Yoꞌoꞌ kaꞌán David xiinꞌ Ndiosí te̱ ku̱ntaꞌanꞌ a̱ xiinꞌ te̱ kuntaꞌanꞌ xiinꞌ ra̱
Ya̱a̱ ña̱ ni̱ xi̱ta̱ David nuu̱ꞌ Ndiosí.
35
Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ na̱kaꞌa̱n u̱nꞌ xaꞌa̱ꞌ i̱ nuu̱ꞌ te̱ yivi̱ꞌ,
te̱ kuntaꞌanꞌ xiinꞌ i̱,
te̱ ku̱ntaꞌanꞌ u̱nꞌ xiinꞌ ra̱ xaꞌa̱ꞌ i̱.
2 Na̱kuiꞌnu̱ kiꞌi̱ꞌ ka̱a̱ tiꞌeꞌ,
te̱ ki̱ꞌi̱n tu̱ u̱nꞌ ka̱a̱ ña̱ tiasi ti̱a̱ꞌni̱ u̱nꞌ nuu̱ꞌ ña̱ i̱yo̱,
te̱ sa̱kooꞌ tu̱ꞌva̱ xiinꞌ miiꞌ u̱nꞌ te̱ ki̱xi̱n kiꞌi̱ꞌ u̱nꞌ te̱ tyi̱ndi̱e̱eꞌ u̱nꞌ yuꞌu̱.
3 Ki̱ꞌi̱n kiꞌi̱ꞌ kuxi̱ u̱nꞌ tunꞌ xíinꞌ nuu̱ꞌ te̱ na̱ka̱si̱ u̱nꞌ nuu̱ꞌ te̱ ndasiꞌ taꞌanꞌ xiinꞌ i̱,
te̱ kaꞌa̱n u̱nꞌ xiinꞌ nimá i̱ ndii:
“Yuꞌu̱ tyi̱ndi̱e̱eꞌ yoꞌó te̱ ke̱ta̱ va̱ꞌa̱ u̱nꞌ”,
katyi̱ u̱nꞌ.
4 Sa̱kaꞌanꞌ u̱nꞌ nuu̱ꞌ sa̱kuuꞌ te̱ yivi̱ꞌ,
te̱ kuni ka̱ꞌni̱ꞌ yuꞌu̱,
te̱ na sa̱na̱ xa̱tyiꞌ xíniꞌ ra̱,
sa̱ndi̱e̱e̱ kuiꞌe u̱nꞌ sa̱kuuꞌ te̱ kuni ka̱ꞌni̱ꞌ yuꞌu̱ ja̱a̱nꞌ,
te̱ sa̱na̱ndikoꞌ xataꞌ ña̱ꞌaꞌ u̱nꞌ.
5 Te̱ na ku̱ndu̱u̱ ra̱ nde̱e̱ naa mi̱ꞌiꞌ i̱tyi,
te̱ ka̱ti̱a̱ xikaꞌ ña̱ꞌaꞌ tatyi̱ꞌ,
te̱ na ku̱ndiku̱n ángele,
ña̱ xikaꞌ nuuꞌ nuu̱ꞌ Yahvé,
ta̱xiꞌ ña̱ꞌaꞌ a̱.
6 Te̱ na ku̱u̱ i̱i̱n yaví i̱tyiꞌ miiꞌ kuaꞌa̱n ra̱ ja̱a̱nꞌ,
te̱ ku̱ndi̱ꞌviꞌ tu̱ a̱.
Te̱ na ku̱ndiku̱n ángele,
ña̱ xikaꞌ nuuꞌ nuu̱ꞌ Yahvé,
ta̱xiꞌ ña̱ꞌaꞌ a̱.
7 Sa̱kanꞌ ña̱ köo̱ꞌ nde̱e̱ i̱i̱n ña̱ ni̱a̱ꞌa ni̱ xa̱a̱ i̱ xiinꞌ ra̱,
ndisu̱ ni̱ xika̱ ra̱ se̱kun ra̱ yuꞌu̱ xiinꞌ tunꞌ ii̱ꞌ,
köo̱ꞌ nde̱e̱ i̱i̱n ña̱ ni̱a̱ꞌa ni̱ xa̱a̱ i̱ xiinꞌ ra̱,
ndisu̱ ni̱ xa̱ti̱a̱ ra̱ xitu̱n kunu va̱ te̱ na̱ma̱ i̱,
te̱ ku̱vi̱ ka̱ꞌni̱ꞌ ra̱ yuꞌu̱.
