Yoꞌoꞌ kaꞌán David xiinꞌ Ndiosí te̱ ka̱ꞌni̱ꞌ a̱ sa̱kuuꞌ te̱ ndasiꞌ taꞌanꞌ xiinꞌ ra̱
Ya̱a̱ ña̱ ni̱ xi̱ta̱ David ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ, ña̱ xitaꞌ te̱ yivi̱ꞌ kii̱ꞌ xandaaꞌ ra̱ ñuu̱ꞌ.
55
Tákuiꞌe Ndiosí,
sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ si̱u̱ꞌunꞌ ña̱ kaꞌán i̱ xiinꞌ u̱nꞌ,
te̱ ndä̱si̱ u̱nꞌ so̱ꞌo̱ u̱nꞌ te̱ ku̱ni̱ so̱ꞌo̱ u̱nꞌ ña̱ kaꞌán ndaꞌvi i̱ xiinꞌ u̱nꞌ.
2 Sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ ña̱ kaꞌán i̱ te̱ na̱ku̱i̱i̱n u̱nꞌ,
sa̱kanꞌ ña̱ kaꞌán tiꞌeꞌ i̱ si̱u̱ꞌunꞌ xiinꞌ u̱nꞌ,
te̱ ndiꞌni̱ va̱ nimá i̱.
3 Sa̱kanꞌ ña̱ yiꞌvi va̱ i̱ kii̱ꞌ xini so̱ꞌo̱ i̱ kuaaꞌ te̱ ndasiꞌ taꞌanꞌ xiinꞌ i̱
xiinꞌ xaꞌa̱ꞌ ña̱ sandoꞌoꞌ te̱ xaaꞌ ña̱ ni̱a̱ꞌa yuꞌu̱,
sa̱kanꞌ ña̱ yuꞌu̱ ni̱ sa̱taví ku̱a̱tyi̱ ra̱ xaꞌa̱ꞌ sa̱kuuꞌ ña̱ ni̱a̱ꞌa,
te̱ xiꞌé xa̱va̱ꞌa̱ ra̱,
te̱ ndikún ra̱ taxiꞌ ra̱ yuꞌu̱.
4 Te̱ kandetaꞌ ni̱nu̱ vi̱ꞌ nimá i̱ xaꞌa̱ꞌ a̱ ña̱ yiꞌvi xa̱va̱ꞌa̱ i̱,
te̱ xixi̱n vi̱ꞌ i̱i̱n ka̱niiꞌ ñu̱ꞌuꞌ ndeꞌi̱ i̱ xaꞌa̱ꞌ a̱ ña̱ yiꞌvi i̱ ka̱ꞌni̱ꞌ ra̱ yuꞌu̱.
5 Sa̱kanꞌ ña̱ ña̱ i̱yo̱ xiinꞌ ña̱ ndi̱e̱eꞌ va̱ kisiꞌ a̱ yuꞌu̱ ña̱ yivi̱ꞌ va̱ i̱ ndii,
xa̱ ni̱ ko̱ꞌni̱ a̱ i̱i̱n ka̱niiꞌ ku̱ñu̱ i̱,
te̱ ndi̱e̱eꞌ va̱ kisiꞌ a̱ yuꞌu̱ ña̱ yiꞌvi xa̱va̱ꞌa̱ i̱.
6 Te̱ xanini i̱ xiinꞌ nimá i̱ ndii:
“Naaꞌ sa̱kanꞌ te̱ yoo ndi̱xi̱n i̱ nde̱e̱ naa ko̱ku̱i̱i̱ ndii,
ku̱ta̱ꞌnu̱ i̱ te̱ kuꞌu̱n i̱ nde̱e̱ miiꞌ ku̱vi̱ na̱ndiee̱ꞌ i̱.
7 Ku̱ta̱ꞌnu̱ i̱ te̱ kuꞌu̱n xikaꞌ i̱ nde̱e̱ miiꞌ taxi̱nꞌ kaaꞌ xikaꞌ va̱,
te̱ ku̱nduꞌu̱ꞌ i̱ nde̱e̱ miiꞌ i̱tyi kaaꞌ.
Selah
8 Yatyi̱ va̱ ku̱nu̱ i̱ te̱ na̱ndu̱kuꞌ kiꞌi̱ꞌ i̱ miiꞌ ku̱vi̱ kaku̱ i̱ nda̱ꞌaꞌ ne̱ ndasiꞌ yuꞌu̱ ja̱a̱nꞌ,
ne̱ nduuꞌ nde̱e̱ naa tatyi̱ꞌ ndi̱e̱eꞌ kii̱ꞌ kuunꞌ kuiꞌe̱ savi̱ꞌ.”
