Yoꞌoꞌ kaꞌán David ña̱ Yahvé Ndiosí nduuꞌ ña̱ xitoꞌ ña̱ꞌaꞌ
Ya̱a̱ ña̱ ni̱ xi̱ta̱ David nuu̱ꞌ Ndiosí.
27
Yahvé nduuꞌ nde̱e̱ naa ñuꞌu̱,
ña̱ sayiꞌé nuu̱ꞌ i̱ te̱ xikaꞌ i̱ i̱i̱n yivi̱ꞌ,
te̱ su̱vi̱ tu̱ a̱ nduuꞌ ña̱ sakakú yuꞌu̱,
sa̱kanꞌ na kuiiꞌ kuäsa̱ꞌ yiꞌvi i̱ nde̱e̱ i̱i̱n ne̱ yivi̱ꞌ.
Yahvé ja̱a̱nꞌ nduuꞌ ña̱ xitoꞌ yuꞌu̱ te̱ xikaꞌ i̱ i̱i̱n yivi̱ꞌ,
sa̱kanꞌ na kuiiꞌ kuäsa̱ꞌ yiꞌvi i̱ nde̱e̱ i̱i̱n ne̱ yivi̱ꞌ.
2 Kii̱ꞌ nduiinꞌ te̱ xaaꞌ ña̱ ni̱a̱ꞌa,
xiinꞌ te̱ sandoꞌoꞌ yuꞌu̱,
xiinꞌ te̱ ndasiꞌ taꞌanꞌ xiinꞌ i̱,
te̱ kiniꞌ ra̱ yuꞌu̱,
te̱ sa̱ndo̱ñuꞌuꞌ xa̱tyiꞌ ra̱ yuꞌu̱ ndii,
mi̱iꞌ ra̱ nduuꞌ te̱ kakiꞌí,
te̱ xiꞌí sa̱kuuꞌ ra̱.
3 Tee̱ꞌ ndee kuaꞌa̱ꞌ va̱ te̱ xíinꞌ ko̱o̱ sa̱a̱ xinundu̱u̱ xi̱i̱nꞌ i̱ miiꞌ nduꞌu̱ꞌ i̱ ndii,
kü̱yi̱ꞌvi nimá i̱.
Tee̱ꞌ ndee xa̱ꞌaꞌ ra̱ kiniꞌ ra̱ yuꞌu̱ ndii,
i̱ni̱ naa i̱ni̱ i̱ xini i̱ Ndiosí.
4 I̱i̱n nda̱a̱ꞌ ku̱i̱ti̱ꞌ ña̱ꞌa̱ xikán i̱ nuu̱ꞌ Yahvé,
te̱ ña̱ ja̱a̱nꞌ ku̱i̱ti̱ꞌ nduuꞌ ña̱ na̱ndu̱kuꞌ i̱.
Ña̱ ja̱a̱nꞌ ndii,
ña̱ ta̱xi̱ a̱ ku̱nduꞌu̱ꞌ i̱ vi̱ꞌe̱ a̱ nde̱e̱ ndiꞌiꞌ ni̱ kivi̱ꞌ nduuꞌ a̱.
Te̱ ko̱to̱ ndieꞌe̱ꞌ i̱ ña̱ nda̱tu̱nꞌ va̱ a̱,
te̱ ku̱vi̱ tu̱ na̱ka̱ni̱ni̱ i̱ xaꞌa̱ꞌ a̱ ti̱xi̱n yu̱kunꞌ kaꞌnuꞌ a̱.
5 Te̱ kii̱ꞌ ko̱o̱ tu̱ndoꞌo̱ꞌ nuu̱ꞌ i̱ ndii,
mi̱iꞌ a̱ ko̱to̱ yuꞌu̱ ti̱xi̱n yu̱kunꞌ a̱ ja̱a̱nꞌ,
te̱ ti̱si̱ꞌe a̱ yuꞌu̱ ti̱xi̱n yu̱kunꞌ kaꞌnuꞌ a̱ miiꞌ nduꞌu̱ꞌ a̱ ja̱a̱nꞌ.
Te̱ tyi̱nduꞌu̱ꞌ a̱ yuꞌu̱ xata̱ꞌ i̱i̱n yuu̱ꞌ sukun miiꞌ kutu̱ꞌ va̱ kaaꞌ.
6 Te̱ mi̱iꞌ Ndiosí sa̱a̱ sa̱kanꞌ,
te̱ ke̱ta̱ va̱ꞌa̱ i̱ nuu̱ꞌ sa̱kuuꞌ te̱ ndasiꞌ taꞌanꞌ xiinꞌ i̱,
te̱ itaꞌ sa̱a̱ xinundu̱u̱ xi̱i̱nꞌ i̱ ja̱a̱nꞌ.
Sa̱kanꞌ te̱ na̱soko̱ꞌ i̱ ki̱tiꞌ nuu̱ꞌ Ndiosí ti̱xi̱n yu̱kunꞌ a̱ xiinꞌ ña̱ va̱ꞌa̱ va̱ kuni i̱.