8 Te̱ na ku̱ndo̱ꞌo̱ ra̱ ña̱ kueinꞌ kii̱ꞌ köo̱ꞌ a̱ naá nimá ra̱ ndieeꞌ ra̱,
te̱ na koyo̱ ra̱ nuu̱ꞌ tunꞌ ii̱ꞌ,
tunꞌ ni̱ ta̱ndi̱e̱e̱ ra̱,
te̱ na̱ma̱ yuꞌu̱ kaꞌanꞌ ra̱ ja̱a̱nꞌ,
te̱ na koyo̱ mi̱iꞌ ra̱ xitu̱n ña̱ ni̱ xa̱ti̱a̱ ra̱ xaꞌa̱ꞌ yuꞌu̱ ja̱a̱nꞌ.
9 Sa̱kanꞌ te̱ va̱ꞌa̱ ku̱ni̱ nimá i̱ xaꞌa̱ꞌ tyu̱u̱n kaꞌnuꞌ ña̱ ni̱ xa̱a̱ Yahvé xaꞌa̱ꞌ i̱,
te̱ va̱ꞌa̱ ku̱ni̱ i̱ ña̱ sakakú a̱ yuꞌu̱.
10 Xiinꞌ i̱i̱n ka̱niiꞌ nimá i̱ kaꞌán i̱ ndii:
“Yahvé,
köo̱ꞌ nakuitá xa̱tyiꞌ xiinꞌ yoꞌó,
sa̱kanꞌ ña̱ yoꞌó ndii,
sakakú u̱nꞌ ne̱ ndoꞌoꞌ xaaꞌ ne̱ yivi̱ꞌ,
ne̱ ndi̱e̱eꞌ ka̱ te̱ sa̱kanꞌ ne̱ ja̱a̱nꞌ.
Te̱ sa̱kakú tu̱ u̱nꞌ ne̱ ndaꞌvi kuuꞌ xiinꞌ ne̱ natiín nda̱ꞌaꞌ ne̱ mi̱iꞌ kuuꞌ xiinꞌ ni̱a̱,
te̱ sakakú tu̱ u̱nꞌ ne̱ ndaꞌvi kuuꞌ nda̱ꞌaꞌ ne̱ tuꞌunꞌ uꞌvi̱ ña̱ꞌa̱ ni̱a̱ nda̱ꞌaꞌ ni̱a̱”,
katyi̱ i̱.
11 Ndekuieeꞌ te̱ ndieeꞌ yu̱ꞌuꞌ sikiꞌ,
te̱ ni̱a̱ꞌa va̱,
te̱ sataví ku̱a̱tyi̱ ra̱ yuꞌu̱ xaꞌa̱ꞌ ña̱ꞌa̱ ña̱ xïní xa̱tyiꞌ i̱ xaꞌa̱ꞌ.
12 Tee̱ꞌ ndee mani̱ꞌ ni̱ ku̱u̱ yuꞌu̱ xiinꞌ ra̱ ndii,
ña̱ ni̱a̱ꞌa xaaꞌ ra̱ xiinꞌ i̱,
te̱ sandoꞌoꞌ va̱ ra̱ nimá i̱ kii̱ꞌ xaaꞌ ra̱ sa̱kanꞌ xiinꞌ i̱.
13 Ndisu̱ kii̱ꞌ ni̱ ku̱ni̱ ku̱vi̱ te̱ ja̱a̱nꞌ ndii,
ni̱ na̱kuiꞌnu̱ i̱ toto̱ nde̱iꞌ,
te̱ ni̱ ku̱su̱tyiꞌ i̱ni̱ i̱ xaꞌa̱ꞌ ra̱,
te̱ ni̱ xa̱ꞌni̱ꞌ so̱ko̱ xiinꞌ miiꞌ tu̱ i̱ ña̱ ni̱ yoo̱ ndi̱ti̱a̱ i̱,
te̱ kaꞌán i̱ xiinꞌ Ndiosí xaꞌa̱ꞌ ra̱,
ndisu̱ nï̱ na̱ku̱i̱i̱n Ndiosí si̱u̱ꞌunꞌ ña̱ kaꞌán ndaꞌvi i̱ nuu̱ꞌ a̱ xaꞌa̱ꞌ ra̱.
14 Xaꞌa̱ꞌ a̱ ja̱a̱nꞌ na ni̱ ku̱su̱tyiꞌ i̱ni̱ i̱ xaꞌa̱ꞌ ra̱ nde̱e̱ naa te̱ ndiakaꞌ taꞌanꞌ kutu̱ꞌ xiinꞌ i̱ uun nde̱e̱ naa i̱i̱n te̱ i̱i̱n kuuꞌ xa̱tyiꞌ xiinꞌ i̱.
Nde̱e̱ naa kusutyiꞌ i̱ni̱ i̱ xaꞌa̱ꞌ si̱ꞌiꞌ mi̱iꞌ i̱ kii̱ꞌ kuni ku̱vi̱ tyi̱ꞌ.
