Nda̱ꞌaꞌ ne̱ xatyuunꞌ nda̱ku ndoo̱ ñu̱ꞌuꞌ i̱i̱n yivi̱ꞌ, te̱ nduxi̱n ndo̱o̱ sa̱kuuꞌ ne̱ xaaꞌ ña̱ ni̱a̱ꞌa
Ya̱a̱ ña̱ ni̱ xi̱ta̱ David nuu̱ꞌ Ndiosí.
37
Nä̱saa̱ꞌ u̱nꞌ xaꞌa̱ꞌ ña̱ kieeꞌ va̱ꞌa̱ ne̱ xaaꞌ ña̱ ni̱a̱ꞌa,
ni̱ nde̱e̱ kü̱nda̱si̱ꞌ tu̱ nuu̱ꞌ u̱nꞌ xaꞌa̱ꞌ ña̱ꞌa̱ ña̱ kumiꞌ ne̱ xaaꞌ ña̱ ni̱a̱ꞌa.
2 Sa̱kanꞌ ña̱ yatyi̱ va̱ xiꞌí ni̱a̱ nde̱e̱ naa xaaꞌ kuꞌu̱ kuii̱ꞌ ña̱ yatyi̱ va̱ xiꞌí a̱,
te̱ yatyi̱ va̱ tu̱ ku̱vi̱ ni̱a̱ nde̱e̱ naa xaaꞌ i̱ti̱a̱ kuii̱ꞌ ña̱ yoo yo̱soꞌ,
ña̱ yatyi̱ va̱ ityí a̱.
3 I̱ni̱ u̱nꞌ ku̱ni̱ u̱nꞌ Yahvé,
te̱ sa̱a̱ tu̱ u̱nꞌ ña̱ va̱ꞌa̱,
sa̱kanꞌ te̱ ka̱ka̱ ndi̱tu̱ni̱ u̱nꞌ nuu̱ꞌ ñu̱ꞌuꞌ i̱i̱n yivi̱ꞌ,
te̱ ki̱e̱e̱ va̱ꞌa̱ u̱nꞌ xiinꞌ sa̱kuuꞌ ña̱ sa̱a̱ u̱nꞌ.
4 Te̱ ku̱a̱tiaꞌ tu̱ nimá u̱nꞌ ku̱ni̱ u̱nꞌ Yahvé,
te̱ ta̱xi̱ a̱ nda̱ꞌaꞌ u̱nꞌ sa̱kuuꞌ ña̱ xikán nimá u̱nꞌ xaꞌa̱ꞌ.
5 Nda̱ꞌaꞌ Yahvé sa̱na̱kuaꞌa u̱nꞌ sa̱kuuꞌ ña̱ xaaꞌ u̱nꞌ,
te̱ i̱ni̱ u̱nꞌ ku̱ni̱ ña̱ꞌaꞌ u̱nꞌ,
te̱ tyi̱ndi̱e̱eꞌ a̱ yoꞌó.
6 Te̱ mi̱iꞌ Ndiosí sa̱a̱ sa̱kanꞌ te̱ ku̱ni̱ sa̱kuuꞌ ne̱ yivi̱ꞌ ña̱ te̱ xatyuunꞌ nda̱ku nduuꞌ u̱nꞌ,
te̱ yiꞌe̱ a̱ nde̱e̱ naa kii̱ꞌ ku̱a̱xi̱ kitúꞌ.
Te̱ ña̱ xatyuunꞌ nda̱ku u̱nꞌ ndii,
sa̱yiꞌé a̱ yoꞌó nde̱e̱ naa yiꞌé ñu̱ꞌu̱ i̱i̱n keꞌinꞌ sa̱va̱.
7 Taxi̱nꞌ ku̱i̱ti̱ꞌ ko̱o̱ yu̱ꞌuꞌ u̱nꞌ nuu̱ꞌ Yahvé,
te̱ ndiatuꞌ kuiee i̱ni̱ u̱nꞌ nde̱e̱ sa̱a̱ a̱ mi̱iꞌ a̱ ña̱ xikán u̱nꞌ nuu̱ꞌ a̱.
