Yoꞌoꞌ kaꞌán ndaꞌvi va̱ David nuu̱ꞌ Ndiosí, te̱ xitaꞌ tu̱ ra̱ ya̱a̱ nuu̱ꞌ a̱
Ya̱a̱ ña̱ ni̱ xi̱ta̱ David kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
22
Ndiosí mi̱iꞌ i̱,
Ndiosí mi̱iꞌ i̱,
¿ndiotyun na ni̱ na̱ko̱o̱ u̱nꞌ yuꞌu̱?
Te̱,
¿ndiotyun na xikaꞌ niatu̱ yoo u̱nꞌ kii̱ꞌ kanaꞌ i̱ yoꞌó,
te̱ tyi̱ndi̱e̱eꞌ u̱nꞌ yuꞌu̱?
2 Ndiosí mi̱iꞌ i̱,
sa̱a̱ kivi̱ꞌ kaꞌán ndaꞌvi i̱ xiinꞌ u̱nꞌ te̱ näkuiinꞌ u̱nꞌ.
Te̱ sa̱a̱ ñu̱u xini so̱ꞌo̱ u̱nꞌ tatyi̱ꞌ yu̱ꞌuꞌ i̱ ña̱ kaꞌán tu̱ i̱ xiinꞌ u̱nꞌ,
te̱ kuäsa̱ꞌ tyindieeꞌ u̱nꞌ yuꞌu̱ te̱ vi̱kuii̱n ña̱ ndoꞌoꞌ i̱.
3 Ndisu̱ yoꞌó nduuꞌ Ndiosí su̱ꞌu̱n ña̱ xakaꞌnuꞌ nduꞌu̱,
ne̱ vi̱ꞌe̱ Israel.
4 Yoꞌó ni̱ i̱ni̱ ne̱ xii̱ꞌ ya̱taꞌ ndu̱ ni̱ xi̱ni̱ ni̱a̱,
ni̱ i̱ni̱ xa̱va̱ꞌa̱ ni̱a̱ ni̱ xi̱ni̱ ni̱a̱ yoꞌó,
te̱ ni̱ sakakú ña̱ꞌaꞌ u̱nꞌ.
5 Ni̱ kaꞌa̱n ndaꞌvi ni̱a̱ xiinꞌ u̱nꞌ,
te̱ ni̱ sa̱kakú ña̱ꞌaꞌ u̱nꞌ,
ni̱ i̱ni̱ ni̱a̱ ni̱ xi̱ni̱ ni̱a̱ yoꞌó,
te̱ köo̱ꞌ kivi̱ꞌ ni̱ ku̱tyani ni̱a̱.
6 Ndisu̱ yuꞌu̱ ndii,
nde̱e̱ naa i̱i̱n ti̱ndaa̱ꞌ ku̱i̱ti̱ꞌ nduuꞌ i̱ nuu̱ꞌ ne̱ yivi̱ꞌ,
te̱ nde̱e̱ naa süu̱ꞌ te̱ yivi̱ꞌ nduuꞌ i̱,
te̱ sa̱kuuꞌ ni̱a̱ xandiꞌiꞌ xiinꞌ i̱,
te̱ ndasiꞌ tu̱ ne̱ ndieeꞌ sa̱kuuꞌ ñu̱u̱ yuꞌu̱.
7 Sa̱kuuꞌ ne̱ yivi̱ꞌ,
ne̱ xini yuꞌu̱ ndii,
xandiꞌiꞌ ni̱a̱ xiinꞌ i̱,
te̱ xakú ndi̱a̱a̱ ityi̱ ni̱a̱ yuꞌu̱,
te̱ sekoꞌ ni̱a̱ xíniꞌ ni̱a̱ kaꞌán ni̱a̱ ndii:
8 “Te̱ kaa̱ꞌ ndii,
Yahvé i̱ni̱ ra̱ xini ra̱,
naaꞌ sa̱kanꞌ ndii,
na ki̱xi̱n mi̱iꞌ Yahvé te̱ sakakú ña̱ꞌaꞌ a̱.
Naaꞌ ndani̱ yaꞌa̱ xna̱ꞌa̱ ña̱ꞌaꞌ Yahvé ndii,
ña̱ ja̱a̱nꞌ na sa̱kakú ña̱ꞌaꞌ”,
katyi ni̱a̱.
9 Ndisu̱ yoꞌó nduuꞌ ña̱ ni̱ xa̱a̱ sa̱kanꞌ,
te̱ ni̱ tuvi̱ va̱ꞌa̱ i̱ i̱i̱n yivi̱ꞌ kii̱ꞌ ni̱ sa̱kakuꞌ si̱ꞌiꞌ i̱ yuꞌu̱,
te̱ yoꞌó tu̱ nduuꞌ ña̱ ni̱ xa̱a̱ sa̱kanꞌ,
te̱ i̱ni̱ xini i̱ yoꞌó nde̱e̱ kii̱ꞌ satyityinꞌ ka̱ si̱ꞌiꞌ i̱ yuꞌu̱.
