Köo̱ꞌ Ndiosí yoo katyi ne̱ yivi̱ꞌ, ne̱ xaaꞌ ña̱ ni̱a̱ꞌa
Ya̱a̱ ña̱ ni̱ xi̱ta̱ David ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ, ña̱ kaꞌán xaꞌa̱ꞌ i̱i̱n te̱ naniꞌ Mahalat.
53
Te̱ yivi̱ꞌ,
te̱ küuꞌ kaxiꞌ kaꞌán xiinꞌ nimá ra̱ ndii:
“Köo̱ꞌ Ndiosí yoo vi̱ꞌ”,
katyi ra̱.
Xa̱ ni̱ sa̱tíviꞌ xiinꞌ miiꞌ sa̱kuuꞌ ra̱,
te̱ ndee xa̱ nuu̱ꞌ ña̱ ni̱a̱ꞌa xaaꞌ ra̱,
te̱ nde̱e̱ i̱i̱n ra̱ xäaꞌ ka̱ ña̱ va̱ꞌa̱.
2 Ndiosí ndii,
nde̱e̱ ndi̱viꞌ nduꞌu̱ꞌ a̱ te̱ xitoꞌ ndo̱so̱ꞌ a̱ ña̱ xaaꞌ sa̱kuuꞌ ne̱ yivi̱ꞌ i̱i̱n yivi̱ꞌ,
xitoꞌ a̱ te̱ ku̱ni̱ a̱ naaꞌ yoo na sa̱va̱ ne̱ xini tuní xna̱ꞌa̱,
te̱ na̱ndu̱kuꞌ ni̱a̱ Ndiosí.
3 Ndisu̱ köo̱ꞌ nde̱e̱ i̱i̱n nda̱a̱ꞌ ni̱a̱ ni̱ xini a̱,
sa̱kanꞌ ña̱ sa̱kuuꞌ ni̱a̱ ni̱ ki̱e̱e̱ nuu̱ꞌ i̱tyiꞌ a̱,
te̱ ni̱ sa̱tíviꞌ xiinꞌ miiꞌ ni̱a̱,
te̱ köo̱ꞌ ka̱ ne̱ xaaꞌ ña̱ va̱ꞌa̱,
köo̱ꞌ ka̱ nde̱e̱ i̱i̱n nda̱a̱ꞌ tilu̱ꞌ ni̱a̱.
4 ¿Ñáá köo̱ꞌ kivi̱ꞌ ka̱ tu̱ na̱ka̱ni̱ni̱ va̱ꞌa̱ sa̱kuuꞌ ne̱ xaaꞌ ña̱ ni̱a̱ꞌa kaa̱ꞌ?
Xaxi̱ꞌ ni̱a̱ sa̱kuuꞌ ne̱ nduuꞌ kuenta i̱ nde̱e̱ naa xaaꞌ ne̱ yivi̱ꞌ kii̱ꞌ xixiꞌ ni̱a̱ xita̱ꞌ.
Te̱ köo̱ꞌ kivi̱ꞌ kaꞌán ni̱a̱ xiinꞌ Ndiosí.
5 Ne̱ ja̱a̱nꞌ ndii,
ku̱yi̱ꞌvi va̱ ni̱a̱ sa̱a̱ ña̱ i̱yo̱ ña̱ köo̱ꞌ kivi̱ꞌ ni̱ ndo̱ꞌo̱ xa̱tyiꞌ ni̱a̱ tee̱ꞌ ndee köo̱ꞌ nde̱e̱ i̱i̱n xaꞌa̱ꞌ.
Sa̱kanꞌ ña̱ ki̱ku̱ꞌ ndo̱o̱ a̱ i̱kiꞌ ne̱ ndasiꞌ taꞌanꞌ xiinꞌ ndo̱ꞌ ja̱a̱nꞌ,
te̱ sa̱kaꞌanꞌ ña̱ꞌaꞌ ndo̱ꞌ,
sa̱kanꞌ ña̱ mi̱iꞌ Ndiosí ni̱ sa̱xi̱o̱o̱ ña̱ꞌaꞌ.
6 Xa̱ va̱ꞌa̱ naaꞌ so̱ꞌo̱ te̱ ki̱e̱e̱ ña̱ sa̱kakú ne̱ vi̱ꞌe̱ Israel xíniꞌ i̱kuꞌ Sión,
te̱ ki̱xi̱n sa̱kakú kiꞌi̱ꞌ ña̱ꞌaꞌ a̱.
Kii̱ꞌ sa̱ndoó ndiká Yahvé sa̱kuuꞌ ne̱ nduuꞌ kuenta a̱ ndii,
va̱ꞌa̱ yaꞌa̱ ku̱ni̱ sa̱kuuꞌ yooꞌ,
ne̱ vi̱ꞌe̱ Israel,
ne̱ nduuꞌ si̱a̱niꞌ xikaꞌ Jacob.