Te̱ nä̱saa̱ꞌ u̱nꞌ xaꞌa̱ꞌ a̱ ña̱ kuvikaꞌ ne̱ xaaꞌ ña̱ ni̱a̱ꞌa,
ni̱ nde̱e̱ kü̱ndi̱ꞌni̱ tu̱ u̱nꞌ xaꞌa̱ꞌ ña̱ ni̱a̱ꞌa ña̱ tyituní ni̱a̱ sa̱a̱ ni̱a̱.
8 Na̱ko̱o̱ u̱nꞌ ña̱ nasaáꞌ u̱nꞌ,
te̱ na̱ko̱o̱ tu̱ u̱nꞌ ña̱ i̱ꞌniꞌ va̱ u̱nꞌ.
Nä̱saa̱ꞌ xa̱tyiꞌ u̱nꞌ,
sa̱kanꞌ ña̱ ña̱ ja̱a̱nꞌ sakiꞌi̱ꞌ yoꞌó te̱ sa̱a̱ u̱nꞌ ña̱ ni̱a̱ꞌa.
9 Sa̱kanꞌ ña̱ ne̱ xaaꞌ ña̱ ni̱a̱ꞌa ndii,
ne̱ nduxi̱n ku̱ndu̱u̱ ni̱a̱,
ndisu̱ ne̱ i̱ni̱ xini Yahvé ndii,
nda̱ꞌaꞌ ne̱ ja̱a̱nꞌ ndoo̱ ñu̱ꞌuꞌ i̱i̱n yivi̱ꞌ ku̱ndu̱u̱ ña̱ꞌa̱ ni̱a̱.
10 Sa̱kanꞌ ña̱ nä̱ꞌaꞌ ka̱ te̱ ndo̱ñuꞌuꞌ sa̱kuuꞌ ne̱ xaaꞌ ña̱ ni̱a̱ꞌa,
tee̱ꞌ ndee na̱ndu̱kuꞌ uꞌvi̱ ña̱ꞌaꞌ u̱nꞌ ndii,
köo̱ꞌ ka̱ ni̱a̱ ku̱ni̱ u̱nꞌ nuu̱ꞌ.
11 Ndisu̱ nda̱ꞌaꞌ ne̱ maso ndoo̱ ñu̱ꞌuꞌ i̱i̱n yivi̱ꞌ ku̱ndu̱u̱ ña̱ꞌa̱ ni̱a̱,
te̱ ku̱ndi̱e̱e̱ mani̱ꞌ ni̱a̱.
12 Ne̱ xaaꞌ ña̱ ni̱a̱ꞌa ndii,
tyituní ni̱a̱ sa̱ndoꞌoꞌ ni̱a̱ ne̱ xatyuunꞌ nda̱ku,
te̱ xitoꞌ ndiꞌe̱ꞌ xiꞌé ña̱ꞌaꞌ ni̱a̱.
13 Ndisu̱ Tákuiꞌe Ndiosí ndii,
xakú ndi̱a̱a̱ ku̱i̱ti̱ꞌ ña̱ꞌaꞌ a̱,
sa̱kanꞌ ña̱ xiní a̱ ña̱ nä̱ꞌaꞌ ka̱ te̱ xaa̱ kivi̱ꞌ ña̱ sa̱naꞌmá a̱ sa̱kuuꞌ ni̱a̱.
14 Ne̱ xaaꞌ ña̱ ni̱a̱ꞌa ndii,
tava̱ꞌ ni̱a̱ ityi̱ ni̱a̱ ti̱xi̱n i̱i̱nꞌ a̱,
te̱ natyitaꞌnuꞌ ni̱ꞌi̱ ni̱a̱ yo̱ꞌoꞌ nuu̱ꞌ tunꞌ to̱so̱ ni̱a̱,
te̱ ka̱ꞌni̱ꞌ ni̱a̱ ne̱ ndaꞌvi kuuꞌ xiinꞌ ne̱ ndoꞌoꞌ xaaꞌ ne̱ yivi̱ꞌ.
