Yoꞌoꞌ kaꞌán a̱ xaꞌa̱ꞌ ña̱ tundaꞌáꞌ i̱i̱n rey
Ya̱a̱ ña̱ ni̱ xi̱ta̱ tiaa̱ si̱a̱niꞌ Coré, ña̱ kaꞌán xaꞌa̱ꞌ ña̱ ndani̱ taꞌanꞌ ne̱ tundaꞌáꞌ, ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
45
Tyituꞌ vi̱ꞌ nimá i̱ ñuꞌuꞌ kuento nda̱tu̱nꞌ,
sa̱kanꞌ na kuiiꞌ ka̱ta̱ i̱ i̱i̱n ya̱a̱ nuu̱ꞌ yoꞌó,
rey,
te̱ yaa̱ꞌ i̱ ndii,
nduuꞌ a̱ nde̱e̱ naa tu̱mi̱ ña̱ tiinꞌ i̱i̱n te̱ tyu̱u̱n va̱ keꞌi xiinꞌ nda̱ꞌaꞌ ra̱.
2 Yoꞌó nduuꞌ te̱ lu̱vi̱ ka̱ kaaꞌ te̱ sa̱kanꞌ sa̱kuuꞌ te̱ yivi̱ꞌ,
te̱ tyu̱u̱n va̱ tu̱ u̱nꞌ nda̱tuꞌunꞌ va̱ꞌa̱ u̱nꞌ,
xaꞌa̱ꞌ a̱ ja̱a̱nꞌ na ni̱ sa̱ñuꞌuꞌ va̱ Ndiosí yoꞌó nde̱e̱ ndiꞌiꞌ ni̱ kivi̱ꞌ.
3 Na̱ꞌi̱ kiꞌi̱ꞌ ityi̱ u̱nꞌ te̱ ka̱ta̱a̱ u̱nꞌ u̱n to̱koꞌ u̱nꞌ,
yoꞌó,
te̱ kooꞌ tyukuuꞌ va̱ ku̱ntaꞌanꞌ,
sa̱kanꞌ ña̱ ña̱ ja̱a̱nꞌ nduuꞌ ña̱ xanda̱tu̱nꞌ va̱ yoꞌó,
te̱ nduuꞌ tu̱ u̱nꞌ te̱ kaꞌnuꞌ va̱ xaaꞌ a̱.
4 Kaꞌnuꞌ ko̱o̱ u̱nꞌ te̱ ko̱so̱ꞌ u̱nꞌ kuei te̱ kuꞌu̱n ku̱ntaꞌanꞌ u̱nꞌ,
te̱ na̱kaꞌa̱n va̱ꞌa̱ u̱nꞌ xaꞌa̱ꞌ ña̱ ndi̱xa̱,
xiinꞌ xaꞌa̱ꞌ ña̱ ndaꞌvi kuuꞌ nimá,
xiinꞌ xaꞌa̱ꞌ ña̱ xatyuunꞌ nda̱ku,
te̱ sa̱a̱ u̱nꞌ kuaꞌa̱ꞌ tyu̱u̱n kaꞌnuꞌ xiinꞌ ña̱ ndi̱e̱eꞌ u̱nꞌ,
te̱ ke̱ta̱ va̱ꞌa̱ u̱nꞌ.
5 Te̱ xíinꞌ va̱ kuxi̱ ndisoꞌ u̱nꞌ,
te̱ kiꞌví nu̱ꞌ nimá te̱ ndasiꞌ taꞌanꞌ xiinꞌ u̱nꞌ,
rey,
te̱ ka̱nandoo u̱nꞌ sa̱kuuꞌ ne̱ tukuꞌ,
ne̱ ndieeꞌ nuu̱ꞌ ñu̱ꞌuꞌ i̱i̱n yivi̱ꞌ.
