Yoꞌoꞌ kaꞌán a̱ xaꞌa̱ꞌ ña̱ kande̱iꞌ sa̱kaꞌnuꞌ e̱ꞌ Ndiosí, ña̱ ni̱ xa̱ꞌa̱ sa̱kuuꞌ ña̱ yoo
33
Ndoꞌó,
ne̱ xatyuunꞌ nda̱ku,
na ka̱ta̱ sii̱ꞌ ndo̱ꞌ ya̱a̱ nuu̱ꞌ Yahvé xaꞌa̱ꞌ a̱ ña̱ va̱ꞌa̱ kuni ndo̱ꞌ,
sa̱kanꞌ ña̱ xataꞌa̱n ña̱ ka̱ta̱ ndoꞌó ne̱ i̱i̱n nda̱a̱ꞌ nimá nuu̱ꞌ Yahvé.
2 Sa̱ndaaꞌ ndo̱ꞌ ya̱a̱ nda̱tu̱nꞌ nuu̱ꞌ Yahvé xiinꞌ ñuu̱ꞌ to̱so̱ ña̱ naniꞌ lira,
sa̱ndaaꞌ ndo̱ꞌ ya̱a̱ nuu̱ꞌ a̱ xiinꞌ ñuu̱ꞌ ña̱ naniꞌ arpa,
ña̱ ndisoꞌ uxi̱ taꞌan tu̱tyi̱.
3 Ka̱ta̱ ndo̱ꞌ ya̱a̱ xa̱aꞌ nuu̱ꞌ Ndiosí,
sa̱ndaaꞌ va̱ꞌa̱ ndo̱ꞌ ñuu̱ꞌ arpa nuu̱ꞌ a̱,
te̱ ka̱ta̱ sii̱ꞌ ndo̱ꞌ nuu̱ꞌ a̱.
4 Sa̱kanꞌ ña̱ tu̱ꞌu̱n Yahvé ndii,
ña̱ ndi̱xa̱ nduuꞌ a̱,
te̱ xatyuunꞌ nda̱ku a̱ xiinꞌ sa̱kuuꞌ ña̱ xaaꞌ a̱.
5 Tákuiꞌe Yahvé ndii,
nde̱e̱ ndiꞌiꞌ ni̱ kivi̱ꞌ xatyuunꞌ nda̱ku a̱,
te̱ xaaꞌ a̱ ña̱ va̱ꞌa̱ xiinꞌ sa̱kuuꞌ ña̱ xaaꞌ a̱,
te̱ tyituꞌ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ xaaꞌ a̱ xiinꞌ ña̱ ndani̱ a̱ ña̱ köo̱ꞌ kivi̱ꞌ ndiꞌiꞌ.
6 Xiinꞌ tu̱ꞌu̱n yu̱ꞌuꞌ Yahvé ni̱ ku̱a̱ꞌa̱ ndi̱viꞌ,
ni̱ ko̱ndi̱a̱ a̱ tatyi̱ꞌ yu̱ꞌuꞌ ku̱i̱ti̱ꞌ a̱,
te̱ ni̱ xi̱koo̱ sa̱kuuꞌ tiuu̱nꞌ ndieeꞌ ndi̱viꞌ.
7 Nakaya ti̱ꞌvi̱ a̱ sa̱kuuꞌ ti̱kui mi̱ni̱ kaꞌnuꞌ,
te̱ ndasi i̱ꞌnu̱ tu̱ a̱ sa̱kuuꞌ ti̱kui mi̱ni̱ kaꞌnuꞌ ja̱a̱nꞌ i̱i̱n xaanꞌ mi̱ni̱ miiꞌ kunu xa̱va̱ꞌa̱.
8 Sa̱kuuꞌ yooꞌ,
ne̱ yivi̱ꞌ i̱i̱n yivi̱ꞌ ndii,
na ku̱yi̱ꞌvi e̱ꞌ Yahvé,
te̱ sa̱kuuꞌ yoo,
ne̱ yivi̱ꞌ,
ne̱ ndieeꞌ nuu̱ꞌ ñu̱ꞌuꞌ i̱i̱n yivi̱ꞌ ndii,
na ko̱to̱ kaꞌnuꞌ e̱ꞌ Yahvé.
9 Sa̱kanꞌ ña̱ ña̱ ja̱a̱nꞌ ni̱ kaꞌa̱n,
te̱ ni̱ xi̱koo̱ sa̱kuuꞌ ña̱ yoo,
ni̱ kaꞌa̱n tyuunꞌ a̱,
te̱ i̱ꞌi̱n ña̱ꞌa̱ ja̱a̱nꞌ ni̱ xi̱ku̱ndiee̱ miiꞌ kuní a̱ ku̱ndi̱e̱e̱ a̱.
10 Täxiꞌ Yahvé xinu̱ ña̱ tyituní ne̱ tukuꞌ,
te̱ xaꞌnú tu̱ a̱ ña̱ ni̱a̱ꞌa ña̱ tyituní ni̱a̱ sa̱a̱ ni̱a̱.