Te̱ ka̱ꞌni̱ꞌ tu̱ ni̱a̱ ne̱ xatyuunꞌ nda̱ku.
15 Ndisu̱ ityi̱ ni̱a̱ ja̱a̱nꞌ ndii,
nimá mi̱iꞌ ni̱a̱ tu̱vi̱ te̱ yivi̱ꞌ a̱,
te̱ taꞌnu̱ ndo̱o̱ tu̱ tunꞌ to̱so̱ ndisoꞌ ni̱a̱.
16 Va̱ꞌa̱ ka̱ ku̱miꞌ e̱ꞌ siee ku̱i̱ti̱ꞌ ña̱ꞌa̱,
te̱ xatyuunꞌ nda̱ku e̱ꞌ,
te̱ sa̱kanꞌ ña̱ ku̱miꞌ e̱ꞌ kuaꞌa̱ꞌ ña̱ vikaꞌ ña̱ ki̱ꞌi̱n e̱ꞌ nda̱ꞌaꞌ kuaꞌa̱ꞌ ne̱ xaaꞌ ña̱ ni̱a̱ꞌa.
17 Sa̱kanꞌ ña̱ sa̱ndokoꞌ ndo̱o̱ Ndiosí ña̱ ndi̱e̱eꞌ ne̱ xaaꞌ ña̱ ni̱a̱ꞌa,
ndisu̱ tyindieeꞌ Yahvé ne̱ xatyuunꞌ nda̱ku.
18 Xiní Yahvé ña̱ ndoꞌoꞌ ne̱ xatyuunꞌ nda̱ku sa̱a̱ kivi̱ꞌ,
te̱ ña̱ ndoo̱ nda̱ꞌaꞌ ne̱ ja̱a̱nꞌ ndii,
ña̱ köo̱ꞌ kivi̱ꞌ ndo̱ñuꞌuꞌ nduuꞌ a̱.
19 Te̱ köo̱ꞌ kivi̱ꞌ ku̱ka̱ꞌa̱n nuu̱ꞌ ni̱a̱ kii̱ꞌ xaa̱ kivi̱ꞌ ña̱ ko̱o̱ tu̱ndoꞌo̱ꞌ i̱i̱n yivi̱,
sa̱kanꞌ ña̱ ko̱o̱ ña̱ ka̱xi̱ꞌ ni̱a̱ kivi̱ꞌ ña̱ ko̱o̱ so̱ko̱.
20 Ndisu̱ ne̱ xaaꞌ ña̱ ni̱a̱ꞌa ndii,
ku̱vi̱ ndo̱o̱ ni̱a̱,
te̱ ne̱ ndasiꞌ taꞌanꞌ xiinꞌ Yahvé ndii,
nduuꞌ ni̱a̱ nde̱e̱ naa i̱ta̱ kuꞌu̱.
Te̱ ndo̱ñuꞌuꞌ sa̱kuuꞌ ni̱a̱ nde̱e̱ naa xaaꞌ ñuꞌma̱.
21 Ne̱ xaaꞌ ña̱ ni̱a̱ꞌa,
kii̱ꞌ tatu ni̱a̱ xu̱ꞌunꞌ ndii,
köo̱ꞌ kivi̱ꞌ nataxiꞌ ni̱a̱ a̱.
Ndisu̱ ne̱ xatyuunꞌ nda̱ku ndii,
kuvita i̱ni̱ ni̱a̱ xaꞌa̱ꞌ ne̱ yivi̱ꞌ,
te̱ taxiꞌ ni̱a̱ ña̱ tiaku ne̱ ja̱a̱nꞌ.
