Yoꞌoꞌ kaꞌán David ña̱ Ndiosí ku̱i̱ti̱ꞌ xataꞌa̱n sa̱kaꞌnuꞌ e̱ꞌ
Ya̱a̱ ña̱ ni̱ xi̱ta̱ David ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
65
Tákuiꞌe Ndiosí,
na na̱ti̱i̱n u̱nꞌ ña̱ xakaꞌnuꞌ ndu̱ yoꞌó xíniꞌ i̱kuꞌ Sión.
Te̱ sa̱xinú tu̱ ndu̱ kuento ndu̱ ña̱ ni̱ ta̱xi̱ ndu̱ nuu̱ꞌ u̱nꞌ.
2 Sa̱kanꞌ ña̱ yoꞌó ndii,
saxinú u̱nꞌ si̱u̱ꞌunꞌ ña̱ kaꞌán ndu̱ xiinꞌ u̱nꞌ,
te̱ sa̱kuuꞌ ndu̱ kuní a̱ ku̱ya̱ti̱n nuu̱ꞌ u̱nꞌ,
3 tee̱ꞌ ndee kundieeꞌ ku̱a̱tyi̱ ndu̱ xikoꞌ niꞌiꞌ a̱ ndu̱,
ndisu̱ yoꞌó ndii,
yoo kaꞌnuꞌ i̱ni̱ u̱nꞌ xaꞌa̱ꞌ sa̱kuuꞌ ndu̱ xaꞌa̱ꞌ ku̱a̱tyi̱ ña̱ xaaꞌ ndu̱.
4 Va̱ꞌa̱ va̱ kuni ne̱ yivi̱ꞌ,
ne̱ nakaxin u̱nꞌ te̱ ki̱xi̱n ni̱a̱ nuu̱ꞌ u̱nꞌ,
te̱ ku̱ndi̱e̱e̱ ni̱a̱ xiinꞌ u̱nꞌ ti̱xi̱n yu̱kunꞌ.
Xa̱ tyiee̱ vi̱koꞌ ka̱sa̱ꞌa̱ u̱nꞌ xaꞌa̱ꞌ ndu̱ kii̱ꞌ ku̱ndi̱e̱e̱ ndu̱ xiinꞌ u̱nꞌ ti̱xi̱n yu̱kunꞌ su̱ꞌu̱n ja̱a̱nꞌ.
5 Te̱ yoꞌó ndii,
xiinꞌ tyu̱u̱n kaꞌnuꞌ va̱ nakuiinꞌ u̱nꞌ si̱u̱ꞌunꞌ ña̱ kaꞌán ndu̱ xiinꞌ u̱nꞌ,
te̱ niaꞌá u̱nꞌ ndu̱ ña̱ xatyuunꞌ nda̱ku u̱nꞌ.
Tákuiꞌe Ndiosí,
ña̱ sakakú ndu̱,
yoꞌó nduuꞌ ña̱ ndiatuꞌ i̱ni̱ sa̱kuuꞌ ne̱ yivi̱ꞌ i̱i̱n yivi̱ꞌ sa̱kakú ña̱ꞌaꞌ.
Te̱ yoꞌó tu̱ ndiatuꞌ i̱ni̱ ne̱ ndieeꞌ nde̱e̱ tu̱ku̱ taꞌviꞌ xi̱o̱o̱ mi̱ni̱ kaꞌnuꞌ.
6 Xiinꞌ ña̱ ndi̱e̱eꞌ u̱nꞌ ni̱ xa̱ꞌa̱ u̱nꞌ sa̱kuuꞌ i̱kuꞌ naꞌnuꞌ,
te̱ xiinꞌ kuaꞌa̱ꞌ va̱ ña̱ ndi̱e̱eꞌ u̱nꞌ ni̱ na̱ka̱ta̱ kutu̱ꞌ u̱nꞌ sa̱kuuꞌ ña̱ ja̱a̱nꞌ.
7 Ni̱ sa̱i̱i̱n kuiín u̱nꞌ mi̱ni̱ kaꞌnuꞌ kii̱ꞌ i̱yo̱ va̱ kuuꞌ a̱,
kii̱ꞌ ndi̱e̱eꞌ va̱ nutaꞌ ti̱kui nuu̱ꞌ a̱.
Te̱ ni̱ na̱tyi̱ndi̱e̱e̱ taxi̱nꞌ tu̱ u̱nꞌ ne̱ yivi̱ꞌ i̱i̱n yivi̱ꞌ kii̱ꞌ ni̱ na̱ku̱tyi ni̱a̱ sa̱kuuꞌ ñu̱u̱.
