Yoꞌoꞌ naꞌmá David ku̱a̱tyi̱ ra̱ nuu̱ꞌ Ndiosí te̱ ko̱o̱ kaꞌnuꞌ i̱ni̱ a̱ xaꞌa̱ꞌ ra̱
Ya̱a̱ ña̱ ni̱ xi̱ta̱ David ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ kii̱ꞌ ndi̱ꞌi̱ ni̱ xa̱a̱ ra̱ ku̱a̱tyi̱ ña̱ ni̱ kixi̱n ra̱ xiinꞌ Betsabé. Kii̱ꞌ ni̱ ki̱xi̱n te̱ kaꞌán tiakú tu̱ꞌu̱n Ndiosí, te̱ naniꞌ Natán, te̱ ni̱ ka̱ni̱ kuento ña̱ꞌaꞌ ra̱.
51
Tákuiꞌe Ndiosí,
sa̱a̱ u̱nꞌ ña̱ va̱ꞌa̱ te̱ ku̱vi̱ta i̱ni̱ u̱nꞌ xaꞌa̱ꞌ i̱ xaꞌa̱ꞌ a̱ ña̱ ndani̱ va̱ u̱nꞌ yuꞌu̱,
te̱ xaꞌa̱ꞌ a̱ ña̱ kuvita va̱ i̱ni̱ u̱nꞌ xaꞌa̱ꞌ i̱ ndii,
sa̱a̱ u̱nꞌ ña̱ va̱ꞌa̱ te̱ ko̱o̱ kaꞌnuꞌ i̱ni̱ u̱nꞌ xaꞌa̱ꞌ ku̱a̱tyi̱ i̱.
2 Na̱ti̱a̱ u̱nꞌ nimá i̱ nde̱e̱ ki̱e̱e̱ sa̱kuuꞌ ña̱ ni̱a̱ꞌa ña̱ ñuꞌuꞌ ti̱xi̱n a̱,
te̱ sa̱ndoyoꞌ u̱nꞌ sa̱kuuꞌ ku̱a̱tyi̱ i̱.
3 Sa̱kanꞌ ña̱ xiní i̱ ña̱ te̱ xaaꞌ ku̱a̱tyi̱ nduuꞌ i̱,
te̱ sa̱a̱ kivi̱ꞌ nakaꞌanꞌ i̱ xaꞌa̱ꞌ ku̱a̱tyi̱ i̱ ja̱a̱nꞌ.
4 I̱i̱n nda̱a̱ꞌ yoꞌó ku̱i̱ti̱ꞌ ni̱ sa̱tu̱xuꞌví nimá kii̱ꞌ ni̱ xa̱a̱ i̱ ku̱a̱tyi̱,
te̱ ni̱ xi̱ni̱ ndu̱tyiꞌ nuu̱ꞌ u̱nꞌ ña̱ ni̱a̱ꞌa ña̱ ni̱ xa̱a̱ i̱ ja̱a̱nꞌ.
Sa̱kanꞌ na kuiiꞌ ña̱ katunꞌ u̱nꞌ yuꞌu̱ xaꞌa̱ꞌ kaa̱ꞌ vi̱ti̱n ndii,
kumiꞌ u̱nꞌ ña̱ nda̱ku kii̱ꞌ xaaꞌ u̱nꞌ sa̱kanꞌ,
te̱ ña̱ katunꞌ u̱nꞌ yuꞌu̱ ndii,
ña̱ nda̱ku nduuꞌ a̱.
5 Ko̱to̱ u̱nꞌ,
yuꞌu̱ ndii,
xa̱ te̱ ndisoꞌ ku̱a̱tyi̱ nduuꞌ i̱ nde̱e̱ kii̱ꞌ ni̱ tuvi̱ i̱,
te̱ nde̱e̱ kii̱ꞌ ni̱ na̱ku̱i̱so̱ si̱ꞌiꞌ i̱ yuꞌu̱ ndii,
xa̱ te̱ ndisoꞌ ku̱a̱tyi̱ nduuꞌ i̱.
6 Ndisu̱ yoꞌó ndii,
kuní u̱nꞌ ña̱ sa̱a̱ i̱ ña̱ nda̱ku ña̱ ku̱a̱xi̱ nde̱e̱ ma̱aꞌ ti̱xi̱n nimá i̱,
te̱ nde̱e̱ ti̱xi̱n nimá i̱ ja̱a̱nꞌ ni̱ ta̱xi̱ u̱nꞌ ña̱ xini tuní nuu̱ꞌ i̱.
