Yoꞌoꞌ kaꞌán a̱ xaꞌa̱ꞌ ña̱ ndi̱e̱eꞌ Ndiosí xiinꞌ xaꞌa̱ꞌ ña̱ kaꞌnuꞌ a̱
Ya̱a̱ ña̱ ni̱ xi̱ta̱ David nuu̱ꞌ Ndiosí.
29
Sa̱kuuꞌ ndoꞌó,
ángele,
ña̱ ndieeꞌ ndi̱viꞌ ndii,
sa̱kaꞌnuꞌ ndo̱ꞌ Yahvé,
te̱ ki̱ꞌi̱n kaꞌnuꞌ va̱ ndo̱ꞌ Yahvé xaꞌa̱ꞌ a̱ ña̱ ndi̱e̱eꞌ kooꞌ tyukuuꞌ a̱
xiinꞌ xaꞌa̱ꞌ a̱ ña̱ kaꞌnuꞌ va̱ ña̱ nduuꞌ a̱.
2 Ku̱a̱aꞌ tiꞌeꞌ sa̱kuuꞌ ndo̱ꞌ ña̱ kiꞌinꞌ kaꞌnuꞌ ndo̱ꞌ Yahvé xaꞌa̱ꞌ a̱ ña̱ nda̱tu̱nꞌ xa̱va̱ꞌa̱ kivi̱ꞌ a̱,
te̱ sa̱kaꞌnuꞌ ña̱ꞌaꞌ ndo̱ꞌ ti̱xi̱n yu̱kunꞌ miiꞌ yiꞌé ña̱ nda̱tu̱nꞌ va̱ a̱,
sa̱kanꞌ ña̱ ña̱ su̱ꞌu̱n ndi̱ꞌi̱ nduuꞌ a̱.
3 Ku̱vi̱ ku̱ni̱ so̱ꞌo̱ e̱ꞌ tatyi̱ꞌ Yahvé nuu̱ꞌ mi̱ni̱ kaꞌnuꞌ,
te̱ tiakú tiꞌeꞌ tatyi̱ꞌ Yahvé,
ña̱ xataꞌa̱n na̱ti̱i̱n sa̱kuuꞌ ña̱ kiꞌinꞌ kaꞌnuꞌ,
te̱ Yahvé ja̱a̱nꞌ xaꞌndia tyuunꞌ nuu̱ꞌ mi̱ni̱ kaꞌnuꞌ ja̱a̱nꞌ.
4 Tatyi̱ꞌ Yahvé ndii,
ndu̱su̱ xa̱va̱ꞌa̱ a̱,
te̱ tiꞌeꞌ xa̱va̱ꞌa̱ tiakú tatyi̱ꞌ a̱ ja̱a̱nꞌ.
5 Tatyi̱ꞌ Yahvé ndii,
sakuatyiꞌ a̱ tu̱nxaꞌ naꞌnuꞌ xa̱va̱ꞌa̱,
tunꞌ naniꞌ cedro.
Ni̱ sa̱kuatyiꞌ Yahvé tu̱nxaꞌ,
tunꞌ naniꞌ cedro,
tunꞌ yoo i̱kuꞌ ña̱ naniꞌ Líbano.
6 Te̱ sakandetaꞌ a̱ sa̱kuuꞌ i̱kuꞌ naꞌnuꞌ ña̱ itaꞌ nuu̱ꞌ ñu̱ꞌuꞌ Líbano nde̱e̱ naa si̱ndiki̱ꞌ kualiꞌ,
te̱ sakandetaꞌ tu̱ a̱ i̱kuꞌ ña̱ naniꞌ Hermón nde̱e̱ naa si̱ndiki̱ꞌ i̱kuꞌ kualiꞌ,
siꞌe̱ toro i̱kuꞌ.
7 Tatyi̱ꞌ Yahvé ndii,
nduuꞌ a̱ nde̱e̱ naa ñuꞌu̱ savi̱ꞌ.
8 Tatyi̱ꞌ Yahvé ndii,
sakanda a̱ ka̱niiꞌ miiꞌ i̱tyi kaaꞌ,
naa kuuꞌ miiꞌ i̱tyi kaaꞌ nuu̱ꞌ ñu̱ꞌuꞌ Cades ndii,
sakanda ña̱ꞌaꞌ a̱.
9 Tatyi̱ꞌ Yahvé ndii,
sakuatyiꞌ a̱ nde̱e̱ ta̱ntaꞌ naꞌnuꞌ va̱,
te̱ sa̱nduva ndo̱o̱ a̱ i̱tunꞌ xiinꞌ kuꞌu̱ ña̱ itaꞌ xiki̱ꞌ naꞌnuꞌ,
te̱ yu̱kunꞌ a̱ ndii,
sa̱kuuꞌ ne̱ yivi̱ꞌ xakaꞌnuꞌ ña̱ꞌaꞌ.
10 Yahvé nduuꞌ ña̱ xaꞌndia tyuunꞌ nuu̱ꞌ savi̱ꞌ,
ña̱ kuunꞌ kuieꞌe̱,
te̱ su̱vi̱ tu̱ a̱ nduuꞌ rey ña̱ xaꞌndia tyuunꞌ nde̱e̱ ndiꞌiꞌ ni̱ kivi̱ꞌ.
11 Yahvé ndii,
taxiꞌ a̱ ña̱ ndi̱e̱eꞌ ne̱ nduuꞌ kuenta a̱,
te̱ sañuꞌuꞌ tu̱ ña̱ꞌaꞌ a̱ te̱ ku̱ndi̱e̱e̱ mani̱ꞌ ni̱a̱.