Te̱ ka̱ta̱ tu̱ i̱ ya̱a̱ nuu̱ꞌ Yahvé,
te̱ ndeꞌi̱ tiꞌeꞌ tu̱ i̱ ña̱ va̱ꞌa̱ va̱ kuni i̱.
7 Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ kii̱ꞌ kaꞌán i̱ xiinꞌ u̱nꞌ.
Sa̱a̱ u̱nꞌ ña̱ va̱ꞌa̱ te̱ ku̱vi̱ta i̱ni̱ u̱nꞌ xaꞌa̱ꞌ i̱,
te̱ na̱ku̱i̱i̱n u̱nꞌ kii̱ꞌ kaꞌán i̱ xiinꞌ u̱nꞌ.
8 Ni̱ xi̱ni̱ so̱ꞌo̱ nimá i̱ kaꞌán u̱nꞌ xiinꞌ a̱ ndii:
“Ni̱a̱ꞌa̱ te̱ nda̱tuꞌunꞌ e̱ꞌ,”
katyi u̱nꞌ.
Sa̱kanꞌ na kuiiꞌ ku̱a̱xi̱ i̱ nuu̱ꞌ u̱nꞌ te̱ nda̱tuꞌunꞌ i̱ xiinꞌ u̱nꞌ,
Yahvé.
9 Sa̱a̱ u̱nꞌ ña̱ va̱ꞌa̱ te̱ nä̱ko̱o̱ u̱nꞌ yuꞌu̱ xata̱ꞌ u̱nꞌ,
ni̱ nde̱e̱ sä̱xi̱o̱o̱ tu̱ u̱nꞌ yuꞌu̱,
te̱ xikaꞌ nuuꞌ nuu̱ꞌ u̱nꞌ,
xaꞌa̱ꞌ ña̱ xiꞌé u̱nꞌ xini u̱nꞌ yuꞌu̱.
Sa̱kanꞌ ña̱ yoꞌó nduuꞌ ña̱ xityindieeꞌ yuꞌu̱ sa̱kuuꞌ kivi̱ꞌ.
Sa̱a̱ u̱nꞌ ña̱ va̱ꞌa̱ te̱ nä̱ko̱o̱ u̱nꞌ yuꞌu̱ vi̱ti̱n,
te̱ ko̱to̱ na xitoꞌ tu̱ u̱nꞌ yuꞌu̱.
Sa̱kanꞌ ña̱ yoꞌó nduuꞌ Ndiosí ña̱ sakakú yuꞌu̱.
10 Tee̱ꞌ ndee na̱ko̱o̱ yu̱vaꞌ i̱ uun si̱ꞌiꞌ i̱ yuꞌu̱ ndii,
Yahvé ko̱to̱ yuꞌu̱ nde̱e̱ sa̱a̱ ka̱ ni̱.
11 Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ niaꞌa̱ u̱nꞌ yuꞌu̱ i̱tyiꞌ va̱ꞌa̱ ña̱ kuní a̱ ka̱ka̱ i̱ i̱i̱n yivi̱ꞌ,
te̱ tyi̱ndi̱e̱eꞌ u̱nꞌ yuꞌu̱ te̱ sa̱tyuunꞌ nda̱ku i̱,
sa̱kanꞌ ña̱ yoo kuaꞌa̱ꞌ va̱ te̱ ndasiꞌ taꞌanꞌ xiinꞌ i̱.
12 Tä̱xi̱ u̱nꞌ na̱ti̱i̱n te̱ ndasiꞌ taꞌanꞌ xiinꞌ i̱ ja̱a̱nꞌ yuꞌu̱,
te̱ sa̱a̱ ra̱ xiinꞌ i̱ sa̱a̱ ka̱ kaꞌán nimá mi̱iꞌ ra̱.
Sa̱kanꞌ ña̱ xa̱ yoo kuaꞌa̱ꞌ te̱ ndieeꞌ yu̱ꞌuꞌ sikiꞌ xaꞌa̱ꞌ i̱,
te̱ ndi̱e̱eꞌ va̱ kaꞌán nimá ra̱ ka̱ꞌni̱ꞌ ra̱ yuꞌu̱.
13 Ndisu̱ i̱ni̱ yuꞌu̱ ña̱ ku̱ni̱ i̱ ña̱ va̱ꞌa̱ nimá Yahvé vi̱ti̱n ña̱ yoo i̱ nuu̱ꞌ ñu̱ꞌuꞌ i̱i̱n yivi̱ꞌ yoꞌoꞌ.
14 Ku̱ndi̱a̱tu̱ kuiee i̱ni̱ ndo̱ꞌ Yahvé,
sa̱ndi̱e̱ni xiinꞌ miiꞌ ndo̱ꞌ,
te̱ kü̱ndi̱ꞌni̱ tu̱ nimá ndo̱ꞌ.
Uun ndo̱ꞌ,
ku̱ndi̱a̱tu̱ kuiee i̱ni̱ ndo̱ꞌ Yahvé.