Kaꞌnuꞌ va̱ ña̱ nduuꞌ Ndiosí, te̱ nda̱tu̱nꞌ va̱ ñu̱u̱ Sión miiꞌ nduꞌu̱ꞌ a̱
Ya̱a̱ ña̱ ni̱ xi̱ta̱ tiaa̱ siꞌe̱ Coré ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ kaꞌnuꞌ.
48
Kaꞌnuꞌ va̱ ña̱ nduuꞌ Yahvé,
te̱ xataꞌa̱n ña̱ sa̱kaꞌnuꞌ xa̱va̱ꞌa̱ ña̱ꞌaꞌ e̱ꞌ
ñu̱u̱ miiꞌ nduꞌu̱ꞌ a̱ xíniꞌ i̱kuꞌ Sión su̱ꞌu̱n.
2 Te̱ sukun va̱ i̱kuꞌ ja̱a̱nꞌ,
te̱ nda̱tu̱nꞌ tu̱ a̱,
te̱ va̱ꞌa̱ va̱ kuni sa̱kuuꞌ ne̱ yivi̱ꞌ i̱i̱n yivi̱ꞌ kii̱ꞌ xitoꞌ ni̱a̱ miiꞌ iinꞌ i̱kuꞌ ja̱a̱nꞌ.
Te̱ xi̱i̱nꞌ xíniꞌ i̱kuꞌ Sión ja̱a̱nꞌ ni̱nu̱ nduuꞌ miiꞌ ka̱nduꞌu̱ꞌ ñu̱u̱ mi̱iꞌ Rey ña̱ kaꞌnuꞌ xa̱va̱ꞌa̱.
3 Ndiosí ndii,
nduꞌu̱ꞌ a̱ ñu̱u̱ Jerusalén i̱i̱n vi̱ꞌe̱ sukun va̱,
te̱ niaꞌá a̱ nuu̱ꞌ ne̱ yivi̱ꞌ ña̱ su̱vi̱ a̱ nduuꞌ miiꞌ ku̱vi̱ kaku̱ ni̱a̱ te̱ köo̱ꞌ a̱ ku̱ndo̱ꞌo̱ ni̱a̱.
4 Sa̱kanꞌ ña̱ ni̱ ndu̱i̱i̱n sa̱kuuꞌ rey,
te̱ xaꞌndia tyuunꞌ nuu̱ꞌ ñu̱ꞌuꞌ i̱i̱n yivi̱ꞌ,
te̱ ni̱ ko̱ꞌni̱ ti̱ꞌvi̱ ra̱ ñu̱u̱ ja̱a̱nꞌ te̱ ku̱ntaꞌanꞌ ra̱ xiinꞌ ne̱ ndieeꞌ i̱kanꞌ.
5 Te̱ kii̱ꞌ ni̱ xi̱ni̱ ra̱ sa̱a̱ kaaꞌ ñu̱u̱ ja̱a̱nꞌ ndii,
ni̱ na̱nda̱ni̱ va̱ ra̱,
te̱ ni̱ yi̱ꞌvi xa̱va̱ꞌa̱ tu̱ ra̱,
sa̱kanꞌ na ni̱ xi̱nu̱ kiꞌi̱ꞌ xa̱va̱ꞌa̱ sa̱kuuꞌ ra̱.
6 Te̱ ni̱ ki̱si̱ vi̱ꞌ ña̱ꞌaꞌ a̱ xaꞌa̱ꞌ a̱ ña̱ yiꞌvi xa̱va̱ꞌa̱ ra̱,
te̱ ni̱ sa̱kuiyoꞌ vi̱ꞌ ña̱ꞌaꞌ a̱ ña̱ uꞌvi̱ va̱ xini ra̱,
nde̱e̱ naa ndoꞌoꞌ ña̱ꞌaꞌ kii̱ꞌ sakakuꞌ aꞌ siꞌe̱ aꞌ.
7 Te̱ ni̱ sa̱ndo̱ñuꞌuꞌ a̱ sa̱kuuꞌ ra̱ nde̱e̱ naa xaaꞌ tatyi̱ꞌ ndi̱e̱eꞌ va̱,
ña̱ ku̱a̱xi̱ miiꞌ ketaꞌ ñu̱ꞌu̱ kii̱ꞌ sandoñuꞌuꞌ a̱ tundo̱oꞌ naꞌnuꞌ va̱,
tunꞌ kieeꞌ ñu̱u̱ Tarsis.