11 Ndisu̱ ña̱ tyituní mi̱iꞌ Yahvé ndii,
yoo a̱ nde̱e̱ ndiꞌiꞌ ni̱ kivi̱ꞌ,
te̱ köo̱ꞌ kivi̱ꞌ tu̱ taꞌnu̱ ña̱ tyituní a̱ sa̱a̱ nde̱e̱ a̱ma̱ ka̱ kivi̱ꞌ.
12 Va̱ꞌa̱ va̱ kuni ne̱ ndieeꞌ i̱i̱n ñu̱ꞌuꞌ miiꞌ Yahvé nduuꞌ Ndiosí ña̱ xakaꞌnuꞌ ni̱a̱,
sa̱kanꞌ ña̱ ne̱ ja̱a̱nꞌ nduuꞌ ne̱ ni̱ na̱ka̱xi̱n a̱ ku̱ndu̱u̱ kuenta a̱ mi̱iꞌ a̱.
13 Nde̱e̱ ndi̱viꞌ nduꞌu̱ꞌ Yahvé,
te̱ xitoꞌ ndo̱so̱ꞌ a̱ i̱i̱n yivi̱ꞌ,
te̱ xini a̱ sa̱kuuꞌ ña̱ xaaꞌ sa̱kuuꞌ ne̱ yivi̱ꞌ i̱i̱n yivi̱ꞌ.
14 Nde̱e̱ nuu̱ꞌ tei̱ kaꞌnuꞌ miiꞌ nduꞌu̱ꞌ a̱ xaꞌndia tyuunꞌ a̱ xitoꞌ a̱ sa̱kuuꞌ ña̱ xaaꞌ ne̱ ndieeꞌ nuu̱ꞌ ñu̱ꞌuꞌ i̱i̱n yivi̱ꞌ.
15 Su̱vi̱ a̱ ni̱ xa̱ꞌa̱ nimá sa̱kuuꞌ ni̱a̱,
xaꞌa̱ꞌ a̱ ja̱a̱nꞌ na xiní a̱ sa̱kuuꞌ ña̱ xaaꞌ ni̱a̱.
16 I̱i̱n rey ndii,
käku̱ ra̱ nuu̱ꞌ te̱ ndasiꞌ taꞌanꞌ xiinꞌ ra̱ tee̱ꞌ ndee kuaꞌa̱ꞌ xa̱va̱ꞌa̱ te̱ xíinꞌ kumiꞌ ra̱,
ni̱ nde̱e̱ käku̱ tu̱ ra̱ nuu̱ꞌ te̱ ndasiꞌ taꞌanꞌ xiinꞌ ra̱ ja̱a̱nꞌ tee̱ꞌ ndee ndi̱e̱ni xa̱va̱ꞌa̱ ra̱.
17 Tee̱ꞌ nde̱e̱ kuaꞌa̱ꞌ kuei kumiꞌ rey ja̱a̱nꞌ ndii,
kü̱vi̱ sa̱kakú ña̱ꞌaꞌ tiꞌ ja̱a̱nꞌ nuu̱ꞌ te̱ ndasiꞌ taꞌanꞌ xiinꞌ ra̱,
sa̱kanꞌ ña̱ tee̱ꞌ ndee kuaꞌa̱ꞌ xa̱va̱ꞌa̱ ndi̱e̱e̱ꞌ riꞌ ndii,
kü̱vi̱ sa̱kakú riꞌ nde̱e̱ i̱i̱n ne̱ yivi̱ꞌ.
18 Ndisu̱ xitoꞌ Yahvé ne̱ yivi̱ꞌ,
ne̱ yiꞌvi ña̱ꞌaꞌ,
xitoꞌ a̱ ne̱ i̱ni̱ ña̱ köo̱ꞌ kivi̱ꞌ ndiꞌiꞌ ña̱ kuvita i̱ni̱ a̱ xaꞌa̱ꞌ ni̱a̱.
19 Te̱ sa̱kakú ña̱ꞌaꞌ a̱ te̱ kü̱vi̱ ni̱a̱,
te̱ tä̱xi̱ tu̱ a̱ ku̱vi̱ ni̱a̱ so̱ko̱ kivi̱ꞌ ña̱ yoo va̱ so̱ko̱.
20 Te̱ nimá yooꞌ ndii,
Yahvé ndiatuꞌ i̱ni̱ a̱ tyi̱ndi̱e̱eꞌ ña̱ꞌaꞌ,
te̱ xitoꞌ a̱ yooꞌ nduuꞌ a̱ nde̱e̱ naa ka̱a̱ tiꞌeꞌ ña̱ tiasi yoo nuu̱ꞌ ña̱ kueinꞌ.
21 Xaꞌa̱ꞌ a̱ ja̱a̱nꞌ na va̱ꞌa̱ kuni nimá e̱ꞌ xini a̱ Yahvé ja̱a̱nꞌ,
sa̱kanꞌ ña̱ i̱ni̱ e̱ꞌ ña̱ ña̱ su̱ꞌu̱n ndi̱ꞌi̱ nduuꞌ a̱.
22 Tákuiꞌe Yahvé,
na ku̱vi̱ta i̱ni̱ u̱nꞌ xaꞌa̱ꞌ ndu̱,
sa̱a̱ niiꞌ ndiatuꞌ i̱ni̱ ndu̱ sa̱a̱ u̱nꞌ xaꞌa̱ꞌ ndu̱.