Yoꞌoꞌ kaꞌán a̱ ña̱ köo̱ꞌ kuaꞌa̱ꞌ xa̱tyiꞌ kivi̱ꞌ xikaꞌ e̱ꞌ i̱i̱n yivi̱ꞌ
Ya̱a̱ ña̱ ni̱ xi̱ta̱ David nuu̱ꞌ Ndiosí ña̱ kuaꞌa̱n nda̱ꞌaꞌ Jedutún, te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
39
Ni̱ kaꞌa̱n i̱ xiinꞌ nimá i̱ ndii:
“Ko̱to̱ xiinꞌ miiꞌ va̱ i̱ xiinꞌ ña̱ xaaꞌ i̱,
te̱ ko̱to̱ va̱ tu̱ i̱ yu̱ꞌuꞌ i̱ xiinꞌ ña̱ kaꞌán i̱.
Te̱ ko̱to̱ va̱ tu̱ i̱ yaa̱ꞌ i̱ xiinꞌ ña̱ ndatuꞌunꞌ i̱
kii̱ꞌ itaꞌ ya̱ti̱n ne̱ xaaꞌ ña̱ ni̱a̱ꞌa”,
ni̱ katyi̱ i̱ xiinꞌ nimá i̱.
2 Sa̱kanꞌ na kuiiꞌ nde̱e̱ i̱i̱n ña̱ꞌa̱ nï̱ kaꞌa̱n i̱,
te̱ ni̱ nde̱e̱ xaꞌa̱ꞌ ña̱ va̱ꞌa̱ nï̱ kaꞌa̱n i̱.
Te̱ so̱ꞌo̱ ndi̱e̱eꞌ ka̱ uꞌvi̱ xini i̱.
3 Te̱ xaꞌa̱ꞌ a̱ ña̱ ndi̱e̱eꞌ va̱ xanini ku̱i̱ti̱ꞌ i̱ xaꞌa̱ꞌ ña̱ ja̱a̱nꞌ ndii,
nï̱ ku̱ndi̱e̱ni ka̱ nimá i̱,
te̱ ni̱ ki̱e̱e̱ sa̱kuuꞌ ña̱ xanini i̱ xaꞌa̱ꞌ ja̱a̱nꞌ yu̱ꞌuꞌ i̱ nde̱e̱ naa ñuꞌu̱,
sa̱kanꞌ te̱ ni̱ xa̱ꞌaꞌ i̱ kaꞌán tiꞌeꞌ i̱ sa̱kuuꞌ ña̱ ñuꞌuꞌ nimá i̱ ja̱a̱nꞌ ndii:
4 “Yahvé,
sa̱a̱ u̱nꞌ ña̱ va̱ꞌa̱ te̱ niaꞌa̱ u̱nꞌ yuꞌu̱ a̱ma̱ kuꞌu̱n ndi̱koꞌ i̱ ña̱ xikaꞌ i̱ i̱i̱n yivi̱ꞌ,
te̱ sa̱a̱ ka̱ taꞌanꞌ kivi̱ꞌ ku̱ti̱a̱ku̱ i̱ te̱ ku̱vi̱ i̱,
te̱ kuní i̱ ku̱nda̱ni̱ i̱ ña̱ ii̱ꞌ xa̱va̱ꞌa̱ yoo i̱.
5 Kuiti va̱ kivi̱ꞌ ñu̱u̱ i̱ ni̱ ta̱xi̱ u̱nꞌ nda̱ꞌaꞌ i̱,
te̱ nuu̱ꞌ yoꞌó ndii,
köo̱ꞌ nduuꞌ xa̱tyiꞌ kuiya̱ ña̱ xikaꞌ yuꞌu̱ i̱i̱n yivi̱ꞌ,
sa̱kanꞌ na kuiiꞌ naaꞌ kuaꞌa̱ꞌ kivi̱ꞌ xikaꞌ ndu̱ nuu̱ꞌ ñu̱ꞌuꞌ i̱i̱n yivi̱ꞌ ndii,
nduuꞌ a̱ nde̱e̱ naa ña̱ naꞌiꞌ tatyi̱ꞌ ne̱ yivi̱ꞌ untaꞌ ku̱i̱ti̱ꞌ nuu̱ꞌ yoꞌó.
Selah
6 Ña̱ nda̱ku nduuꞌ a̱ ndii,
sa̱kuuꞌ ne̱ yivi̱ꞌ i̱i̱n yivi̱ꞌ ndii,
ne̱ xkaꞌndíá kuaꞌa̱n ku̱i̱ti̱ꞌ nduuꞌ ni̱a̱ nde̱e̱ naa ku̱ndaꞌvi̱ ku̱i̱ti̱ꞌ,
te̱ köo̱ꞌ nde̱e̱ i̱i̱n xaꞌa̱ꞌ ña̱ kaya ni̱a̱ kuaꞌa̱ꞌ va̱ ña̱ vikaꞌ,
sa̱kanꞌ ña̱ xïní ni̱a̱ yo̱o̱ nda̱ꞌaꞌ ndoo̱ a̱”,
ni̱ katyi̱ i̱ xiinꞌ u̱nꞌ.