10 Nda̱ꞌaꞌ yoꞌó ni̱ sa̱na̱kuaꞌa yu̱vaꞌ siꞌiꞌ i̱ yuꞌu̱ nde̱e̱ ña̱ kuní ka̱ tuvi̱ i̱,
te̱ nde̱e̱ kii̱ꞌ naá ka̱ i̱ ti̱xi̱n si̱ꞌiꞌ i̱ ndii,
xa̱ yoꞌó nduuꞌ Ndiosí i̱.
11 Kü̱xikaꞌ u̱nꞌ nuu̱ꞌ i̱,
sa̱kanꞌ ña̱ xa̱ kuyatinꞌ va̱ tu̱ndoꞌo̱ꞌ nuu̱ꞌ i̱,
te̱ köo̱ꞌ nde̱e̱ i̱i̱n ne̱ ku̱vi̱ tyi̱ndi̱e̱eꞌ yuꞌu̱.
12 Ne̱ ndasiꞌ taꞌanꞌ xiinꞌ i̱ ndii,
ni̱ xi̱nu̱ndu̱u̱ ni̱a̱ yuꞌu̱,
te̱ nduuꞌ ni̱a̱ nde̱e̱ naa kuaꞌa̱ꞌ toro kuiꞌe̱ va̱,
te̱ ndi̱e̱eꞌ ni̱a̱ nde̱e̱ naa toro i̱kuꞌ,
tiꞌ yoo nuu̱ꞌ ñu̱ꞌuꞌ Basán,
te̱ xa̱ ni̱ nda̱si̱ i̱ꞌnu̱ ni̱a̱ yuꞌu̱.
13 Te̱ xaaꞌ tu̱ ni̱a̱ xiinꞌ i̱ nde̱e̱ naa lion kii̱ꞌ xa̱ ndika riꞌ yu̱ꞌuꞌ riꞌ ña̱ kuni ka̱xi̱ꞌ riꞌ ki̱tiꞌ,
xiña riꞌ te̱ sa̱kuatyiꞌ xiꞌe̱ riꞌ ki̱tiꞌ,
tiꞌ xaꞌni̱ꞌ riꞌ.
14 Ni̱ ndo̱ko̱ ndo̱o̱ ña̱ ndi̱e̱eꞌ i̱ nde̱e̱ naa xaaꞌ ti̱kui ndokoꞌ raꞌ i̱ti̱a̱,
te̱ sa̱kuuꞌ i̱kiꞌ i̱ ndii,
ni̱ se̱inꞌ taꞌanꞌ ndo̱o̱ a̱.
Te̱ nimá i̱ ndii,
ni̱ ndu̱ti̱a̱ a̱ ti̱xi̱n i̱ nde̱e̱ naa ndutiaꞌ ñuma̱ꞌ.
15 Te̱ ña̱ ndi̱e̱eꞌ i̱ ndii,
ni̱ na̱ya̱a̱ ndo̱o̱ a̱ nde̱e̱ naa nayaaꞌ ñu̱ꞌuꞌ kixinꞌ ña̱ yatanꞌ nuu̱ꞌ ñuꞌu̱.
Te̱ yaa̱ꞌ i̱ ndii,
ni̱ na̱ya̱a̱ a̱ nde̱e̱ ni̱ tii̱n ndi̱a̱a̱ a̱ ti̱xi̱n yu̱ꞌuꞌ i̱,
ni̱ na̱ko̱o̱ u̱nꞌ yuꞌu̱ kanduꞌu̱ꞌ i̱ ñu̱ꞌuꞌ nde̱e̱ naa te̱ xa̱ ni̱ xiꞌi̱ xa̱tyiꞌ.
16 Te̱ ndasiꞌ taꞌanꞌ xiinꞌ i̱ ndii,
xa̱ ni̱ xi̱nu̱ndu̱u̱ ra̱ yuꞌu̱ nde̱e̱ naa i̱i̱n ti̱ꞌvi̱ naya̱ꞌ,
te̱ kuaꞌa̱ꞌ va̱ te̱ xaaꞌ ña̱ ni̱a̱ꞌa itaꞌ sa̱a̱ kuaꞌa̱n xi̱i̱nꞌ i̱,
te̱ xa̱ ni̱ sa̱tu̱xuꞌví ra̱ xaꞌa̱ꞌ i̱ xiinꞌ nda̱ꞌaꞌ i̱.
