Yoꞌoꞌ kaꞌán a̱ ña̱ sa̱ndoꞌoꞌ Ndiosí sa̱kuuꞌ kuesí, te̱ xätyuunꞌ nda̱ku
Ya̱a̱ ña̱ ni̱ xi̱ta̱ David ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ. Na ka̱ta̱ e̱ꞌ ya̱a̱ ña̱ naniꞌ kä̱ꞌni̱ꞌ ña̱ꞌaꞌ ndo̱ꞌ.
58
Ndoꞌó,
kuesí ndii,
xäꞌndia tyuunꞌ nda̱ku ndo̱ꞌ,
te̱ ni̱ nde̱e̱ xäꞌnú nda̱ku tu̱ ndo̱ꞌ ku̱a̱tyi̱ ne̱ yivi̱ꞌ.
2 Süu̱ꞌ ja̱a̱nꞌ ndii,
ña̱ ni̱a̱ꞌa ku̱i̱ti̱ꞌ tyituní ndo̱ꞌ xiinꞌ nimá ndo̱ꞌ,
te̱ sanakuiníá ndo̱ꞌ ña̱ xaꞌni̱ꞌ taꞌanꞌ ne̱ yivi̱ꞌ i̱i̱n ka̱niiꞌ nuu̱ꞌ ñu̱ꞌuꞌ Israel yoꞌoꞌ.
3 Ne̱ xaaꞌ ña̱ ni̱a̱ꞌa ja̱a̱nꞌ ndii,
ne̱ xaaꞌ ku̱a̱tyi̱ nduuꞌ ni̱a̱ nde̱e̱ ni̱ tuvi̱ ni̱a̱,
te̱ nde̱e̱ kii̱ꞌ ni̱ ka̱ku̱ ni̱a̱ te̱ nduuꞌ ni̱a̱ ne̱ xini xaꞌanꞌ,
te̱ xaaꞌ ni̱a̱ ña̱ kuní mi̱iꞌ ni̱a̱.
4 Ña̱ kaꞌán ni̱a̱ ndii,
mi̱iꞌ ndiꞌiꞌ kuento ni̱a̱ꞌa nduuꞌ a̱,
te̱ nduuꞌ a̱ nde̱e̱ naa ña̱ xatu̱ xa̱va̱ꞌa̱ ña̱ kieeꞌ yu̱ꞌuꞌ koo̱ꞌ,
te̱ nduuꞌ tu̱ a̱ nde̱e̱ naa ña̱ xatu̱ ña̱ kieeꞌ yu̱ꞌuꞌ koo̱ꞌ xiniꞌ xaꞌndiaꞌ naꞌnuꞌ va̱,
tiꞌ tïakú xíniꞌ kii̱ꞌ kaꞌán te̱ yivi̱ꞌ xiinꞌ riꞌ.
5 Koo̱ꞌ ja̱a̱nꞌ ndii,
xïni so̱ꞌo̱ riꞌ kii̱ꞌ xikaꞌ te̱ tu̱ꞌva̱ kuni sa̱maso ra̱ riꞌ,
te̱ xïni so̱ꞌo̱ tu̱ riꞌ tee̱ꞌ ndee i̱i̱n te̱ tu̱ꞌva̱ kooꞌ tyukuuꞌ va̱ nduuꞌ te̱ yivi̱ꞌ,
te̱ xikaꞌ sa̱maso riꞌ ja̱a̱nꞌ.
6 Tákuiꞌe Ndiosí,
sa̱a̱ u̱nꞌ ña̱ va̱ꞌa̱ te̱ kaꞌnu̱ u̱nꞌ sa̱kuuꞌ nu̱ꞌu̱ ni̱a̱.
Tákuiꞌe Yahvé,
sa̱kuatyiꞌ tu̱ u̱nꞌ i̱kiꞌ yu̱ꞌuꞌ ne̱ yivi̱ꞌ,
ne̱ nduuꞌ nde̱e̱ naa lion ja̱a̱nꞌ.
7 Te̱ na ndo̱ñuꞌuꞌ sa̱kuuꞌ ni̱a̱ so̱ꞌo̱ nde̱e̱ naa xaaꞌ ti̱kui kii̱ꞌ nayaaꞌ raꞌ nuu̱ꞌ ñu̱ꞌuꞌ i̱tyi,
te̱ na taꞌnu̱ sa̱kuuꞌ kuxi̱ ni̱a̱ kii̱ꞌ kiniꞌ ni̱a̱.
8 Te̱ naa ku̱vi̱ ni̱a̱ te̱ ku̱ndo̱ꞌo̱ ni̱a̱ nde̱e̱ naa ti̱koo̱ꞌ yu̱ꞌuꞌ kii̱ꞌ ndutiaꞌ riꞌ ña̱ i̱ꞌniꞌ va̱,
te̱ ku̱ndo̱ꞌo̱ tu̱ ni̱a̱ nde̱e̱ naa ña̱ kuañuꞌu̱ ña̱ xiꞌí kii̱ꞌ tuví a̱,
te̱ kü̱ni̱ ka̱ ni̱a̱ ñu̱ꞌu̱.
9 Ne̱ ja̱a̱nꞌ ndii,
sa̱ndo̱ñuꞌuꞌ Ndiosí sa̱kuuꞌ ni̱a̱,
ne̱ sa̱va̱ xiinꞌ ne̱ xi̱xa̱,
te̱ yatyi̱ ka̱ sa̱ndo̱ñuꞌuꞌ ña̱ꞌaꞌ a̱ te̱ sa̱kanꞌ ña̱ nasaáꞌ i̱i̱n ki̱si̱ ña̱ ndonuꞌ nuuꞌ ñuꞌu̱ kii̱ꞌ xixí tunꞌ i̱ñu̱ꞌ.
10 Va̱ꞌa̱ va̱ ku̱ni̱ ne̱ xatyuunꞌ nda̱ku kii̱ꞌ ku̱ni̱ ni̱a̱ ña̱ ku̱ndo̱ꞌo̱ sa̱kuuꞌ ne̱ ja̱a̱nꞌ sa̱a̱ Ndiosí
xaꞌa̱ꞌ a̱ ña̱ ni̱a̱ꞌa ña̱ ni̱ xa̱a̱ ni̱a̱ xiinꞌ ne̱ xatyuunꞌ nda̱ku ja̱a̱nꞌ,
te̱ nde̱e̱ xaꞌa̱ꞌ ne̱ xatyuunꞌ nda̱ku ja̱a̱nꞌ na̱ti̱a̱ ni̱a̱ xiinꞌ níiꞌ ne̱ ni̱ xa̱a̱ ña̱ ni̱a̱ꞌa,
ne̱ ni̱ xiꞌi̱ ja̱a̱nꞌ.
11 Sa̱kanꞌ te̱ kaꞌa̱n ne̱ yivi̱ꞌ,
ne̱ xatyuunꞌ nda̱ku ja̱a̱nꞌ ndii:
“Ña̱ ndi̱xa̱ nduuꞌ a̱ ndii,
yoo xna̱ꞌa̱ ña̱ va̱ꞌa̱ natiinꞌ ne̱ xatyuunꞌ nda̱ku nda̱ꞌaꞌ Ndiosí.
Ña̱ ndi̱xa̱ xna̱ꞌa̱ nduuꞌ a̱ ndii,
yoo Ndiosí ña̱ sanaꞌmá nda̱ku ne̱ yivi̱ꞌ nuu̱ꞌ ñu̱ꞌuꞌ i̱i̱n yivi̱ꞌ yoꞌoꞌ”,
katyi̱ ni̱a̱.