6 Ndiosí,
yoꞌó nduuꞌ ña̱ xaꞌndia tyuunꞌ nde̱e̱ ndiꞌiꞌ ni̱ kivi̱ꞌ,
te̱ nde̱e̱ a̱ma̱ ka̱ ni̱,
te̱ xaꞌndia tyuunꞌ nda̱ku u̱nꞌ xiinꞌ ta̱tunꞌ,
tunꞌ niꞌiꞌ u̱nꞌ xaꞌndia tyuunꞌ.
7 Te̱ xtani̱ u̱nꞌ ña̱ xatyuunꞌ nda̱ku,
te̱ ndasiꞌ u̱nꞌ ña̱ ni̱a̱ꞌa.
Xaꞌa̱ꞌ a̱ ja̱a̱nꞌ na ni̱ sa̱kuisoꞌ tyuunꞌ Ndiosí yoꞌó,
Ndiosí ña̱ xakaꞌnuꞌ u̱nꞌ,
te̱ ni̱ ta̱xi̱ a̱ ña̱ sii̱ꞌ ka̱ ku̱ni̱ u̱nꞌ te̱ sa̱kanꞌ sa̱kuuꞌ ndee ka̱ ne̱ taꞌanꞌ u̱nꞌ nde̱e̱ naa ni̱ xa̱ki̱n a̱ xa̱ꞌa̱n xavixínꞌ yoꞌó.
8 Toto̱ niꞌnuꞌ u̱nꞌ ndii,
kumiꞌ a̱ xiko̱ mirra,
xiinꞌ xiko̱ ña̱ naniꞌ áloe,
xiinꞌ xiko̱ tunꞌ naniꞌ casia.
Te̱ xiinꞌ ya̱a̱,
ña̱ xandaaꞌ te̱ yivi̱ꞌ,
xiinꞌ ñuu̱ꞌ,
ña̱ taꞌnuꞌ tu̱tyi̱ nuu̱ꞌ xaaꞌ sii̱ꞌ ra̱ nuu̱ꞌ u̱nꞌ kii̱ꞌ nduꞌu̱ꞌ u̱nꞌ vi̱ꞌe̱ u̱nꞌ miiꞌ xaꞌndia tyuunꞌ u̱nꞌ,
ña̱ ni̱ sa̱tití te̱ yivi̱ꞌ xiinꞌ mi̱iꞌ ndiꞌiꞌ ña̱ naniꞌ marfil.
9 Te̱i̱n ña̱ꞌaꞌ,
ne̱ ndieeꞌ vi̱ꞌe̱ miiꞌ xaꞌndia tyuunꞌ u̱nꞌ ndii,
yoo kuaꞌa̱ꞌ ña̱ꞌaꞌ siꞌe̱ kiꞌinꞌ rey,
te̱ xi̱i̱nꞌ ku̱a̱ꞌa̱ tei̱ kaꞌnuꞌ miiꞌ nduꞌu̱ꞌ u̱nꞌ xaꞌndia tyuunꞌ u̱nꞌ nduꞌu̱ꞌ tu̱ reina ña̱ xaꞌndia tyuunꞌ xiinꞌ u̱nꞌ.
Te̱ ka̱niiꞌ toto̱ niꞌnuꞌ aꞌ ndisoꞌ mi̱iꞌ ndiꞌiꞌ oro va̱ꞌa̱.
10 Yoꞌó,
ñaꞌ siꞌe̱ rey,
ko̱to̱ u̱nꞌ,
te̱ ku̱ni̱ so̱ꞌo̱ u̱nꞌ,
te̱ tyu̱nxaꞌaꞌ va̱ tu̱ u̱nꞌ ña̱ kaꞌán i̱ xiinꞌ u̱nꞌ.
Va̱ꞌa̱ ka̱ na̱ndoso̱ꞌ u̱nꞌ xaꞌa̱ꞌ ñu̱u̱ miiꞌ ni̱ ki̱e̱e̱ u̱nꞌ xiinꞌ xaꞌa̱ꞌ vi̱ꞌe̱ yu̱vaꞌ siꞌiꞌ u̱nꞌ.
