Yoꞌoꞌ kaꞌán a̱ xaꞌa̱ꞌ ña̱ kuvita xa̱va̱ꞌa̱ i̱ni̱ Ndiosí xaꞌa̱ꞌ e̱ꞌ
Ya̱a̱ ña̱ ni̱ xi̱ta̱ David, te̱ xikaꞌ nuuꞌ nuu̱ꞌ Yahvé, ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
36
Ne̱ xaaꞌ ña̱ ni̱a̱ꞌa ndii,
kaꞌán ya̱aꞌ ña̱ ni̱a̱ꞌa ja̱a̱nꞌ xiinꞌ ni̱a̱ nde̱e̱ ma̱aꞌ ti̱xi̱n nimá ni̱a̱,
te̱ kuäsa̱ꞌ yiꞌvi xa̱tyiꞌ ni̱a̱ Ndiosí xaꞌa̱ꞌ a̱ ña̱ xaaꞌ ni̱a̱ ña̱ ni̱a̱ꞌa ja̱a̱nꞌ.
2 Xa̱ mi̱iꞌ ne̱ xaaꞌ ña̱ ni̱a̱ꞌa ja̱a̱nꞌ nduuꞌ ni̱a̱ te̱ kaꞌán ñuñuꞌ ni̱a̱ xaꞌa̱ꞌ ni̱a̱,
te̱ kuäsa̱ꞌ ndasiꞌ ni̱a̱ ña̱ ni̱a̱ꞌa ña̱ xaaꞌ ni̱a̱ ja̱a̱nꞌ,
ni̱ nde̱e̱ xänini tu̱ ni̱a̱ ña̱ na̱tuvi̱ ña̱ ni̱a̱ꞌa ña̱ xaaꞌ ni̱a̱ nuu̱ꞌ Ndiosí.
3 Sa̱kuuꞌ i̱tyiꞌ kii̱ꞌ kaꞌán ni̱a̱ ndii,
xa̱ nuu̱ꞌ kani̱a̱ꞌa ni̱a̱,
te̱ xini xaꞌanꞌ tu̱ ni̱a̱ ne̱ yivi̱ꞌ,
ni̱ sa̱na̱ xíniꞌ ni̱a̱,
te̱ xäaꞌ ka̱ ni̱a̱ ña̱ va̱ꞌa̱.
4 Te̱ kii̱ꞌ kanduꞌu̱ꞌ ni̱a̱ nuu̱ꞌ tunꞌ xi̱to̱ ni̱a̱ ndii,
tyituní ni̱a̱ ña̱ ni̱a̱ꞌa ña̱ sa̱a̱ ni̱a̱,
te̱ köo̱ꞌ kivi̱ꞌ xaaꞌ ni̱a̱ ña̱ va̱ꞌa̱,
te̱ köo̱ꞌ kivi̱ꞌ tu̱ xaaꞌ ni̱a̱ ña̱ nduxa̱ꞌ te̱ na̱ko̱o̱ ni̱a̱ ña̱ ni̱a̱ꞌa ña̱ xaaꞌ ni̱a̱ ja̱a̱nꞌ.
5 Yahvé,
ña̱ ndani̱ u̱nꞌ ne̱ yivi̱ꞌ i̱i̱n yivi̱ꞌ ndii,
tyiee̱ a̱ nde̱e̱ naa ndi̱viꞌ,
te̱ ña̱ i̱i̱n nda̱a̱ꞌ nimá u̱nꞌ ndii,
nde̱e̱ nuu̱ꞌ viko̱ꞌ naxaá a̱.
6 Te̱ ña̱ xatyuunꞌ nda̱ku u̱nꞌ ndii,
kooꞌ tyukuuꞌ a̱ nde̱e̱ naa i̱kuꞌ sukun,
te̱ ña̱ xaꞌnú u̱nꞌ ku̱a̱tyi̱ ndii,
nduuꞌ a̱ nde̱e̱ naa mi̱ni̱ kaꞌnuꞌ miiꞌ kunu xa̱va̱ꞌa̱.
Te̱ yoꞌó xitoꞌ ne̱ yivi̱ꞌ i̱i̱n yivi̱ꞌ,
te̱ xitoꞌ tu̱ u̱nꞌ sa̱kuuꞌ ki̱tiꞌ.
7 Nda̱tu̱nꞌ xa̱va̱ꞌa̱ ña̱ ndani̱ u̱nꞌ ne̱ yivi̱ꞌ i̱i̱n yivi̱ꞌ,
sa̱kanꞌ na kuiiꞌ sa̱kuuꞌ ne̱ yivi̱ꞌ i̱i̱n yivi̱ꞌ ku̱vi̱ kaku̱ ti̱xi̱n ndi̱xi̱n u̱nꞌ.
8 Xixiꞌ ni̱a̱ nde̱e̱ ndaꞌni ni̱a̱ xaꞌa̱ꞌ a̱ ña̱ yoo kuaꞌa̱ꞌ ña̱ xaxi̱ꞌ vi̱ꞌe̱ u̱nꞌ,
te̱ sa̱koꞌoꞌ ña̱ꞌaꞌ u̱nꞌ ti̱kui teꞌ xakuatiaꞌ i̱ni̱ u̱nꞌ,
teꞌ yoo miiꞌ nduꞌu̱ꞌ u̱nꞌ.
9 Sa̱kanꞌ ña̱ yoꞌó nduuꞌ nde̱e̱ naa ti̱ko̱ꞌyoꞌ ña̱ taxiꞌ kivi̱ꞌ ñu̱u̱ ne̱ yivi̱ꞌ i̱i̱n yivi̱ꞌ,
te̱ su̱vi̱ tu̱ u̱nꞌ nduuꞌ ñuꞌu̱ ña̱ tuún nuu̱ꞌ ndu̱,
te̱ xikaꞌ ndu̱ i̱i̱n yivi̱ꞌ.
10 Ta̱xi̱ u̱nꞌ kuaꞌa̱ꞌ va̱ ña̱ ndani̱ xa̱va̱ꞌa̱ u̱nꞌ nda̱ꞌaꞌ ne̱ ndani̱ yoꞌó,
te̱ sa̱tyuunꞌ nda̱ku u̱nꞌ xaꞌa̱ꞌ ne̱ xatyuunꞌ nda̱ku.
11 Te̱ tä̱xi̱ u̱nꞌ kuei̱n ndo̱so̱ꞌ ne̱ ñuñuꞌ yuꞌu̱,
ni̱ nde̱e̱ tä̱xi̱ tu̱ u̱nꞌ ña̱ sa̱yi̱ꞌvi ne̱ xaaꞌ ña̱ ni̱a̱ꞌa yuꞌu̱.
12 Ko̱to̱ ndo̱ꞌ,
xa̱ ni̱ ndo̱kueinꞌ sa̱kuuꞌ ne̱ xaaꞌ ña̱ ni̱a̱ꞌa,
xa̱ ni̱ xiꞌi̱ sa̱kuuꞌ ni̱a̱,
te̱ köo̱ꞌ kivi̱ꞌ ka̱ na̱ti̱a̱ku̱ nde̱e̱ i̱i̱n ni̱a̱.