Yoꞌoꞌ kaꞌán David ña̱ va̱ꞌa̱ va̱ kuni ra̱ ña̱ saxinú ra̱ ña̱ kaꞌán tyuunꞌ Ndiosí
Ya̱a̱ ña̱ ni̱ xi̱ta̱ David ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
40
Kuiee ni̱ ndiatu̱ i̱ni̱ i̱ ña̱ tyi̱ndi̱e̱eꞌ Yahvé yuꞌu̱,
sa̱kanꞌ te̱ ni̱ ku̱ya̱ti̱n a̱ nuu̱ꞌ i̱,
te̱ ni̱ ta̱xi̱ so̱ꞌo̱ a̱ ña̱ kaꞌán ndaꞌvi i̱ xiinꞌ a̱.
2 Te̱ ni̱ xta̱ꞌniꞌ a̱ yuꞌu̱ nuu̱ꞌ tu̱ndoꞌo̱ꞌ ña̱ sandiꞌni̱ va̱ nimá i̱ ña̱ ni̱ nduu̱ nde̱e̱ naa i̱i̱n poso̱ kunu va̱,
te̱ tu̱ndoꞌo̱ꞌ ja̱a̱nꞌ ndii,
ni̱ nduu̱ a̱ nde̱e̱ naa kuaꞌa̱ꞌ va̱ ndeꞌi̱ kunu va̱,
ni̱ xta̱ꞌniꞌ a̱ yuꞌu̱ i̱kanꞌ,
te̱ ni̱ xa̱ni̱ a̱ yuꞌu̱ xata̱ꞌ ka̱va̱ꞌ,
i̱kanꞌ te̱ ni̱ xa̱ni̱ a̱ yuꞌu̱ miiꞌ köo̱ꞌ ka̱ a̱ ku̱ndo̱ꞌo̱ i̱.
3 Ndi̱ꞌi̱ ña̱ ja̱a̱nꞌ te̱ ni̱ ta̱xi̱ a̱ i̱i̱n ya̱a̱ xa̱aꞌ ni̱ xi̱ta̱ i̱ nuu̱ꞌ a̱,
i̱i̱n ya̱a̱ xa̱aꞌ ña̱ xakaꞌnuꞌ e̱ꞌ Ndiosí e̱ꞌ.
Kuaꞌa̱ꞌ va̱ ne̱ yivi̱ꞌ,
kii̱ꞌ ku̱ni̱ ni̱a̱ ña̱ xa̱a̱ Tákuiꞌe Ndiosí xaꞌa̱ꞌ i̱ kaa̱ꞌ ndii,
na̱nda̱ni̱ va̱ ni̱a̱,
te̱ i̱ni̱ tu̱ ni̱a̱ ku̱ni̱ ña̱ꞌaꞌ ni̱a̱.
4 Va̱ꞌa̱ va̱ kuni ne̱ yivi̱ꞌ,
ne̱ i̱ni̱ xini Yahvé,
te̱ kïꞌinꞌ taꞌanꞌ ni̱a̱ xiinꞌ ne̱ ñuñuꞌ,
ni̱ nde̱e̱ kïꞌinꞌ taꞌanꞌ tu̱ ni̱a̱ xiinꞌ ne̱ xakaꞌnuꞌ ndiosí saka.
5 Tákuiꞌe Yahvé,
Ndiosí mi̱iꞌ i̱,
kuaꞌa̱ꞌ va̱ tyu̱u̱n kaꞌnuꞌ ni̱ xa̱a̱ u̱nꞌ xaꞌa̱ꞌ ndu̱,
te̱ ña̱ va̱ꞌa̱ ña̱ tyituní u̱nꞌ xaꞌa̱ꞌ ndu̱ ndii,
kuaꞌa̱ꞌ xa̱va̱ꞌa̱ a̱.
Naaꞌ sa̱kanꞌ te̱ kaꞌa̱n i̱ xaꞌa̱ꞌ sa̱kuuꞌ ña̱ ja̱a̱nꞌ nuu̱ꞌ ne̱ yivi̱ꞌ ndii,
köo̱ꞌ kivi̱ꞌ ndi̱ꞌi̱ a̱ kaꞌa̱n i̱ xaꞌa̱ꞌ.
6 Sa̱kanꞌ ña̱ yoꞌó ndii,
xtäni̱ ka̱ u̱nꞌ ña̱ xaꞌni̱ꞌ ne̱ yivi̱ꞌ ki̱tiꞌ xiinꞌ ña̱ nasoko̱ꞌ ni̱a̱ ña̱ꞌa̱ nuu̱ꞌ u̱nꞌ.