11 Sa̱kanꞌ ña̱ rey i̱i̱ꞌ u̱nꞌ ndii,
sii̱ꞌ va̱ kuni ra̱ xaꞌa̱ꞌ ña̱ nda̱tu̱nꞌ u̱nꞌ,
te̱ ki̱ꞌi̱n kaꞌnuꞌ ña̱ꞌaꞌ u̱nꞌ,
sa̱kanꞌ ña̱ te̱ kaa̱ꞌ nduuꞌ i̱i̱ꞌ u̱nꞌ.
12 Ña̱ꞌaꞌ siꞌe̱ rey,
te̱ xaꞌndia tyuunꞌ ñu̱u̱ Tiro ndii,
ki̱xi̱n ndi̱a̱ka̱ ni̱a̱ kuaꞌa̱ꞌ tu̱mani̱ꞌ nda̱ꞌaꞌ u̱nꞌ,
te̱ sa̱kuuꞌ ne̱ vika̱ꞌ,
ne̱ ndieeꞌ ñu̱u̱ ja̱a̱nꞌ,
ndu̱kuꞌ ña̱ ko̱o̱ u̱nꞌ ña̱ mani̱ꞌ xiinꞌ ni̱a̱.
13 Nda̱tu̱nꞌ xa̱va̱ꞌa̱ ñaꞌ siꞌe̱ rey,
ñaꞌ tundaꞌáꞌ ja̱a̱nꞌ,
ndaꞌniꞌ aꞌ kuaꞌa̱n aꞌ vi̱ꞌe̱ miiꞌ kixín aꞌ,
te̱ toto̱ niꞌnuꞌ aꞌ ndii,
xiinꞌ mi̱iꞌ ndiꞌiꞌ oro ni̱ xa̱ nda̱tu̱nꞌ ne̱ yivi̱ꞌ a̱.
14 Nda̱tu̱nꞌ xa̱va̱ꞌa̱ toto̱ niꞌnuꞌ aꞌ,
te̱ kuaꞌa̱n ndi̱a̱ka̱ ña̱ꞌaꞌ ne̱ yivi̱ꞌ nuu̱ꞌ rey,
te̱ kiꞌinꞌ ña̱ꞌaꞌ ndieeꞌ sa̱va̱ kuaꞌa̱n xiinꞌ aꞌ xaꞌa̱ꞌ a̱ ña̱ kiꞌinꞌ kaꞌnuꞌ ña̱ꞌaꞌ ni̱a̱.
15 Te̱ va̱ꞌa̱ va̱ kuni ni̱a̱,
te̱ kuatiaꞌ tu̱ nimá ni̱a̱
kii̱ꞌ kuaꞌa̱n ko̱ꞌni̱ ni̱a̱ xiinꞌ aꞌ vi̱ꞌe̱ miiꞌ nduꞌu̱ rey xaꞌndia tyuunꞌ ra̱.
16 Tiaa̱ si̱a̱niꞌ xikaꞌ u̱nꞌ,
Tákuiꞌe rey,
ku̱ndu̱u̱ rey nde̱e̱ naa yoꞌó,
te̱ ka̱ꞌndi̱a̱ tyuunꞌ ra̱ miiꞌ ni̱ xa̱ꞌndi̱a̱ tyuunꞌ te̱ xii̱ꞌ ya̱taꞌ u̱nꞌ,
te̱ ka̱ꞌndi̱a̱ tyuunꞌ ra̱ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ sa̱a̱ u̱nꞌ.
17 Mi̱iꞌ yuꞌu̱ sa̱a̱ sa̱kanꞌ te̱ köo̱ꞌ kivi̱ꞌ na̱ko̱o̱ ne̱ yivi̱ꞌ ña̱ nakaꞌanꞌ ni̱a̱ yoꞌó,
xaꞌa̱ꞌ a̱ ja̱a̱nꞌ na ki̱ꞌi̱n kaꞌnuꞌ ne̱ tukuꞌ yoꞌó nde̱e̱ ndiꞌiꞌ ni̱ kivi̱ꞌ,
te̱ nde̱e̱ a̱ma̱ ka̱ ni̱.