Yoꞌoꞌ ku̱a̱xi̱ ya̱a̱ ña̱ ni̱ xi̱ta̱ David nuu̱ꞌ Ndiosí kii̱ꞌ ni̱ sa̱kakú ña̱ꞌaꞌ a̱
Ya̱a̱ ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ. Ña̱ ni̱ xi̱ta̱ David, te̱ xikaꞌ nuuꞌ nuu̱ꞌ Yahvé, kii̱ꞌ ni̱ sa̱kakú ña̱ꞌaꞌ a̱ nda̱ꞌaꞌ te̱ ndasiꞌ taꞌanꞌ xiinꞌ ra̱ xiinꞌ nda̱ꞌaꞌ Saúl. Ni̱ xi̱ta̱ ra̱ ya̱a̱ kaa̱ꞌ nuu̱ꞌ Yahvé, kaꞌán ra̱ ndii:
18
Kundani̱ va̱ i̱ yoꞌó,
Tákuiꞌe Yahvé,
sa̱kanꞌ ña̱ yoꞌó nduuꞌ ña̱ taxiꞌ ndi̱e̱e̱ꞌ i̱.
2 Yahvé nduuꞌ nde̱e̱ naa vi̱ꞌe̱ yuu̱ꞌ miiꞌ ku̱vi̱ ti̱si̱ꞌe i̱,
te̱ nduuꞌ tu̱ a̱ nde̱e̱ naa vi̱ꞌe̱ sukun miiꞌ kakú i̱,
te̱ nduuꞌ tu̱ a̱ ña̱ sakakú yuꞌu̱,
te̱ nduuꞌ tu̱ a̱ ña̱ taxiꞌ ndi̱e̱e̱ꞌ i̱,
te̱ ña̱ ja̱a̱nꞌ ku̱i̱ti̱ꞌ i̱ni̱ i̱ xini i̱.
Yahvé ja̱a̱nꞌ nduuꞌ Ndiosí i̱,
ña̱ taxiꞌ ña̱ ndi̱e̱eꞌ i̱,
ña̱ ja̱a̱nꞌ i̱ni̱ i̱ xini i̱.
Ña̱ ja̱a̱nꞌ nduuꞌ nde̱e̱ naa ka̱a̱ tiꞌeꞌ ña̱ tiasi yuꞌu̱ te̱ köo̱ꞌ a̱ ndoꞌoꞌ i̱,
te̱ sakakú a̱ yuꞌu̱ xiinꞌ ña̱ ndi̱e̱eꞌ a̱,
te̱ nduuꞌ tu̱ a̱ nde̱e̱ naa miiꞌ kakú i̱,
te̱ köo̱ꞌ ku̱vi̱ ka̱ꞌni̱ꞌ yuꞌu̱.
3 Ni̱ kaꞌa̱n ndaꞌvi i̱ xiinꞌ Yahvé,
ña̱ xataꞌa̱n sa̱kaꞌnuꞌ e̱ꞌ,
te̱ ni̱ sa̱kakú a̱ yuꞌu̱ nuu̱ꞌ te̱ ndasiꞌ taꞌanꞌ xiinꞌ i̱,
4 Ña̱ xiꞌí ndii,
nde̱e̱ naa ni̱ se̱kun a̱ yuꞌu̱ ñu̱nu̱ꞌ a̱,
te̱ te̱ yivi̱ꞌ,
te̱ ndasiꞌ taꞌanꞌ xiinꞌ i̱ ndii,
xaꞌa̱ꞌ a̱ ña̱ kuaꞌa̱ꞌ ra̱ ndikún taxiꞌ yuꞌu̱ nde̱e̱ naa ti̱a̱ñuꞌu̱ꞌ ndii,
ni̱ sa̱yi̱ꞌvi va̱ ra̱ yuꞌu̱.
5 Yavi̱ ndi̱i̱ ndii,
nde̱e̱ naa ni̱ se̱kun a̱ yuꞌu̱ xiinꞌ yo̱ꞌoꞌ a̱,
te̱ ña̱ xiꞌí ndii,
nde̱e̱ naa ni̱ tyu̱ꞌu̱n a̱ yo̱ꞌoꞌ suku̱nꞌ i̱ te̱ ndee tyaaꞌ va̱ ku̱vi̱ i̱.
