Yoꞌoꞌ kaꞌán David xiinꞌ Ndiosí te̱ sa̱ndaꞌa ña̱ꞌaꞌ a̱
Ya̱a̱ ña̱ ni̱ xi̱ta̱ David ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
41
Sañuꞌuꞌ va̱ Ndiosí ne̱ yivi̱ꞌ,
ne̱ tyindieeꞌ ne̱ ndaꞌvi kuuꞌ.
Te̱ mi̱iꞌ Yahvé sa̱kakú ña̱ꞌaꞌ kii̱ꞌ yoo tu̱ndoꞌo̱ꞌ nuu̱ꞌ kivi̱ꞌ ñu̱u̱ ni̱a̱.
2 Te̱ ko̱to̱ tu̱ ña̱ꞌaꞌ Yahvé,
te̱ ta̱xi̱ tu̱ a̱ kivi̱ꞌ ñu̱u̱ ni̱a̱,
te̱ sa̱ñuꞌuꞌ ña̱ꞌaꞌ a̱ kii̱ꞌ ndieeꞌ ni̱a̱ nuu̱ꞌ ñu̱ꞌuꞌ i̱i̱n yivi̱ꞌ,
te̱ tä̱xi̱ a̱ koyo̱ ni̱a̱ nda̱ꞌaꞌ te̱ ndasiꞌ taꞌanꞌ xiinꞌ ni̱a̱ te̱ ka̱ꞌni̱ꞌ ña̱ꞌaꞌ ra̱.
3 Mi̱iꞌ Yahvé ta̱xi̱ ndi̱e̱e̱ꞌ ni̱a̱ kii̱ꞌ kuni ku̱vi̱ ni̱a̱,
te̱ uꞌvi̱ va̱ xini ni̱a̱,
te̱ sa̱ndaꞌa ña̱ꞌaꞌ a̱ kii̱ꞌ kuni ku̱vi̱ ni̱a̱ ndieeꞌ ni̱a̱ nuu̱ꞌ tunꞌ xi̱to̱.
4 Ni̱ kaꞌa̱n yuꞌu̱ xiinꞌ Yahvé ndii:
“Yahvé,
sa̱a̱ u̱nꞌ ña̱ va̱ꞌa̱ te̱ ku̱vi̱ta i̱ni̱ u̱nꞌ xaꞌa̱ꞌ i̱,
sa̱a̱ u̱nꞌ ña̱ va̱ꞌa̱ te̱ sa̱ndaꞌa u̱nꞌ yuꞌu̱,
sa̱kanꞌ ña̱ nuu̱ꞌ yoꞌó ni̱ xa̱a̱ i̱ ku̱a̱tyi̱”,
katyi i̱.
5 Ndisu̱ te̱ ndasiꞌ taꞌanꞌ xiinꞌ i̱ ndii,
kani̱a̱ꞌa ku̱i̱ti̱ꞌ ra̱ xaꞌa̱ꞌ i̱ ndatuꞌúnꞌ taꞌanꞌ ra̱ ndii:
“¿A̱ma̱ vi̱ꞌ tu̱ ku̱vi̱ te̱ ja̱a̱nꞌ,
te̱ köo̱ꞌ na̱ka̱ꞌanꞌ xa̱tyiꞌ ka̱ xaꞌa̱ꞌ ra̱?”,
katyi xiinꞌ taꞌanꞌ ra̱.
6 Te̱ kii̱ꞌ ku̱a̱xi̱ ko̱to̱ ra̱ yuꞌu̱ ndii,
kuuꞌ ra̱ nde̱e̱ naa te̱ xiní taꞌanꞌ xiinꞌ i̱,
ndisu̱ ti̱xi̱n nimá ra̱ ndii,
xa̱ mi̱iꞌ ndiꞌiꞌ ña̱ ni̱a̱ꞌa xanini ra̱ xaꞌa̱ꞌ i̱.
Te̱ kii̱ꞌ kieeꞌ ra̱ kuaꞌa̱n ra̱ ndii,
xaꞌaꞌ ra̱ ndatuꞌunꞌ ra̱ sa̱kuuꞌ ña̱ ja̱a̱nꞌ nuu̱ꞌ ne̱ yivi̱ꞌ.
7 Te̱ kii̱ꞌ nakayá sa̱kuuꞌ ne̱ ndasiꞌ yuꞌu̱ ja̱a̱nꞌ ndii,
ki̱ni̱ va̱ ndatuꞌunꞌ ya̱aꞌ ni̱a̱ xaꞌa̱ꞌ i̱,
te̱ xanini ki̱ni̱ tu̱ ni̱a̱ xaꞌa̱ꞌ i̱,
kaꞌán ni̱a̱ ndii:
8 “Kuiꞌe̱ xatu̱ xa̱va̱ꞌa̱ ndoꞌoꞌ te̱ ja̱a̱nꞌ,
xa̱va̱ꞌa̱ na köo̱ꞌ kivi̱ꞌ ka̱ ndo̱koo̱ ra̱ nuu̱ꞌ tunꞌ xto̱ miiꞌ kanduꞌu̱ꞌ ra̱ ja̱a̱nꞌ”,
katyi ni̱a̱.
9 Nde̱e̱ te̱ ndiakaꞌ taꞌanꞌ kutu̱ꞌ xiinꞌ i̱,
te̱ i̱ni̱ va̱ i̱ xini i̱,
te̱ ni̱ xi̱xi̱ ingaꞌ tu̱ ra̱ xiinꞌ i̱ ndii,
ni̱ ku̱nda̱siꞌ ra̱ yuꞌu̱.
10 Ndisu̱ yoꞌó,
Yahvé ndii,
sa̱a̱ u̱nꞌ ña̱ va̱ꞌa̱ te̱ ku̱vi̱ta i̱ni̱ u̱nꞌ xaꞌa̱ꞌ i̱,
te̱ sa̱ndaꞌa u̱nꞌ yuꞌu̱,
te̱ ku̱vi̱ sa̱ndoꞌoꞌ i̱ sa̱kuuꞌ te̱ ndasiꞌ taꞌanꞌ xiinꞌ i̱ ja̱a̱nꞌ.
11 Xiní i̱ ña̱ xtani̱ u̱nꞌ ña̱ xaaꞌ i̱,
sa̱kanꞌ ña̱ nï̱ ta̱xi̱ u̱nꞌ ña̱ kanandoo te̱ ndasiꞌ taꞌanꞌ xiinꞌ yuꞌu̱.
12 Te̱ nï̱ ta̱xi̱ tu̱ u̱nꞌ ku̱vi̱ i̱,
sa̱kanꞌ ña̱ xiní u̱nꞌ ña̱ te̱ köo̱ꞌ ku̱a̱tyi̱ nduuꞌ i̱,
te̱ ni̱ ta̱xi̱ u̱nꞌ ña̱ ko̱o̱ i̱ nuu̱ꞌ u̱nꞌ nde̱e̱ ndiꞌiꞌ ni̱ kivi̱ꞌ.
13 Kaꞌnuꞌ va̱ ña̱ nduuꞌ Yahvé,
Ndiosí ña̱ xakaꞌnuꞌ yooꞌ,
ne̱ vi̱ꞌe̱ Israel,
sa̱kanꞌ ña̱ yoo a̱ nde̱e̱ ndiꞌiꞌ ni̱ kivi̱ꞌ.
Sa̱kanꞌ nduuꞌ a̱,
te̱ sa̱kanꞌ na ku̱ndu̱u̱ a̱.