Yoꞌoꞌ kaꞌán a̱ ña̱ xitoꞌ Ndiosí ne̱ nduuꞌ kuenta a̱
Ya̱a̱ ña̱ ni̱ xi̱ta̱ David nuu̱ꞌ Ndiosí kii̱ꞌ ni̱ xi̱ni̱ xaꞌanꞌ ra̱ Abimelec ña̱ nduuꞌ ra̱ te̱ küuꞌ kaxiꞌ, te̱ ni̱ xta̱ꞌniꞌ ña̱ꞌaꞌ te̱ ja̱a̱nꞌ nuu̱ꞌ ñu̱ꞌuꞌ ra̱.
34
Sa̱a̱ kivi̱ꞌ sa̱kaꞌnuꞌ i̱ Yahvé,
te̱ köo̱ꞌ kivi̱ꞌ na̱ko̱o̱ i̱ ña̱ xitaꞌ i̱ ya̱a̱ nuu̱ꞌ a̱.
2 Xaꞌa̱ꞌ Yahvé kaꞌán kuatiaꞌ nimá i̱,
na ku̱ni̱ so̱ꞌo̱ ña̱ꞌaꞌ sa̱kuuꞌ ne̱ ndaꞌvi kuuꞌ nimá,
te̱ na̱ku̱a̱tiaꞌ ingaꞌ ni̱a̱ xiinꞌ i̱.
3 Ni̱a̱ꞌa̱ ndo̱ꞌ te̱ nda̱tuꞌunꞌ e̱ꞌ xaꞌa̱ꞌ ña̱ kaꞌnuꞌ va̱ Ndiosí,
te̱ na sa̱kaꞌnuꞌ ingaꞌ ña̱ꞌaꞌ e̱ꞌ.
4 Ni̱ na̱ndu̱kuꞌ i̱ nuu̱ꞌ Yahvé,
te̱ ni̱ xi̱ni̱ so̱ꞌo̱ a̱ tatyi̱ꞌ i̱,
te̱ ni̱ sa̱kakú a̱ yuꞌu̱ nuu̱ꞌ sa̱kuuꞌ ña̱ yiꞌvi i̱.
5 Ne̱ ndukuꞌ nuu̱ꞌ Ndiosí te̱ tyi̱ndi̱e̱eꞌ ña̱ꞌaꞌ a̱ ndii,
tyituꞌ vi̱ꞌ nimá ni̱a̱ xiinꞌ ña̱ va̱ꞌa̱ kuni ni̱a̱,
te̱ köo̱ꞌ kivi̱ꞌ ni̱ ku̱ka̱ꞌa̱n nuu̱ꞌ ni̱a̱ sa̱a̱ ne̱ yivi̱ꞌ.
6 Kii̱ꞌ ndiꞌni̱ va̱ yuꞌu̱ ndaꞌvi,
te̱ ni̱ kaꞌa̱n i̱ xiinꞌ Yahvé,
te̱ ni̱ sa̱kakú a̱ yuꞌu̱ nuu̱ꞌ sa̱kuuꞌ ña̱ ndoꞌoꞌ i̱.
7 Sa̱kanꞌ ña̱ ángele,
ña̱ xikaꞌ nuuꞌ nuu̱ꞌ Yahvé ndii,
yoo a̱ sa̱a̱ xinundu̱u̱ xi̱i̱nꞌ ne̱ saxinú ña̱ kaꞌán Yahvé ja̱a̱nꞌ,
te̱ nakaꞌán a̱ xaꞌa̱ꞌ ni̱a̱.
8 Ko̱to̱ ku̱a̱ꞌa̱ ndo̱ꞌ Yahvé te̱ ku̱nda̱ni̱ ndo̱ꞌ ña̱ ña̱ va̱ꞌa̱ yaꞌa̱ nduuꞌ a̱,
te̱ va̱ꞌa̱ va̱ kuni ne̱ yivi̱ꞌ,
ne̱ kuaꞌa̱n nuu̱ꞌ ña̱ ja̱a̱nꞌ,
te̱ ndukuꞌ ni̱a̱ ña̱ sa̱kakú ña̱ꞌaꞌ a̱.
9 Ndoꞌó,
ne̱ nduuꞌ kuenta Yahvé ndii,
ku̱yi̱ꞌvi ña̱ꞌaꞌ ndo̱ꞌ,
sa̱kanꞌ ña̱ ne̱ yiꞌvi ña̱ꞌaꞌ ndii,
kü̱ndo̱ꞌo̱ ni̱a̱ xaꞌa̱ꞌ nde̱e̱ i̱i̱n ña̱ꞌa̱.
10 Nde̱e̱ lion sa̱va̱,
tiꞌ kaꞌni̱ va̱ ña̱ ndi̱e̱eꞌ ndii,
xiꞌí tu̱ tiꞌ ja̱a̱nꞌ so̱ko̱ xaá,
ndisu̱ ne̱ ndukuꞌ nuu̱ꞌ Yahvé te̱ tyi̱ndi̱e̱eꞌ ña̱ꞌaꞌ a̱ ndii,
köo̱ꞌ kivi̱ꞌ ku̱ndo̱ꞌo̱ ni̱a̱ xaꞌa̱ꞌ nde̱e̱ i̱i̱n ña̱ꞌa̱.
