Yoꞌoꞌ kaꞌán David ña̱ kaꞌán va̱ nimá ra̱ ku̱nda̱ni̱ ra̱ xaꞌa̱ꞌ Ndiosí tiaku
Ya̱a̱ ña̱ ni̱ xi̱ta̱ tiaa̱ si̱a̱niꞌ Coré ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
42
Nde̱e̱ naa xaaꞌ i̱su̱ kii̱ꞌ ndeꞌí riꞌ ña̱ xikaꞌ ndukuꞌ riꞌ ti̱kui ko̱ꞌo̱ riꞌ ndii,
niiꞌ sa̱kanꞌ vi̱ꞌ kaꞌán nimá i̱ ña̱ ko̱o̱ u̱nꞌ xiinꞌ i̱,
Tákuiꞌe Ndiosí.
2 Kaꞌán va̱ nimá i̱ ña̱ ko̱o̱ u̱nꞌ xiinꞌ i̱,
Ndiosí,
ña̱ nduuꞌ Ndiosí ña̱ taxiꞌ kivi̱ꞌ ñu̱u̱ i̱.
¿A̱ma̱ vi̱ꞌ tu̱ kuꞌu̱n i̱ te̱ sakaꞌnuꞌ i̱ nuu̱ꞌ Ndiosí ja̱a̱nꞌ?
3 Ndu̱viꞌ xiinꞌ niiꞌ ñu̱u xiꞌiꞌ i̱ ti̱kui nuu̱ꞌ i̱ ña̱ xakuꞌ i̱,
te̱ sa̱kuuꞌ ne̱ ndasiꞌ taꞌanꞌ xiinꞌ i̱ kaꞌán xiinꞌ i̱ ndii:
“¿Miiꞌ yoo Ndiosí ña̱ xakaꞌnuꞌ u̱nꞌ?”,
katyi ni̱a̱.
4 Kii̱ꞌ nakaꞌanꞌ i̱ xaꞌa̱ꞌ sa̱a̱ ni̱ xika̱ i̱ xta̱ꞌanꞌ nuu̱ꞌ Ndiosí ndii,
kusutyiꞌ xa̱va̱ꞌa̱ i̱ni̱ i̱.
Nakaꞌanꞌ i̱ kii̱ꞌ kuaꞌa̱n i̱ te̱i̱n kuaꞌa̱ꞌ va̱ ne̱ yivi̱ꞌ,
ne̱ xakaꞌnuꞌ Ndiosí,
ndiakaꞌ ña̱ꞌaꞌ i̱ kuaꞌa̱n ndu̱ vi̱ꞌe̱ Ndiosí,
te̱ nakaꞌanꞌ tu̱ i̱ kii̱ꞌ kuaaꞌ ndu̱ kuaꞌa̱n ndu̱ ña̱ va̱ꞌa̱ va̱ kuni ndu̱,
te̱ taxiꞌ ndu̱ ña̱ tyi̱nda̱ni Ndiosí,
te̱ nde̱e̱ naa vi̱koꞌ kaꞌnuꞌ vi̱ꞌ ni̱ nduu̱ a̱ nuu̱ꞌ ndu̱.
5 Köo̱ꞌ nde̱e̱ i̱i̱n xaꞌa̱ꞌ ña̱ ku̱ndi̱ꞌni̱ va̱ i̱,
te̱ köo̱ꞌ tu̱ nde̱e̱ i̱i̱n xaꞌa̱ꞌ ña̱ ku̱su̱tyiꞌ va̱ i̱ni̱ i̱.
I̱ni̱ na i̱ni̱ i̱ ku̱ni̱ Ndiosí,
sa̱kanꞌ ña̱ sa̱kaꞌnuꞌ na sa̱kaꞌnuꞌ ka̱ ña̱ꞌaꞌ i̱,
ku̱a̱tyi̱ ndii,
ña̱ ja̱a̱nꞌ nduuꞌ ña̱ sakakú yuꞌu̱,
te̱ su̱vi̱ tu̱ a̱ nduuꞌ Ndiosí ña̱ xakaꞌnuꞌ i̱.