6 Ndisu̱ kii̱ꞌ ndoꞌoꞌ va̱ nimá i̱,
te̱ ni̱ kaꞌa̱n tiꞌeꞌ i̱ xiinꞌ Yahvé,
ni̱ xika̱n i̱ nuu̱ꞌ Ndiosí i̱ ña̱ tyi̱ndi̱e̱eꞌ a̱ yuꞌu̱.
Te̱ ni̱ xi̱ni̱ so̱ꞌo̱ a̱ ña̱ ni̱ kaꞌa̱n i̱ xiinꞌ a̱ nde̱e̱ yu̱kunꞌ kaꞌnuꞌ miiꞌ nduꞌu̱ꞌ a̱.
Sa̱kanꞌ ña̱ ni̱ na̱xaa̱ ña̱ kaꞌán ndaꞌvi i̱ xiinꞌ a̱ ja̱a̱nꞌ nde̱e̱ nuu̱ꞌ a̱.
7 Sa̱kanꞌ te̱ ndi̱e̱eꞌ va̱ ni̱ ka̱nda̱ ñu̱ꞌuꞌ i̱i̱n yivi̱ꞌ,
te̱ ni̱ ta̱a̱n tu̱ a̱,
te̱ ni̱ ta̱a̱n tu̱ sa̱kuuꞌ xaꞌa̱ꞌ i̱kuꞌ naꞌnuꞌ,
ni̱ ta̱a̱n ndi̱e̱eꞌ a̱ xaꞌa̱ꞌ a̱ ña̱ ni̱ na̱saa̱ꞌ va̱ Ndiosí.
8 Te̱ xaꞌa̱ꞌ a̱ ña̱ ni̱ na̱saa̱ꞌ xa̱va̱ꞌa̱ a̱ ndii,
ni̱ ki̱e̱e̱ vi̱ꞌ ñuꞌma̱ xiti̱nꞌ a̱,
te̱ yu̱ꞌuꞌ a̱ ni̱ ki̱e̱e̱ ñuꞌu̱ ndatin i̱ꞌniꞌ xa̱va̱ꞌa̱ ña̱ xaꞌmiꞌ sa̱kuuꞌ nuu̱ꞌ ña̱ꞌa̱,
te̱ nde̱e̱ ñuꞌu̱ ti̱keí ndatin ni̱ ki̱e̱e̱ sa̱a̱ kuaꞌa̱n i̱i̱nꞌ a̱.
9 Ni̱ nu̱niaꞌ Ndiosí ndi̱viꞌ,
te̱ ni̱ nu̱u̱ a̱,
te̱ ni̱ yoo̱ viko̱ꞌ nu̱ꞌuꞌ ndiaaꞌ xa̱va̱ꞌa̱ xaꞌa̱ꞌ a̱ miiꞌ ni̱ ii̱n a̱.
10 Te̱ xata̱ꞌ i̱i̱n querubín kaꞌnuꞌ xa̱va̱ꞌa̱ kanuꞌ a̱,
taꞌnuꞌ a̱ ni̱ ki̱xi̱n a̱.
Te̱ ndi̱e̱eꞌ xa̱va̱ꞌa̱ taꞌnuꞌ a̱ ni̱ ki̱xi̱n a̱ te̱i̱n tatyi̱ꞌ.
11 Te̱ ni̱ ti̱si̱ꞌe xiinꞌ miiꞌ a̱ te̱i̱n ña̱ i̱i̱n yaví,
te̱ te̱i̱n viko̱ꞌ nu̱ꞌuꞌ ña̱ sakuunꞌ savi̱ꞌ ni̱ xa̱a̱ si̱ꞌe a̱.
12 Ña̱ yiꞌé,
ña̱ yoo sa̱a̱ xinundu̱u̱ xi̱i̱nꞌ a̱ ndii,
ni̱ nda̱si̱ ña̱ꞌaꞌ viko̱ꞌ nu̱ꞌuꞌ,
te̱ ni̱ ku̱u̱n tu̱ iꞌinꞌ xiinꞌ ñuꞌu̱ ti̱keí ndatin.