11 Ndoꞌó,
ne̱ kualiꞌ,
ni̱a̱ꞌa̱ ndo̱ꞌ te̱ ku̱ni̱ so̱ꞌo̱ ndo̱ꞌ ña̱ kaꞌa̱n i̱,
te̱ sa̱niaꞌá i̱ ndoꞌó sa̱a̱ kuní a̱ ka̱ka̱ su̱ꞌu̱n ndo̱ꞌ nuu̱ꞌ Yahvé,
te̱ ku̱yi̱ꞌvi ndo̱ꞌ a̱.
12 Naaꞌ na̱ꞌaꞌ kuni ka̱ka̱ u̱nꞌ i̱i̱n yivi̱ꞌ,
te̱ ku̱miꞌ u̱nꞌ kuaꞌa̱ꞌ kuiya̱,
te̱ ko̱o̱ va̱ꞌa̱ u̱nꞌ i̱i̱n yivi̱ꞌ ndii,
13 kuní a̱ ña̱ ko̱to̱ u̱nꞌ yu̱ꞌuꞌ u̱nꞌ,
te̱ kä̱ni̱a̱ꞌa u̱nꞌ xaꞌa̱ꞌ i̱nga̱ ne̱ yivi̱ꞌ,
te̱ käꞌán tu̱ u̱nꞌ nde̱e̱ i̱i̱n tu̱ꞌu̱n vixi̱.
14 Na̱ko̱o̱ u̱nꞌ ña̱ ni̱a̱ꞌa ña̱ xaaꞌ u̱nꞌ,
te̱ sa̱a̱ u̱nꞌ ña̱ va̱ꞌa̱,
te̱ ko̱o̱ u̱nꞌ ña̱ mani̱ꞌ xiinꞌ sa̱kuuꞌ ne̱ yivi̱ꞌ sa̱a̱ kivi̱ꞌ.
15 Xitoꞌ Yahvé ne̱ xatyuunꞌ nda̱ku,
te̱ taxiꞌ so̱ꞌo̱ a̱ ña̱ kaꞌán ndaꞌvi ni̱a̱ xiinꞌ a̱.
16 Ndisu̱ nasaáꞌ va̱ a̱ xini a̱ ne̱ xaaꞌ ña̱ ni̱a̱ꞌa,
sa̱kanꞌ na kuiiꞌ sa̱ndo̱ñuꞌuꞌ a̱ sa̱kuuꞌ ne̱ ja̱a̱nꞌ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ,
te̱ köo̱ꞌ na̱ka̱ꞌanꞌ ka̱ xaꞌa̱ꞌ ni̱a̱.
17 Te̱ kii̱ꞌ kaꞌán ndaꞌvi ne̱ xatyuunꞌ nda̱ku nuu̱ꞌ Yahvé ña̱ tyi̱ndi̱e̱eꞌ ña̱ꞌaꞌ a̱ ndii,
xini so̱ꞌo̱ a̱ ña̱ kaꞌán ni̱a̱ xiinꞌ a̱,
te̱ sa̱kakú ña̱ꞌaꞌ a̱ nuu̱ꞌ sa̱kuuꞌ ña̱ ndoꞌoꞌ ni̱a̱.
18 Ya̱ti̱n yoo Yahvé nuu̱ꞌ ne̱ ndoꞌoꞌ va̱ nimá,
te̱ sa̱kakú tu̱ a̱ ne̱ sutyiꞌ xa̱va̱ꞌa̱ i̱ni̱.
19 Kuaꞌa̱ꞌ va̱ tu̱ndoꞌo̱ꞌ yoo nuu̱ꞌ kivi̱ꞌ ñu̱u̱ ne̱ xatyuunꞌ nda̱ku,
ndisu̱ sa̱kakú ña̱ꞌaꞌ Yahvé nuu̱ꞌ sa̱kuuꞌ ña̱ ja̱a̱nꞌ.
20 Sa̱kanꞌ ña̱ mi̱iꞌ Yahvé xitoꞌ sa̱kuuꞌ i̱kiꞌ ne̱ ja̱a̱nꞌ,
te̱ nde̱e̱ i̱i̱n a̱ täꞌnu̱.
21 Ne̱ xaaꞌ ña̱ ni̱a̱ꞌa ndii,
xa̱ mi̱iꞌ ña̱ ni̱a̱ꞌa ña̱ xaaꞌ ni̱a̱ ja̱a̱nꞌ ka̱ꞌni̱ꞌ ña̱ꞌaꞌ,
te̱ ne̱ yivi̱ꞌ,
ne̱ ndasiꞌ ne̱ xatyuunꞌ nda̱ku ndii,
na̱tya̱ꞌa̱n ni̱a̱ sa̱a̱ Ndiosí.
22 Ndisu̱ ne̱ xikaꞌ nuuꞌ nuu̱ꞌ a̱ ndii,
sa̱kakú a̱ nimá ni̱a̱,
te̱ sä̱na̱tyaꞌan a̱ nde̱e̱ i̱i̱n ne̱ i̱ni̱ xini ña̱ꞌaꞌ ja̱a̱nꞌ.