Yoꞌoꞌ kaꞌán David ña̱ Ndiosí nduuꞌ ña̱ xitoꞌ ña̱ꞌaꞌ
Ya̱a̱ ña̱ ni̱ xi̱ta̱ David ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
31
Tákuiꞌe Yahvé,
yoꞌó nduuꞌ ña̱ sakakú yuꞌu̱,
sa̱a̱ u̱nꞌ ña̱ va̱ꞌa̱ te̱ na̱kaꞌa̱n u̱nꞌ xaꞌa̱ꞌ i̱,
te̱ nde̱e̱ i̱i̱n kivi̱ꞌ tä̱xi̱ u̱nꞌ ña̱ ndoo̱ kuieꞌe i̱ nuu̱ꞌ ne̱ yivi̱ꞌ sa̱a̱ u̱nꞌ.
Sa̱a̱ u̱nꞌ ña̱ va̱ꞌa̱ te̱ sa̱kakú u̱nꞌ yuꞌu̱,
sa̱kanꞌ ña̱ yoꞌó ndii,
ña̱ xatyuunꞌ nda̱ku nduuꞌ u̱nꞌ.
2 Ta̱xi̱ so̱ꞌo̱ u̱nꞌ ña̱ kaꞌán ndaꞌvi i̱ xiinꞌ u̱nꞌ,
te̱ sa̱kakú kiꞌi̱ꞌ u̱nꞌ yuꞌu̱,
sa̱a̱ u̱nꞌ ña̱ va̱ꞌa̱ te̱ ku̱ndu̱u̱ u̱nꞌ nde̱e̱ naa vi̱ꞌe̱ yuu̱ꞌ miiꞌ ku̱vi̱ ti̱si̱ꞌe i̱,
te̱ ko̱to̱ tu̱ u̱nꞌ yuꞌu̱ te̱ kaku̱ i̱.
3 Sa̱kanꞌ ña̱ yoꞌó nduuꞌ nde̱e̱ naa vi̱ꞌe̱ yuu̱ꞌ miiꞌ ku̱vi̱ kaku̱ i̱,
te̱ nduuꞌ tu̱ u̱nꞌ nde̱e̱ naa i̱i̱n vi̱ꞌe̱ sukun va̱.
Xaꞌa̱ꞌ a̱ ña̱ kiꞌinꞌ kaꞌnuꞌ xiinꞌ mi̱iꞌ u̱nꞌ ndii,
niaꞌa̱ u̱nꞌ yuꞌu̱ ndee ña̱ nduuꞌ ña̱ va̱ꞌa̱ sa̱a̱ i̱.
4 Sa̱a̱ u̱nꞌ ña̱ va̱ꞌa̱ te̱ sakakú u̱nꞌ yuꞌu̱ nuu̱ꞌ ña̱ níániꞌ te̱ ndasiꞌ taꞌanꞌ xiinꞌ i̱ yuꞌu̱,
sa̱kanꞌ ña̱ i̱i̱n nda̱a̱ꞌ yoꞌó ku̱i̱ti̱ꞌ nduuꞌ nde̱e̱ naa miiꞌ kakú i̱.
5 Nda̱ꞌaꞌ yoꞌó nataxiꞌ i̱ nimá i̱,
te̱ ko̱to̱ u̱nꞌ u̱n,
sa̱kanꞌ ña̱ yoꞌó ni̱ tya̱ꞌvi̱ xaꞌa̱ꞌ i̱,
te̱ ni̱ sa̱kakú u̱nꞌ yuꞌu̱,
Tákuiꞌe Yahvé,
ña̱ nduuꞌ Ndiosí xna̱ꞌa̱.
6 Yuꞌu̱ ndii,
ndasiꞌ va̱ i̱ ne̱ xakaꞌnuꞌ ndiosí saka,
sa̱kanꞌ ña̱ yuꞌu̱ ndii,
Yahvé ku̱i̱ti̱ꞌ i̱ni̱ i̱ xini i̱.
7 Yuꞌu̱ ndii,
sii̱ꞌ ku̱ni̱ i̱,
te̱ va̱ꞌa̱ tu̱ ku̱ni̱ i̱ xaꞌa̱ꞌ a̱ ña̱ kuvita i̱ni̱ u̱nꞌ xaꞌa̱ꞌ i̱,
sa̱kanꞌ ña̱ ni̱ xi̱ni̱ u̱nꞌ ña̱ ndoꞌoꞌ i̱,
te̱ ndiꞌni̱ u̱nꞌ xaꞌa̱ꞌ ña̱ ndoꞌoꞌ nimá i̱.
8 Nï̱ sa̱na̱kuaꞌa u̱nꞌ yuꞌu̱ nda̱ꞌaꞌ te̱ ndasiꞌ taꞌanꞌ xiinꞌ i̱,
süu̱ꞌ ja̱a̱nꞌ ndii ni̱ tyi̱nduꞌu̱ꞌ u̱nꞌ yuꞌu̱ i̱i̱n xaanꞌ miiꞌ köo̱ꞌ ña̱ i̱yo̱ ku̱ndo̱ꞌo̱ i̱.
9 Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ ku̱vi̱ta i̱ni̱ u̱nꞌ xaꞌa̱ꞌ i̱,
sa̱kanꞌ ña̱ ndiꞌni̱ va̱ nimá i̱,
te̱ xaꞌa̱ꞌ a̱ ña̱ xakuꞌ va̱ i̱ ndii,
täxiꞌ ka̱ ti̱kui ndu̱tyiꞌ nuu̱ꞌ i̱ ko̱to̱ va̱ꞌa̱ i̱,
te̱ sa̱kanꞌ tu̱ ñu̱ꞌuꞌ ndeꞌi̱ i̱ xiinꞌ nimá i̱ ndii,
xa̱ ni̱ xa̱vi va̱ a̱.
10 Ña̱ uꞌvi̱ xini i̱kiꞌ i̱ xiinꞌ ña̱ xakuꞌ i̱ ndii,
xa̱ ni̱ sa̱kuixaꞌ va̱ a̱ yuꞌu̱,
te̱ ña̱ sutyiꞌ i̱ni̱ i̱ ndii,
xa̱ ni̱ sa̱ndokoꞌ va̱ a̱ ña̱ ndi̱e̱eꞌ i̱,
te̱ i̱kiꞌ i̱ ndii,
köo̱ꞌ ka̱ xa̱tyiꞌ ka̱ ña̱ ndi̱e̱eꞌ a̱.
11 Te̱ xaꞌa̱ꞌ ña̱ kuuꞌ sa̱kuuꞌ te̱ ndasiꞌ taꞌanꞌ xiinꞌ i̱ ndii,
xandiꞌiꞌ ne̱ yivi̱ꞌ xiinꞌ i̱,
te̱ nduuꞌ i̱ nde̱e̱ naa te̱ tava̱ꞌ sii̱ꞌ nuu̱ꞌ ne̱ ndieeꞌ ya̱ti̱n vi̱ꞌe̱ i̱,
te̱ nduuꞌ tu̱ i̱ nde̱e̱ naa te̱ sayi̱ꞌvi nuu̱ꞌ ne̱ xiní taꞌanꞌ xiinꞌ i̱,
te̱ kii̱ꞌ xini ni̱a̱ ku̱a̱xi̱ i̱ ya̱ꞌya̱ ndii,
tu̱ku̱ xaanꞌ kiꞌinꞌ ni̱a̱ kuaꞌa̱n ni̱a̱.
12 Xa̱ ni̱ na̱ndoso̱ꞌ ni̱a̱ xaꞌa̱ꞌ i̱,
nde̱e̱ naa te̱ xa̱ ni̱ xiꞌi̱ nduuꞌ i̱ nuu̱ꞌ ni̱a̱,
te̱ nduuꞌ i̱ nuu̱ꞌ ni̱a̱ nde̱e̱ naa i̱i̱n ya̱xinꞌ ña̱ xa̱ ni̱ taꞌvi̱ꞌ.
13 Te̱ kuaꞌa̱ꞌ va̱ ña̱ kuäsa̱ꞌ kuní xini so̱ꞌo̱ i̱ ndatuꞌunꞌ ne̱ yivi̱ꞌ xata̱ꞌ i̱,
te̱ miiꞌ ka̱ kuaꞌa̱n i̱ ndii,
yiꞌvi va̱ i̱,
te̱ ne̱ ndasiꞌ taꞌanꞌ xiinꞌ i̱ ndii,
nduiinꞌ ni̱a̱ te̱ ndatuꞌunꞌ tuní ni̱a̱ꞌa ni̱a̱ xaꞌa̱ꞌ i̱,
te̱ tyituní ni̱a̱ ña̱ ka̱ꞌni̱ꞌ ni̱a̱ yuꞌu̱.
14 Ndisu̱ yuꞌu̱ ndii,
i̱ni̱ i̱ xini yoꞌó,
Tákuiꞌe Yahvé,
kaꞌán i̱ ndii:
“Yoꞌó nduuꞌ Ndiosí ña̱ xakaꞌnuꞌ i̱”,
katyi i̱.
15 Yoꞌó nduuꞌ ña̱ xiní ndee ña̱ xkaꞌndi̱a̱ nuu̱ꞌ kivi̱ꞌ ñu̱u̱ i̱ nuu̱ꞌ kuꞌu̱n e̱ꞌ,
sa̱a̱ u̱nꞌ ña̱ va̱ꞌa̱ te̱ sa̱kakú u̱nꞌ yuꞌu̱ nuu̱ꞌ ne̱ ndasiꞌ taꞌanꞌ xiinꞌ i̱ xiinꞌ nuu̱ꞌ ne̱ sandoꞌoꞌ yuꞌu̱.
16 Sa̱a̱ u̱nꞌ ña̱ va̱ꞌa̱ te̱ na̱ku̱a̱tiaꞌ u̱nꞌ ku̱ni̱ u̱nꞌ yuꞌu̱,
te̱ xikaꞌ nuuꞌ nuu̱ꞌ u̱nꞌ,
te̱ sa̱kakú u̱nꞌ yuꞌu̱ xaꞌa̱ꞌ a̱ ña̱ kuvita i̱ni̱ u̱nꞌ xaꞌa̱ꞌ i̱.
17 Tákuiꞌe Yahvé,
tä̱xi̱ u̱nꞌ sa̱ndoó kuiꞌe te̱ ndasiꞌ taꞌanꞌ xiinꞌ i̱ yuꞌu̱,
sa̱kanꞌ ña̱ xiinꞌ yoꞌó ni̱ kaꞌa̱n i̱ ña̱ tyi̱ndi̱e̱eꞌ u̱nꞌ yuꞌu̱.
Nde̱e̱ tyaaꞌ ka̱ na ku̱ka̱ꞌa̱n nuu̱ꞌ te̱ xaaꞌ ña̱ ni̱a̱ꞌa,
te̱ na ndoo̱ ra̱ ku̱ꞌu̱n iꞌinꞌ ra̱ ti̱xi̱n yavi̱ ndi̱i̱.
18 Te̱ na ku̱u̱ iꞌinꞌ te̱ ndatuꞌunꞌ tu̱n vixi̱,
te̱ käꞌa̱n ka̱ ra̱ nde̱e̱ i̱i̱n tu̱n vixi̱,
sa̱kanꞌ ña̱ sataví ku̱a̱tyi̱ vie̱ va̱ ra̱ ne̱ xatyuunꞌ nda̱ku,
te̱ ndatuꞌunꞌ ñuñuꞌ ra̱,
te̱ ndasiꞌ tu̱ ña̱ꞌaꞌ ra̱.
19 Tyiee̱ xa̱va̱ꞌa̱ ña̱ va̱ꞌa̱ nimá u̱nꞌ ni̱ ta̱xa̱ꞌa̱ u̱nꞌ xaꞌa̱ꞌ ne̱ xitoꞌ kaꞌnuꞌ yiꞌvi yoꞌó.
Te̱ xiinꞌ ña̱ ja̱a̱nꞌ sañuꞌuꞌ kuaꞌa̱ꞌ u̱nꞌ ne̱ xitoꞌ kaꞌnuꞌ yoꞌó,
te̱ nuu̱ꞌ sa̱kuuꞌ ne̱ yivi̱ꞌ i̱i̱n yivi̱ꞌ sañuꞌuꞌ ña̱ꞌaꞌ u̱nꞌ xiinꞌ ña̱ ja̱a̱nꞌ.
20 I̱i̱n xaanꞌ miiꞌ yoo si̱ꞌe nuu̱ꞌ u̱nꞌ,
miiꞌ nduꞌu̱ꞌ u̱nꞌ ti̱si̱ꞌe ña̱ꞌaꞌ u̱nꞌ nuu̱ꞌ ña̱ ni̱a̱ꞌa ña̱ tyituní te̱ yivi̱ꞌ sa̱a̱ ra̱ xiinꞌ ni̱a̱,
ko̱to̱ ña̱ꞌaꞌ u̱nꞌ ti̱xi̱n vi̱ꞌe̱ u̱nꞌ ja̱a̱nꞌ te̱ kü̱vi̱ ti̱i̱n ku̱a̱tyi̱ ña̱ꞌaꞌ te̱ ndasiꞌ ña̱ꞌaꞌ,
te̱ ko̱to̱ tu̱ ña̱ꞌaꞌ u̱nꞌ nuu̱ꞌ ña̱ tiinꞌ ku̱a̱tyi̱ sikiꞌ ña̱ꞌaꞌ ne̱ yivi̱ꞌ.
21 Sa̱kaꞌnuꞌ ndo̱ꞌ Yahvé,
sa̱kanꞌ ña̱ xaꞌa̱ꞌ a̱ ña̱ ndani̱ a̱ yuꞌu̱ ndii,
ni̱ ku̱vi̱ta va̱ i̱ni̱ a̱ xaꞌa̱ꞌ i̱,
te̱ ni̱ sa̱kakú a̱ yuꞌu̱ nuu̱ꞌ te̱ ndasiꞌ taꞌanꞌ xiinꞌ i̱ kii̱ꞌ ni̱ ko̱ꞌni̱ ra̱ sa̱a̱ kuaꞌa̱n ka̱niiꞌ ñu̱u̱ ndasiꞌ kutu̱ꞌ miiꞌ nduꞌu̱ꞌ i̱.
22 Kii̱ꞌ ni̱ yi̱ꞌvi xa̱va̱ꞌa̱ i̱,
te̱ ni̱ kaꞌa̱n i̱ xiinꞌ nimá i̱ ndii:
“Ni̱ sa̱xi̱o̱o̱ u̱nꞌ yuꞌu̱ nuu̱ꞌ u̱nꞌ”,
ni̱ xa̱ni̱ni̱ i̱.
Ndisu̱ kii̱ꞌ ni̱ kaꞌa̱n ndaꞌvi i̱ xiinꞌ u̱nꞌ ña̱ tyi̱ndi̱e̱eꞌ u̱nꞌ yuꞌu̱ ndii,
ni̱ na̱ku̱i̱i̱n u̱nꞌ ña̱ kaꞌán i̱.
23 Sa̱kuuꞌ ndoꞌó,
ne̱ nduuꞌ kuenta Yahvé ndii,
ku̱ndani̱ ña̱ꞌaꞌ ndo̱ꞌ,
te̱ ndoꞌó,
ne̱ xatyuunꞌ nda̱ku ndii,
xitoꞌ a̱ ndoꞌó.
Ndisu̱ ne̱ ñuñuꞌ ndii,
sa̱ndoꞌoꞌ uꞌvi̱ xa̱va̱ꞌa̱ ña̱ꞌaꞌ a̱.
24 Sa̱kanꞌ na kuiiꞌ sa̱kuuꞌ ndoꞌó,
ne̱ i̱ni̱ xini Yahvé ndii,
sa̱ndi̱e̱ni xiinꞌ miiꞌ ndo̱ꞌ,
te̱ na̱tyi̱naá kutu̱ꞌ ndo̱ꞌ ndi̱e̱e̱ꞌ nimá ndo̱ꞌ.