Yoꞌoꞌ xakaꞌnuꞌ rey David Ndiosí xaꞌa̱ꞌ a̱ ña̱ ni̱ ke̱ta̱ va̱ꞌa̱ ra̱ nuu̱ꞌ te̱ ndasiꞌ taꞌanꞌ xiinꞌ ra̱
Ya̱a̱ ña̱ ni̱ xi̱ta̱ David, ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
21
Tákuiꞌe Yahvé,
va̱ꞌa̱ va̱ kuni rey ña̱ tyindieeꞌ u̱nꞌ ra̱ xiinꞌ ña̱ ndi̱e̱eꞌ u̱nꞌ,
te̱ va̱ꞌa̱ yaꞌa̱ tu̱ kuni ra̱ xaꞌa̱ꞌ a̱ ña̱ ni̱ ta̱xi̱ u̱nꞌ ni̱ ka̱nandoo ra̱.
2 Sa̱kanꞌ ña̱ ni̱ ta̱xi̱ u̱nꞌ ña̱ kuní nimá ra̱ nda̱ꞌaꞌ ra̱,
te̱ nde̱e̱ i̱i̱n ña̱ xikán ra̱ nuu̱ꞌ u̱nꞌ nï̱ kaꞌa̱n yu̱ꞌuꞌ u̱nꞌ,
te̱ ni̱ ta̱xi̱ u̱nꞌ u̱n nda̱ꞌaꞌ ra̱.
Selah
3 Ku̱a̱tyi̱ ndii,
ni̱ ki̱xi̱n na̱ti̱i̱n va̱ꞌa̱ ña̱ꞌaꞌ u̱nꞌ,
te̱ ni̱ sa̱ñuꞌuꞌ va̱ ña̱ꞌaꞌ u̱nꞌ xiinꞌ kuaꞌa̱ꞌ va̱ ña̱ va̱ꞌa̱,
te̱ ni̱ tyi̱nduꞌu̱ꞌ tu̱ u̱nꞌ i̱i̱n corona ña̱ ni̱ ku̱a̱ꞌa̱ xiinꞌ mi̱iꞌ ndiꞌiꞌ oro xíniꞌ ra̱.
4 Ni̱ xika̱n ra̱ nuu̱ꞌ u̱nꞌ ña̱ ko̱to̱ u̱nꞌ kivi̱ꞌ ñu̱u̱ ra̱,
te̱ ni̱ xi̱to̱ xna̱ꞌa̱ ña̱ꞌaꞌ u̱nꞌ,
te̱ kivi̱ꞌ ñu̱u̱,
ña̱ ni̱ ta̱xi̱ u̱nꞌ nda̱ꞌaꞌ ra̱ ja̱a̱nꞌ ndii,
ña̱ köo̱ꞌ kivi̱ꞌ ndiꞌiꞌ nduuꞌ a̱,
te̱ yoo a̱ nde̱e̱ ndiꞌiꞌ ni̱ kivi̱ꞌ.
5 Te̱ kuaꞌa̱ꞌ va̱ ne̱ yivi̱ꞌ kiꞌinꞌ kaꞌnuꞌ ña̱ꞌaꞌ xaꞌa̱ꞌ a̱ ña̱ ni̱ ta̱xi̱ u̱nꞌ ni̱ ka̱nandoo ra̱,
te̱ ni̱ sa̱ñuꞌuꞌ va̱ u̱nꞌ ra̱ xiinꞌ ña̱ kiꞌinꞌ kaꞌnuꞌ ña̱ꞌaꞌ ne̱ yivi̱ꞌ,
te̱ sa̱kanꞌ tu̱ xiinꞌ ña̱ kooꞌ tyukuuꞌ va̱ ra̱.
6 Te̱ ni̱ sa̱ñuꞌuꞌ ña̱ꞌaꞌ u̱nꞌ nde̱e̱ ndiꞌiꞌ ni̱ kivi̱ꞌ,
te̱ va̱ꞌa̱ va̱ kuni ra̱ ña̱ yoo te̱ yoo u̱nꞌ xiinꞌ ra̱.
7 Te̱ xaꞌa̱ꞌ a̱ ña̱ i̱ni̱ rey xini ra̱ Yahvé,
te̱ i̱ni̱ tu̱ ra̱ xini ra̱ ña̱ kuvita i̱ni̱ Ndiosí nduꞌu̱ꞌ ndi̱viꞌ xaꞌa̱ꞌ ra̱ ndii,
köo̱ꞌ kivi̱ꞌ na̱ko̱o̱ ra̱ i̱tyiꞌ a̱.
8 Tákuiꞌe Ndiosí,
nde̱e̱ i̱i̱n te̱ ndasiꞌ taꞌanꞌ xiinꞌ u̱nꞌ käku̱ nda̱ꞌaꞌ u̱nꞌ,
te̱ xiinꞌ ña̱ ndi̱e̱eꞌ u̱nꞌ ka̱nandoo u̱nꞌ sa̱kuuꞌ te̱ ja̱a̱nꞌ.
9 Kii̱ꞌ ki̱xi̱n u̱nꞌ ndii,
ko̱ꞌni̱ u̱nꞌ sa̱kuuꞌ ra̱ ti̱xi̱n yavi̱ kunu va̱ miiꞌ ndatin ñuꞌu̱,
te̱ xaꞌa̱ꞌ a̱ ña̱ xiꞌé va̱ yoꞌó,
Yahvé,
xini ña̱ꞌaꞌ u̱nꞌ ndii,
ka̱ꞌmi̱ u̱nꞌ sa̱kuuꞌ ra̱,
te̱ ko̱ko̱ sa̱kuuꞌ ra̱ nuu̱ꞌ ñuꞌu̱ ndatin ja̱a̱nꞌ.
10 Te̱ sa̱ndo̱ñuꞌuꞌ u̱nꞌ sa̱kuuꞌ siꞌe̱ ra̱ nuu̱ꞌ ñu̱ꞌuꞌ i̱i̱n yivi̱ꞌ yoꞌoꞌ,
te̱ sa̱kanꞌ tu̱ sa̱ndo̱ñuꞌuꞌ u̱nꞌ sa̱kuuꞌ si̱a̱niꞌ ra̱.
11 Tee̱ꞌ ndee tyi̱tuní ra̱ sa̱a̱ ra̱ ña̱ ni̱a̱ꞌa xiinꞌ u̱nꞌ ndii,
köo̱ꞌ kivi̱ꞌ ku̱vi̱ xinu̱ a̱.
12 Sa̱kanꞌ ña̱ ta̱xiꞌ u̱nꞌ sa̱kuuꞌ ra̱
kii̱ꞌ ku̱ni̱ ra̱ ña̱ kiꞌinꞌ nuu̱ꞌ ña̱ꞌaꞌ u̱nꞌ xiinꞌ kuxi̱ u̱nꞌ.
13 Tákuiꞌe Yahvé,
niaꞌa̱ u̱nꞌ ña̱ nduuꞌ u̱nꞌ ña̱ kaꞌnuꞌ va̱ xiinꞌ ña̱ ndi̱e̱eꞌ u̱nꞌ,
te̱ nduꞌu̱ ndii,
ka̱ta̱ ndu̱ nuu̱ꞌ u̱nꞌ xiinꞌ ya̱a̱ ña̱ kiꞌinꞌ kaꞌnuꞌ ndu̱ tyu̱u̱n kaꞌnuꞌ ña̱ xaaꞌ u̱nꞌ.