Yoꞌoꞌ kaꞌán a̱ xaꞌa̱ꞌ sa̱kuuꞌ ña̱ ni̱ xa̱ꞌa̱ Ndiosí xiinꞌ tu̱ꞌu̱n va̱ꞌa̱ ña̱ kaꞌán a̱
Ya̱a̱ ña̱ ni̱ xi̱ta̱ David ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
19
Ndi̱viꞌ nduuꞌ ña̱ kaꞌán ndo̱so̱ꞌ ña̱ ña̱ kaꞌnuꞌ kooꞌ tyukuuꞌ nduuꞌ Ndiosí,
te̱ kaꞌán tu̱ ndi̱viꞌ ña̱ mi̱iꞌ Ndiosí nduuꞌ ña̱ ni̱ xa̱ꞌa̱ sa̱kuuꞌ ña̱ yooꞌ.
2 Te̱ i̱ꞌi̱n kivi̱ꞌ kaꞌán xiinꞌ i̱nga̱ kivi̱ꞌ xaꞌa̱ꞌ sa̱kuuꞌ ña̱ ni̱ xa̱ꞌa̱ Ndiosí ja̱a̱nꞌ xiinꞌ nda̱ꞌaꞌ a̱,
te̱ i̱ꞌi̱n ñu̱u kaꞌán xiinꞌ i̱nga̱ ñu̱u xaꞌa̱ꞌ sa̱kuuꞌ ña̱ xini tuní Ndiosí.
3 Tee̱ꞌ ndee kü̱vi̱ ku̱ni̱ so̱ꞌo̱ e̱ꞌ ña̱ kaꞌán ña̱ ja̱a̱nꞌ,
te̱ nde̱e̱ i̱i̱n yu̱ꞌuꞌ tïakú kaꞌán a̱,
te̱ ni̱ nde̱e̱ köo̱ꞌ tu̱ tatyi̱ꞌ a̱ ku̱vi̱ ku̱ni̱ so̱ꞌo̱ e̱ꞌ ndii.
4 Naxaá tu̱ꞌu̱n yu̱ꞌuꞌ a̱ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ,
te̱ naxaá tu̱ a̱ nde̱e̱ miiꞌ xaꞌa̱n ndi̱ꞌi̱ i̱i̱n yivi̱ꞌ.
Te̱ nuu̱ꞌ ndi̱viꞌ ni̱ xa̱ꞌa̱ Ndiosí i̱i̱n vi̱ꞌe̱ miiꞌ nduꞌu̱ꞌ ñu̱ꞌu̱.
5 Te̱ ñu̱ꞌu̱ ja̱a̱nꞌ ndii,
sa̱a̱ ni̱a̱ꞌa̱ ketaꞌ a̱ kuaꞌa̱n a̱ nde̱e̱ naa xaaꞌ i̱i̱n te̱ tundaꞌáꞌ kii̱ꞌ ndi̱ꞌi̱ ni̱ kixi̱n ra̱ xiinꞌ ñaꞌ siꞌi ra̱ i̱tyiꞌ nu̱uꞌ,
te̱ xaaꞌ tu̱ ñu̱ꞌu̱ ja̱a̱nꞌ nde̱e̱ naa i̱i̱n te̱ kati̱n taꞌanꞌ kii̱ꞌ va̱ꞌa̱ kuni ra̱ ndavaꞌ ra̱ kuaꞌa̱n ra̱.
6 Te̱ ketaꞌ ñu̱ꞌu̱ ja̱a̱nꞌ i̱i̱n taꞌviꞌ xaꞌa̱ꞌ ndi̱viꞌ,
te̱ ketá a̱ nde̱e̱ tu̱ku̱ taꞌviꞌ xaꞌa̱ꞌ ndi̱viꞌ ja̱a̱nꞌ,
te̱ nde̱e̱ i̱i̱n ña̱ꞌa̱ kü̱vi̱ ti̱si̱ꞌe xiinꞌ miiꞌ nuu̱ꞌ ña̱ i̱ꞌniꞌ a̱.
7 Tu̱ꞌu̱n nde̱iꞌ Yahvé ndii,
ña̱ va̱ꞌa̱ ndi̱ꞌi̱ nduuꞌ a̱,
sa̱kanꞌ ña̱ natyinaá a̱ va̱ꞌa̱ nimá ne̱ yivi̱ꞌ.
Te̱ sa̱kuuꞌ ña̱ ndieeꞌ yu̱ꞌuꞌ Yahvé ndii,
xa̱ mi̱iꞌ ndiꞌiꞌ ña̱ nda̱ku nduuꞌ a̱,
sa̱kanꞌ ña̱ taxiꞌ a̱ ña̱ xini tuní ne̱ yivi̱ꞌ ndaꞌvi so̱ꞌo̱.
