Ndiosí nduuꞌ ña̱ xaꞌndia tyuunꞌ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ
Ya̱a̱ ña̱ ni̱ xi̱ta̱ tiaa̱ siꞌe̱ Coré ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
47
Sa̱kuuꞌ ndoꞌó,
ne̱ ndieeꞌ sa̱kuuꞌ ñu̱u̱ ña̱ yooꞌ nuu̱ꞌ ñu̱ꞌuꞌ i̱i̱n yivi̱ꞌ ndii,
ka̱tu̱ꞌ nda̱ꞌaꞌ ndo̱ꞌ,
te̱ ka̱ta̱ tiꞌeꞌ ndo̱ꞌ ya̱a̱ ki̱ꞌi̱n kaꞌnuꞌ ndo̱ꞌ Ndiosí xaꞌa̱ꞌ a̱ ña̱ va̱ꞌa̱ kuni ndo̱ꞌ.
2 Sa̱kanꞌ ña̱ Yahvé,
ña̱ nduꞌu̱ꞌ ndi̱viꞌ,
nduuꞌ ña̱ kuní a̱ ki̱ꞌi̱n kaꞌnuꞌ e̱ꞌ.
Te̱ su̱vi̱ tu̱ a̱ nduuꞌ Rey kuuꞌ nu̱uꞌ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ.
3 Ña̱ ja̱a̱nꞌ xaaꞌ sa̱kanꞌ te̱ kanandoo e̱ꞌ ne̱ ndasi taꞌanꞌ xiinꞌ e̱ꞌ,
te̱ nanduuꞌ ni̱a̱ ne̱ xikaꞌ nuuꞌ so̱ꞌo̱ nuu̱ꞌ e̱ꞌ,
te̱ sa̱kanꞌ tu̱ xaaꞌ a̱ xiinꞌ sa̱kuuꞌ ne̱ tukuꞌ te̱ nanduuꞌ tu̱ ne̱ ja̱a̱nꞌ ne̱ xikaꞌ nuuꞌ so̱ꞌo̱ nuu̱ꞌ e̱ꞌ.
4 Ni̱ na̱ka̱xi̱n a̱ ñu̱ꞌuꞌ ña̱ ni̱ ndoo̱ nda̱ꞌaꞌ e̱ꞌ,
ña̱ ni̱ ta̱xi̱ a̱ kuento a̱ xaꞌa̱ꞌ ku̱ndu̱u̱ ña̱ꞌa̱ e̱ꞌ,
te̱ ndani̱ a̱ yooꞌ xaꞌa̱ꞌ a̱ ja̱a̱nꞌ na ni̱ ta̱xi̱ a̱ ñu̱ꞌuꞌ nda̱tu̱nꞌ va̱ ja̱a̱nꞌ nda̱ꞌaꞌ e̱ꞌ.
Selah
5 Kii̱ꞌ ni̱ xi̱ku̱nduꞌu̱ꞌ Ndiosí nuu̱ꞌ tei̱ kaꞌnuꞌ miiꞌ xaꞌndia tyuunꞌ a̱ ndii,
ni̱ ku̱a̱aꞌ tiꞌeꞌ xa̱va̱ꞌa̱ sa̱kuuꞌ ne̱ yivi̱ꞌ xaꞌa̱ꞌ a̱ ña̱ va̱ꞌa̱ kuni ni̱a̱,
te̱ ni̱ ti̱vi̱ tiꞌeꞌ tu̱ ni̱a̱ nda̱tyuunꞌ tunꞌ nityiꞌ kii̱ꞌ sa̱kanꞌ.
6 Ka̱ta̱ ndo̱ꞌ ya̱a̱ nuu̱ꞌ Ndiosí e̱ꞌ,
ka̱ta̱ ndo̱ꞌ nuu̱ꞌ a̱.
Ka̱ta̱ ndo̱ꞌ ya̱a̱ nuu̱ꞌ ña̱ nduuꞌ Rey,
ka̱ta̱ ndo̱ꞌ nuu̱ꞌ a̱.
7 Sa̱kanꞌ ña̱ Ndiosí e̱ꞌ ja̱a̱nꞌ nduuꞌ Rey ña̱ xaꞌndia tyuunꞌ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ.
Ka̱ta̱ ndo̱ꞌ nuu̱ꞌ a̱ xiinꞌ i̱i̱n ya̱a̱ nda̱tu̱nꞌ va̱,
ya̱a̱ ña̱ xakaꞌnuꞌ ña̱ꞌaꞌ ndo̱ꞌ.
8 Sa̱kanꞌ ña̱ Ndiosí ja̱a̱nꞌ nduuꞌ ña̱ xaꞌndia tyuunꞌ nuu̱ꞌ ne̱ yivi̱ꞌ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ,
te̱ xaꞌndia tyuunꞌ a̱ nuu̱ꞌ ni̱a̱ nde̱e̱ nuu̱ꞌ tei̱ kaꞌnuꞌ su̱ꞌu̱n miiꞌ nduꞌu̱ꞌ a̱.
9 Te̱ ni̱ ndu̱i̱i̱n tu̱ sa̱kuuꞌ te̱ kuuꞌ nu̱uꞌ nuu̱ꞌ i̱nga̱ ñu̱ꞌuꞌ i̱i̱n yivi̱ꞌ
xiinꞌ yooꞌ,
ne̱ xakaꞌnuꞌ Ndiosí,
ña̱ xakaꞌnuꞌ Abraham.
10 Sa̱kanꞌ ña̱ kuenta Ndiosí nduuꞌ sa̱kuuꞌ rey,
te̱ xaꞌndia tyuunꞌ nuu̱ꞌ ñu̱ꞌuꞌ i̱i̱n yivi̱ꞌ.
Te̱ i̱i̱n ka̱niiꞌ tu̱ nuu̱ꞌ ñu̱ꞌuꞌ i̱i̱n yivi̱ꞌ kiꞌinꞌ kaꞌnuꞌ ne̱ yivi̱ꞌ Ndiosí ja̱a̱nꞌ.