13 Te̱ ni̱ ndeꞌi̱ tiꞌeꞌ Yahvé nde̱e̱ ndi̱viꞌ,
te̱ ni̱ tiaku̱ tatyi̱ꞌ yu̱ꞌuꞌ ña̱ nduꞌu̱ ndi̱viꞌ
te̱i̱n iꞌinꞌ xiinꞌ ñuꞌu̱ ti̱keí ña̱ ndatin ja̱a̱nꞌ.
14 Ni̱ ki̱niꞌ a̱ xiinꞌ kuxi̱ a̱,
te̱ ni̱ ki̱ku̱ꞌ a̱ sa̱kuuꞌ te̱ ndasiꞌ taꞌanꞌ xiinꞌ a̱,
ni̱ sa̱koyó tu̱ a̱ ñuꞌu̱ savi̱ꞌ,
te̱ ni̱ xa̱ꞌni̱ꞌ ndo̱o̱ ña̱ꞌaꞌ a̱.
15 Te̱ ni̱ na̱tuvi̱ ndo̱o̱ nde̱ma̱aꞌ ti̱xi̱n mi̱ni̱ kaꞌnuꞌ,
te̱ ni̱ na̱tuvi̱ ndo̱o̱ tu̱ xaꞌa̱ꞌ i̱kuꞌ naꞌnuꞌ xiinꞌ nde̱e̱ ti̱o̱ꞌo̱ a̱
kii̱ꞌ ni̱ xiꞌe̱ u̱nꞌ nuu̱ꞌ a̱,
Tákuiꞌe Yahvé,
xiinꞌ kii̱ꞌ ni̱ ki̱e̱e̱ ñuꞌma̱ xiti̱nꞌ u̱nꞌ ña̱ xiꞌé u̱nꞌ ja̱a̱nꞌ.
16 Nde̱e̱ ndi̱viꞌ ni̱ sa̱na̱kaá nda̱ꞌaꞌ a̱,
te̱ ni̱ sa̱kakú a̱ yuꞌu̱,
ni̱ xta̱ꞌniꞌ a̱ yuꞌu̱ ti̱xi̱n ti̱kui mi̱ni̱ kaꞌnuꞌ.
17 Ni̱ sa̱kakú a̱ yuꞌu̱ nuu̱ꞌ te̱ kooꞌ tyukuuꞌ ndasiꞌ taꞌanꞌ xiinꞌ i̱
xiinꞌ nuu̱ꞌ sa̱kuuꞌ te̱ ndasiꞌ yuꞌu̱,
sa̱kanꞌ ña̱ ndi̱e̱eꞌ yaꞌa̱ ka̱ te̱ ja̱a̱nꞌ te̱ sa̱kanꞌ yuꞌu̱.
18 Ni̱ ku̱u̱n ra̱ yuꞌu̱ sa̱va̱ ni̱ kii̱ꞌ yoo tu̱ndoꞌo̱ꞌ nuu̱ꞌ i̱,
ndisu̱ Yahvé ni̱ tyi̱ndi̱e̱eꞌ yuꞌu̱.
19 Ni̱ xta̱ꞌniꞌ a̱ yuꞌu̱,
te̱ ni̱ xaꞌa̱n ndi̱a̱ka̱ a̱ yuꞌu̱ i̱i̱n xaanꞌ miiꞌ köo̱ꞌ a̱ ku̱ndo̱ꞌo̱ i̱,
ni̱ sa̱kakú a̱ yuꞌu̱ xaꞌa̱ꞌ a̱ ña̱ ndani̱ va̱ a̱ yuꞌu̱.
20 Ni̱ xa̱mani̱ꞌ Yahvé yuꞌu̱,
sa̱kanꞌ ña̱ ni̱ xi̱ni̱ a̱ ña̱ i̱i̱n te̱ xatyuunꞌ nda̱ku nduuꞌ i̱,
te̱ ni̱ xa̱mani̱ꞌ tu̱ a̱ yuꞌu̱ xaꞌa̱ꞌ a̱ ña̱ ni̱ xi̱ni̱ a̱ ña̱ köo̱ꞌ ña̱ ni̱a̱ꞌa ni̱ xa̱a̱ i̱.
