Yoꞌoꞌ kaꞌán David ña̱ yïꞌvi ra̱ ña̱ ni̱a̱ꞌa ña̱ kuni sa̱a̱ ne̱ yivi̱ꞌ xiinꞌ ra̱, sa̱kanꞌ ña̱ Ndiosí yoo xiinꞌ ra̱
Ya̱a̱ ña̱ ni̱ xi̱ta̱ David ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ. Ya̱a̱ kaa̱ꞌ ni̱ xi̱ta̱ David kii̱ꞌ ni̱ na̱ti̱i̱n ña̱ꞌaꞌ te̱ filisteo nuu̱ꞌ ñu̱ꞌuꞌ Gat. Te̱ kaꞌán ya̱a̱ kaa̱ꞌ xaꞌa̱ꞌ paloma, tiꞌ taxi̱nꞌ nduꞌu̱ꞌ nda̱ꞌaꞌ tu̱n koo̱ꞌ i̱i̱n xaanꞌ miiꞌ xikaꞌ va̱.
56
Tákuiꞌe Ndiosí,
sa̱a̱ u̱nꞌ ña̱ va̱ꞌa̱ te̱ ku̱vi̱ta i̱ni̱ u̱nꞌ xaꞌa̱ꞌ i̱,
sa̱kanꞌ ña̱ sandoꞌoꞌ va̱ ne̱ yivi̱ꞌ yuꞌu̱,
te̱ ne̱ ndasiꞌ taꞌanꞌ xiinꞌ i̱ ndii,
i̱ꞌi̱n kivi̱ꞌ kuaꞌa̱n kuntaꞌanꞌ ni̱a̱ xiinꞌ i̱.
2 Ndu̱viꞌ ndikún te̱ ndasiꞌ taꞌanꞌ xiinꞌ i̱ yuꞌu̱,
kuni ka̱xi̱ꞌiꞌ tiaku ra̱ yuꞌu̱,
te̱ kuaꞌa̱ꞌ xa̱va̱ꞌa̱ te̱ ñuñuꞌ ndikún yuꞌu̱ kuntaꞌanꞌ ra̱ xiinꞌ i̱.
3 Ndisu̱ kii̱ꞌ yiꞌvi i̱ ndii,
i̱ni̱ i̱ xini yoꞌó.
4 I̱ni̱ i̱ xini i̱ Ndiosí,
te̱ kiꞌinꞌ kaꞌnuꞌ i̱ kuento a̱ ña̱ ni̱ ta̱xi̱ a̱,
i̱ni̱ xini i̱ Ndiosí,
te̱ yïꞌvi i̱ ndee ka̱ ña̱ sa̱a̱ te̱ yivi̱ꞌ xiinꞌ i̱.
Sa̱kanꞌ ña̱ köo̱ꞌ xa̱tyiꞌ ña̱ ku̱vi̱ sa̱a̱ te̱ yivi̱ꞌ i̱i̱n yivi̱ꞌ ku̱i̱ti̱ꞌ xiinꞌ yuꞌu̱.
5 Sa̱a̱ kivi̱ꞌ namaꞌ ra̱ sa̱kuuꞌ ña̱ kaꞌán i̱,
te̱ ndu̱viꞌ tyituní ra̱ sa̱a̱ ra̱ ña̱ ni̱a̱ꞌa xiinꞌ i̱.
6 Nakaya taꞌanꞌ ra̱,
te̱ ñuꞌuꞌ si̱ꞌe ra̱ xaꞌa̱ꞌ kuꞌu̱ te̱ níániꞌ ra̱ yuꞌu̱,
te̱ xitoꞌ ra̱ miiꞌ ka̱ kuaꞌa̱n i̱,
te̱ ndi̱e̱eꞌ va̱ kaꞌán nimá ra̱ ka̱ꞌni̱ꞌ ra̱ yuꞌu̱.
7 Sa̱a̱ u̱nꞌ ña̱ va̱ꞌa̱ te̱ tä̱xi̱ u̱nꞌ kaku̱ ra̱,
sa̱kanꞌ ña̱ xa̱ kuaꞌa̱ꞌ va̱ ña̱ ni̱a̱ꞌa ni̱ xa̱a̱ ra̱,
xaꞌa̱ꞌ a̱ ña̱ xiꞌé va̱ u̱nꞌ xini u̱nꞌ ne̱ ndieeꞌ ñu̱u̱ ja̱a̱nꞌ ndii,
sa̱kaꞌanꞌ ndi̱e̱eꞌ kiꞌi̱ꞌ ña̱ꞌaꞌ u̱nꞌ.