15 Ndisu̱ vi̱ti̱n ña̱ yoo tu̱ndoꞌo̱ꞌ nuu̱ꞌ kivi̱ꞌ ñu̱u̱ yuꞌu̱ ndii,
sa̱kuuꞌ ra̱ va̱ꞌa̱ kuni,
te̱ ni̱ ndu̱u̱ i̱i̱n tu̱ ra̱ ña̱ xa̱ ni̱ ka̱nandoo ra̱ katyi mi̱iꞌ ra̱.
Te̱ nde̱e̱ ne̱ yivi̱ꞌ,
ne̱ xïní xa̱tyiꞌ i̱ ni̱ sa̱taví ku̱a̱tyi̱ yuꞌu̱,
te̱ nï̱ xi̱kuii̱n tu̱ ni̱a̱ ña̱ tiinꞌ ku̱a̱tyi̱ nianí ni̱a̱ yuꞌu̱.
16 Xandiꞌiꞌ ra̱ xiinꞌ i̱,
te̱ kani̱a̱ꞌa tu̱ ra̱ xiinꞌ i̱,
te̱ keꞌi̱ꞌ vi̱ꞌ na̱ka̱xi̱ꞌ nu̱ꞌu̱ ra̱ ña̱ xiꞌé ra̱ xini ra̱ yuꞌu̱.
17 Tákuiꞌe,
¿a̱ma̱ vi̱ꞌ kuꞌu̱n ndi̱koꞌ u̱nꞌ ña̱ xitoꞌ ndiꞌe̱ꞌ ku̱i̱ti̱ꞌ u̱nꞌ ña̱ sandoꞌoꞌ ra̱ yuꞌu̱,
te̱ sa̱kanꞌ vi̱ꞌ sa̱vi̱kuiín ña̱ꞌaꞌ u̱nꞌ?
Sa̱kakú kiꞌi̱ꞌ u̱nꞌ yuꞌu̱ nda̱ꞌaꞌ ra̱ te̱ kä̱ꞌni̱ꞌ ra̱ yuꞌu̱,
sa̱kakú u̱nꞌ kivi̱ꞌ ñu̱u̱ i̱ nda̱ꞌaꞌ te̱ ja̱a̱nꞌ,
sa̱kanꞌ ña̱ nduuꞌ ra̱ nde̱e̱ naa kuaꞌa̱ꞌ va̱ lion.
18 Ndi̱e̱e̱ yu̱ꞌuꞌ i̱ xaꞌa̱ꞌ u̱nꞌ miiꞌ nakayá kuaꞌa̱ꞌ ne̱ yivi̱ꞌ,
te̱ sa̱kaꞌnuꞌ i̱ yoꞌó miiꞌ nakayá kuaꞌa̱ꞌ xa̱va̱ꞌa̱ ne̱ yivi̱ꞌ.
19 Tä̱xi̱ u̱nꞌ na̱ku̱a̱tiaꞌ te̱ ndasiꞌ yuꞌu̱ xaꞌa̱ꞌ ña̱ ndoꞌoꞌ i̱,
köo̱ꞌ nde̱e̱ i̱i̱n xaꞌa̱ꞌ te̱ ndasiꞌ ra̱ yuꞌu̱.
Tä̱xi̱ u̱nꞌ na̱ku̱a̱tiaꞌ te̱ ndasiꞌ yuꞌu̱ xaꞌa̱ꞌ ña̱ sutyiꞌ i̱ni̱ i̱,
sa̱kanꞌ ña̱ köo̱ꞌ nde̱e̱ i̱i̱n xaꞌa̱ꞌ te̱ ndasiꞌ ra̱ yuꞌu̱.
20 Sa̱kanꞌ ña̱ süu̱ꞌ xaꞌa̱ꞌ ña̱ ku̱ndi̱e̱e̱ mani̱ꞌ e̱ꞌ ndatuꞌunꞌ te̱ ja̱a̱nꞌ,
süu̱ꞌ ja̱a̱nꞌ ndii,
tyituní sikiꞌ ra̱ te̱ sa̱a̱ ra̱ ña̱ ni̱a̱ꞌa xiinꞌ ne̱ maso ndieeꞌ nuu̱ꞌ ñu̱ꞌuꞌ i̱i̱n yivi̱ꞌ.
21 Kuaaꞌ tiꞌeꞌ ra̱,
kaꞌán ra̱ xaꞌa̱ꞌ i̱ ndii:
“A̱jaan,
vi̱ti̱n vi̱ꞌ ni̱ xi̱ni̱ ndu̱tyiꞌ nuu̱ꞌ e̱ꞌ xaaꞌ ra̱ ña̱ ni̱a̱ꞌa”,
katyi ra̱.