21 Sa̱kanꞌ ña̱ nï̱ na̱ko̱o̱ i̱ i̱tyiꞌ Yahvé,
te̱ nï̱ ku̱xi̱o̱o̱ tu̱ i̱ nuu̱ꞌ a̱ te̱ sa̱a̱ i̱ ña̱ ni̱a̱ꞌa.
22 Te̱ nakaꞌanꞌ i̱ sa̱a̱ kivi̱ꞌ sa̱kuuꞌ ña̱ kaꞌán tyuunꞌ a̱,
te̱ köo̱ꞌ kivi̱ꞌ ni̱ na̱ko̱o̱ i̱ tu̱ꞌu̱n nde̱iꞌ a̱.
23 Sa̱a̱ kivi̱ꞌ ni̱ xika̱ nda̱ku i̱ nuu̱ꞌ a̱,
te̱ ni̱ xi̱to̱ xiinꞌ miiꞌ i̱,
te̱ nï̱ xa̱a̱ i̱ nde̱e̱ i̱i̱n ña̱ ni̱a̱ꞌa.
24 Xaꞌa̱ꞌ ja̱a̱nꞌ na kuiiꞌ ni̱ sa̱ñuꞌuꞌ Yahvé yuꞌu̱,
ni̱ xa̱a̱ a̱ sa̱kanꞌ xiinꞌ i̱ xaꞌa̱ꞌ a̱ ña̱ ni̱ xi̱ni̱ a̱ ña̱ köo̱ꞌ ña̱ ni̱a̱ꞌa ni̱ xa̱a̱ i̱.
25 Ne̱ vi̱ta nimá ndii,
ku̱vi̱ta tu̱ nimá yoꞌó,
Ndiosí,
xaꞌa̱ꞌ ni̱a̱,
te̱ ne̱ xatyuunꞌ nda̱ku ndii,
sa̱tyuunꞌ nda̱ku tu̱ yoꞌó xaꞌa̱ꞌ ni̱a̱.
26 Ne̱ i̱i̱n nda̱a̱ꞌ nimá ndii,
i̱i̱n nda̱a̱ꞌ tu̱ nimá yoꞌó ku̱ni̱ ña̱ꞌaꞌ u̱nꞌ,
ndisu̱ ne̱ xaaꞌ ña̱ ni̱a̱ꞌa ndii,
ndi̱e̱eꞌ sa̱ndoꞌoꞌ ña̱ꞌaꞌ u̱nꞌ.
27 Sakakú u̱nꞌ ne̱ ndaꞌvi kuuꞌ nimá,
ndisu̱ sakaꞌanꞌ u̱nꞌ sa̱kuuꞌ ne̱ ñuñuꞌ.
28 Yoꞌó,
Yahvé,
na̱ku̱nꞌ u̱nꞌ ka̱ndiri nuu̱ꞌ i̱,
te̱ yoꞌó,
Ndiosí mi̱iꞌ i̱,
nduuꞌ ña̱ yiꞌé nuu̱ꞌ i̱ miiꞌ i̱i̱n yaví.
29 Yoꞌó ta̱xi̱ ndi̱e̱e̱ꞌ i̱ te̱ ke̱ta̱ va̱ꞌa̱ i̱ xiinꞌ te̱ ndasiꞌ taꞌanꞌ xiinꞌ i̱,
te̱ yoꞌó tu̱ tyi̱ndi̱e̱eꞌ yuꞌu̱ te̱ ka̱a̱ i̱ nuu̱ꞌ nama̱ sukun ña̱ ndasi i̱ꞌnu̱ ñu̱u̱.
30 I̱tyiꞌ Ndiosí ndii,
ña̱ va̱ꞌa̱ va̱ nduuꞌ a̱.
Te̱ kuento a̱,
ña̱ taxiꞌ a̱ nuu̱ꞌ e̱ꞌ ndii,
ña̱ ndo̱o̱ ndi̱ꞌi̱ nduuꞌ a̱ nde̱e̱ naa ka̱a̱ ña̱ xaꞌmiꞌ te̱ yivi̱ꞌ.