Te̱ vi̱ti̱n ña̱ xa̱ ni̱ ta̱xi̱ u̱nꞌ ni̱ xi̱ni̱ so̱ꞌo̱ i̱ ña̱ kaꞌán u̱nꞌ ndii,
ni̱ ku̱nda̱ni̱ i̱ ña̱ xtäni̱ ka̱ u̱nꞌ ña̱ xaꞌmiꞌ ni̱a̱ ki̱tiꞌ nuu̱ꞌ u̱nꞌ,
ni̱ nde̱e̱ ña̱ nasoko̱ꞌ ni̱a̱ ña̱ꞌa̱ nuu̱ꞌ u̱nꞌ te̱ sa̱ndoyoꞌ u̱nꞌ ku̱a̱tyi̱ ni̱a̱.
7 Sa̱kanꞌ na ni̱ kaꞌa̱n i̱ xiinꞌ u̱nꞌ ndii:
“Yoꞌoꞌ iinꞌ i̱,
naa yoso̱ꞌ a̱ xaꞌa̱ꞌ i̱ nuu̱ꞌ tu̱tu̱ tu̱ꞌu̱n nde̱iꞌ u̱nꞌ ña̱ ni̱ ke̱ꞌi̱ Moisés.
8 Ndiosí mi̱iꞌ i̱,
xtani̱ va̱ i̱ sa̱a̱ i̱ ña̱ kuní u̱nꞌ,
sa̱kanꞌ ña̱ ti̱xi̱n nimá i̱ ñuꞌuꞌ tu̱ꞌu̱n nde̱iꞌ u̱nꞌ.”
9 Nuu̱ꞌ kuaꞌa̱ꞌ ne̱ yivi̱ꞌ ni̱ kaꞌa̱n ndo̱so̱ꞌ i̱ xaꞌa̱ꞌ ña̱ xatyuunꞌ nda̱ku u̱nꞌ,
nï̱ ti̱a̱si̱ yu̱ꞌuꞌ i̱ nde̱e̱ i̱i̱n a̱,
süu̱ꞌ ja̱a̱nꞌ ndii,
ni̱ kaꞌa̱n ndo̱so̱ꞌ i̱ sa̱kuuꞌ a̱,
te̱ xiní kaxiꞌ yoꞌó,
Yahvé,
ña̱ sa̱kanꞌ xna̱ꞌa̱ ni̱ xa̱a̱ i̱.
10 Nï̱ ti̱si̱ꞌe i̱ ti̱xi̱n nimá i̱ ña̱ xatyuunꞌ nda̱ku u̱nꞌ nuu̱ꞌ nde̱e̱ i̱i̱n ne̱ yivi̱ꞌ,
süu̱ꞌ ja̱a̱nꞌ ndii,
ni̱ kaꞌa̱n i̱ xiinꞌ ni̱a̱ ña̱ saxinú xna̱ꞌa̱ u̱nꞌ ña̱ kaꞌán u̱nꞌ,
te̱ sa̱kakú tu̱ u̱nꞌ ne̱ yivi̱.
Nï̱ ti̱si̱ꞌe tu̱ i̱ ña̱ kuvita i̱ni̱ u̱nꞌ xaꞌa̱ꞌ ne̱ yivi̱ꞌ,
ni̱ nde̱e̱ ña̱ ndi̱xa̱ xaꞌa̱ꞌ u̱nꞌ nuu̱ꞌ ni̱a̱,
süu̱ꞌ ja̱a̱nꞌ ndii,
ni̱ kaꞌa̱n ndo̱so̱ꞌ i̱ xaꞌa̱ꞌ ña̱ ja̱a̱nꞌ nuu̱ꞌ kuaꞌa̱ꞌ ne̱ yivi̱ꞌ miiꞌ nakayá ni̱a̱.
11 Te̱ yoꞌó,
Yahvé,
sa̱a̱ u̱nꞌ ña̱ va̱ꞌa̱ te̱ vï̱kuii̱n u̱nꞌ ña̱ kuvita i̱ni̱ u̱nꞌ xaꞌa̱ꞌ i̱,
te̱ xaꞌa̱ꞌ a̱ ña̱ ndani̱ u̱nꞌ yuꞌu̱,
te̱ kuvita tu̱ i̱ni̱ u̱nꞌ xaꞌa̱ꞌ i̱ ndii,
sa̱a̱ u̱nꞌ ña̱ va̱ꞌa̱ te̱ ko̱to̱ u̱nꞌ yuꞌu̱ nde̱e̱ ndiꞌiꞌ ni̱ kivi̱ꞌ.