8 Ña̱ kaꞌán tyuunꞌ Yahvé ndii,
ña̱ nda̱ku nduuꞌ sa̱kuuꞌ a̱,
sa̱kanꞌ ña̱ xa̱ kuatiaꞌ nimá e̱ꞌ.
Te̱ ña̱ saniaꞌá a̱ ndii,
ña̱ ndo̱o̱ ndi̱ꞌi̱ nduuꞌ a̱,
sa̱kanꞌ ña̱ nduuꞌ a̱ nde̱e̱ naa ñuꞌu̱ ña̱ saniaꞌá yooꞌ sa̱a̱ ka̱ka̱ e̱ꞌ i̱i̱n yivi̱ꞌ.
9 Ña̱ xitoꞌ kaꞌnuꞌ e̱ꞌ Ndiosí ndii,
ndasaꞌ ndooꞌ a̱ yooꞌ,
te̱ yoo a̱ nde̱e̱ ndiꞌiꞌ ni̱ kivi̱ꞌ,
te̱ ña̱ kaꞌán tuní Yahvé ndii,
ña̱ ndi̱xa̱ nduuꞌ a̱,
te̱ ña̱ nda̱ku nduuꞌ tu̱ sa̱kuuꞌ a̱.
10 Ndiaa yaꞌviꞌ ka̱ a̱ te̱ sa̱kanꞌ mi̱iꞌ ndiꞌiꞌ oro,
te̱ ndiaa yaꞌviꞌ yaꞌa̱ ka̱ a̱ te̱ sa̱kanꞌ kuaꞌa̱ꞌ xa̱va̱ꞌa̱ mi̱iꞌ ndiꞌiꞌ oro va̱ꞌa̱ va̱.
Te̱ vixi̱ yaꞌa̱ ka̱ a̱ te̱ sa̱kanꞌ ñuñu̱ꞌ,
te̱ nde̱e̱ vixi̱ ka̱ a̱ te̱ sa̱kanꞌ ñuñu̱ꞌ ña̱ ñuꞌuꞌ ka̱ ti̱xi̱n tu̱tu̱ yoko̱.
11 Te̱ nduuꞌ tu̱ a̱ ña̱ sakuniꞌ tu̱ꞌu̱n yuꞌu̱,
te̱ xikaꞌ nuuꞌ nuu̱ꞌ u̱nꞌ,
te̱ tyindieeꞌ kuaꞌa̱ꞌ a̱ ne̱ saxinú ña̱ kaꞌán a̱.
12 Nde̱e̱ i̱i̱n ne̱ yivi̱ꞌ xïní xaꞌa̱ꞌ ña̱ ni̱a̱ꞌa ña̱ ñuꞌuꞌ nimá ni̱a̱,
sa̱kanꞌ na kuiiꞌ ko̱o̱ kaꞌnuꞌ i̱ni̱ u̱nꞌ xaꞌa̱ꞌ sa̱kuuꞌ ku̱a̱tyi̱ i̱ naaꞌ yoo si̱ꞌe a̱ nimá i̱.
13 Sa̱a̱ u̱nꞌ ña̱ va̱ꞌa̱ te̱ tä̱xi̱ u̱nꞌ vi̱ko̱niꞌiꞌ ña̱ ñuñuꞌ yuꞌu̱,
te̱ tä̱xi̱ u̱nꞌ ka̱nandoo a̱ yuꞌu̱.
Sa̱kanꞌ te̱ ku̱ndu̱u̱ i̱ i̱i̱n te̱ ndo̱o̱ nimá,
te̱ ku̱ndu̱u̱ tu̱ i̱ i̱i̱n te̱ köo̱ꞌ ña̱ ni̱a̱ꞌa ña̱ tyiee̱ va̱ xaaꞌ.
14 Te̱ sa̱kuuꞌ ña̱ kaꞌán i̱ xiinꞌ ña̱ xanini nimá i̱ ndii,
na ku̱ndu̱u̱ a̱ ña̱ xtani̱ u̱nꞌ.
Sa̱kanꞌ ña̱,
Tákuiꞌe Yahvé,
yoꞌó nduuꞌ nde̱e̱ naa vi̱ꞌe̱ yuu̱ꞌ miiꞌ ku̱vi̱ ti̱si̱ꞌe i̱ te̱ kaku̱ i̱,
te̱ yoꞌó tu̱ nduuꞌ ña̱ tyaꞌvi̱ xaꞌa̱ꞌ ku̱a̱tyi̱ i̱.