Yoꞌoꞌ kaꞌán David xiinꞌ Ndiosí te̱ tyi̱ndi̱e̱eꞌ ña̱ꞌaꞌ a̱ kii̱ꞌ yoo tu̱ndoꞌo̱ꞌ nuu̱ꞌ kivi̱ꞌ ñu̱u̱ ra̱
Ya̱a̱ ña̱ ni̱ xi̱ta̱ David nuu̱ꞌ Ndiosí kii̱ꞌ nasoko̱ꞌ ra̱ te̱ na̱ka̱ꞌanꞌ a̱ xaꞌa̱ꞌ ra̱.
38
Tákuiꞌe Yahvé,
kä̱siꞌe̱ u̱nꞌ nuu̱ꞌ i̱ xaꞌa̱ꞌ a̱ ña̱ xiꞌé u̱nꞌ,
ni̱ nde̱e̱ kü̱tunꞌ tu̱ u̱nꞌ yuꞌu̱ xaꞌa̱ꞌ a̱ ña̱ ni̱ na̱saa̱ꞌ va̱ u̱nꞌ.
2 Sa̱kanꞌ ña̱ sandoꞌoꞌ va̱ u̱nꞌ yuꞌu̱ nde̱e̱ naa xaaꞌ kuxi̱ kii̱ꞌ kiꞌví nu̱ꞌ i̱i̱nꞌ te̱ yivi̱ꞌ,
te̱ xa̱ ni̱ ku̱tunꞌ u̱nꞌ yuꞌu̱ xiinꞌ nda̱ꞌaꞌ u̱nꞌ.
3 Te̱ xaꞌa̱ꞌ a̱ ña̱ xiꞌé u̱nꞌ xini u̱nꞌ yuꞌu̱ xaꞌa̱ꞌ ku̱a̱tyi̱ ña̱ ni̱ xa̱a̱ i̱ ndii,
ka̱niiꞌ ñu̱ꞌuꞌ ndeꞌi̱ i̱ kuni ku̱vi̱ xaaꞌ u̱nꞌ,
te̱ sa̱kuuꞌ tu̱ i̱kiꞌ i̱ kuꞌví xaaꞌ u̱nꞌ.
4 Ndoꞌoꞌ va̱ i̱ xaaꞌ ña̱ ni̱a̱ꞌa ña̱ ni̱ xa̱a̱ i̱,
te̱ ni̱ ku̱u̱ vie̱ va̱ a̱ ndisoꞌ i̱ xikaꞌ i̱,
te̱ kü̱ndi̱e̱ni ka̱ i̱ kuuꞌ a̱.
5 Te̱ xaꞌa̱ꞌ ku̱a̱tyi̱ ña̱ xaaꞌ i̱ ndii,
teꞌí miiꞌ kuꞌví ndi̱a̱a̱ i̱,
te̱ ki̱ni̱ va̱ xaꞌán a̱.
6 Uꞌvi̱ xa̱va̱ꞌa̱ xini i̱ te̱ nde̱e̱ nakuiyoꞌ vi̱ꞌ i̱ xaaꞌ a̱,
te̱ ndu̱viꞌ ndaꞌvi kuni i̱ xikaꞌ i̱ xaaꞌ a̱.
7 Xixí tiaku vi̱ꞌ i̱ xaaꞌ ka̱ꞌniꞌ ndi̱e̱eꞌ va̱,
sa̱kanꞌ na kuiiꞌ köo̱ꞌ nde̱e̱ i̱i̱n xaanꞌ ñu̱ꞌuꞌ ndeꞌi̱ i̱ va̱ꞌa̱ kuni.
8 Xa̱ ni̱ ndi̱ꞌi̱ ndo̱o̱ ndi̱e̱e̱ꞌ i̱,
te̱ nde̱e̱ kü̱vi̱ ka̱ ndo̱koo̱ i̱,
te̱ tanaꞌ vi̱ꞌ i̱ xaꞌa̱ꞌ a̱ ña̱ ndoꞌoꞌ va̱ nimá i̱.
9 Tákuiꞌe,
xiní yoꞌó sa̱kuuꞌ ña̱ kaꞌán nimá i̱ xaꞌa̱ꞌ,
te̱ xini so̱ꞌo̱ tu̱ u̱nꞌ sa̱kuuꞌ ña̱ tanaꞌ ndi̱i i̱ xaꞌa̱ꞌ.
10 Te̱ nimá i̱ ndii,
kiꞌi̱ꞌ va̱ katin a̱,
te̱ köo̱ꞌ ka̱ ka̱ndi̱e̱e̱ꞌ i̱,
te̱ xa̱ xa̱ꞌaꞌ tüviꞌ ka̱ tu̱ ndu̱tyiꞌ nuu̱ꞌ i̱.
11 Sa̱kuuꞌ ne̱ i̱i̱n kuuꞌ xiinꞌ i̱ xiinꞌ ne̱ xiní taꞌanꞌ xiinꞌ i̱ ni̱ kuxikaꞌ nuu̱ꞌ i̱
xaꞌa̱ꞌ a̱ ña̱ yiꞌvi ni̱a̱ ko̱to̱ ka̱ naku̱n ndi̱a̱a̱ ña̱ꞌaꞌ kuiꞌe̱ ña̱ ndoꞌoꞌ i̱,
te̱ nde̱e̱ ne̱ ndieeꞌ vi̱ꞌe̱ mi̱iꞌ i̱ ni̱ ku̱u̱ xikaꞌ nuu̱ꞌ i̱ xaꞌa̱ꞌ ña̱ kuni ku̱vi̱ i̱.
