Yoꞌoꞌ kaꞌán a̱ ña̱ sañuꞌuꞌ va̱ Ndiosí yooꞌ kii̱ꞌ xa̱ ni̱ yoo̱ kaꞌnuꞌ i̱ni̱ a̱ xaꞌa̱ꞌ ku̱a̱tyi̱ e̱ꞌ
Ya̱a̱ ña̱ ni̱ xi̱ta̱ David nuu̱ꞌ Ndiosí.
32
Va̱ꞌa̱ va̱ kuni ne̱ yivi̱ꞌ,
ne̱ xa̱ ni̱ yoo̱ kaꞌnuꞌ i̱ni̱ Ndiosí xaꞌa̱ꞌ xaꞌa̱ꞌ a̱ ña̱ ni̱ xaꞌnu̱ ni̱a̱ tu̱ꞌu̱n nde̱iꞌ a̱,
sa̱kanꞌ ña̱ xa̱ ni̱ sa̱ndoyoꞌ a̱ sa̱kuuꞌ ku̱a̱tyi̱ ni̱a̱.
2 Va̱ꞌa̱ va̱ kuni ne̱ yivi̱ꞌ,
ne̱ xäaꞌ ka̱ Yahvé kuenta kuuꞌ xaꞌa̱ꞌ ku̱a̱tyi̱ ña̱ ni̱ xa̱a̱ ni̱a̱ xaꞌa̱ꞌ ña̱ kuvita i̱ni̱ a̱ xaꞌa̱ꞌ ni̱a̱,
te̱ köo̱ꞌ ka̱ ña̱ xini xaꞌanꞌ ñuꞌuꞌ nimá ne̱ ja̱a̱nꞌ.
3 Yuꞌu̱,
kii̱ꞌ ni̱ kuní ka̱ naꞌma̱ i̱ ku̱a̱tyi̱ i̱ nuu̱ꞌ Ndiosí ndii,
ni̱ ndi̱ꞌi̱ ndo̱o̱ ña̱ ndi̱e̱e̱ꞌ i̱kiꞌ i̱ xaꞌa̱ꞌ a̱ ña̱ tanaꞌ i̱ sa̱a̱ kivi̱ꞌ ña̱ uꞌvi̱ xini i̱.
4 Sa̱kanꞌ ña̱ i̱ꞌi̱n kivi̱ꞌ kuaꞌa̱n xiinꞌ i̱ꞌi̱n ñu̱u ndii,
ndi̱e̱eꞌ ka̱ ni̱ sa̱ndoꞌoꞌ u̱nꞌ yuꞌu̱,
te̱ ni̱ ndo̱ko̱ ndo̱o̱ ña̱ ndi̱e̱e̱ꞌ i̱ nde̱e̱ naa xaaꞌ ti̱kui ndokoꞌ raꞌ ñu̱miꞌ.
Selah
5 Ndisu̱ ni̱ naꞌma̱ i̱ sa̱kuuꞌ ku̱a̱tyi̱ i̱ nuu̱ꞌ u̱nꞌ,
te̱ nï̱ ti̱si̱ꞌe i̱ nde̱e̱ i̱i̱n ña̱ ni̱a̱ꞌa ña̱ ni̱ xa̱a̱ i̱,
te̱ ni̱ kaꞌa̱n i̱ xiinꞌ nimá i̱ ndii:
“Naꞌma̱ i̱ nuu̱ꞌ Yahvé sa̱kuuꞌ ña̱ ni̱ xkaꞌndi̱a̱ i̱ ña̱ kaꞌán tu̱ꞌu̱n nde̱iꞌ a̱”,
ni̱ katyi̱ i̱.
Te̱ ni̱ yoo̱ kaꞌnuꞌ i̱ni̱ u̱nꞌ xaꞌa̱ꞌ sa̱kuuꞌ ku̱a̱tyi̱ i̱ ja̱a̱nꞌ.
