Yoꞌoꞌ kaꞌán ne̱ yivi̱ꞌ xiinꞌ Ndiosí xaꞌa̱ꞌ rey David te̱ tyi̱ndi̱e̱eꞌ ña̱ꞌaꞌ a̱
Ya̱a̱ ña̱ ni̱ xi̱ta̱ David ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
20
Na ku̱ni̱ so̱ꞌo̱ na Yahvé ña̱ kaꞌán ndaꞌvi u̱nꞌ xiinꞌ a̱ kii̱ꞌ yoo tu̱ndoꞌo̱ꞌ nuu̱ꞌ u̱nꞌ,
te̱ na ko̱to̱ na Ndiosí,
ña̱ xakaꞌnuꞌ Jacob,
yoꞌó.
2 Nde̱e̱ yu̱kunꞌ kaꞌnuꞌ miiꞌ nduꞌu̱ꞌ a̱ ti̱ꞌviꞌ a̱ ña̱ ki̱xi̱n tyi̱ndi̱e̱eꞌ yoꞌó,
te̱ nde̱e̱ ñu̱u̱ Jerusalén na ti̱ꞌviꞌ a̱ ña̱ ki̱xi̱n na̱kaꞌa̱n xaꞌa̱ꞌ u̱nꞌ.
3 Te̱ na na̱ka̱ꞌanꞌ a̱ xaꞌa̱ꞌ sa̱kuuꞌ ña̱ nasoko̱ꞌ u̱nꞌ nuu̱ꞌ a̱,
te̱ na na̱ti̱i̱n tu̱ a̱ sa̱kuuꞌ ña̱ xaꞌmiꞌ u̱nꞌ ki̱tiꞌ nuu̱ꞌ a̱.
Selah
4 Te̱ na ta̱xi̱ a̱ ña̱ kaꞌán nimá u̱nꞌ xaꞌa̱ꞌ nda̱ꞌaꞌ u̱nꞌ,
te̱ na tyi̱ndi̱e̱eꞌ a̱ yoꞌó te̱ sa̱xinú u̱nꞌ sa̱kuuꞌ ña̱ tyituní u̱nꞌ.
5 Te̱ sa̱kuuꞌ e̱ꞌ na̱ku̱a̱tiaꞌ kii̱ꞌ ku̱ni̱ e̱ꞌ ña̱ ni̱ sa̱kakú Ndiosí yoꞌó,
te̱ ndo̱ni̱ꞌi̱ e̱ꞌ kiꞌinꞌ bandera xaꞌa̱ꞌ a̱ ña̱ ni̱ tyi̱ndi̱e̱eꞌ Ndiosí yoꞌó,
te̱ ni̱ ke̱ta̱ va̱ꞌa̱ u̱nꞌ nuu̱ꞌ te̱ ndasiꞌ taꞌanꞌ xiinꞌ u̱nꞌ,
te̱ na sa̱xinú na Yahvé sa̱kuuꞌ ña̱ xikán u̱nꞌ nuu̱ꞌ a̱.
6 Vi̱ti̱n xiní kaxiꞌ i̱ ña̱ sakakú Yahvé rey,
te̱ ni̱ na̱ka̱xi̱n a̱ ka̱ꞌndi̱a̱ tyuunꞌ,
te̱ xiní tu̱ i̱ ña̱ ku̱ni̱ so̱ꞌo̱ a̱ ña̱ xikán u̱nꞌ nuu̱ꞌ a̱ nde̱e̱ miiꞌ nduꞌu̱ꞌ a̱ ndi̱viꞌ su̱ꞌu̱n,
te̱ xiní tu̱ i̱ ña̱ ta̱xi̱ a̱ ke̱ta̱ va̱ꞌa̱ u̱nꞌ nuu̱ꞌ te̱ ndasiꞌ taꞌanꞌ xiinꞌ u̱nꞌ kiꞌinꞌ i̱tyiꞌ xiinꞌ kuaꞌa̱ꞌ va̱ ña̱ ndi̱e̱eꞌ a̱.
7 Yoo sa̱va̱ ne̱ yivi̱ꞌ ndii,
kaꞌán ñuñuꞌ ni̱a̱ xaꞌa̱ꞌ a̱ ña̱ kumiꞌ ni̱a̱ kuaꞌa̱ꞌ va̱ carreta,
te̱ sa̱va̱ ni̱a̱ kaꞌán ñuñuꞌ xaꞌa̱ꞌ a̱ ña̱ kumiꞌ ni̱a̱ kuaꞌa̱ꞌ va̱ kuei,
ndisu̱ nduꞌu̱ ndii,
Yahvé,
Ndiosí ña̱ xakaꞌnuꞌ ku̱i̱ti̱ꞌ ndu̱,
i̱ni̱ ndu̱ xini ndu̱.
8 Ne̱ yivi̱ꞌ,
ne̱ kaꞌán ñuñuꞌ ja̱a̱nꞌ ndii,
ka̱nandoo ña̱ꞌaꞌ u̱nꞌ te̱ ka̱ꞌni̱ꞌ u̱nꞌ sa̱kuuꞌ ni̱a̱,
ndisu̱ yooꞌ ndii,
ka̱nandoo ña̱ꞌaꞌ e̱ꞌ te̱ nde̱e̱ i̱i̱n e̱ꞌ kü̱vi̱ sa̱a̱ ni̱a̱.
9 Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ tyi̱ndi̱e̱eꞌ u̱nꞌ rey David te̱ ka̱nandoo ra̱ ne̱ yivi̱ꞌ ja̱a̱nꞌ,
te̱ na̱ku̱i̱i̱n u̱nꞌ kii̱ꞌ kaꞌa̱n tiꞌeꞌ ndu̱ xiinꞌ u̱nꞌ ña̱ tyi̱ndi̱e̱eꞌ u̱nꞌ ndu̱.