7 Ko̱ndi̱a̱ liki̱nꞌ u̱nꞌ ti̱kui yuꞌu̱ xiinꞌ yuku̱ tunꞌ hisopo,
te̱ ndu̱ndo̱o̱ xa̱tyiꞌ sa̱kuuꞌ ku̱a̱tyi̱ i̱.
Na̱ti̱a̱ nimá i̱ te̱ ndu̱ya̱a̱ a̱ nde̱e̱ naa iꞌinꞌ.
8 Sa̱a̱ u̱nꞌ ña̱ va̱ꞌa̱ te̱ sa̱na̱ndikoꞌ u̱nꞌ ña̱ va̱ꞌa̱ kuni i̱,
te̱ sa̱na̱ndikoꞌ tu̱ u̱nꞌ ña̱ sii̱ꞌ kuni nimá i̱,
te̱ na̱ku̱naa̱ na ndi̱e̱e̱ꞌ ñu̱ꞌuꞌ ndeꞌi̱ i̱ yoꞌoꞌ ña̱ ni̱ sa̱ndoꞌoꞌ va̱ u̱nꞌ.
9 Sa̱a̱ u̱nꞌ ña̱ va̱ꞌa̱ te̱ kö̱to̱ ka̱ u̱nꞌ ku̱a̱tyi̱ ña̱ ni̱ xa̱a̱ i̱ ja̱a̱nꞌ,
te̱ sa̱ndoyoꞌ u̱nꞌ sa̱kuuꞌ ña̱ ni̱a̱ꞌa ña̱ ñuꞌuꞌ nimá i̱.
10 Tákuiꞌe Ndiosí,
sa̱a̱ u̱nꞌ ña̱ va̱ꞌa̱ te̱ nda̱sa̱ xa̱aꞌ u̱nꞌ nimá i̱,
te̱ nda̱tu̱nꞌ ko̱o̱ a̱,
te̱ nda̱sa̱ xa̱aꞌ u̱nꞌ espíritu va̱ꞌa̱ ti̱xi̱n nimá i̱,
te̱ ka̱ka̱ nda̱ku i̱ i̱tyiꞌ u̱nꞌ.
11 Sä̱xi̱o̱o̱ u̱nꞌ yuꞌu̱ nuu̱ꞌ u̱nꞌ,
te̱ ni̱ nde̱e̱ xtä̱ꞌniꞌ tu̱ u̱nꞌ Espíritu su̱ꞌu̱n ña̱ naá nimá i̱.
12 Sa̱a̱ u̱nꞌ ña̱ va̱ꞌa̱ te̱ sa̱na̱ndikoꞌ u̱nꞌ ña̱ sii̱ꞌ kuni nimá i̱ ña̱ ni̱ sa̱kakú u̱nꞌ yuꞌu̱,
te̱ sa̱a̱ tu̱ u̱nꞌ ña̱ va̱ꞌa̱ te̱ ta̱xi̱ u̱nꞌ ña̱ ndi̱e̱eꞌ xiinꞌ ña̱ kaꞌán nimá i̱ te̱ sa̱xinú i̱ sa̱kuuꞌ ña̱ kaꞌán u̱nꞌ xiinꞌ i̱.
13 Te̱ sa̱niaꞌá i̱ i̱tyiꞌ u̱nꞌ nuu̱ꞌ ne̱ xaaꞌ ña̱ ni̱a̱ꞌa,
te̱ na̱ma̱ ne̱ xaaꞌ ku̱a̱tyi̱ nimá ni̱a̱ te̱ sa̱a̱ ni̱a̱ ña̱ kuní u̱nꞌ.
14 Tákuiꞌe Ndiosí,
yoꞌó ña̱ sakakú yuꞌu̱,
sa̱a̱ u̱nꞌ ña̱ va̱ꞌa̱ te̱ ko̱o̱ kaꞌnuꞌ i̱ni̱ u̱nꞌ xaꞌa̱ꞌ i̱ xaꞌa̱ꞌ a̱ ña̱ ni̱ xa̱ꞌni̱ꞌ i̱ te̱ yivi̱ꞌ,
sa̱kanꞌ te̱ ka̱ta̱ sii̱ꞌ i̱ ya̱a̱ nuu̱ꞌ u̱nꞌ xaꞌa̱ꞌ ña̱ ni̱ sa̱kakú u̱nꞌ yuꞌu̱.
