Yoꞌoꞌ kaꞌán David xiinꞌ Ndiosí te̱ ko̱to̱ ña̱ꞌaꞌ a̱
Ya̱a̱ ña̱ ni̱ xi̱ta̱ David ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ kii̱ꞌ ni̱ xa̱a̱ te̱ vi̱ꞌe̱ Zif, te̱ ni̱ kaꞌa̱n ra̱ xiinꞌ Saúl ndii: “Xiní ndu̱ ña̱ nuu̱ꞌ ñu̱ꞌuꞌ e̱ꞌ yoꞌoꞌ naá si̱ꞌe David”, ni̱ katyi̱ ra̱.
54
Tákuiꞌe Ndiosí,
ña̱ ndi̱e̱eꞌ kooꞌ tyukuuꞌ,
sa̱a̱ u̱nꞌ ña̱ va̱ꞌa̱ te̱ ki̱xi̱n sa̱kakú u̱nꞌ yuꞌu̱,
te̱ xiinꞌ ña̱ ndi̱e̱eꞌ u̱nꞌ ja̱a̱nꞌ tu̱ na̱kaꞌa̱n u̱nꞌ xaꞌa̱ꞌ i̱.
2 Tákuiꞌe Ndiosí,
sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ si̱u̱ꞌunꞌ ña̱ kaꞌán i̱ xiinꞌ u̱nꞌ,
te̱ sa̱xinú u̱nꞌ ña̱ kaꞌán ndaꞌvi i̱ xiinꞌ u̱nꞌ.
3 Sa̱kanꞌ ña̱ ne̱ yivi̱ꞌ,
ne̱ sikiꞌ,
nakuitá teiꞌ nuu̱ꞌ i̱,
te̱ ne̱ kuni ka̱ꞌni̱ꞌ yuꞌu̱ ja̱a̱nꞌ ndii,
ne̱ kuiꞌe̱ va̱ nduuꞌ ni̱a̱,
te̱ nde̱e̱ siee xäaꞌ ne̱ ja̱a̱nꞌ kuenta kuuꞌ yoꞌó,
Tákuiꞌe Ndiosí.
Selah
4 Ndisu̱ yoꞌó,
Tákuiꞌe Ndiosí ña̱ xakaꞌnuꞌ i̱,
nduuꞌ ña̱ tyindieeꞌ yuꞌu̱,
te̱ yoꞌó,
Xto̱ꞌo̱ i̱,
nduuꞌ tu̱ ña̱ xitoꞌ kivi̱ꞌ ñu̱u̱ i̱,
te̱ kä̱ꞌni̱ꞌ te̱ yivi̱ꞌ ja̱a̱nꞌ yuꞌu̱.
5 Te̱ ña̱ ni̱a̱ꞌa,
ña̱ tyituní te̱ ndasiꞌ taꞌanꞌ xiinꞌ i̱ ja̱a̱nꞌ sa̱a̱ ra̱ xiinꞌ i̱ ndii,
sa̱na̱ndikoꞌ u̱nꞌ ku̱ndo̱ꞌo̱ mi̱iꞌ ra̱,
te̱ xaꞌa̱ꞌ a̱ ña̱ ña̱ xatyuunꞌ nda̱ku nduuꞌ u̱nꞌ ndii,
ka̱ꞌni̱ꞌ kiꞌi̱ꞌ u̱nꞌ sa̱kuuꞌ ra̱.
6 Te̱ yuꞌu̱ ndii,
xaꞌa̱ꞌ a̱ ña̱ kaꞌán nimá mi̱iꞌ i̱,
te̱ na̱soko̱ꞌ i̱ ki̱tiꞌ nuu̱ꞌ u̱nꞌ,
te̱ sa̱kaꞌnuꞌ i̱ yoꞌó,
Tákuiꞌe Yahvé,
ña̱ ndi̱e̱eꞌ kooꞌ tyukuuꞌ,
sa̱kanꞌ ña̱ ña̱ ja̱a̱nꞌ nduuꞌ ña̱ xataꞌa̱n sa̱a̱ i̱.
7 Ku̱a̱tyi̱ ndii,
sa̱kakú u̱nꞌ yuꞌu̱ nuu̱ꞌ sa̱kuuꞌ ña̱ ndoꞌoꞌ i̱,
te̱ tyi̱ndi̱e̱eꞌ tu̱ u̱nꞌ yuꞌu̱,
te̱ ka̱nandoo i̱ sa̱kuuꞌ te̱ ndasiꞌ taꞌanꞌ xiinꞌ i̱ ja̱a̱nꞌ.