12 Te̱ ne̱ kuni ka̱ꞌni̱ꞌ yuꞌu̱ ndii,
xitoꞌ níániꞌ ni̱a̱ yuꞌu̱ xiinꞌ tunꞌ ii̱ꞌ te̱ ka̱ꞌni̱ꞌ ndiꞌiꞌ ni̱a̱ yuꞌu̱,
te̱ ne̱ kaꞌán nimá ña̱ ku̱vi̱ i̱ ndii,
tyituní ni̱a̱ sa̱a̱ sa̱a̱ ni̱a̱ te̱ ka̱ꞌni̱ꞌ ni̱a̱ yuꞌu̱,
te̱ sa̱a̱ kivi̱ꞌ kaꞌán ni̱a̱ tu̱n vixi̱ xaꞌa̱ꞌ i̱.
13 Ndisu̱ yuꞌu̱ ndii,
kuuꞌ i̱ nde̱e̱ naa te̱ soꞌoꞌ,
te̱ täxiꞌ so̱ꞌo̱ i̱ ña̱ kaꞌán ni̱a̱,
kuuꞌ tu̱ i̱ nde̱e̱ naa te̱ iꞌinꞌ nuu̱ꞌ ni̱a̱,
te̱ käꞌán i̱ nde̱e̱ i̱i̱n ña̱ꞌa̱.
14 Xaꞌa̱ꞌ a̱ ja̱a̱nꞌ na kuuꞌ i̱ nde̱e̱ naa te̱ soꞌoꞌ,
te̱ ni̱ nde̱e̱ nï̱ kaꞌa̱n tu̱ i̱ nde̱e̱ i̱i̱n yu̱ꞌuꞌ xiinꞌ ni̱a̱.
15 Sa̱kanꞌ ña̱ yoꞌó,
Tákuiꞌe Yahvé,
ndiatuꞌ i̱ni̱ i̱ tyi̱ndi̱e̱eꞌ yuꞌu̱,
te̱ yoꞌó,
Yahvé Ndiosí mi̱iꞌ i̱,
ndiatuꞌ i̱ni̱ i̱ na̱ku̱i̱i̱n u̱nꞌ ña̱ kaꞌán i̱ xiinꞌ u̱nꞌ xaꞌa̱ꞌ i̱.
16 Ña̱ xikán i̱ nuu̱ꞌ u̱nꞌ vi̱ti̱n ndii,
ña̱ tä̱xi̱ u̱nꞌ kuaku̱ ndi̱a̱a̱ te̱ ndasiꞌ taꞌanꞌ xiinꞌ i̱ yuꞌu̱ xaꞌa̱ꞌ ña̱ ndoꞌoꞌ i̱ nduuꞌ a̱,
ni̱ nde̱e̱ tä̱xi̱ tu̱ u̱nꞌ ña̱ kaꞌa̱n ñuñuꞌ ra̱ kii̱ꞌ ku̱ni̱ ra̱ ke̱ꞌniꞌ i̱ te̱ xaa̱ xa̱tyiꞌ i̱ ñu̱ꞌuꞌ.
17 Sa̱kanꞌ ña̱ xa̱ sa̱kanꞌ ni̱ kuuꞌ te̱ xaa̱ i̱ ñu̱ꞌuꞌ,
te̱ ña̱ uꞌvi̱ xini i̱ ndii,
xïinꞌ xa̱tyiꞌ a̱ ki̱e̱e̱ a̱ yuꞌu̱.
18 Xaꞌa̱ꞌ a̱ ja̱a̱nꞌ na naꞌmá i̱ sa̱kuuꞌ ku̱a̱tyi̱ i̱ nuu̱ꞌ u̱nꞌ,
te̱ ndiꞌni̱ va̱ nimá i̱ xaꞌa̱ꞌ ku̱a̱tyi̱ ña̱ ni̱ xa̱a̱ i̱.
19 Te̱ ndasiꞌ yuꞌu̱ ndii,
yo̱o̱ va̱ ndi̱e̱e̱ꞌ ra̱,
te̱ kuäsa̱ꞌ tu̱ kuni ku̱vi̱ nde̱e̱ i̱i̱n ra̱.
Yoo kuaꞌa̱ꞌ va̱ te̱ ndasiꞌ yuꞌu̱ tee̱ꞌ ndee köo̱ꞌ a̱ xaaꞌ xa̱tyiꞌ i̱ xiinꞌ ra̱.
20 Tee̱ꞌ ndee ña̱ va̱ꞌa̱ xaaꞌ i̱ xaꞌa̱ꞌ ra̱ ndii,
ña̱ ni̱a̱ꞌa xaaꞌ ra̱ xiinꞌ i̱,
te̱ kani̱a̱ꞌa ra̱ xaꞌa̱ꞌ i̱ kii̱ꞌ xaaꞌ i̱ ña̱ va̱ꞌa̱.
21 Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ nä̱ko̱o̱ u̱nꞌ yuꞌu̱.
Ndiosí mi̱iꞌ i̱,
sa̱a̱ u̱nꞌ ña̱ va̱ꞌa̱ te̱ kü̱xikaꞌ u̱nꞌ nuu̱ꞌ i̱.
22 Tákuiꞌe Ndiosí,
ni̱a̱ꞌa̱ kiꞌi̱ꞌ te̱ tyi̱ndi̱e̱eꞌ u̱nꞌ yuꞌu̱.
I̱i̱n nda̱a̱ꞌ yoꞌó nduuꞌ ña̱ ku̱vi̱ sa̱kakú yuꞌu̱.