Te̱ nduuꞌ a̱ ña̱ xitoꞌ sa̱kuuꞌ yooꞌ,
ne̱ xikán nuu̱ꞌ a̱,
te̱ tyi̱ndi̱e̱eꞌ a̱ yooꞌ nde̱e̱ naa ka̱a̱ ña̱ tiasi yoo nuu̱ꞌ ña̱ i̱yo̱.
31 Sa̱kanꞌ ña̱ i̱i̱n nda̱a̱ꞌ Yahvé ku̱i̱ti̱ꞌ nduuꞌ Ndiosí,
te̱ köo̱ꞌ ka̱ i̱nga̱ a̱.
Te̱ köo̱ꞌ ka̱ nde̱e̱ i̱i̱n ndiosí ña̱ nduuꞌ nde̱e̱ naa vi̱ꞌe̱ yuu̱ꞌ ña̱ ku̱vi̱ xitoꞌ yooꞌ,
süu̱ꞌ ja̱a̱nꞌ ndii,
i̱i̱n nda̱a̱ꞌ Yahvé Ndiosí ku̱i̱ti̱ꞌ xaaꞌ sa̱kanꞌ.
32 I̱i̱n nda̱a̱ꞌ Ndiosí ku̱i̱ti̱ꞌ nduuꞌ ña̱ taxiꞌ ndi̱e̱e̱ꞌ i̱,
te̱ su̱vi̱ tu̱ a̱ nduuꞌ ña̱ xaaꞌ sa̱kanꞌ,
te̱ xikaꞌ nda̱ku i̱ i̱tyiꞌ a̱.
33 Te̱ su̱vi̱ tu̱ a̱ xaaꞌ sa̱kanꞌ,
te̱ ka̱ma̱ va̱ i̱ nda̱va̱ i̱ nde̱e̱ naa i̱su̱,
te̱ kii̱ꞌ xikaꞌ i̱ xíniꞌ i̱kuꞌ miiꞌ sukun xa̱va̱ꞌa̱ ndii,
xitoꞌ u̱nꞌ yuꞌu̱ ko̱to̱ ka̱ na̱ma̱ i̱.
34 Te̱ saniaꞌá u̱nꞌ yuꞌu̱ sa̱a̱ ku̱ntaꞌanꞌ i̱ xiinꞌ te̱ ndasiꞌ taꞌanꞌ xiinꞌ i̱,
te̱ taxiꞌ tu̱ u̱nꞌ ndi̱e̱e̱ꞌ nda̱ꞌaꞌ i̱ te̱ ku̱vi̱ xi̱ta̱ꞌ i̱ yo̱ꞌoꞌ tunꞌ to̱so̱,
tunꞌ ni̱ ku̱a̱ꞌa̱ xiinꞌ ka̱a̱ bronce.
35 Te̱ ta̱xi̱ u̱nꞌ ña̱ sa̱kakú u̱nꞌ yuꞌu̱,
ña̱ nduuꞌ nde̱e̱ naa ka̱a̱ tiꞌeꞌ,
ña̱ tiasi yuꞌu̱ te̱ köo̱ꞌ a̱ ku̱ndo̱ꞌo̱ i̱,
te̱ xiinꞌ nda̱ꞌaꞌ kuaꞌa u̱nꞌ sakakú u̱nꞌ yuꞌu̱,
te̱ xaꞌa̱ꞌ a̱ ña̱ kuvita i̱ni̱ u̱nꞌ xaꞌa̱ꞌ i̱ ndii,
ni̱ sa̱ñuꞌuꞌ xa̱va̱ꞌa̱ u̱nꞌ yuꞌu̱.
36 Ni̱ nu̱niaꞌ u̱nꞌ i̱tyiꞌ nuu̱ꞌ i̱ miiꞌ xikaꞌ i̱,
ni̱ xa̱a̱ u̱nꞌ sa̱kanꞌ te̱ nä̱taꞌnu̱ xaꞌa̱ꞌ i̱ kii̱ꞌ kuaꞌa̱n i̱ i̱tyiꞌ ja̱a̱nꞌ.