12 Sa̱kanꞌ ña̱ kuaꞌa̱ꞌ xa̱va̱ꞌa̱ tu̱ndoꞌo̱ꞌ yoo nuu̱ꞌ kivi̱ꞌ ñu̱u̱ i̱,
ni̱ nde̱e̱ kü̱ndi̱e̱eꞌ i̱ ka̱ꞌvi̱ i̱ a̱.
Te̱ xa̱ ni̱ ku̱ndi̱e̱eꞌ ña̱ ni̱a̱ꞌa ña̱ xaaꞌ i̱ taví a̱ yuꞌu̱,
te̱ nde̱e̱ xïní ka̱ i̱ sa̱a̱ sa̱a̱ i̱ te̱ kaku̱ i̱.
Kuaꞌa̱ꞌ yaꞌa̱ ka̱ a̱ te̱ sa̱kanꞌ sa̱kuuꞌ i̱xiꞌ xíniꞌ i̱,
te̱ nde̱e̱ nimá i̱ ndii,
köo̱ꞌ ka̱ xa̱tyiꞌ ka̱ ndi̱e̱e̱ꞌ a̱.
13 Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ sa̱kakú u̱nꞌ yuꞌu̱,
ni̱a̱ꞌa̱ kiꞌi̱ꞌ Yahvé te̱ tyi̱ndi̱e̱eꞌ u̱nꞌ yuꞌu̱.
14 Na ku̱ka̱ꞌa̱n nuu̱ꞌ sa̱kuuꞌ te̱ yivi̱ꞌ,
te̱ xikaꞌ ndukuꞌ ka̱ꞌni̱ꞌ yuꞌu̱,
te̱ na sa̱ndi̱e̱e̱ kuiꞌe u̱nꞌ sa̱kuuꞌ ra̱.
Na ku̱nu̱ sa̱kuuꞌ te̱ yivi̱ꞌ,
te̱ kuni sa̱ndii̱ꞌ xiinꞌ i̱,
te̱ na ku̱ka̱ꞌa̱n xa̱va̱ꞌa̱ ra̱ sa̱a̱ u̱nꞌ,
te̱ na̱ndi̱koꞌ ra̱ kuꞌu̱n ra̱.
15 Te̱ na sa̱ndi̱e̱e̱ kuiꞌe xa̱va̱ꞌa̱ u̱nꞌ,
te̱ sa̱kaꞌanꞌ xa̱va̱ꞌa̱ tu̱ u̱nꞌ sa̱kuuꞌ te̱ yivi̱ꞌ,
te̱ xakú ndi̱a̱a̱ yuꞌu̱ kaꞌán ra̱ ndii:
“A̱jaan,
vi̱ti̱n xna̱ꞌa̱ ndii,
ni̱ na̱ti̱i̱n ña̱ꞌaꞌ e̱ꞌ”,
katyi ra̱.
16 Ndisu̱ na na̱ku̱a̱tiaꞌ nimá sa̱kuuꞌ ne̱ nandukuꞌ yoꞌó,
te̱ na sii̱ꞌ tu̱ ku̱ni̱ nimá ni̱a̱ ku̱ni̱ ni̱a̱ yoꞌó.
Te̱ na i̱i̱n ni̱ nda̱ꞌaꞌ kaꞌa̱n sa̱kuuꞌ ne̱ kaꞌán va̱ nimá ña̱ sa̱kakú ña̱ꞌaꞌ u̱nꞌ ndii:
“Kaꞌnuꞌ va̱ ña̱ nduuꞌ Yahvé”,
katyi̱ ni̱a̱.
17 Te̱ yuꞌu̱,
Tákuiꞌe Yahvé,
tee̱ꞌ ndee te̱ ndaꞌvi kuuꞌ nduuꞌ i̱,
te̱ nduuꞌ tu̱ i̱ te̱ natiín va̱ ndii,
sa̱a̱ u̱nꞌ ña̱ va̱ꞌa̱ te̱ na̱ka̱ꞌanꞌ u̱nꞌ xaꞌa̱ꞌ i̱.
Sa̱kanꞌ ña̱ yoꞌó nduuꞌ ña̱ tyindieeꞌ yuꞌu̱,
te̱ su̱vi̱ tu̱ u̱nꞌ nduuꞌ ña̱ sakakú yuꞌu̱,
Tákuiꞌe Ndiosí mi̱iꞌ i̱,
sa̱a̱ u̱nꞌ ña̱ va̱ꞌa̱ te̱ numi̱ꞌ va̱ ki̱xi̱n u̱nꞌ.