Yoꞌoꞌ kaꞌán a̱ xaꞌa̱ꞌ ña̱ ku̱ndo̱ꞌo̱ ne̱ xaaꞌ ña̱ ni̱a̱ꞌa
Ya̱a̱ ña̱ ni̱ xi̱ta̱ David ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ kii̱ꞌ ni̱ ki̱xi̱n Doeg, te̱ ni̱ ki̱e̱e̱ nuu̱ꞌ ñu̱ꞌuꞌ Edom, te̱ ni̱ kaꞌa̱n ra̱ xiinꞌ Saúl ndii: “Ni̱ ki̱xi̱n David vi̱ꞌe̱ Ahimelec”, ni̱ katyi̱ ra̱.
52
Yoꞌó,
te̱ kaꞌnuꞌ,
¿ndiotyun na kaꞌán ñuñuꞌ u̱nꞌ,
te̱ xateiꞌ va̱ u̱nꞌ xaꞌa̱ꞌ ña̱ ni̱a̱ꞌa ña̱ xaaꞌ u̱nꞌ?
¿Tee̱ꞌ xanini u̱nꞌ ña̱ ña̱ kuvita i̱ni̱ Ndiosí xaꞌa̱ꞌ ne̱ yivi̱ꞌ ndii,
i̱ꞌi̱n kivi̱ꞌ kuaꞌa̱n yoo a̱,
ndisu̱ xini a̱ sa̱kuuꞌ ña̱ ni̱a̱ꞌa ña̱ xaaꞌ u̱nꞌ?
2 Te̱ yoꞌó ndii,
xa̱nuu̱ꞌ xaꞌa̱ꞌ ña̱ ka̱ꞌni̱ꞌ u̱nꞌ ne̱ yivi̱ꞌ ku̱i̱ti̱ꞌ xanini u̱nꞌ,
te̱ yaa̱ꞌ u̱nꞌ ndii,
nduuꞌ a̱ nde̱e̱ naa i̱i̱n tyilo ña̱ xíinꞌ va̱,
sa̱kanꞌ ña̱ tyu̱u̱n va̱ u̱nꞌ ku̱ni̱ xaꞌanꞌ u̱nꞌ.
3 Xtani̱ ka̱ u̱nꞌ sa̱a̱ u̱nꞌ ña̱ ni̱a̱ꞌa te̱ sa̱kanꞌ ña̱ sa̱a̱ u̱nꞌ ña̱ va̱ꞌa̱,
te̱ xtani̱ ka̱ u̱nꞌ kaꞌa̱n u̱nꞌ tu̱n vixi̱ te̱ sa̱kanꞌ ña̱ kaꞌa̱n u̱nꞌ ña̱ ndi̱xa̱.
Selah
4 Xtani̱ va̱ u̱nꞌ sa̱tu̱xuꞌví u̱nꞌ ne̱ yivi̱ꞌ xiinꞌ ña̱ kani̱a̱ꞌa u̱nꞌ.
I̱i̱n te̱ vixi̱ xa̱va̱ꞌa̱ nduuꞌ u̱nꞌ.
5 Sa̱kanꞌ na kuiiꞌ ka̱ꞌni̱ꞌ xa̱tyiꞌ Ndiosí yoꞌó nde̱e̱ ndiꞌiꞌ ni̱ kivi̱ꞌ,
te̱ xta̱ꞌniꞌ xa̱tyiꞌ tu̱ a̱ yoꞌó vi̱ꞌe̱ u̱nꞌ,
te̱ sa̱nduxín xa̱tyiꞌ a̱ yoꞌó nuu̱ꞌ ñu̱ꞌuꞌ i̱i̱n yivi̱ꞌ miiꞌ ndieeꞌ ne̱ yivi̱ꞌ.
Selah
6 Te̱ ku̱ni̱ sa̱kuuꞌ ne̱ xatyuunꞌ nda̱ku sa̱kuuꞌ ña̱ ku̱ndo̱ꞌo̱ te̱ ja̱a̱nꞌ,
te̱ ku̱yi̱ꞌvi va̱ ni̱a̱,
te̱ kuaku̱ ndi̱a̱a̱ ña̱ꞌaꞌ ni̱a̱,
kaꞌán ni̱a̱ ndii:
7 “Ko̱to̱ ndo̱ꞌ,
te̱ yivi̱ꞌ kaa̱ꞌ nduuꞌ te̱ ni̱ xa̱a̱ sa̱kuuꞌ nuu̱ꞌ ña̱ ni̱a̱ꞌa,
te̱ nï̱ na̱ndu̱kuꞌ ra̱ Ndiosí te̱ ta̱xi̱ a̱ ndi̱e̱e̱ꞌ ra̱,
süu̱ꞌ ja̱a̱nꞌ ndii,
ña̱ kuaꞌa̱ꞌ ña̱ vikaꞌ ku̱i̱ti̱ꞌ ra̱ ni̱ i̱ni̱ ra̱ xini ra̱,
te̱ köo̱ꞌ kivi̱ꞌ ni̱ na̱ko̱o̱ ra̱ ña̱ xaaꞌ ra̱ ña̱ ni̱a̱ꞌa ja̱a̱nꞌ”,
katyi̱ ni̱a̱.
8 Ndisu̱ yuꞌu̱ ndii,
vi̱ꞌe̱ Ndiosí nduꞌu̱ꞌ i̱,
te̱ nduuꞌ i̱ nde̱e̱ naa i̱i̱n tunꞌ olivo,
tunꞌ kuii̱ꞌ va̱ yuku̱,
te̱ i̱ni̱ ku̱ni̱ i̱ ña̱ kuvita i̱ni̱ a̱ xaꞌa̱ꞌ i̱ nde̱e̱ ndiꞌiꞌ ni̱ kivi̱ꞌ,
te̱ nde̱e̱ a̱ma̱ ka̱ ni̱.
9 Tákuiꞌe Ndiosí,
sa̱kaꞌnuꞌ i̱ yoꞌó ndee ndiꞌiꞌ ni̱ kivi̱ꞌ xaꞌa̱ꞌ sa̱kuuꞌ ña̱ ni̱ xa̱a̱ u̱nꞌ ja̱a̱nꞌ,
te̱ kaꞌa̱n ndo̱so̱ꞌ i̱ nuu̱ꞌ sa̱kuuꞌ ne̱ nduuꞌ kuenta u̱nꞌ ña̱ i̱ni̱ i̱ xini i̱ yoꞌó.