Ne̱ küuꞌ kaxiꞌ nduuꞌ e̱ꞌ naaꞌ i̱ni̱ ka̱ e̱ꞌ xini e̱ꞌ ña̱ vikaꞌ te̱ sa̱kanꞌ Ndiosí
Ya̱a̱ ña̱ ni̱ xi̱ta̱ tiaa̱ siꞌe̱ Coré ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
49
Ku̱ni̱ so̱ꞌo̱ sa̱kuuꞌ ndoꞌó,
ne̱ ndieeꞌ sa̱kuuꞌ ñu̱u̱ ña̱ ñuꞌuꞌ nuu̱ꞌ ñu̱ꞌuꞌ i̱i̱n yivi̱ꞌ ña̱ kaꞌa̱n i̱ yoꞌoꞌ,
te̱ tyu̱nxaꞌaꞌ va̱ ndoꞌó,
ne̱ ndieeꞌ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ.
2 Naa kuuꞌ ndoꞌó,
ne̱ yivi̱ꞌ ndaꞌvi so̱ꞌo̱,
xiinꞌ ndoꞌó,
ne̱ kumiꞌ ña̱ ndi̱e̱eꞌ,
naa kuuꞌ ndoꞌó,
ne̱ ndaꞌvi kuuꞌ,
xiinꞌ naa kuuꞌ ndoꞌó,
ne̱ vikaꞌ ndii,
ku̱ni̱ so̱ꞌo̱ sa̱kuuꞌ ndo̱ꞌ ña̱ kaꞌán i̱.
3 Sa̱kanꞌ ña̱ kuento ña̱ kaꞌa̱n i̱ ndii,
mi̱iꞌ ndiꞌiꞌ ña̱ xini tuní nduuꞌ a̱,
te̱ ña̱ xanini i̱ xiinꞌ nimá i̱ ndii,
mi̱iꞌ ndiꞌiꞌ ña̱ ndityi nduuꞌ a̱.
4 Xini so̱ꞌo̱ kaxiꞌ i̱ kuaꞌa̱ꞌ ña̱ kaꞌán ndi̱a̱a̱,
te̱ sanakuatyiꞌ i̱ nuu̱ꞌ ne̱ yivi̱ꞌ ndee ña̱ kuni katyi̱ ña̱ kaꞌán ndi̱a̱a̱ ja̱a̱nꞌ kii̱ꞌ xandaaꞌ i̱ xiinꞌ ñuu̱ꞌ ña̱ naniꞌ arpa.
5 Köo̱ꞌ nde̱e̱ i̱i̱n xaꞌa̱ꞌ ña̱ ku̱yi̱ꞌvi yuꞌu̱ kii̱ꞌ ko̱o̱ tu̱ndoꞌo̱ꞌ nuu̱ꞌ kivi̱ꞌ ñu̱u̱ i̱,
uun kii̱ꞌ ko̱o̱ ne̱ ndasi taꞌanꞌ xiinꞌ sa̱a̱ xinundu̱u̱ miiꞌ nduꞌu̱ꞌ i̱.
6 Ne̱ ja̱a̱nꞌ ndii,
ña̱ꞌa̱ ña̱ kumiꞌ ku̱i̱ti̱ꞌ ni̱a̱ i̱ni̱ ni̱a̱ xini ni̱a̱,
te̱ kaꞌán ñuñuꞌ ni̱a̱ xaꞌa̱ꞌ kuaꞌa̱ꞌ ña̱ vikaꞌ ña̱ kumiꞌ ni̱a̱.
7 Ndisu̱ nde̱e̱ i̱i̱n ne̱ ja̱a̱nꞌ kü̱vi̱ tya̱ꞌvi̱ xaꞌa̱ꞌ mi̱iꞌ ni̱a̱,
te̱ sa̱kakú xiinꞌ mi̱iꞌ ni̱a̱ ñu̱u̱ ndi̱i,
ni̱ nde̱e̱ kü̱vi̱ tu̱ tya̱ꞌvi̱ ni̱a̱ Ndiosí te̱ sa̱kakú ña̱ꞌaꞌ a̱.