9 Tákuiꞌe,
sa̱a̱ u̱nꞌ ña̱ va̱ꞌa̱ te̱ ka̱ꞌni̱ꞌ u̱nꞌ sa̱kuuꞌ te̱ ndasiꞌ taꞌanꞌ xiinꞌ i̱ ja̱a̱nꞌ,
te̱ sa̱a̱ ku̱u̱ tiati̱a̱ tu̱ u̱nꞌ sa̱kuuꞌ ra̱ te̱ xïnu̱ ña̱ tyituní ra̱ sa̱a̱ ra̱ xiinꞌ i̱,
sa̱kanꞌ ña̱ xa̱ mi̱iꞌ ndiꞌiꞌ ña̱ xaꞌni̱ꞌ taꞌanꞌ ne̱ yivi̱ꞌ xiinꞌ ña̱ kuntaꞌanꞌ ni̱a̱ yoo sa̱a̱ kuaꞌa̱n i̱i̱n ka̱niiꞌ ñu̱u̱ i̱.
10 Ndu̱viꞌ xiinꞌ niiꞌ ñu̱u xinundu̱u̱ ña̱ ni̱a̱ꞌa ja̱a̱nꞌ nuu̱ꞌ nama̱ ña̱ ndasi i̱ꞌnu̱ ñu̱u̱ ja̱a̱nꞌ,
te̱ ti̱xi̱n nama̱ ja̱a̱nꞌ ndii,
xa̱ mi̱iꞌ ndiꞌiꞌ ña̱ ni̱a̱ꞌa xiinꞌ ña̱ i̱yo̱ ku̱i̱ti̱ꞌ yoo.
11 Te̱ sa̱kuuꞌ ya̱ꞌya̱ ñu̱u̱ ja̱a̱nꞌ ndii,
xa̱ mi̱iꞌ ndiꞌiꞌ ña̱ ni̱a̱ꞌa yoo,
te̱ ne̱ yivi̱ꞌ ndii,
xa̱ nuu̱ꞌ xini xaꞌanꞌ taꞌanꞌ ni̱a̱,
te̱ mi̱iꞌ ndiꞌiꞌ tu̱n vixi̱ ndatuꞌunꞌ ni̱a̱ xaꞌa̱ꞌ ne̱ yivi̱ꞌ i̱i̱n ka̱niiꞌ ñu̱u̱ ja̱a̱nꞌ.
12 Naaꞌ sa̱kanꞌ te̱ i̱i̱n te̱ ndasiꞌ taꞌanꞌ xiinꞌ i̱ nduuꞌ te̱ kani̱a̱ꞌa xiinꞌ i̱ ndii,
ku̱ndi̱e̱ni i̱,
te̱ naaꞌ sa̱kanꞌ te̱ i̱i̱n te̱ ndasiꞌ yuꞌu̱ nduuꞌ te̱ kuni ka̱ꞌni̱ꞌ yuꞌu̱ ndii,
ku̱vi̱ ti̱si̱ꞌe i̱ nuu̱ꞌ ra̱.
13 Ndisu̱ yoꞌó nduuꞌ te̱ kuni ka̱ꞌni̱ꞌ yuꞌu̱,
yoꞌó,
te̱ yivi̱ꞌ,
te̱ ndaꞌvi so̱ꞌo̱ nde̱e̱ naa yuꞌu̱,
te̱ ndiakaꞌ taꞌanꞌ kutu̱ꞌ xiinꞌ i̱ nde̱e̱ naa ña̱ni̱ mi̱iꞌ i̱,
yoꞌó,
te̱ xiní taꞌanꞌ xiinꞌ i̱,
te̱ i̱ni̱ i̱ xini i̱.
14 Sa̱a̱ ni̱ kuaꞌa̱ꞌ kivi̱ꞌ ni̱ nda̱tuꞌunꞌ nuu̱ꞌ taꞌanꞌ e̱ꞌ ña̱ ndoꞌoꞌ i̱ꞌi̱n e̱ꞌ,
te̱ va̱ꞌa̱ ni̱ ndiaka̱ taꞌanꞌ e̱ꞌ kii̱ꞌ kuaꞌa̱n ingaꞌ e̱ꞌ vi̱ꞌe̱ Ndiosí.
15 Xa̱ va̱ꞌa̱ na sa̱kanꞌ te̱ i̱i̱n xaa̱ kiꞌi̱ꞌ ku̱i̱ti̱ꞌ ña̱ ku̱vi̱ sa̱kuuꞌ te̱ ndasiꞌ taꞌanꞌ xiinꞌ i̱ ja̱a̱nꞌ,
te̱ xa̱va̱ꞌa̱ na sa̱kanꞌ te̱ nuni̱a̱ꞌ ñu̱ꞌuꞌ te̱ koyo̱ tiaku ra̱ ti̱xi̱n a̱,
sa̱kanꞌ ña̱ xa̱ mi̱iꞌ ndiꞌiꞌ ña̱ ni̱a̱ꞌa ñuꞌuꞌ nimá ra̱.
16 Ndisu̱ yuꞌu̱ ndii,
kaꞌa̱n i̱ xiinꞌ Tákuiꞌe Yahvé te̱ sa̱kakú a̱ yuꞌu̱.
17 Xa̱kuaa̱ꞌ,
ni̱a̱ꞌa̱,
xiinꞌ i̱i̱n keꞌinꞌ kaꞌa̱n tiꞌeꞌ i̱ si̱u̱ꞌunꞌ nuu̱ꞌ Ndiosí,
te̱ ku̱ni̱ so̱ꞌo̱ a̱ si̱u̱ꞌunꞌ ña̱ kaꞌa̱n i̱ xiinꞌ a̱ ja̱a̱nꞌ.