15 Tákuiꞌe,
sa̱a̱ u̱nꞌ ña̱ va̱ꞌa̱ te̱ nu̱niaꞌ u̱nꞌ yu̱ꞌuꞌ i̱,
sa̱kanꞌ te̱ ka̱ta̱ i̱ ya̱a̱ nuu̱ꞌ u̱nꞌ ña̱ xakaꞌnuꞌ i̱ yoꞌó.
16 Sa̱kanꞌ ña̱ küní u̱nꞌ ña̱ na̱soko̱ꞌ i̱ níiꞌ ki̱tiꞌ nuu̱ꞌ u̱nꞌ,
ni̱ nde̱e̱ küní tu̱ u̱nꞌ ña̱ ka̱ꞌmi̱ i̱ ki̱tiꞌ ja̱a̱nꞌ nuu̱ꞌ u̱nꞌ,
na sa̱kanꞌ te̱ kuní u̱nꞌ na̱soko̱ꞌ i̱ tiꞌ ja̱a̱nꞌ ndii,
va̱ꞌa̱ yaꞌa̱ kuni i̱ te̱ na̱soko̱ꞌ i̱ riꞌ nuu̱ꞌ u̱nꞌ.
17 Tákuiꞌe Ndiosí,
ña̱ nasoko̱ꞌ ña̱ xtani̱ yoꞌó ndii,
ne̱ yivi̱ꞌ,
ne̱ sutyiꞌ xa̱va̱ꞌa̱ i̱ni̱ nuu̱ꞌ yoꞌó ña̱ yoo kuaꞌa̱ꞌ va̱ ku̱a̱tyi̱ ni̱a̱,
nduuꞌ a̱,
te̱ yoꞌó ndii,
säxiooꞌ u̱nꞌ ne̱ yivi̱ꞌ,
ne̱ ndaꞌvi va̱ kuuꞌ nimá te̱ ku̱a̱xi̱ ni̱a̱ nuu̱ꞌ u̱nꞌ,
xaꞌa̱ꞌ a̱ ña̱ kuni na̱ko̱o̱ ni̱a̱ ña̱ ni̱a̱ꞌa ña̱ xaaꞌ ni̱a̱,
te̱ na̱ma̱ ni̱a̱ nimá ni̱a̱.
18 Sa̱a̱ u̱nꞌ ña̱ va̱ꞌa̱ te̱ tyi̱ndi̱e̱eꞌ u̱nꞌ ñu̱u̱ Sión xaꞌa̱ꞌ a̱ ña̱ va̱ꞌa̱ nimá u̱nꞌ,
te̱ na̱ka̱sa̱ꞌa̱ xa̱aꞌ u̱nꞌ nama̱ ña̱ ndasiꞌ i̱ꞌnu̱ xi̱i̱nꞌ a̱.
19 Te̱ kii̱ꞌ sa̱kanꞌ ndii,
tu̱ku̱ ni̱ sa̱kanꞌ na̱ti̱i̱n va̱ꞌa̱ u̱nꞌ ña̱ na̱soko̱ꞌ ne̱ yivi̱ꞌ ña̱ꞌa̱ nuu̱ꞌ u̱nꞌ xiinꞌ nimá nda̱ku,
te̱ na̱ti̱i̱n va̱ꞌa̱ tu̱ u̱nꞌ ña̱ ka̱ꞌmi̱ ni̱a̱ ki̱tiꞌ nuu̱ꞌ u̱nꞌ xiinꞌ ña̱ ka̱ꞌmi̱ tu̱ ni̱a̱ tu̱mani̱ꞌ ña̱ nasoko̱ꞌ ni̱a̱ nuu̱ꞌ u̱nꞌ.
Sa̱kanꞌ te̱ xa̱ꞌaꞌ ne̱ yivi̱ꞌ na̱soko̱ꞌ tukuuꞌ ni̱a̱ si̱ndiki̱ꞌ tiakiꞌ nuu̱ꞌ altar ña̱ kiꞌinꞌ kaꞌnuꞌ ni̱a̱ yoꞌó.