̱a̱ꞌa̱ sa̱kaꞌnuꞌ i̱ yoꞌó xaꞌa̱ꞌ a̱ ña̱ kuvita i̱ni̱ u̱nꞌ xaꞌa̱ꞌ i̱,
sa̱kanꞌ ña̱ yoꞌó nduuꞌ ña̱ xikuiꞌní xaꞌa̱ꞌ i̱,
te̱ su̱vi̱ tu̱ u̱nꞌ nduuꞌ nde̱e̱ naa miiꞌ ku̱vi̱ kaku̱ i̱ kii̱ꞌ ndiꞌni̱ nimá i̱.
17 Nuu̱ꞌ yoꞌó ka̱ta̱ i̱ ya̱a̱,
Tákuiꞌe Ndiosí,
ña̱ taxiꞌ ndi̱e̱e̱ꞌ i̱,
sa̱kanꞌ ña̱ yoꞌó nduuꞌ nde̱e̱ naa miiꞌ ku̱vi̱ kaku̱ i̱,
te̱ niaꞌá tu̱ u̱nꞌ yuꞌu̱ ña̱ ndani̱ xa̱va̱ꞌa̱ u̱nꞌ yuꞌu̱.