Yoꞌoꞌ kaꞌán ndaꞌvi David xiinꞌ Ndiosí te̱ sa̱kakú ña̱ꞌaꞌ a̱ nda̱ꞌaꞌ te̱ kuni ka̱ꞌni̱ꞌ ña̱ꞌaꞌ
Ya̱a̱ ña̱ ni̱ xi̱ta̱ David ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ kii̱ꞌ ni̱ xi̱nu̱ ra̱ nuu̱ꞌ Saúl, te̱ kuaꞌa̱n ku̱nduꞌu̱ꞌ ra̱ i̱i̱n yavi̱ yuu̱ꞌ. Te̱ na ka̱ta̱ e̱ꞌ ya̱a̱ ña̱ naniꞌ kä̱ꞌni̱ꞌ ña̱ꞌaꞌ ndo̱ꞌ.
57
Tákuiꞌe Ndiosí,
sa̱a̱ u̱nꞌ ña̱ va̱ꞌa̱ te̱ ku̱vi̱ta i̱ni̱ u̱nꞌ xaꞌa̱ꞌ i̱.
Sa̱a̱ u̱nꞌ ña̱ va̱ꞌa̱ te̱ ku̱vi̱ta i̱ni̱ u̱nꞌ xaꞌa̱ꞌ i̱,
sa̱kanꞌ ña̱ nuu̱ꞌ yoꞌó ku̱i̱ti̱ꞌ ndukuꞌ i̱ ña̱ tyi̱ndi̱e̱eꞌ u̱nꞌ yuꞌu̱,
te̱ kuní i̱ ña̱ ko̱to̱ u̱nꞌ yuꞌu̱ xiinꞌ nda̱ꞌaꞌ u̱nꞌ ña̱ nduuꞌ nde̱e̱ naa ndi̱xi̱n sa̱a̱,
ko̱o̱ i̱ te̱ tyi̱ndi̱e̱eꞌ u̱nꞌ yuꞌu̱ nde̱e̱ ska̱tyiꞌ xkaꞌndi̱a̱ ña̱ i̱yo̱.
2 Kaꞌán tiꞌeꞌ i̱ nuu̱ꞌ Ndiosí,
ña̱ nduꞌu̱ꞌ ndi̱e̱nu̱,
Ndiosí,
ña̱ tyindieeꞌ yuꞌu̱ nuu̱ꞌ sa̱kuuꞌ ña̱ ndoꞌoꞌ i̱.
3 Nde̱e̱ ndi̱viꞌ miiꞌ nduꞌu̱ꞌ a̱ ka̱ta̱ni̱ a̱ nda̱ꞌaꞌ a̱ te̱ sa̱kakú a̱ yuꞌu̱,
te̱ sa̱kaꞌanꞌ a̱ sa̱kuuꞌ te̱ ndikún kuni sa̱ndoꞌoꞌ yuꞌu̱.
Selah
Te̱ mi̱iꞌ Ndiosí ti̱ꞌviꞌ ña̱ ku̱vi̱ta i̱ni̱ a̱ xaꞌa̱ꞌ i̱ xiinꞌ ña̱ ndi̱xa̱ te̱ sa̱kakú a̱ yuꞌu̱.
4 Ma̱ꞌiꞌ te̱ ndasiꞌ taꞌanꞌ xiinꞌ i̱ nduꞌu̱ꞌ i̱,
te̱ nduuꞌ ra̱ nde̱e̱ naa kuaꞌa̱ꞌ lion ni̱a̱ꞌa va̱,
te̱ ndasiꞌ taꞌanꞌ xiinꞌ i̱ ja̱a̱nꞌ ndii,
yatyi̱ va̱ xaꞌni̱ꞌ ra̱ ne̱ yivi̱ꞌ,
te̱ xíinꞌ va̱ yu̱ꞌuꞌ ra̱ nde̱e̱ naa kuxi̱,
xiinꞌ tunꞌ xíinꞌ nuu̱ꞌ,
te̱ yaa̱ꞌ ra̱ ndii,
nduuꞌ a̱ nde̱e̱ naa ityi̱ ña̱ xíinꞌ xa̱va̱ꞌa̱.
5 Tákuiꞌe Ndiosí,
yoꞌó ndii,
nde̱e̱ miiꞌ sukun ka̱ ndi̱viꞌ nduꞌu̱ꞌ u̱nꞌ,
te̱ ña̱ kaꞌnuꞌ u̱nꞌ ndii,
yoo a̱ ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ.
6 Te̱ ndasiꞌ taꞌanꞌ xiinꞌ i̱ ja̱a̱nꞌ ndii,
ni̱ tyi̱ta̱ꞌnu̱ ra̱ tunꞌ ii̱ꞌ i̱tyiꞌ miiꞌ xikaꞌ i̱,
te̱ xa̱ ni̱ xa̱vi va̱ i̱ ña̱ sandiꞌni̱ va̱ ra̱ nimá i̱.
Selah
Te̱ ni̱ xa̱ti̱a̱ tu̱ ra̱ poso̱ kunu va̱ i̱tyiꞌ miiꞌ xikaꞌ i̱,
ndisu̱ mi̱iꞌ ra̱ ni̱ koyo̱ ti̱xi̱n poso̱ ja̱a̱nꞌ.
7 Xa̱ yoo tu̱ꞌva̱ nimá i̱,
Tákuiꞌe Ndiosí,
xa̱ yoo tu̱ꞌva̱ nimá i̱ vi̱ti̱n,
te̱ ka̱ta̱ i̱ ya̱a̱ nuu̱ꞌ u̱nꞌ,
te̱ sa̱kaꞌnuꞌ i̱ yoꞌó.
8 Nimá mi̱iꞌ i̱,
ndo̱to̱ nuu̱ꞌ u̱nꞌ,
te̱ ndo̱to̱ tu̱ nuu̱ꞌ ndoꞌó ñuu̱ꞌ ña̱ xandaaꞌ i̱,
ña̱ nduuꞌ salterio xiinꞌ ñuu̱ꞌ arpa.
Ni̱a̱ꞌa̱ va̱ ndo̱koo̱ i̱ te̱ ka̱ta̱ i̱ ya̱a̱ nuu̱ꞌ Ndiosí.
9 Tákuiꞌe Ndiosí,
ta̱xi̱ i̱ ña̱ tyi̱nda̱ni u̱nꞌ nuu̱ꞌ kuaꞌa̱ꞌ ne̱ yivi̱ꞌ,
te̱ ka̱ta̱ i̱ ya̱a̱ nda̱tu̱nꞌ nuu̱ꞌ yoꞌó te̱i̱n kuaꞌa̱ꞌ ne̱ tukuꞌ.
10 Sa̱kanꞌ ña̱ tyiee̱ xa̱va̱ꞌa̱ ña̱ ndani̱ u̱nꞌ ne̱ yivi̱ꞌ,
te̱ naxaá a̱ nde̱e̱ ndi̱viꞌ,
te̱ nde̱e̱ nuu̱ꞌ viko̱ꞌ naxaá ña̱ xatyuunꞌ nda̱ku u̱nꞌ.
11 Tákuiꞌe Ndiosí,
nde̱e̱ miiꞌ sukun ka̱ ndi̱viꞌ nduꞌu̱ꞌ u̱nꞌ,
te̱ ña̱ kaꞌnuꞌ yoꞌó ndii,
yoo a̱ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ.