Yoꞌoꞌ kaꞌán a̱ xaꞌa̱ꞌ ña̱ ni̱ sa̱kiꞌví Ndiosí nimá David
Ya̱a̱ ni̱ xi̱ta̱ David kii̱ꞌ ni̱ xinu̱ yu̱kunꞌ Ndiosí.
30
Sa̱kaꞌnuꞌ i̱ yoꞌó,
Yahvé,
sa̱kanꞌ ña̱ ni̱ sa̱kakú u̱nꞌ yuꞌu̱ nda̱ꞌaꞌ te̱ ndasiꞌ taꞌanꞌ xiinꞌ i̱,
te̱ nï̱ ta̱xi̱ u̱nꞌ ña̱ kuaku̱ ndi̱a̱a̱ ra̱ yuꞌu̱.
2 Yahvé,
Ndiosí ña̱ xakaꞌnuꞌ i̱,
ni̱ kaꞌa̱n ndaꞌvi i̱ xiinꞌ u̱nꞌ,
te̱ ni̱ sa̱ndaꞌa u̱nꞌ yuꞌu̱.
3 Tákuiꞌe Yahvé,
ni̱ xta̱ꞌniꞌ u̱nꞌ yuꞌu̱ yavi̱ ndi̱i̱,
ni̱ sa̱na̱kaá ka̱ u̱nꞌ kivi̱ꞌ ñu̱u̱ i̱,
te̱ nï̱ ta̱xi̱ u̱nꞌ ku̱vi̱ i̱.
4 Ndoꞌó,
ne̱ xatyuunꞌ nda̱ku,
ka̱ta̱ ndo̱ꞌ ya̱a̱ nuu̱ꞌ Yahvé,
te̱ ki̱ꞌi̱n kaꞌnuꞌ ña̱ꞌaꞌ ndo̱ꞌ xaꞌa̱ꞌ a̱ ña̱ ña̱ su̱ꞌu̱n ndi̱ꞌi̱ nduuꞌ a̱.
5 Sa̱kanꞌ ña̱ ña̱ xiꞌé a̱ ndii,
i̱i̱n kani̱ꞌ ku̱i̱ti̱ꞌ te̱ xkaꞌndíá a̱,
ndisu̱ ña̱ kuvita i̱ni̱ a̱ ndii,
yoo a̱ nde̱e̱ ndiꞌiꞌ ni̱ kivi̱ꞌ.
Te̱ naaꞌ ni̱ xa̱ku̱ e̱ꞌ ñu̱u ndii,
ni̱a̱ꞌa̱ kii̱ꞌ kitu̱ꞌ te̱ ndeꞌi̱ tiꞌeꞌ e̱ꞌ ña̱ va̱ꞌa̱ kuni e̱ꞌ.
6 Kii̱ꞌ ni̱ ku̱miꞌ i̱ ña̱ tiaku i̱,
te̱ ni̱ kaꞌa̱n i̱ xiinꞌ nimá i̱ ndii:
“Nde̱e̱ i̱i̱n ña̱ꞌa̱ kü̱vi̱ na̱ka̱si̱ yuꞌu̱ vi̱ti̱n”,
ni̱ katyi̱ i̱.
7 Te̱ yoꞌó,
Yahvé,
xaꞌa̱ꞌ a̱ ña̱ ndani̱ u̱nꞌ yuꞌu̱ ndii,
ni̱ ta̱xi̱ u̱nꞌ kuaꞌa̱ꞌ ndi̱e̱e̱ꞌ i̱ te̱ kutu̱ꞌ iinꞌ i̱ nde̱e̱ naa i̱i̱n i̱kuꞌ tyiee̱,
ndisu̱ kii̱ꞌ ni̱ na̱ko̱o̱ i̱i̱n nda̱a̱ꞌ u̱nꞌ yuꞌu̱ ndii,
ni̱ yi̱ꞌvi xa̱va̱ꞌa̱ i̱.
8 Tákuiꞌe Yahvé,
xiinꞌ yoꞌó ni̱ kaꞌa̱n tiꞌeꞌ i̱,
te̱ ni̱ kaꞌa̱n ndaꞌvi i̱ xiinꞌ u̱nꞌ ña̱ ku̱vi̱ta i̱ni̱ u̱nꞌ xaꞌa̱ꞌ i̱,
kaꞌán i̱ ndii:
9 “Köo̱ꞌ xa̱tyiꞌ a̱ ka̱nandoo u̱nꞌ naaꞌ ku̱vi̱ yuꞌu̱,
te̱ kuꞌu̱n i̱ ti̱xi̱n yavi̱ ndi̱i̱,
kü̱vi̱ sa̱kaꞌnuꞌ ñu̱ꞌuꞌ ndeꞌi̱ i̱ yoꞌó ti̱xi̱n ñu̱ꞌuꞌ,
te̱ kü̱vi̱ tu̱ kaꞌa̱n ndo̱so̱ꞌ a̱ ña̱ ndi̱xa̱ xaꞌa̱ꞌ u̱nꞌ.
10 Sa̱a̱ u̱nꞌ ña̱ va̱ꞌa̱,
Tákuiꞌe Yahvé,
te̱ ku̱ni̱ so̱ꞌo̱ u̱nꞌ ña̱ kaꞌán i̱ xiinꞌ u̱nꞌ,
te̱ ku̱vi̱ta i̱ni̱ u̱nꞌ xaꞌa̱ꞌ i̱.
Tákuiꞌe Yahvé,
tyi̱ndi̱e̱eꞌ yuꞌu̱.”
11 Ni̱ na̱ma̱ u̱nꞌ ña̱ sutyiꞌ i̱ni̱ i̱,
te̱ ni̱ nda̱sa̱ nduuꞌ u̱nꞌ ña̱ taxaꞌaꞌ sii̱ꞌ i̱,
ni̱ xta̱ꞌniꞌ u̱nꞌ ña̱ nduuꞌ nde̱e̱ naa toto̱ ndiaaꞌ nde̱iꞌ ña̱ niꞌnuꞌ i̱ kii̱ꞌ sutyiꞌ i̱ni̱ i̱,
te̱ ni̱ sa̱kutuꞌ u̱nꞌ yuꞌu̱ ña̱ va̱ꞌa̱ kuni i̱,
te̱ nduuꞌ a̱ nde̱e̱ naa toto̱ nda̱tu̱nꞌ va̱.
12 Sa̱kanꞌ te̱ ka̱ta̱ i̱ ya̱a̱ nuu̱ꞌ u̱nꞌ,
te̱ köo̱ꞌ kivi̱ꞌ ko̱o̱ taxi̱nꞌ yu̱ꞌuꞌ i̱.
Tákuiꞌe Yahvé,
Ndiosí kuaꞌa mi̱iꞌ i̱,
nde̱e̱ ndiꞌiꞌ ni̱ kivi̱ꞌ sa̱kaꞌnuꞌ i̱ yoꞌó.