Yoꞌoꞌ kaꞌán David xiinꞌ Ndiosí te̱ sa̱kakú ña̱ꞌaꞌ a̱ nda̱ꞌaꞌ te̱ ndasiꞌ taꞌanꞌ xiinꞌ ra̱
43
Tákuiꞌe Ndiosí,
sa̱naꞌmá u̱nꞌ yuꞌu̱ te̱ na̱kaꞌa̱n u̱nꞌ xaꞌa̱ꞌ i̱.
Sa̱a̱ u̱nꞌ ña̱ va̱ꞌa̱ te̱ na̱kaꞌa̱n u̱nꞌ xaꞌa̱ꞌ i̱ nuu̱ꞌ tu̱ndoꞌo̱ꞌ ña̱ ndoꞌoꞌ i̱.
Sa̱kakú u̱nꞌ yuꞌu̱ nda̱ꞌaꞌ ne̱ yivi̱ꞌ,
ne̱ xätyuunꞌ nda̱ku,
xiinꞌ nda̱ꞌaꞌ ne̱ yivi̱ꞌ,
ne̱ vixi̱ xiinꞌ ne̱ xaaꞌ ña̱ ni̱a̱ꞌa.
2 Sa̱kanꞌ ña̱ yoꞌó nduuꞌ Ndiosí ña̱ xitoꞌ yuꞌu̱.
¿Ndiotyun na ni̱ na̱ko̱o̱ i̱i̱n nda̱a̱ꞌ u̱nꞌ yuꞌu̱?
¿Ndiotyun na ka̱ka̱ sutyiꞌ i̱ni̱ yuꞌu̱ xaꞌa̱ꞌ a̱ ña̱ sandoꞌoꞌ te̱ ndasiꞌ taꞌanꞌ xiinꞌ yuꞌu̱?
3 Sa̱a̱ u̱nꞌ ña̱ va̱ꞌa̱ te̱ ti̱ꞌviꞌ u̱nꞌ ñuꞌu̱ u̱nꞌ te̱ yiꞌe̱ a̱ nuu̱ꞌ i̱,
te̱ ti̱ꞌviꞌ tu̱ u̱nꞌ ña̱ ndi̱xa̱ xaꞌa̱ꞌ u̱nꞌ nuu̱ꞌ i̱,
te̱ ña̱ ja̱a̱nꞌ niaꞌa̱ yuꞌu̱ te̱ kuꞌu̱n i̱ nde̱e̱ miiꞌ iinꞌ i̱kuꞌ su̱ꞌu̱n,
te̱ na̱xaa̱ i̱ nde̱e̱ miiꞌ nduꞌu̱ꞌ u̱nꞌ.
4 Te̱ i̱kanꞌ te̱ kuꞌu̱n i̱ nde̱e̱ altar nuu̱ꞌ Ndiosí,
Ndiosí ña̱ taxiꞌ ña̱ va̱ꞌa̱ kuni i̱ xiinꞌ ña̱ sii̱ꞌ kuni nimá i̱.
Te̱ ka̱ta̱ i̱ ya̱a̱ nuu̱ꞌ u̱nꞌ xiinꞌ ñuu̱ꞌ ña̱ naniꞌ arpa,
Tákuiꞌe Ndiosí mi̱iꞌ i̱.
5 Köo̱ꞌ nde̱e̱ i̱i̱n xaꞌa̱ꞌ ña̱ ku̱ndi̱ꞌni̱ va̱ i̱,
te̱ köo̱ꞌ tu̱ nde̱e̱ i̱i̱n xaꞌa̱ꞌ ña̱ ku̱su̱tyiꞌ va̱ i̱ni̱ i̱.
I̱ni̱ na i̱ni̱ i̱ ku̱ni̱ Ndiosí,
sa̱kanꞌ ña̱ sa̱kaꞌnuꞌ na sa̱kaꞌnuꞌ ka̱ ña̱ꞌaꞌ i̱,
ku̱a̱tyi̱ ndii,
ña̱ ja̱a̱nꞌ nduuꞌ ña̱ sakakú yuꞌu̱,
te̱ su̱vi̱ tu̱ a̱ nduuꞌ Ndiosí ña̱ xakaꞌnuꞌ i̱.