Yoꞌoꞌ kaꞌán a̱ ña̱ xini so̱ꞌo̱ Ndiosí ña̱ kaꞌán ndaꞌvi e̱ꞌ xiinꞌ a̱
Ya̱a̱ ña̱ ni̱ xi̱ta̱ David nuu̱ꞌ Ndiosí.
28
Tákuiꞌe Yahvé,
ña̱ nduuꞌ nde̱e̱ naa vi̱ꞌe̱ yuu̱ꞌ miiꞌ kaku̱ i̱,
xiinꞌ yoꞌó kaꞌán tiꞌeꞌ i̱,
sä̱soꞌoꞌ xiinꞌ miiꞌ u̱nꞌ nuu̱ꞌ i̱.
Sa̱kanꞌ ña̱ naaꞌ nä̱ku̱i̱i̱n u̱nꞌ ña̱ kaꞌán i̱ xiinꞌ u̱nꞌ ndii,
nde̱e̱ tyaaꞌ ka̱ ko̱o̱ mi̱iꞌ i̱ sa̱kanꞌ te̱ ku̱vi̱ ndi̱ꞌi̱ i̱.
2 Sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ tatyi̱ꞌ i̱ kii̱ꞌ kaꞌán ndaꞌvi i̱ xiinꞌ u̱nꞌ,
te̱ ku̱vi̱ta i̱ni̱ u̱nꞌ xaꞌa̱ꞌ i̱
kii̱ꞌ kaꞌán tiꞌeꞌ i̱ xiinꞌ u̱nꞌ te̱ tyi̱ndi̱e̱eꞌ u̱nꞌ yuꞌu̱
xiinꞌ kii̱ꞌ ndaniꞌiꞌ i̱ nda̱ꞌaꞌ i̱ te̱ kataniꞌ i̱ e̱ miiꞌ iinꞌ yu̱kunꞌ kaꞌnuꞌ su̱ꞌu̱n.
3 Sä̱ndoꞌoꞌ u̱nꞌ yuꞌu̱ nde̱e̱ naa sandoꞌoꞌ u̱nꞌ ne̱ xaaꞌ ña̱ ni̱a̱ꞌa,
ni̱ nde̱e̱ sä̱ndoꞌoꞌ tu̱ u̱nꞌ yuꞌu̱ nde̱e̱ naa sandoꞌoꞌ u̱nꞌ ne̱ xaaꞌ ña̱ ki̱ni̱.
Ne̱ ja̱a̱nꞌ ndii,
kaꞌán mani̱ꞌ ni̱a̱ xiinꞌ ne̱ ndieeꞌ ya̱ti̱n vi̱ꞌe̱ ni̱a̱,
ndisu̱ xiinꞌ nimá ni̱a̱ ndii,
tyituní ni̱a̱ ña̱ ni̱a̱ꞌa xaꞌa̱ꞌ ne̱ ja̱a̱nꞌ.
4 Sa̱ndoꞌoꞌ u̱nꞌ ne̱ xaaꞌ ña̱ ni̱a̱ꞌa ja̱a̱nꞌ sa̱a̱ xataꞌa̱n ku̱ndo̱ꞌo̱ ni̱a̱,
te̱ ka̱ni̱ ña̱ꞌaꞌ u̱nꞌ sa̱a̱ niiꞌ kuaꞌa̱ꞌ ña̱ ni̱a̱ꞌa ni̱ xa̱a̱ ni̱a̱.
Sa̱na̱ndikoꞌ u̱nꞌ sa̱kuuꞌ ña̱ ni̱a̱ꞌa ña̱ ni̱ xa̱a̱ ni̱a̱ xiinꞌ ne̱ yivi̱ꞌ ku̱ndo̱ꞌo̱ mi̱iꞌ ni̱a̱.
5 Sa̱kanꞌ ña̱ xäaꞌ ni̱a̱ kuenta kuuꞌ sa̱kuuꞌ ña̱ ni̱ xa̱ꞌa̱ Yahvé,
ni̱ nde̱e̱ xäaꞌ tu̱ ni̱a̱ kuenta kuuꞌ nde̱e̱ i̱i̱n ña̱ ni̱ xa̱ꞌa̱ nda̱ꞌaꞌ Ndiosí.
Xaꞌa̱ꞌ a̱ ja̱a̱nꞌ na sa̱nduxín xa̱tyiꞌ ña̱ꞌaꞌ a̱,
te̱ köo̱ꞌ kivi̱ꞌ ka̱ na̱ku̱ndiee̱ va̱ꞌa̱ ni̱a̱ sa̱a̱ a̱.
6 Ña̱ kaꞌnuꞌ va̱ nduuꞌ Yahvé,
sa̱kanꞌ ña̱ xini so̱ꞌo̱ a̱ tatyi̱ꞌ yu̱ꞌuꞌ i̱ kii̱ꞌ kaꞌán ndaꞌvi i̱ xiinꞌ a̱.
7 Yahvé nduuꞌ ña̱ xitoꞌ yuꞌu̱,
te̱ su̱vi̱ tu̱ a̱ nduuꞌ nde̱e̱ naa ka̱a̱ ña̱ tiasi ti̱a̱ꞌni̱ i̱ te̱ xitoꞌ a̱ yuꞌu̱,
i̱ni̱ nimá i̱ xi̱ni̱ ña̱ꞌaꞌ i̱,
te̱ tyi̱ndi̱e̱eꞌ a̱ yuꞌu̱.
Xaꞌa̱ꞌ a̱ ja̱a̱nꞌ na nakuatiaꞌ va̱ nimá i̱,
te̱ xitaꞌ i̱ ya̱a̱ nuu̱ꞌ a̱ xaꞌa̱ꞌ a̱ ña̱ taxiꞌ i̱ ña̱ tyi̱nda̱ni a̱.
8 Yahvé nduuꞌ ña̱ xitoꞌ ne̱ nduuꞌ kuenta a̱,
te̱ nduuꞌ tu̱ a̱ miiꞌ kaku̱ rey,
te̱ ni̱ na̱ka̱xi̱n mi̱iꞌ a̱ xaꞌndia tyuunꞌ,
te̱ sakakú ña̱ꞌaꞌ a̱.
9 Yahvé,
sa̱kakú ne̱ nduuꞌ kuenta u̱nꞌ
sa̱ñuꞌuꞌ ne̱ vi̱ꞌe̱ Israel,
ne̱ ndani̱ va̱ u̱nꞌ.
Ku̱ndi̱a̱ka̱ ni̱a̱ kuꞌu̱n u̱nꞌ nde̱e̱ naa xaaꞌ i̱i̱n te̱ pa̱xto,
te̱ ta̱xi̱ u̱nꞌ ña̱ kuní nuu̱ꞌ ni̱a̱ te̱ ku̱ti̱a̱ku̱ ni̱a̱ nde̱e̱ ndiꞌiꞌ ni̱ kivi̱ꞌ.