17 Nde̱e̱ ku̱vi̱ ka̱ꞌvi̱ i̱ i̱ꞌi̱n i̱kiꞌ i̱,
te̱ ne̱ ndasiꞌ taꞌanꞌ xiinꞌ i̱ ja̱a̱nꞌ ndii,
itaꞌ te̱ itaꞌ ni̱a̱ xitoꞌ ndo̱so̱ꞌ ni̱a̱ yuꞌu̱.
18 Te̱ ni̱ na̱ta̱ꞌviꞌ tu̱ ni̱a̱ toto̱ i̱,
ndi̱ꞌi̱ ja̱a̱nꞌ,
te̱ ni̱ ka̱ti̱n ni̱a̱ a̱ te̱ ku̱ni̱ ni̱a̱ yo̱o̱ nda̱ꞌaꞌ ndoo̱ a̱.
19 Ndisu̱ yoꞌó,
Yahvé,
sa̱a̱ u̱nꞌ ña̱ va̱ꞌa̱ te̱ kü̱xikaꞌ u̱nꞌ nuu̱ꞌ i̱,
sa̱kanꞌ ña̱ yoꞌó nduuꞌ ña̱ taxiꞌ ndi̱e̱e̱ꞌ i̱,
xaꞌa̱ꞌ a̱ ja̱a̱nꞌ na ni̱a̱ꞌa̱ kiꞌi̱ꞌ te̱ tyi̱ndi̱e̱eꞌ u̱nꞌ yuꞌu̱.
20 Tä̱xi̱ u̱nꞌ ka̱ꞌni̱ꞌ te̱ yivi̱ꞌ kaa̱ꞌ yuꞌu̱ xiinꞌ ityi̱,
sa̱a̱ u̱nꞌ ña̱ va̱ꞌa̱ te̱ sa̱kakú u̱nꞌ yuꞌu̱ nda̱ꞌaꞌ ra̱,
te̱ tä̱xi̱ u̱nꞌ sa̱kuatyiꞌ xa̱tyiꞌ ra̱ yuꞌu̱,
sa̱kanꞌ ña̱ te̱ ndasiꞌ taꞌanꞌ xiinꞌ i̱ kaa̱ꞌ ndii,
kuuꞌ ra̱ nde̱e̱ naa naya̱ꞌ.
21 Sa̱a̱ u̱nꞌ ña̱ va̱ꞌa̱ te̱ sa̱kakú u̱nꞌ yuꞌu̱ nda̱ꞌaꞌ te̱ yivi̱ꞌ ja̱a̱nꞌ,
te̱ nduuꞌ nde̱e̱ naa yu̱ꞌuꞌ lion,
te̱ na̱kaꞌa̱n u̱nꞌ xaꞌa̱ꞌ i̱ nuu̱ꞌ te̱ yivi̱ꞌ ja̱a̱nꞌ,
te̱ nduuꞌ nde̱e̱ naa ndi̱kiꞌ toro i̱kuꞌ.
22 Kaꞌa̱n ndo̱so̱ꞌ i̱ nuu̱ꞌ ne̱ taꞌanꞌ i̱ ña̱ ña̱ kaꞌnuꞌ va̱ nduuꞌ u̱nꞌ,
te̱ ki̱ꞌi̱n kaꞌnuꞌ tu̱ i̱ yoꞌó miiꞌ nakayá kuaꞌa̱ꞌ ne̱ yivi̱ꞌ xakaꞌnuꞌ ni̱a̱ yoꞌó.
23 Ndoꞌó,
ne̱ kiꞌinꞌ kaꞌnuꞌ Yahvé ndii,
na sa̱kaꞌnuꞌ ña̱ꞌaꞌ ndo̱ꞌ.
Te̱ sa̱kuuꞌ ndoꞌó,
ne̱ nduuꞌ si̱a̱niꞌ xikaꞌ Jacob xiinꞌ i̱ ndii,
ki̱ꞌi̱n kaꞌnuꞌ ña̱ꞌaꞌ ndo̱ꞌ.
Te̱ sa̱kanꞌ tu̱ ku̱yi̱ꞌvi ña̱ꞌaꞌ sa̱kuuꞌ ndoꞌó,
ne̱ si̱a̱niꞌ xikaꞌ te̱ vi̱ꞌe̱ Israel xiinꞌ i̱.
24 Sa̱kanꞌ ña̱ nï̱ sa̱xi̱o̱o̱ a̱ ne̱ yoo tu̱ndoꞌo̱ꞌ nuu̱ꞌ,
ni̱ nde̱e̱ nï̱ na̱ko̱o̱ tu̱ ña̱ꞌaꞌ a̱ xata̱ꞌ a̱,
ni̱ nde̱e̱ nï̱ ti̱si̱ꞌe tu̱ a̱ nuu̱ꞌ ni̱a̱ kii̱ꞌ ni̱ xika̱n ni̱a̱ nuu̱ꞌ a̱ ña̱ tyi̱ndi̱e̱eꞌ ña̱ꞌaꞌ a̱.