8 Sa̱kanꞌ ña̱ kivi̱ꞌ ñu̱u̱ e̱ꞌ ndii,
ndiaa yaꞌviꞌ xa̱va̱ꞌa̱ a̱,
te̱ köo̱ꞌ nde̱e̱ i̱i̱n ne̱ yivi̱ꞌ ne̱ ku̱vi̱ tya̱ꞌvi̱ xaꞌa̱ꞌ kivi̱ꞌ ñu̱u̱ ni̱a̱ nda̱ꞌaꞌ Ndiosí,
9 te̱ ku̱ti̱a̱ku̱ ni̱a̱ nde̱e̱ ndiꞌiꞌ ni̱ kivi̱ꞌ,
te̱ köo̱ꞌ kivi̱ꞌ ku̱vi̱ ni̱a̱ te̱ kuꞌu̱n ni̱a̱ ñu̱u̱ ndi̱i.
10 Sa̱kanꞌ ña̱ sa̱kuuꞌ e̱ꞌ xiní ndii,
tee̱ꞌ ndee xini tuní ne̱ yivi̱ꞌ ndii,
ne̱ ku̱vi̱ ku̱ndu̱u̱ ni̱a̱,
te̱ sa̱kanꞌ tu̱ tee̱ꞌ ndee ne̱ na̱a̱ꞌ kuuꞌ nduuꞌ ni̱a̱ uun ne̱ köo̱ꞌ a̱ xiní xa̱tyiꞌ nduuꞌ ni̱a̱ ndii,
ne̱ ku̱vi̱ ku̱ndu̱u̱ sa̱kuuꞌ ni̱a̱.
Te̱ nda̱ꞌaꞌ i̱nga̱ ne̱ yivi̱ꞌ ndoó sa̱kuuꞌ ña̱ vikaꞌ ni̱a̱.
11 Yavi̱ ndi̱i̱ ja̱a̱nꞌ ku̱ndu̱u̱ vi̱ꞌe̱ ni̱a̱ nde̱e̱ ndiꞌiꞌ ni̱ kivi̱ꞌ,
te̱ i̱kanꞌ ku̱ndi̱e̱e̱ ni̱a̱ a̱ma̱ ka̱ kivi̱ꞌ,
tee̱ꞌ ndee kivi̱ꞌ mi̱iꞌ ni̱a̱ tyi̱ndi̱e̱e̱ ni̱a̱ nuu̱ꞌ tu̱tu̱ xaꞌa̱ꞌ sa̱kuuꞌ ña̱ vikaꞌ ni̱a̱.
12 Te̱ ña̱ kiꞌinꞌ kaꞌnuꞌ ña̱ꞌaꞌ ne̱ yivi̱ꞌ ndii,
süu̱ꞌ nde̱e̱ ndiꞌiꞌ ni̱ kivi̱ꞌ ko̱o̱ a̱,
ku̱vi̱ ni̱a̱ nde̱e̱ naa xiꞌí ki̱tiꞌ i̱kuꞌ.
13 Sa̱kanꞌ ku̱ndo̱ꞌo̱ ne̱ küuꞌ kaxiꞌ,
te̱ niiꞌ sa̱kanꞌ tu̱ ku̱ndo̱ꞌo̱ sa̱kuuꞌ ne̱ ndikún ña̱ kaꞌán ni̱a̱.
Selah
14 Nde̱e̱ naa xaaꞌ te̱ pa̱xto xikoniꞌiꞌ ra̱ mbe̱e̱ sana̱ ra̱ xaaꞌ tu̱ ña̱ xiꞌí xiinꞌ ne̱ ja̱a̱nꞌ xikoniꞌiꞌ ña̱ꞌaꞌ a̱ kuaꞌa̱n a̱ xiinꞌ ni̱a̱ miiꞌ iinꞌ yavi̱ ndi̱i̱,
te̱ i̱kanꞌ ndii,
ña̱ xiꞌí ja̱a̱nꞌ ku̱ndu̱u̱ ña̱ pa̱xto ni̱a̱.