8 Sa̱a̱ niiꞌ ni̱ xi̱ni̱ so̱ꞌo̱ ndu̱ kaꞌán ne̱ xi̱xa̱ xiinꞌ ndu̱ xaꞌa̱ꞌ tyu̱u̱n kaꞌnuꞌ ña̱ ni̱ xa̱a̱ a̱ xta̱ꞌanꞌ ndii,
niiꞌ sa̱kanꞌ ni̱ xi̱ni̱ ndu̱tyiꞌ nuu̱ꞌ ndu̱ ni̱ xa̱a̱ a̱ tyu̱u̱n ja̱a̱nꞌ xaꞌa̱ꞌ ndu̱ vi̱ti̱n
ñu̱u̱ miiꞌ nduꞌu̱ꞌ mií yoꞌó,
Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ.
Ñu̱u̱ miiꞌ nduꞌu̱ꞌ mi̱iꞌ yoꞌó,
Ndiosí ndu̱ ndii,
mi̱iꞌ u̱nꞌ sa̱a̱ sa̱kanꞌ te̱ köo̱ꞌ kivi̱ꞌ nduxi̱n a̱.
Selah
9 Tákuiꞌe Ndiosí,
kii̱ꞌ ñuꞌuꞌ ndu̱ ti̱xi̱n yu̱kunꞌ yoꞌó ndii,
xanini ndu̱ xaꞌa̱ꞌ ña̱ köo̱ꞌ kivi̱ꞌ ndiꞌiꞌ ña̱ ndani̱ u̱nꞌ ndu̱.
10 Sa̱a̱ niiꞌ ña̱ kaꞌnuꞌ nduuꞌ u̱nꞌ,
Tákuiꞌe Ndiosí ndii,
niiꞌ sa̱kanꞌ xataꞌa̱n sa̱kaꞌnuꞌ ne̱ yivi̱ꞌ yoꞌó i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ.
Te̱ xiinꞌ ña̱ ndi̱e̱eꞌ u̱nꞌ xatyuunꞌ nda̱ku u̱nꞌ.
11 Va̱ꞌa̱ ku̱ni̱ i̱kuꞌ Sión xaꞌa̱ꞌ sa̱kuuꞌ ña̱ ja̱a̱nꞌ,
te̱ nakuatiaꞌ sa̱kuuꞌ ne̱ ndieeꞌ ñu̱u̱ ña̱ ñuꞌuꞌ nuu̱ꞌ ñu̱ꞌuꞌ Judá xaꞌa̱ꞌ a̱ ña̱ xatyuunꞌ nda̱ku u̱nꞌ.
12 Ku̱nu̱ꞌni̱ ndo̱ꞌ ka̱niiꞌ i̱kuꞌ Sión,
te̱ ku̱nu̱ndu̱u̱ ndo̱ꞌ sa̱a̱ kuaꞌa̱n xi̱i̱nꞌ a̱,
te̱ ka̱ꞌvi̱ ndo̱ꞌ sa̱a̱ taꞌanꞌ vi̱ꞌe̱ sukun va̱ kumiꞌ a̱.
13 Ko̱to̱ kaxiꞌ va̱ ndo̱ꞌ sa̱a̱ iinꞌ nama̱ ña̱ ndasiꞌ i̱ꞌnu̱ ña̱ ja̱a̱nꞌ,
ko̱to̱ tu̱ ndo̱ꞌ sa̱a̱ iinꞌ vi̱ꞌe̱ kaꞌnuꞌ miiꞌ ndieeꞌ te̱ xaꞌndia tyuunꞌ nuu̱ꞌ ña̱ ja̱a̱nꞌ,
sa̱kanꞌ te̱ ku̱vi̱ nda̱tuꞌunꞌ ndo̱ꞌ xaꞌa̱ꞌ ña̱ ja̱a̱nꞌ nuu̱ꞌ si̱a̱niꞌ xikaꞌ ndo̱ꞌ,
ne̱ ko̱o̱ nuu̱ꞌ kuꞌu̱n e̱ꞌ.
14 Sa̱kanꞌ ña̱ Ndiosí ja̱a̱nꞌ nduuꞌ Ndiosí yooꞌ nde̱e̱ ndiꞌiꞌ ni̱ kivi̱ꞌ,
te̱ nde̱e̱ a̱ma̱ ka̱ ni̱.
Ña̱ ja̱a̱nꞌ nduuꞌ ña̱ tyi̱ndi̱e̱eꞌ yooꞌ tee̱ꞌ ndee ku̱vi̱ e̱ꞌ.