37 Ni̱ ndiku̱n i̱ te̱ ndasiꞌ taꞌanꞌ xiinꞌ i̱,
te̱ ni̱ na̱niꞌi̱ꞌ ña̱ꞌaꞌ i̱,
te̱ nï̱ na̱ndi̱koꞌ i̱ nde̱e̱ ni̱ ndi̱ꞌi̱ ndo̱o̱ ra̱ ni̱ xa̱ꞌni̱ꞌ i̱.
38 Ni̱ xa̱ꞌni̱ꞌ xa̱tyiꞌ ña̱ꞌaꞌ i̱,
te̱ nï̱ ku̱vi̱ ka̱ ndo̱koo̱ nde̱e̱ i̱i̱n ra̱,
te̱ ni̱ ndoo̱ ñu̱ꞌuꞌ ndeꞌi̱ ra̱ ndieeꞌ a̱ ñu̱ꞌuꞌ xaꞌa̱ꞌ i̱ miiꞌ iinꞌ.
39 Sa̱kanꞌ ña̱ yoꞌó ni̱ ta̱xi̱ ndi̱e̱e̱ꞌ i̱,
te̱ ni̱ ku̱ntaꞌanꞌ i̱ xiinꞌ ra̱.
Yoꞌó ni̱ xa̱a̱ sa̱kanꞌ,
te̱ ni̱ ka̱nandoo i̱ sa̱kuuꞌ te̱ ndasiꞌ taꞌanꞌ xiinꞌ i̱.
40 Te̱ ni̱ xa̱ta̱ u̱nꞌ xaꞌa̱ꞌ i̱ suku̱nꞌ te̱ ndasiꞌ taꞌanꞌ xiinꞌ i̱ ja̱a̱nꞌ,
te̱ ni̱ xa̱ꞌni̱ꞌ i̱ sa̱kuuꞌ te̱ ndasiꞌ yuꞌu̱.
41 Ni̱ xika̱ ndu̱kuꞌ ra̱ ne̱ tyi̱ndi̱e̱eꞌ ña̱ꞌaꞌ,
ndisu̱ nï̱ yoo̱ nde̱e̱ i̱i̱n nda̱a̱ꞌ ne̱ yivi̱ꞌ te̱ tyi̱ndi̱e̱eꞌ ña̱ꞌaꞌ ni̱a̱.
Te̱ nde̱e̱ nuu̱ꞌ mi̱iꞌ yoꞌó,
Yahvé,
ni̱ xika̱n ra̱ ña̱ tyi̱ndi̱e̱eꞌ ña̱ꞌaꞌ u̱nꞌ,
ndisu̱ nï̱ xi̱i̱nꞌ u̱nꞌ.
42 Ni̱ sa̱kuatyiꞌ xiꞌe̱ xa̱tyiꞌ ña̱ꞌaꞌ i̱ nde̱e̱ naa ya̱kaꞌ ña̱ ndíátyiꞌ xaaꞌ tatyi̱ꞌ,
te̱ ni̱ ta̱va̱ꞌ ña̱ꞌaꞌ i̱ ki̱ꞌe̱ nde̱e̱ naa xaaꞌ ne̱ yivi̱ꞌ xatia ni̱a̱ ndeꞌi̱ xaꞌa̱ꞌ ni̱a̱ ya̱ꞌya̱.
43 Ni̱ ta̱xi̱ u̱nꞌ ni̱ ke̱ta̱ va̱ꞌa̱ i̱ kii̱ꞌ ni̱ ku̱ntaꞌanꞌ i̱ xiinꞌ sa̱kuuꞌ ne̱ yivi̱ꞌ,
ne̱ so̱ꞌo̱,
te̱ ni̱ nda̱sa̱ nduuꞌ u̱nꞌ yuꞌu̱ te̱ kuuꞌ nu̱uꞌ nuu̱ꞌ kuaꞌa̱ꞌ ne̱ yivi̱ꞌ,
ne̱ ndieeꞌ kuaꞌa̱ꞌ va̱ ñu̱u̱ naꞌnuꞌ.
Te̱ vi̱ti̱n ndii,
ne̱ yivi̱ꞌ,
ne̱ xïní i̱,
sa̱aꞌ nduuꞌ ne̱ xikaꞌ nuuꞌ nuu̱ꞌ i̱.