22 Tákuiꞌe Ndiosí ndii,
nda̱ꞌaꞌ ne̱ sañuꞌuꞌ a̱ ndoo̱ ñu̱ꞌuꞌ i̱i̱n yivi̱ꞌ sa̱a̱ a̱,
ndisu̱ sa̱na̱tyaꞌanꞌ a̱ sa̱kuuꞌ ne̱ xaaꞌ ña̱ ni̱a̱ꞌa te̱ nduxi̱n xa̱tyiꞌ ni̱a̱.
23 Mi̱iꞌ Yahvé xitoꞌ i̱tyiꞌ ne̱ yivi̱ꞌ te̱ xikaꞌ ni̱a̱,
te̱ va̱ꞌa̱ kuni a̱ xini ña̱ꞌaꞌ a̱ kii̱ꞌ xikaꞌ ni̱a̱ sa̱a̱ kaꞌán tyuunꞌ a̱.
24 Tee̱ꞌ ndee ke̱kiꞌi̱ ni̱a̱ ndii,
köo̱ꞌ kivi̱ꞌ na̱ko̱o̱ ni̱a̱ i̱tyiꞌ Ndiosí,
sa̱kanꞌ ña̱ mi̱iꞌ Yahvé tyindieeꞌ ña̱ꞌaꞌ te̱ xikaꞌ ni̱a̱ i̱tyiꞌ a̱.
25 Ni̱ nde̱e̱ kii̱ꞌ ni̱ nduu̱ i̱ te̱ sa̱va̱,
te̱ nde̱e̱ vi̱ti̱n ña̱ nduuꞌ i̱ te̱ xi̱xa̱ ndii,
köo̱ꞌ kivi̱ꞌ ni̱ xi̱ni̱ i̱ nde̱e̱ i̱i̱n ne̱ xatyuunꞌ nda̱ku ña̱ köo̱ꞌ tyindieeꞌ ña̱ꞌaꞌ,
ni̱ nde̱e̱ köo̱ꞌ kivi̱ꞌ ni̱ xi̱ni̱ tu̱ i̱ ña̱ xikaꞌ siꞌe̱ ni̱a̱ xikán ni̱a̱ xita̱ꞌ ku̱xi̱ ni̱a̱.
26 Ne̱ xatyuunꞌ nda̱ku ndii,
sa̱kuuꞌ kivi̱ꞌ kuvita i̱ni̱ ni̱a̱ xaꞌa̱ꞌ ne̱ yivi̱ꞌ,
te̱ satatu ña̱ꞌaꞌ ni̱a̱ yo̱o̱ ka̱ nduuꞌ ña̱ꞌa̱,
te̱ siꞌe̱ ni̱a̱ ndii,
sañuꞌuꞌ ña̱ꞌaꞌ Ndiosí.
27 Ku̱xikaꞌ u̱nꞌ nuu̱ꞌ ña̱ ni̱a̱ꞌa,
te̱ sa̱a̱ u̱nꞌ ña̱ va̱ꞌa̱,
te̱ ndoo̱ u̱nꞌ ku̱nduꞌu̱ꞌ u̱nꞌ nuu̱ꞌ ñu̱ꞌuꞌ i̱i̱n yivi̱ꞌ ña̱ ta̱xi̱ Ndiosí nda̱ꞌaꞌ u̱nꞌ nde̱e̱ ndiꞌiꞌ ni̱ kivi̱ꞌ.
28 Sa̱kanꞌ ña̱ Yahvé ndii,
xtani̱ a̱ ne̱ xatyuunꞌ nda̱ku,
te̱ köo̱ꞌ kivi̱ꞌ na̱ko̱o̱ i̱i̱n nda̱a̱ꞌ a̱ ne̱ nduuꞌ kuenta a̱.
