Yoꞌoꞌ kaꞌán David xiinꞌ Ndiosí ña̱ sataví ku̱a̱tyi̱ nianí ña̱ꞌaꞌ ne̱ yivi̱ꞌ
Ya̱a̱ ña̱ ni̱ xi̱ta̱ David nuu̱ꞌ Ndiosí.
26
Yahvé,
sa̱naꞌmá u̱nꞌ yuꞌu̱,
sa̱kanꞌ te̱ ku̱ni̱ u̱nꞌ ña̱ te̱ xatyuunꞌ nda̱ku nduuꞌ i̱,
te̱ köo̱ꞌ kivi̱ꞌ tu̱ ni̱ na̱ko̱o̱ i̱ ña̱ i̱ni̱ i̱ xini i̱ yoꞌó.
2 Ko̱to̱ ku̱a̱ꞌa̱ u̱nꞌ yuꞌu̱,
te̱ sa̱naꞌmá tu̱ u̱nꞌ yuꞌu̱,
Tákuiꞌe Yahvé,
ko̱to̱ ndiꞌi̱ va̱ u̱nꞌ ña̱ xanini i̱ xiinꞌ ña̱ yoo nimá i̱.
3 Sa̱kanꞌ ña̱ xiní kaxiꞌ i̱ ña̱ ndani̱ u̱nꞌ yuꞌu̱ nde̱e̱ ndiꞌiꞌ ni̱ kivi̱ꞌ,
te̱ xikaꞌ i̱ sa̱a̱ niiꞌ kaꞌán tyuunꞌ ña̱ ndi̱xa̱ xaꞌa̱ꞌ u̱nꞌ.
4 Köo̱ꞌ kivi̱ꞌ kiꞌinꞌ taꞌanꞌ i̱ xiinꞌ te̱ ndatuꞌunꞌ tu̱n vixi̱,
ni̱ nde̱e̱ köo̱ꞌ kivi̱ꞌ kiꞌinꞌ taꞌanꞌ tu̱ i̱ xiinꞌ te̱ xasuviꞌ xiinꞌ miiꞌ.
5 Kii̱ꞌ nakayá te̱ xaaꞌ ña̱ ni̱a̱ꞌa te̱ ndatuꞌunꞌ tuní ra̱ ndii,
xtäni̱ i̱ xa̱tyiꞌ i̱ kuuꞌ ra̱,
te̱ köo̱ꞌ kivi̱ꞌ ni̱ ki̱ꞌi̱n taꞌanꞌ i̱ xiinꞌ nde̱e̱ i̱i̱n ra̱.
6 Tákuiꞌe Yahvé,
xa̱ ni̱ na̱ti̱a̱ i̱ nda̱ꞌaꞌ i̱,
te̱ niaꞌá i̱ ña̱ te̱ köo̱ꞌ ku̱a̱tyi̱ nduuꞌ i̱,
sa̱kanꞌ te̱ ku̱vi̱ ku̱ya̱ti̱n i̱ nuu̱ꞌ altar miiꞌ nasoko̱ꞌ sutu̱ ki̱tiꞌ nuu̱ꞌ u̱nꞌ.
7 Te̱ ka̱ta̱ sii̱ꞌ tiꞌeꞌ i̱ ya̱a̱ nuu̱ꞌ u̱nꞌ xaꞌa̱ꞌ a̱ ña̱ taxiꞌ i̱ ña̱ tyi̱nda̱ni u̱nꞌ,
te̱ kaꞌa̱n tu̱ i̱ nuu̱ꞌ ne̱ yivi̱ꞌ xaꞌa̱ꞌ tyu̱u̱n kaꞌnuꞌ ña̱ xaaꞌ u̱nꞌ.
8 Yahvé,
ndani̱ yuꞌu̱ yu̱kunꞌ kaꞌnuꞌ miiꞌ nduꞌu̱ꞌ u̱nꞌ,
sa̱kanꞌ ña̱ ndani̱ i̱ miiꞌ yoo ña̱ nda̱tu̱nꞌ u̱nꞌ.
9 Tä̱xi̱ u̱nꞌ ku̱ndo̱ꞌo̱ i̱ naa ña̱ ndoꞌoꞌ ne̱ xaaꞌ ku̱a̱tyi̱,
ni̱ nde̱e̱ kä̱ꞌni̱ꞌ ingaꞌ tu̱ u̱nꞌ yuꞌu̱ xiinꞌ ne̱ xaꞌni̱ꞌ ne̱ yivi̱ꞌ.
10 Ne̱ yivi̱ꞌ ja̱a̱nꞌ ndii,
xa̱ nuu̱ꞌ ña̱ ni̱a̱ꞌa xaaꞌ ni̱a̱,
te̱ kiꞌinꞌ ni̱a̱ xu̱ꞌunꞌ nda̱ꞌaꞌ ne̱ yivi̱ꞌ xiinꞌ ña̱ xini xaꞌanꞌ.
11 Ndisu̱ yuꞌu̱ ndii,
xäaꞌ i̱ ña̱ ja̱a̱nꞌ,
süu̱ꞌ ja̱a̱nꞌ ndii,
xatyuunꞌ nda̱ku i̱,
sa̱kanꞌ na kuiiꞌ sa̱a̱ u̱nꞌ ña̱ va̱ꞌa̱ te̱ tya̱ꞌvi̱ u̱nꞌ xaꞌa̱ꞌ i̱,
te̱ sa̱kakú u̱nꞌ yuꞌu̱,
te̱ niaꞌa̱ u̱nꞌ ña̱ kuvita i̱ni̱ u̱nꞌ xaꞌa̱ꞌ i̱.
12 Te̱ vi̱ti̱n ndii,
xikaꞌ nda̱ku i̱ i̱tyiꞌ Ndiosí,
te̱ sa̱kaꞌnuꞌ i̱ Yahvé nuu̱ꞌ sa̱kuuꞌ ne̱ yivi̱ꞌ miiꞌ nakayá ni̱a̱ xakaꞌnuꞌ ña̱ꞌaꞌ ni̱a̱.