7 Te̱ vi̱ti̱n,
Tákuiꞌe,
naaꞌ sa̱kanꞌ nduuꞌ a̱ ndii,
köo̱ꞌ nde̱e̱ i̱i̱n ña̱ va̱ꞌa̱ ka̱ ku̱ndi̱a̱tu̱ i̱ni̱ yuꞌu̱ xaꞌa̱ꞌ.
Süu̱ꞌ ja̱a̱nꞌ ndii,
i̱i̱n nda̱a̱ꞌ yoꞌó ku̱i̱ti̱ꞌ ku̱vi̱ ndiatuꞌ i̱ni̱ i̱ tyi̱ndi̱e̱eꞌ yuꞌu̱.
8 Sa̱a̱ u̱nꞌ ña̱ va̱ꞌa̱ te̱ sa̱kakú u̱nꞌ yuꞌu̱ nuu̱ꞌ ku̱a̱tyi̱ i̱,
te̱ tä̱xi̱ u̱nꞌ ku̱ndi̱ꞌi̱ te̱ küuꞌ kaxiꞌ xiinꞌ i̱ xaꞌa̱ꞌ a̱ ña̱ ndoꞌoꞌ i̱.
9 Ni̱ xa̱ iꞌinꞌ xiinꞌ mi̱iꞌ i̱ nuu̱ꞌ u̱nꞌ,
te̱ nde̱e̱ i̱i̱n ña̱ꞌa̱ nï̱ kaꞌa̱n i̱,
sa̱kanꞌ ña̱ mi̱iꞌ yoꞌó ni̱ ti̱ꞌviꞌ ña̱ ndoꞌoꞌ i̱.
10 Ndisu̱ sa̱a̱ u̱nꞌ ña̱ va̱ꞌa̱ te̱ ta̱va̱ꞌ u̱nꞌ kuiꞌe̱ ña̱ sa̱ndoꞌoꞌ u̱nꞌ yuꞌu̱,
sa̱kanꞌ ña̱ kündieni xa̱tyiꞌ ka̱ i̱ xaaꞌ tu̱ndoꞌo̱ꞌ ña̱ ku̱a̱xi̱ nda̱ꞌaꞌ u̱nꞌ te̱ sandoꞌoꞌ a̱ yuꞌu̱.
11 Yoꞌó ndii,
xiinꞌ tu̱ndoꞌo̱ꞌ sa̱ndoꞌoꞌ u̱nꞌ sa̱kuuꞌ ne̱ yivi̱ꞌ i̱i̱n yivi̱ꞌ xaꞌa̱ꞌ ku̱a̱tyi̱ ña̱ xaaꞌ ni̱a̱.
Te̱ ña̱ ndani̱ xa̱va̱ꞌa̱ ni̱a̱ ndii,
sa̱ndo̱ñuꞌuꞌ u̱nꞌ u̱n nde̱e̱ naa xaaꞌ ndi̱kiꞌndiꞌ.
Ña̱ nda̱ku nduuꞌ a̱ ña̱ ne̱ yivi̱ꞌ ndii,
nduuꞌ ni̱a̱ nde̱e̱ naa ña̱ naꞌiꞌ tatyi̱ꞌ e̱ꞌ untaꞌ ku̱i̱ti̱ꞌ.
Selah
12 Sa̱a̱ u̱nꞌ ña̱ va̱ꞌa̱,
Yahvé,
ku̱ni̱ so̱ꞌo̱ u̱nꞌ si̱u̱ꞌunꞌ ña̱ kaꞌán i̱ xiinꞌ u̱nꞌ,
te̱ ta̱xi̱ so̱ꞌo̱ tu̱ u̱nꞌ ña̱ kaꞌán ndaꞌvi i̱ nuu̱ꞌ u̱nꞌ ña̱ tyi̱ndi̱e̱eꞌ u̱nꞌ yuꞌu̱.
Sa̱a̱ u̱nꞌ ña̱ va̱ꞌa̱ te̱ na̱ku̱i̱i̱n kiꞌi̱ꞌ u̱nꞌ ña̱ xakuꞌ vi̱ꞌ i̱ te̱ kaꞌán i̱ xiinꞌ u̱nꞌ,
sa̱kanꞌ ña̱ nduuꞌ i̱ nde̱e̱ naa te̱ tukuꞌ ku̱i̱ti̱ꞌ nuu̱ꞌ yoꞌó,
te̱ nduuꞌ tu̱ i̱ i̱i̱n te̱ xkaꞌndíá kuaꞌa̱n ku̱i̱ti̱ꞌ nde̱e̱ naa ni̱ nduu̱ tu̱ sa̱kuuꞌ te̱ xii̱ꞌ ya̱taꞌ i̱ kii̱ꞌ ni̱ xika̱ ra̱ i̱i̱n yivi̱ꞌ.
13 Sa̱a̱ u̱nꞌ ña̱ va̱ꞌa̱ te̱ nä̱saa̱ꞌ u̱nꞌ ku̱ni̱ u̱nꞌ yuꞌu̱,
na ko̱o̱ mi̱iꞌ i̱ sa̱kanꞌ,
te̱ na̱ku̱naa̱ ndi̱e̱e̱ꞌ i̱,
ña̱ kuní ka̱ ku̱vi̱ ndi̱ꞌi̱ i̱,
te̱ köo̱ꞌ ka̱ i̱ ka̱ka̱ nuu̱ꞌ ñu̱ꞌuꞌ i̱i̱n yivi̱ꞌ yoꞌoꞌ.