Te̱ nde̱e̱ ndiꞌiꞌ ni̱ kivi̱ꞌ ko̱to̱ ña̱ꞌaꞌ a̱ te̱ köo̱ꞌ a̱ ku̱ndo̱ꞌo̱ ni̱a̱,
ndisu̱ ka̱ꞌni̱ꞌ ndo̱o̱ a̱ si̱a̱niꞌ xikaꞌ ne̱ xaaꞌ ña̱ ni̱a̱ꞌa.
29 Nda̱ꞌaꞌ ne̱ xatyuunꞌ nda̱ku ndoo̱ ñu̱ꞌuꞌ i̱i̱n yivi̱ꞌ ku̱ndu̱u̱ ña̱ꞌa̱ ni̱a̱,
te̱ xa̱ nuu̱ꞌ ñu̱ꞌuꞌ ja̱a̱nꞌ ndoo̱ ni̱a̱ ku̱ndi̱e̱e̱ ni̱a̱ nde̱e̱ ndiꞌiꞌ ni̱ kivi̱ꞌ.
30 Ne̱ xatyuunꞌ nda̱ku,
kii̱ꞌ ndatuꞌunꞌ ni̱a̱ ndii,
kuiee kaꞌán ni̱a̱,
te̱ ña̱ xini tuní ku̱i̱ti̱ꞌ ndatuꞌunꞌ ni̱a̱,
te̱ ña̱ nda̱ku ku̱i̱ti̱ꞌ kieeꞌ yu̱ꞌuꞌ ni̱a̱ kii̱ꞌ kaꞌán ni̱a̱ xiinꞌ ne̱ yivi̱ꞌ.
31 Sa̱a̱ kivi̱ꞌ xanini ni̱a̱ xaꞌa̱ꞌ ña̱ kaꞌán tu̱ꞌu̱n nde̱iꞌ Ndiosí ña̱ xakaꞌnuꞌ ni̱a̱,
xaꞌa̱ꞌ a̱ ja̱a̱nꞌ na köo̱ꞌ kivi̱ꞌ ke̱ꞌniꞌ ni̱a̱ te̱ na̱ko̱o̱ ni̱a̱ i̱tyiꞌ a̱.
32 Ne̱ xaaꞌ ña̱ ni̱a̱ꞌa ndii,
níániꞌ ni̱a̱ ne̱ xatyuunꞌ nda̱ku,
ndiani̱ te̱ ka̱ꞌni̱ꞌ ña̱ꞌaꞌ ni̱a̱ xtun.
33 Ndisu̱ tä̱xi̱ Yahvé ka̱ꞌni̱ꞌ ne̱ xaaꞌ ña̱ ni̱a̱ꞌa ja̱a̱nꞌ ne̱ xatyuunꞌ nda̱ku,
ni̱ nde̱e̱ tä̱xi̱ tu̱ a̱ ta̱a̱nꞌ ña̱ꞌaꞌ kuesí vi̱ꞌe̱ ka̱a̱ kii̱ꞌ tyi̱nduꞌu̱ꞌ ne̱ xaaꞌ ña̱ ni̱a̱ꞌa ja̱a̱nꞌ ku̱a̱tyi̱ xaꞌa̱ꞌ ni̱a̱ nuu̱ꞌ ra̱.
34 I̱ni̱ naa i̱ni̱ u̱nꞌ ku̱ni̱ u̱nꞌ Yahvé,
te̱ ka̱ka̱ ni̱ꞌi̱ u̱nꞌ i̱tyiꞌ a̱,
te̱ ki̱ꞌi̱n kaꞌnuꞌ a̱ yoꞌó kii̱ꞌ na̱ta̱xi̱ a̱ ñu̱ꞌuꞌ nda̱ꞌaꞌ u̱nꞌ ku̱ndu̱u̱ ña̱ꞌa̱ u̱nꞌ.