Ni̱a̱ꞌa̱ ndii,
ne̱ xatyuunꞌ nda̱ku ka̱ꞌndi̱a̱ tyuunꞌ nuu̱ꞌ ni̱a̱,
te̱ ñu̱ꞌuꞌ ndeꞌi̱ ni̱a̱ ndii,
teꞌi̱ ndo̱o̱ a̱ ti̱xi̱n yavi̱ ndi̱i̱ miiꞌ ñuꞌuꞌ a̱,
te̱ kuäsa̱ꞌ xa̱tyiꞌ ka̱ nda̱tu̱nꞌ ni̱a̱,
te̱ xa̱ i̱kanꞌ ndoo̱ ni̱a̱ ku̱ꞌu̱n ni̱a̱ nde̱e̱ ndiꞌiꞌ ni̱ kivi̱ꞌ.
15 Ndisu̱ yuꞌu̱ ndii,
Ndiosí tya̱ꞌvi̱ xaꞌa̱ꞌ i̱,
te̱ sa̱kakú a̱ yuꞌu̱ te̱ küꞌu̱n i̱ ñu̱u̱ ndi̱i ja̱a̱nꞌ,
sa̱kanꞌ ña̱ na̱ka̱ a̱ yuꞌu̱ te̱ kuꞌu̱n ku̱nduꞌu̱ꞌ i̱ miiꞌ nduꞌu̱ꞌ a̱.
Selah
16 Xaꞌa̱ꞌ a̱ ja̱a̱nꞌ na kü̱ndi̱ꞌni̱ ndo̱ꞌ kii̱ꞌ ku̱ni̱ ndo̱ꞌ ña̱ so̱ꞌo̱ kuvikaꞌ ka̱ ne̱ xaaꞌ ña̱ ni̱a̱ꞌa,
te̱ so̱ꞌo̱ nduuꞌ nda̱tu̱nꞌ ka̱ tu̱ vi̱ꞌe̱ ndieeꞌ ni̱a̱.
17 Sa̱kanꞌ ña̱ kii̱ꞌ ku̱vi̱ ni̱a̱ ndii,
köo̱ꞌ nde̱e̱ i̱i̱n ña̱ vikaꞌ ni̱a̱ ja̱a̱nꞌ kuꞌu̱n xiinꞌ ni̱a̱,
ni̱ nde̱e̱ i̱i̱n nda̱a̱ꞌ ña̱ nda̱tu̱nꞌ ña̱ kumiꞌ ni̱a̱ ja̱a̱nꞌ kü̱vi̱ kuꞌu̱n xiinꞌ ni̱a̱ yavi̱ ndii.
18 Tee̱ꞌ ndee va̱ꞌa̱ va̱ kuni ni̱a̱ vi̱ti̱n ña̱ tiaku ni̱a̱ xaꞌa̱ꞌ a̱ ña̱ kuaꞌa̱ꞌ va̱ ña̱ vikaꞌ kumiꞌ ni̱a̱,
te̱ kiꞌinꞌ kaꞌnuꞌ ña̱ꞌaꞌ sa̱kuuꞌ ne̱ yivi̱ꞌ xaꞌa̱ꞌ a̱ ña̱ kuaꞌa̱ꞌ va̱ ña̱ꞌa̱ kumiꞌ ni̱a̱.
19 Ndisu̱ ku̱vi̱ ni̱a̱ nde̱e̱ naa ni̱ xiꞌi̱ sa̱kuuꞌ ne̱ xii̱ꞌ ya̱taꞌ ni̱a̱,
te̱ köo̱ꞌ kivi̱ꞌ ka̱ na̱ndi̱koꞌ ni̱a̱ i̱i̱n yivi̱ꞌ te̱ ku̱ni̱ ni̱a̱ ñu̱ꞌu̱.
20 Ne̱ yivi̱ꞌ,
ne̱ kaꞌán ñuñuꞌ xaꞌa̱ꞌ ña̱ vikaꞌ ni̱a̱ ndii,
kündani̱ ni̱a̱ ña̱ xaaꞌ ni̱a̱,
te̱ nduuꞌ ni̱a̱ nde̱e̱ naa ki̱tiꞌ i̱kuꞌ,
tiꞌ xiꞌí,
te̱ ku̱vi̱ ni̱a̱ nde̱e̱ naa xiꞌí tiꞌ ja̱a̱nꞌ.