Yoꞌoꞌ kaꞌán a̱ ña̱ Ndiosí nduuꞌ ña̱ xikuiꞌní xaꞌa̱ꞌ e̱ꞌ, te̱ xitoꞌ tu̱ a̱ yooꞌ
Ya̱a̱ ña̱ ni̱ xi̱ta̱ tiaa̱ siꞌe̱ Coré ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ, ña̱ xitaꞌ tiꞌeꞌ ne̱ yivi̱ꞌ.
46
Ndiosí nduuꞌ ña̱ xikuiꞌní xaꞌa̱ꞌ e̱ꞌ,
te̱ xitoꞌ tu̱ a̱ yooꞌ,
te̱ yatyi̱ va̱ ku̱a̱xi̱ a̱ te̱ tyindieeꞌ a̱ yooꞌ kii̱ꞌ yoo tu̱ndoꞌo̱ꞌ nuu̱ꞌ kivi̱ꞌ ñu̱u̱ e̱ꞌ.
2 Xaꞌa̱ꞌ a̱ ja̱a̱nꞌ na kuäsa̱ꞌ yiꞌvi e̱ꞌ tee̱ꞌ ndee ndi̱e̱eꞌ va̱ ta̱a̱n i̱i̱n yivi̱ꞌ,
te̱ ndu̱va̱ sa̱kuuꞌ i̱kuꞌ naꞌnuꞌ te̱ kuꞌu̱n a̱ nde̱e̱ ma̱aꞌ ti̱xi̱n mi̱ni̱ kaꞌnuꞌ,
3 tee̱ꞌ ndee ni̱ꞌi̱ mi̱ni̱ kaꞌnuꞌ,
te̱ sukun va̱ nu̱ta̱ ti̱kui nuu̱ꞌ a̱ xaꞌa̱ꞌ a̱ ña̱ ndi̱e̱eꞌ va̱ kanda raꞌ,
tee̱ꞌ ndee ka̱nda̱ ndi̱e̱eꞌ va̱ sa̱kuuꞌ i̱kuꞌ naꞌnuꞌ
xaꞌa̱ꞌ a̱ ña̱ ndi̱e̱eꞌ va̱ kuaꞌa̱n ka̱a̱ ti̱kui mi̱ni̱ ja̱a̱nꞌ.
Selah
4 I̱i̱n i̱ti̱a̱ xasiíꞌ i̱ni̱ ne̱ ndieeꞌ ñu̱u̱ miiꞌ nduꞌu̱ꞌ Ndiosí xiinꞌ kuaꞌa̱ꞌ ti̱kui a̱,
te̱ naxaá raꞌ nde̱e̱ vi̱ꞌe̱ su̱ꞌu̱n miiꞌ nduꞌu̱ꞌ Ndiosí.
5 Te̱ ma̱ꞌiꞌ ñu̱u̱ ja̱a̱nꞌ nduꞌu̱ꞌ Ndiosí,
sa̱kanꞌ na kuiiꞌ köo̱ꞌ kivi̱ꞌ nduxi̱n a̱,
sa̱a̱ ku̱a̱xi̱ kitúꞌ te̱ xaꞌaꞌ Ndiosí xitoꞌ ña̱ꞌaꞌ a̱.
6 Te̱ sa̱kuuꞌ ne̱ tukuꞌ ni̱ na̱ku̱tyi,
te̱ te̱ xaꞌndia tyuunꞌ nuu̱ꞌ ni̱a̱ ndii,
kisiꞌ vi̱ꞌ ña̱ꞌaꞌ a̱ xaꞌa̱ꞌ a̱ ña̱ yiꞌvi ra̱.
Te̱ kii̱ꞌ ni̱ tiaku̱ tatyi̱ꞌ yu̱ꞌuꞌ Ndiosí kaꞌán a̱ ndii,
ni̱ ndu̱ti̱a̱ ndo̱o̱ ñu̱ꞌuꞌ i̱i̱n yivi̱ꞌ.
7 Yahvé,
ña̱ xaꞌndia tyuunꞌ nuu̱ꞌ sa̱kuuꞌ ña̱ xíinꞌ ndieeꞌ ndi̱viꞌ,
yoo xiinꞌ e̱ꞌ,
te̱ nde̱e̱ naa miiꞌ ku̱vi̱ kaku̱ e̱ꞌ nduuꞌ Ndiosí ña̱ xakaꞌnuꞌ yooꞌ,
ne̱ vi̱ꞌe̱ Israel.
Selah
8 Ni̱a̱ꞌa̱ ndo̱ꞌ te̱ ku̱ni̱ ndo̱ꞌ tyu̱u̱n kaꞌnuꞌ va̱ ña̱ xaaꞌ Yahvé,
te̱ ku̱ni̱ ndo̱ꞌ ña̱ xa̱ ni̱ sa̱ndu̱xin xa̱tyiꞌ a̱ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ.
9 Xa̱ ni̱ sa̱i̱i̱n kuiín a̱ ñuꞌu̱ ña̱ kuntaꞌanꞌ te̱ yivi̱ꞌ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ.
Xaꞌnú Ndiosí sa̱kuuꞌ tunꞌ to̱so̱,
tunꞌ xatia te̱ xíinꞌ kuxi̱ ra̱,
te̱ xaꞌnú tu̱ a̱ sa̱kuuꞌ kuxi̱ ra̱,
te̱ xaꞌmiꞌ tu̱ a̱ sa̱kuuꞌ carreta,
tunꞌ ñuꞌuꞌ ña̱ꞌa̱ ra̱ kuaꞌa̱n ra̱ ñuꞌu̱.
10 Te̱ kaꞌa̱n Ndiosí xiinꞌ sa̱kuuꞌ ra̱ ndii:
“Taxi̱nꞌ ko̱o̱ ndo̱ꞌ,
na̱ku̱ni̱ ndo̱ꞌ ña̱ yuꞌu̱ nduuꞌ Ndiosí.
Sa̱kuuꞌ ne̱ tukuꞌ ki̱ꞌi̱n kaꞌnuꞌ yuꞌu̱,
te̱ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ sa̱kaꞌnuꞌ ne̱ yivi̱ꞌ yuꞌu̱”,
katyi̱ a̱.
11 Yahvé,
ña̱ xaꞌndia tyuunꞌ nuu̱ꞌ sa̱kuuꞌ ña̱ xíinꞌ ndieeꞌ ndi̱viꞌ,
yoo xiinꞌ e̱ꞌ,
te̱ nde̱e̱ naa miiꞌ ku̱vi̱ kaku̱ e̱ꞌ nduuꞌ Ndiosí ña̱ xakaꞌnuꞌ yooꞌ,
ne̱ vi̱ꞌe̱ Israel.
Selah