Süu̱ꞌ ja̱a̱nꞌ ndii,
ni̱ xi̱ni̱ so̱ꞌo̱ a̱ tatyi̱ꞌ yu̱ꞌuꞌ ni̱a̱ kii̱ꞌ ni̱ kaꞌa̱n tiꞌeꞌ ni̱a̱ xiinꞌ a̱ ña̱ tyi̱ndi̱e̱eꞌ ña̱ꞌaꞌ a̱.
25 Te̱ ki̱ꞌi̱n kaꞌnuꞌ i̱ yoꞌó miiꞌ nakayá kuaꞌa̱ꞌ ne̱ yivi̱ꞌ xakaꞌnuꞌ ni̱a̱ yoꞌó,
te̱ miiꞌ nakayá sa̱kuuꞌ ne̱ kiꞌinꞌ kaꞌnuꞌ yoꞌó sa̱xinú i̱ kuento i̱ ña̱ ni̱ ta̱xi̱ i̱ nuu̱ꞌ u̱nꞌ.
26 Ne̱ ndaꞌvi kuuꞌ ndii,
ko̱o̱ kuaꞌa̱ꞌ ña̱ ka̱xi̱ꞌ ni̱a̱ nde̱e̱ nda̱ꞌni̱ ni̱a̱,
te̱ ne̱ nandukuꞌ Yahvé ndii,
na sa̱kaꞌnuꞌ ña̱ꞌaꞌ ni̱a̱,
te̱ ku̱ti̱a̱ku̱ ni̱a̱ nde̱e̱ ndiꞌiꞌ ni̱ kivi̱ꞌ.
27 Sa̱kuuꞌ ne̱ yivi̱ꞌ,
ne̱ ndieeꞌ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ,
na̱ka̱ꞌanꞌ xaꞌa̱ꞌ Yahvé,
te̱ na̱ndi̱koꞌ sa̱kuuꞌ ni̱a̱ nuu̱ꞌ a̱.
Te̱ sa̱kuuꞌ i̱ꞌi̱n ti̱ꞌvi̱ ne̱ yivi̱ꞌ,
ne̱ yoo nuu̱ꞌ ñu̱ꞌuꞌ i̱i̱n yivi̱ꞌ,
ku̱i̱ta̱ xitiꞌ nuu̱ꞌ Yahvé,
te̱ ki̱ꞌi̱n kaꞌnuꞌ ña̱ꞌaꞌ ni̱a̱.
28 Sa̱kanꞌ ña̱ mi̱iꞌ Yahvé ja̱a̱nꞌ nduuꞌ rey,
te̱ su̱vi̱ a̱ nduuꞌ ña̱ xaꞌndia tyuunꞌ nuu̱ꞌ sa̱kuuꞌ ne̱ yivi̱ꞌ ka̱niiꞌ i̱i̱n yivi̱ꞌ.
29 Sa̱kuuꞌ te̱ vika̱ꞌ ndieeꞌ i̱i̱n yivi̱ꞌ ka̱sa̱ꞌa̱ vi̱koꞌ te̱ sa̱kaꞌnuꞌ ra̱ Ndiosí.
Te̱ sa̱kuuꞌ ne̱ yivi̱ꞌ,
ne̱ ndieeꞌ i̱i̱n yivi̱ꞌ ndii,
ku̱vi̱ ni̱a̱,
te̱ sa̱kuuꞌ ni̱a̱ ku̱i̱ta̱ xitiꞌ nuu̱ꞌ Ndiosí,
te̱ sa̱kaꞌnuꞌ ña̱ꞌaꞌ ni̱a̱.
Sa̱kanꞌ ña̱ süu̱ꞌ kuenta mi̱iꞌ ni̱a̱ nduuꞌ kivi̱ꞌ ñu̱u̱ ni̱a̱.
30 Si̱a̱niꞌ xikaꞌ ndu̱ ndii,
ka̱ka̱ nu̱u̱ ni̱a̱ nuu̱ꞌ Yahvé,
te̱ sa̱niaꞌá ni̱a̱ siꞌe̱ ni̱a̱,
ne̱ ko̱o̱ nuu̱ꞌ kuꞌu̱n e̱ꞌ,
xaꞌa̱ꞌ Yahvé.
31 Te̱ sa̱niaꞌá tu̱ ni̱a̱ nde̱e̱ siꞌe̱ ni̱a̱,
ne̱ kuní ka̱ tuvi̱,
xaꞌa̱ꞌ ña̱ xatyuunꞌ nda̱ku Yahvé,
te̱ ku̱ni̱ ne̱ ja̱a̱nꞌ sa̱kuuꞌ ña̱ ni̱ xa̱a̱ Ndiosí,
tee̱ꞌ ndee tïaꞌa̱an ko̱o̱ nde̱e̱ i̱i̱n ni̱a̱.