6 Vi̱ti̱n ndii,
ndiꞌni̱ xa̱va̱ꞌa̱ nimá i̱,
ndisu̱ ni̱ na̱ka̱ꞌanꞌ i̱ xaꞌa̱ꞌ yoꞌó tee̱ꞌ ndee nde̱e̱ xiki̱ꞌ ña̱ naniꞌ Hermón miiꞌ yoo xaꞌndu̱ i̱ti̱a̱ Jordán nduꞌu̱ꞌ i̱,
nde̱e̱ xiki̱ꞌ nuu̱ꞌ ñu̱ꞌuꞌ ña̱ naniꞌ Mizar.
7 Xini so̱ꞌo̱ i̱ so̱nda̱ ña̱ tiakú koyó ti̱kui nde̱e̱ ma̱aꞌ ti̱xi̱n mi̱ni̱ kaꞌnuꞌ,
te̱ sa̱kuuꞌ tu̱ndoꞌo̱ꞌ ña̱ ndoꞌoꞌ i̱ ndii,
nduuꞌ a̱ nde̱e̱ naa te̱ñuꞌu̱ꞌ,
te̱ tiꞌviꞌ u̱nꞌ i̱i̱n yivi̱ꞌ,
te̱ ni̱ xkaꞌndi̱a̱ ndo̱so̱ꞌ raꞌ siki̱ꞌ i̱.
8 Ndisu̱ i̱i̱n keꞌinꞌ ndii,
niaꞌá Yahvé nuu̱ꞌ i̱ ña̱ ndani̱ va̱ a̱ yuꞌu̱,
te̱ ñu̱u ndii,
xitaꞌ i̱ ya̱a̱ nuu̱ꞌ a̱,
te̱ kaꞌán i̱ xiinꞌ Ndiosí ña̱ taxiꞌ kivi̱ꞌ ñu̱u̱ i̱.
9 Kaꞌa̱n i̱ xiinꞌ Ndiosí,
ña̱ nduuꞌ nde̱e̱ naa vi̱ꞌe̱ yuu̱ꞌ miiꞌ ku̱vi̱ kaku̱ i̱,
ndii:
“¿Ndiotyun na ni̱ na̱ndoso̱ꞌ u̱nꞌ xaꞌa̱ꞌ i̱?
¿Ndiotyun na ka̱ka̱ sutyiꞌ i̱ni̱ yuꞌu̱ xaꞌa̱ꞌ a̱ ña̱ sandoꞌoꞌ te̱ ndasiꞌ taꞌanꞌ xiinꞌ yuꞌu̱?”,
ni̱ katyi̱ i̱ xiinꞌ a̱.
10 Nde̱e̱ i̱kiꞌ i̱ uꞌvi̱ xaꞌa̱ꞌ a̱ ña̱ kaꞌán ki̱ni̱ te̱ ja̱a̱nꞌ xiinꞌ i̱.
Kundiꞌiꞌ ra̱ xiinꞌ i̱ i̱ꞌi̱n kivi̱ꞌ kuaꞌa̱n kaꞌán ra̱ ndii:
“¿Miiꞌ nduꞌu̱ꞌ Ndiosí ña̱ xakaꞌnuꞌ yoꞌó?”,
katyi ra̱.
11 Köo̱ꞌ nde̱e̱ i̱i̱n xaꞌa̱ꞌ ña̱ ku̱ndi̱ꞌni̱ va̱ i̱,
te̱ köo̱ꞌ tu̱ nde̱e̱ i̱i̱n xaꞌa̱ꞌ ña̱ ku̱su̱tyiꞌ va̱ i̱ni̱ i̱.
I̱ni̱ na i̱ni̱ i̱ ku̱ni̱ Ndiosí,
sa̱kanꞌ ña̱ sa̱kaꞌnuꞌ na sa̱kaꞌnuꞌ ka̱ ña̱ꞌaꞌ i̱,
ku̱a̱tyi̱ ndii,
ña̱ ja̱a̱nꞌ nduuꞌ ña̱ sakakú yuꞌu̱,
te̱ su̱vi̱ tu̱ a̱ nduuꞌ Ndiosí ña̱ xakaꞌnuꞌ i̱.