Selah
6 Sa̱kanꞌ na kuiiꞌ na kaꞌa̱n ndaꞌvi sa̱kuuꞌ ne̱ su̱ꞌu̱n,
ne̱ nduuꞌ kuenta u̱nꞌ,
xiinꞌ u̱nꞌ vi̱ti̱n ña̱ taniꞌ kaa̱ꞌ kivi̱ꞌ,
te̱ kii̱ꞌ xaa̱ kivi̱ꞌ ña̱ ko̱o̱ kuaꞌa̱ꞌ ka̱ tu̱ndoꞌo̱ꞌ nuu̱ꞌ kivi̱ꞌ ñu̱u̱ ni̱a̱,
te̱ ku̱ndu̱u̱ a̱ nde̱e̱ naa kuaꞌa̱ꞌ te̱ñuꞌu̱ꞌ ndii,
köo̱ꞌ a̱ ku̱ndo̱ꞌo̱ ni̱a̱ sa̱a̱ a̱.
7 Sa̱kanꞌ ña̱ yoꞌó nduuꞌ nde̱e̱ naa i̱i̱n xaanꞌ miiꞌ ku̱vi̱ kaku̱ i̱ te̱ köo̱ꞌ a̱ ku̱ndo̱ꞌo̱ i̱,
sa̱kanꞌ ña̱ sa̱a̱ xinundu̱u̱ xi̱i̱nꞌ i̱ ni̱ yoo̱ u̱nꞌ,
te̱ ni̱ sa̱kakú u̱nꞌ yuꞌu̱.
Selah
8 Ni̱ kaꞌa̱n Ndiosí xiinꞌ i̱ ndii:
“Niaꞌa̱ i̱ yoꞌó ndee ña̱ nduuꞌ ña̱ va̱ꞌa̱ ña̱ kuní a̱ sa̱a̱ u̱nꞌ,
ko̱ndi̱a̱ yu̱ꞌuꞌ i̱ yoꞌó,
te̱ ko̱to̱ tu̱ i̱ yoꞌó,
katyi̱ a̱.
9 Sa̱kanꞌ na kuiiꞌ kü̱ndu̱u̱ ndo̱ꞌ nde̱e̱ naa kuei uun nde̱e̱ naa mola,
tiꞌ tïakú xíniꞌ,
sa̱kanꞌ ña̱ tiꞌ ja̱a̱nꞌ ndii,
kuní a̱ tyu̱ꞌu̱n e̱ꞌ yo̱ꞌoꞌ nuu̱ꞌ riꞌ uun tyu̱ꞌu̱n e̱ꞌ ka̱a̱ yu̱ꞌuꞌ riꞌ te̱ ku̱vi̱ vi̱ko̱niꞌiꞌ e̱ꞌ riꞌ”,
ni̱ katyi̱ a̱.
10 Ne̱ xaaꞌ ña̱ ni̱a̱ꞌa ndii,
kuaꞌa̱ꞌ yaꞌa̱ tu̱ndoꞌo̱ꞌ ko̱o̱ ni̱a̱,
ndisu̱ ne̱ i̱ni̱ xini Yahvé ndii,
sa̱a̱ kivi̱ꞌ kuvita i̱ni̱ a̱ xaꞌa̱ꞌ ne̱ ja̱a̱nꞌ.
11 Sa̱kanꞌ na kuiiꞌ sa̱kuuꞌ ndoꞌó,
ne̱ saxinú ña̱ kaꞌán Yahvé,
te̱ yoo ndo̱o̱ tu̱ nimá ndo̱ꞌ nuu̱ꞌ a̱ ndii,
na̱ku̱a̱tiaꞌ ndo̱ꞌ,
te̱ ku̱a̱aꞌ tiꞌeꞌ ndo̱ꞌ ña̱ va̱ꞌa̱ kuni ndo̱ꞌ.
Selah