22 Tákuiꞌe Yahvé,
xiní yoꞌó sa̱kuuꞌ ña̱ xaaꞌ ra̱ xiinꞌ i̱ kaa̱ꞌ,
sa̱a̱ u̱nꞌ ña̱ va̱ꞌa̱ te̱ köo̱ꞌ taxi̱nꞌ yu̱ꞌuꞌ u̱nꞌ,
te̱ ta̱xi̱ so̱ꞌo̱ u̱nꞌ ña̱ kaꞌán i̱ xiinꞌ u̱nꞌ.
Sa̱a̱ u̱nꞌ ña̱ va̱ꞌa̱,
Tákuiꞌe,
te̱ nä̱ko̱o̱ i̱i̱n nda̱a̱ꞌ u̱nꞌ yuꞌu̱ vi̱ti̱n.
23 Ndo̱to̱ nuu̱ꞌ u̱nꞌ,
Ndiosí mi̱iꞌ i̱,
te̱ ndo̱koo̱ u̱nꞌ te̱ tyi̱ndi̱e̱eꞌ u̱nꞌ yuꞌu̱.
Sa̱a̱ u̱nꞌ ña̱ va̱ꞌa̱ te̱ na̱kaꞌa̱n u̱nꞌ xaꞌa̱ꞌ i̱,
Ndiosí mi̱iꞌ i̱,
yoꞌó ña̱ nduuꞌ xto̱ꞌo̱ i̱.
24 Tákuiꞌe Ndiosí miiꞌ i̱,
sa̱a̱ u̱nꞌ ña̱ va̱ꞌa̱ te̱ sa̱naꞌmá nda̱ku u̱nꞌ yuꞌu̱,
sa̱kanꞌ ña̱ yoꞌó ndii,
xatyuunꞌ nda̱ku u̱nꞌ,
te̱ tä̱xi̱ u̱nꞌ ña̱ kuaku̱ ndi̱a̱a̱ te̱ ndasiꞌ taꞌanꞌ xiinꞌ i̱ yuꞌu̱ kii̱ꞌ yoo tu̱ndoꞌo̱ꞌ ja̱a̱nꞌ nuu̱ꞌ kivi̱ꞌ ñu̱u̱ i̱.
25 Te̱ tä̱xi̱ u̱nꞌ kaꞌa̱n ra̱ xiinꞌ i̱ ndii:
“Ko̱to̱ ndo̱ꞌ,
xa̱ ni̱ sa̱xinú e̱ꞌ ña̱ kuní e̱ꞌ sa̱a̱ e̱ꞌ xiinꞌ ra̱,
vi̱ti̱n ndii,
xa̱ ni̱ ka̱nandoo xa̱tyiꞌ ña̱ꞌaꞌ e̱ꞌ”,
katyi̱ ra̱.
26 Na sa̱ndoó kuiꞌe u̱nꞌ sa̱kuuꞌ te̱ va̱ꞌa̱ kuni xaꞌa̱ꞌ ña̱ ndoꞌoꞌ i̱,
te̱ na ku̱ka̱ꞌa̱n tu̱ nuu̱ꞌ ra̱ sa̱a̱ u̱nꞌ.
Te̱ na ku̱ka̱ꞌa̱n xa̱va̱ꞌa̱ nuu̱ꞌ sa̱kuuꞌ te̱ ka̱nandoo yuꞌu̱ sa̱a̱ u̱nꞌ,
te̱ na sa̱ndi̱e̱e̱ kuiꞌe xa̱tyiꞌ tu̱ ña̱ꞌaꞌ u̱nꞌ.
27 Ndisu̱ ta̱xi̱ u̱nꞌ kuaꞌa̱ꞌ va̱ ña̱ ku̱a̱tiaꞌ i̱ni̱ te̱ ni̱ ki̱xi̱n na̱kaꞌa̱n xaꞌa̱ꞌ i̱,
te̱ na kaꞌa̱n ra̱ sa̱a̱ kivi̱ꞌ ndii:
“Kaꞌnuꞌ va̱ ña̱ nduuꞌ Yahvé.
Te̱ va̱ꞌa̱ va̱ kuni a̱ ña̱ ndieeꞌ mani̱ꞌ ne̱ xikaꞌ nuuꞌ nuu̱ꞌ a̱”,
katyi̱ ra̱.
28 Sa̱kanꞌ na kaꞌa̱n ya̱aꞌ i̱ xaꞌa̱ꞌ ña̱ xatyuunꞌ nda̱ku u̱nꞌ,
te̱ sa̱a̱ kivi̱ꞌ ka̱ta̱ i̱ ya̱a̱ nuu̱ꞌ u̱nꞌ.