8 Xa̱ xiní yoꞌó sa̱a̱ vi̱ꞌ kuaꞌa̱ꞌ i̱tyiꞌ xa̱ xikaꞌ xinuꞌ i̱,
te̱ xa̱ ni̱ ka̱ya̱ u̱nꞌ sa̱kuuꞌ ti̱kui nuu̱ꞌ i̱ ti̱xi̱n li̱mita kii̱ꞌ xakuꞌ i̱,
te̱ sa̱kuuꞌ ña̱ ja̱a̱nꞌ ndii,
xa̱ yoso̱ꞌ a̱ nuu̱ꞌ tu̱tu̱ u̱nꞌ ni̱ xa̱a̱ u̱nꞌ.
9 Kii̱ꞌ xa̱ꞌaꞌ i̱ kaꞌa̱n i̱ xiinꞌ yoꞌó te̱ tyi̱ndi̱e̱eꞌ u̱nꞌ yuꞌu̱ ndii,
ku̱nu̱ sa̱kuuꞌ te̱ ndasiꞌ taꞌanꞌ xiinꞌ i̱ ja̱a̱nꞌ.
Sa̱kanꞌ te̱ ku̱nda̱ni̱ kaxiꞌ xna̱ꞌa̱ i̱ ña̱ yoo yoꞌó,
Ndiosí,
xiinꞌ i̱.
10 I̱ni̱ i̱ xini i̱ Ndiosí,
te̱ kiꞌinꞌ kaꞌnuꞌ i̱ kuento a̱ ña̱ ni̱ ta̱xi̱ a̱,
uun ndo̱ꞌ,
i̱ni̱ xini i̱ Yahvé,
te̱ kiꞌinꞌ kaꞌnuꞌ i̱ kuento a̱ ña̱ ni̱ ta̱xi̱ a̱.
11 I̱ni̱ i̱ xini i̱ Ndiosí,
te̱ köo̱ꞌ nde̱e̱ i̱i̱n xaꞌa̱ꞌ ña̱ ku̱yi̱ꞌvi i̱ te̱ ka̱ka̱ i̱,
te̱ köo̱ꞌ xa̱tyiꞌ ña̱ ku̱vi̱ sa̱a̱ te̱ yivi̱ꞌ i̱i̱n yivi̱ꞌ ku̱i̱ti̱ꞌ xiinꞌ yuꞌu̱.
12 Saxinú i̱ kuento i̱ ña̱ ni̱ ta̱xi̱ i̱ nuu̱ꞌ u̱nꞌ,
Tákuiꞌe Ndiosí,
te̱ na̱soko̱ꞌ i̱ ki̱tiꞌ nuu̱ꞌ u̱nꞌ xaꞌa̱ꞌ a̱ ña̱ taxiꞌ i̱ ña̱ tyi̱nda̱ni u̱nꞌ ña̱ ni̱ tyi̱ndi̱e̱eꞌ u̱nꞌ yuꞌu̱.
13 Sa̱kanꞌ ña̱ ni̱ sa̱kakú u̱nꞌ yuꞌu̱,
te̱ nï̱ xa̱ꞌni̱ꞌ te̱ yivi̱ꞌ yuꞌu̱,
te̱ nï̱ ta̱xi̱ tu̱ u̱nꞌ ndu̱va̱ i̱ nuu̱ꞌ i̱tyiꞌ u̱nꞌ.
Xaꞌa̱ꞌ a̱ ja̱a̱nꞌ na kuiiꞌ vi̱ti̱n ndii,
ku̱vi̱ ka̱ka̱ i̱ i̱tyiꞌ u̱nꞌ,
Tákuiꞌe Ndiosí,
ña̱ nduuꞌ nde̱e̱ naa ñuꞌu̱ ña̱ taxiꞌ kivi̱ꞌ ñu̱u̱ ne̱ yivi̱ꞌ.