Te̱ kii̱ꞌ ka̱ꞌni̱ꞌ a̱ sa̱kuuꞌ ne̱ xaaꞌ ña̱ ni̱a̱ꞌa ja̱a̱nꞌ ndii,
ku̱ni̱ ndu̱tyiꞌ nuu̱ꞌ yoꞌó ña̱ ja̱a̱nꞌ.
35 Ni̱ xi̱ni̱ yuꞌu̱ ne̱ xaaꞌ ña̱ ni̱a̱ꞌa xiinꞌ ne̱ mi̱iꞌ kuuꞌ xiinꞌ ne̱ yivi̱ꞌ ne̱ kuñuñuꞌ xa̱va̱ꞌa̱,
te̱ ni̱ xi̱ni̱ tu̱ i̱ ña̱ so̱ꞌo̱ kukuaꞌa̱ꞌ ka̱ ni̱a̱ nde̱e̱ naa i̱tunꞌ cedro,
tunꞌ itaꞌ xiki̱ꞌ nuu̱ꞌ ñu̱ꞌuꞌ ña̱ naniꞌ Líbano miiꞌ ñaꞌma va̱ ñu̱ꞌuꞌ.
36 Ndisu̱ kii̱ꞌ ni̱ na̱ko̱to̱ tu̱ku̱u̱ i̱ miiꞌ iinꞌ nu̱ꞌ ndii,
köo̱ꞌ ka̱ nu̱ꞌ iinꞌ vi̱ꞌ,
tee̱ꞌ nde̱e̱ ni̱ xika̱ va̱ i̱ na̱ndu̱kuꞌ i̱ tunꞌ ja̱a̱nꞌ ndii,
köo̱ꞌ ka̱ nu̱ꞌ ni̱ xi̱ni̱ iinꞌ vi̱ꞌ.
37 Ko̱to̱ ndo̱ꞌ sa̱a̱ xikaꞌ ne̱ xatyuunꞌ nda̱ku,
te̱ ko̱to̱ tu̱ ndo̱ꞌ sa̱a̱ xikaꞌ ne̱ i̱i̱n nda̱a̱ꞌ nimá.
Sa̱kanꞌ ña̱ ne̱ xikaꞌ mani̱ꞌ ndii,
va̱ꞌa̱ ku̱ndi̱e̱e̱ ni̱a̱ nuu̱ꞌ kuꞌu̱n e̱ꞌ.
38 Ndisu̱ ne̱ xaaꞌ ña̱ ni̱a̱ꞌa ndii,
sa̱ndo̱ñuꞌuꞌ ti̱ꞌvi̱ ña̱ꞌaꞌ Ndiosí,
te̱ xa̱ ña̱ ja̱a̱nꞌ ku̱i̱ti̱ꞌ nduuꞌ ña̱ na̱ti̱i̱n ni̱a̱ nuu̱ꞌ kuꞌu̱n e̱ꞌ.
39 Ndisu̱ mi̱iꞌ Yahvé sakakú ne̱ xatyuunꞌ nda̱ku,
te̱ su̱vi̱ tu̱ a̱ nduuꞌ ña̱ xitoꞌ ña̱ꞌaꞌ kii̱ꞌ yoo tu̱ndoꞌo̱ꞌ nuu̱ꞌ kivi̱ꞌ ñu̱u̱ ni̱a̱.
40 Mi̱iꞌ Yahvé tyindieeꞌ ña̱ꞌaꞌ,
te̱ sa̱kakú tu̱ ña̱ꞌaꞌ a̱.
Sa̱ndoó ndiká ña̱ꞌaꞌ a̱ nda̱ꞌaꞌ ne̱ xaaꞌ ña̱ ni̱a̱ꞌa,
te̱ sa̱kakú tu̱ ña̱ꞌaꞌ a̱,
xaꞌa̱ꞌ a̱ ña̱ ña̱ ja̱a̱nꞌ ni̱ ndiatu̱ i̱ni̱ ni̱a̱ tyi̱ndi̱e̱eꞌ ña̱ꞌaꞌ.