8 Nde̱e̱ ne̱ yivi̱ꞌ,
ne̱ ndieeꞌ nde̱e̱ xaꞌa̱ꞌ i̱i̱n yivi̱ꞌ kii̱ꞌ xini ni̱a̱ tyu̱u̱n kaꞌnuꞌ ña̱ xaaꞌ u̱nꞌ ndii,
nandani̱ va̱ ni̱a̱,
te̱ nde̱e̱ miiꞌ ketaꞌ ñu̱ꞌu̱ xiinꞌ nde̱e̱ miiꞌ ketá a̱ ndii,
yoꞌó xaaꞌ sa̱kanꞌ te̱ va̱ꞌa̱ kuni ne̱ yivi̱ꞌ xitaꞌ sii̱ꞌ ni̱a̱ ya̱a̱ nuu̱ꞌ u̱nꞌ.
9 Yoꞌó xitoꞌ ñu̱ꞌuꞌ,
te̱ kosó u̱nꞌ u̱n xiinꞌ savi̱ꞌ,
te̱ kuaꞌa̱ꞌ va̱ ña̱ savi̱ꞌ nakaya ne̱ yivi̱ꞌ nuu̱ꞌ a̱ xaaꞌ u̱nꞌ.
Te̱ yoo kuaꞌa̱ꞌ va̱ ti̱kui i̱ti̱a̱ xaaꞌ u̱nꞌ,
te̱ ku̱vi̱ koso̱ ne̱ yivi̱ꞌ ña̱ tyiꞌiꞌ ni̱a̱ te̱ na̱ku̱i̱xa̱ va̱ꞌa̱ a̱.
10 Xiinꞌ ti̱kui saviꞌ satyiiꞌ u̱nꞌ ñu̱ꞌuꞌ miiꞌ taꞌviꞌ te̱ yivi̱ a̱,
te̱ sandutiaꞌ u̱nꞌ ñu̱ꞌuꞌ tikoꞌndoꞌ naꞌnuꞌ,
te̱ nda̱sa̱ ndaa̱ u̱nꞌ nuu̱ꞌ ñu̱ꞌuꞌ miiꞌ tyiꞌiꞌ ni̱a̱.
Te̱ savita u̱nꞌ ñu̱ꞌuꞌ ni̱a̱ xiinꞌ savi̱ꞌ kii̱ꞌ kuunꞌ ndi̱e̱eꞌ va̱ raꞌ,
te̱ sañuꞌuꞌ u̱nꞌ i̱ti̱a̱ trigo ña̱ nakún xa̱aꞌ nuu̱ꞌ ñu̱ꞌuꞌ ni̱a̱.
11 Te̱ kii̱ꞌ ndiꞌiꞌ kuiya̱ ndii,
kuaꞌa̱ꞌ va̱ ña̱ saviꞌ nakaya ne̱ yivi̱ꞌ xaaꞌ u̱nꞌ,
te̱ i̱tyiꞌ miiꞌ xkaꞌndíá u̱nꞌ xiinꞌ karreta u̱nꞌ ndii,
sañuꞌuꞌ kuaꞌa̱ꞌ u̱nꞌ ne̱ yivi̱ꞌ.
12 Te̱ ka̱niiꞌ yo̱soꞌ miiꞌ i̱tyi kaaꞌ ndii,
nanduuꞌ kuii̱ꞌ a̱ xaaꞌ u̱nꞌ,
te̱ yo̱soꞌ ña̱ ñuꞌuꞌ te̱i̱n i̱kuꞌ ndii,
nda̱tu̱nꞌ va̱ kaaꞌ yoo ña̱ ta̱ta̱ xiinꞌ i̱ta̱.
13 Te̱ ka̱niiꞌ yo̱soꞌ ja̱a̱nꞌ ñuꞌuꞌ kuaꞌa̱ꞌ mbe̱e̱ xaxi̱ꞌ riꞌ kuꞌu̱,
te̱ ka̱niiꞌ yo̱soꞌ ña̱ ñuꞌuꞌ te̱i̱n i̱kuꞌ ja̱a̱nꞌ ndii,
yoo kuaꞌa̱ꞌ xa̱va̱ꞌa̱ i̱ti̱a̱ trigo nuu̱ꞌ a̱,
te̱ sa̱kuuꞌ ña̱ ja̱a̱nꞌ ndii,
kuaaꞌ tiꞌeꞌ a̱ ña̱ va̱ꞌa̱ kuni a̱,
te̱ nde̱e̱ xitaꞌ vi̱ꞌ a̱.