18 Mi̱iꞌ ña̱ ja̱a̱nꞌ tya̱ꞌvi̱ xaꞌa̱ꞌ i̱ te̱ xta̱ꞌniꞌ a̱ yuꞌu̱ nuu̱ꞌ tu̱ndoꞌo̱ꞌ ja̱a̱nꞌ,
te̱ sa̱kakú mani̱ꞌ a̱ yuꞌu̱ nuu̱ꞌ ña̱ kuni ka̱ꞌni̱ꞌ te̱ yivi̱ꞌ yuꞌu̱,
tee̱ꞌ ndee kuaꞌa̱ꞌ xa̱va̱ꞌa̱ te̱ yivi̱ꞌ kuntaꞌanꞌ xiinꞌ i̱.
19 Ku̱ni̱ so̱ꞌo̱ Ndiosí,
ña̱ xaꞌndia tyuunꞌ nde̱e̱ ndiꞌiꞌ ni̱ kivi̱ꞌ,
si̱u̱ꞌunꞌ ña̱ kaꞌán i̱ xiinꞌ a̱,
te̱ sa̱ndoꞌoꞌ uꞌvi̱ a̱ sa̱kuuꞌ ra̱.
Sa̱kanꞌ ña̱ te̱ ndasiꞌ taꞌanꞌ xiinꞌ i̱ ja̱a̱nꞌ ndii,
xïinꞌ ra̱ na̱ma̱ ra̱ nimá ra̱,
te̱ na̱ma̱ tu̱ ra̱ ña̱ xaaꞌ ra̱,
sa̱kanꞌ ña̱ yïꞌvi ra̱ Ndiosí.
Selah
20 Te̱ yivi̱ꞌ ja̱a̱nꞌ ndii,
ni̱ ti̱i̱n sikiꞌ ra̱ te̱ ndiakaꞌ taꞌanꞌ kutu̱ꞌ xiinꞌ ra̱,
te̱ nï̱ sa̱xinú ra̱ kuento ña̱ ni̱ ndoo̱ ra̱ xiinꞌ te̱ ja̱a̱nꞌ.
21 Te̱ kii̱ꞌ ndatuꞌunꞌ ra̱ ndii,
vi̱ta va̱ kaꞌán ra̱,
te̱ nduuꞌ kuento ra̱ nde̱e̱ naa keso u̱ꞌva̱,
ndisu̱ xini xaꞌanꞌ ku̱i̱ti̱ꞌ ra̱,
sa̱kanꞌ ña̱ nimá ra̱ ndii,
xa̱ nuu̱ꞌ xaꞌa̱ꞌ ña̱ ku̱ntaꞌanꞌ ra̱ xanini ra̱.
Kii̱ꞌ ndatuꞌunꞌ ra̱ ndii,
nda̱tu̱nꞌ va̱ ndatuꞌunꞌ ra̱,
te̱ nduuꞌ kuento ra̱ nde̱e̱ naa xa̱ꞌa̱n xavixínꞌ,
ndisu̱ ña̱ nda̱tu̱nꞌ kaꞌán ra̱ ndii,
ña̱ sikiꞌ ku̱i̱ti̱ꞌ nduuꞌ a̱,
sa̱kanꞌ ña̱ nduuꞌ kuento ra̱ nde̱e̱ naa ityi̱ ña̱ köo̱ꞌ i̱i̱nꞌ naá.
22 Nda̱ꞌaꞌ Yahvé sa̱na̱kuaꞌa u̱nꞌ tu̱ndoꞌo̱ꞌ ña̱ yoo nuu̱ꞌ u̱nꞌ,
te̱ ña̱ ja̱a̱nꞌ ko̱to̱ yoꞌó.
Sa̱kanꞌ ña̱ tä̱xi̱ ña̱ ja̱a̱nꞌ koyo̱ ne̱ xatyuunꞌ nda̱ku nuu̱ꞌ tu̱ndoꞌo̱ꞌ,
te̱ köo̱ꞌ kivi̱ꞌ ka̱ ndo̱koo̱ ni̱a̱.
23 Ndisu̱ yoꞌó,
Tákuiꞌe Ndiosí ndii,
ko̱ꞌni̱ u̱nꞌ ne̱ xaaꞌ ña̱ ni̱a̱ꞌa ti̱xi̱n yavi̱ ndi̱i̱ miiꞌ ndo̱ñuꞌuꞌ xa̱tyiꞌ ni̱a̱.
Ne̱ yivi̱ꞌ,
ne̱ xaꞌni̱ꞌ,
xiinꞌ ne̱ xini xaꞌanꞌ ndii,
yatyi̱ va̱ ku̱vi̱ ni̱a̱,
ndisu̱ yuꞌu̱ ndii,
i̱ni̱ i̱ xini i̱ yoꞌó ña̱ sa̱kakú u̱nꞌ yuꞌu̱.