44 Kii̱ꞌ xini so̱ꞌo̱ ni̱a̱ ña̱ kaꞌán tyuunꞌ i̱ ndii,
xa̱kaꞌán e̱ꞌ te̱ saxinú ni̱a̱ a̱,
tee̱ꞌ ndee si̱a̱niꞌ xikaꞌ ne̱ tukuꞌ nduuꞌ ni̱a̱ ndii,
kiꞌinꞌ kaꞌnuꞌ ni̱a̱ yuꞌu̱.
45 Ne̱ tukuꞌ ja̱a̱nꞌ ndii,
yiꞌvi xa̱va̱ꞌa̱ ni̱a̱,
sa̱kanꞌ na kuiiꞌ kieeꞌ ndo̱o̱ ni̱a̱ miiꞌ ñuꞌuꞌ si̱ꞌe ni̱a̱ kisiꞌ vi̱ꞌ ña̱ꞌaꞌ a̱,
te̱ xinuꞌ ni̱a̱ kuaꞌa̱n ni̱a̱.
46 Kaꞌnuꞌ va̱ ña̱ nduuꞌ Yahvé,
ña̱ tiaku a̱.
Te̱ nduuꞌ a̱ nde̱e̱ naa vi̱ꞌe̱ yuu̱ꞌ,
ña̱ xitoꞌ yuꞌu̱.
Te̱ na ki̱ꞌi̱n kaꞌnuꞌ sa̱kuuꞌ ne̱ yivi̱ꞌ ña̱ ni̱ sa̱kakú yuꞌu̱.
47 Ña̱ ja̱a̱nꞌ nduuꞌ Ndiosí,
ña̱ sandoꞌoꞌ ne̱ mi̱iꞌ kuuꞌ xiinꞌ i̱.
Te̱ taxiꞌ a̱ ne̱ tukuꞌ nda̱ꞌaꞌ i̱ te̱ ka̱ꞌndi̱a̱ tyuunꞌ i̱ nuu̱ꞌ ni̱a̱.
48 Te̱ sakakú a̱ yuꞌu̱ nda̱ꞌaꞌ te̱ ndasiꞌ taꞌanꞌ xiinꞌ i̱,
te̱ kaniꞌiꞌ a̱ yuꞌu̱ te̱ ku̱vi̱ kanandoo i̱ te̱ ndasiꞌ taꞌanꞌ xiinꞌ i̱.
Te̱ sakakú tu̱ a̱ yuꞌu̱ nda̱ꞌaꞌ te̱ yivi̱ꞌ,
te̱ ndi̱e̱ni.
49 Xaꞌa̱ꞌ a̱ ja̱a̱nꞌ na kuiiꞌ xakaꞌnuꞌ i̱ yoꞌó,
Tákuiꞌe Yahvé,
te̱i̱n kuaꞌa̱ꞌ ne̱ tukuꞌ,
te̱ ka̱ta̱ i̱ kiꞌinꞌ ya̱a̱ nuu̱ꞌ u̱nꞌ te̱i̱n ne̱ ja̱a̱nꞌ.
50 Te̱ kuaꞌa̱ꞌ i̱tyiꞌ taxiꞌ a̱ ña̱ ka̱nandoo yuꞌu̱,
te̱ nduuꞌ rey,
te̱ ni̱ na̱ka̱xi̱n a̱ ka̱ꞌndi̱a̱ tyuunꞌ nuu̱ꞌ ne̱ vi̱ꞌe̱ Israel.
Te̱ kuvita i̱ni̱ a̱ xaꞌa̱ꞌ yuꞌu̱,
te̱ ni̱ sa̱ñuꞌuꞌ a̱ ku̱ndu̱u̱ rey ja̱a̱nꞌ.
Te̱ te̱ ja̱a̱nꞌ nduuꞌ yuꞌu̱,
David,
xiinꞌ sa̱kuuꞌ ne̱ si̱a̱niꞌ xikaꞌ i̱ nde̱e̱ ndiꞌiꞌ ni̱ kivi̱ꞌ.