Yoꞌoꞌ xikán David nuu̱ꞌ Ndiosí te̱ ko̱to̱ ña̱ꞌaꞌ a̱
Si̱u̱ꞌunꞌ ña̱ ni̱ kaꞌa̱n David.
17
Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ ña̱ kaꞌán ndaꞌvi nda̱ku i̱ nuu̱ꞌ u̱nꞌ.
Ku̱ni̱ so̱ꞌo̱ u̱nꞌ ña̱ kaꞌán tiꞌeꞌ i̱ xiinꞌ u̱nꞌ ña̱ tyi̱ndi̱e̱eꞌ u̱nꞌ yuꞌu̱.
Sa̱a̱ u̱nꞌ ña̱ va̱ꞌa̱ te̱ ta̱xi̱ so̱ꞌo̱ u̱nꞌ ña̱ xikán i̱ nuu̱ꞌ u̱nꞌ,
sa̱kanꞌ ña̱ mi̱iꞌ ndiꞌiꞌ ña̱ ndi̱xa̱ nduuꞌ ña̱ kaꞌán i̱ xiinꞌ u̱nꞌ.
2 Mi̱iꞌ yoꞌó kaꞌa̱n ña̱ te̱ xatyuunꞌ nda̱ku nduuꞌ i̱,
sa̱kanꞌ ña̱ yoꞌó xiní yo̱o̱ nduuꞌ ne̱ xatyuunꞌ nda̱ku.
3 Ni̱ xi̱to̱ ku̱a̱ꞌa̱ u̱nꞌ ña̱ xanini i̱,
te̱ ni̱ xi̱to̱ ku̱a̱ꞌa̱ tu̱ u̱nꞌ nimá i̱ ñu̱u.
Te̱ ni̱ xi̱to̱ ku̱a̱ꞌa̱ ndiꞌi̱ xa̱va̱ꞌa̱ u̱nꞌ yuꞌu̱,
ndisu̱ köo̱ꞌ nde̱e̱ i̱i̱n ña̱ ni̱a̱ꞌa ni̱ xi̱ni̱ u̱nꞌ yoo nimá i̱.
Xa̱ i̱i̱n nda̱a̱ꞌ a̱ ni̱ ta̱xi̱ i̱ni̱ i̱ ña̱ nde̱e̱ i̱i̱n ña̱ ni̱a̱ꞌa köo̱ꞌ kivi̱ꞌ ki̱e̱e̱ yu̱ꞌuꞌ i̱.
4 Te̱ nï̱ xa̱a̱ i̱ ña̱ ni̱a̱ꞌa naa ña̱ xaaꞌ i̱nga̱ ne̱ yivi̱ꞌ,
sa̱kanꞌ ña̱ tu̱ꞌu̱n yu̱ꞌuꞌ yoꞌó nduuꞌ ña̱ nï̱ ta̱xi̱ sa̱a̱ i̱ ña̱ ja̱a̱nꞌ.
Yuꞌu̱ ndii,
ni̱ ku̱xi̱o̱o̱ i̱ nuu̱ꞌ ña̱ xaaꞌ ne̱ yivi̱ꞌ,
ne̱ ndi̱e̱ni.
5 Yuꞌu̱ ndii,
xikaꞌ nda̱ku i̱ i̱tyiꞌ u̱nꞌ,
te̱ nde̱e̱ i̱i̱n kivi̱ꞌ tïaꞌa̱an ku̱xi̱o̱o̱ i̱ nuu̱ꞌ i̱tyiꞌ u̱nꞌ,
ña̱ ndikún i̱ yoꞌó.
6 Tákuiꞌe Ndiosí,
nuu̱ꞌ yoꞌó ku̱a̱xi̱ i̱ te̱ kaꞌán i̱ xiinꞌ u̱nꞌ,
sa̱kanꞌ ña̱ xiní kaxiꞌ i̱ ña̱ nakuiinꞌ u̱nꞌ kii̱ꞌ kaꞌán i̱ xiinꞌ u̱nꞌ.
Sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ ña̱ kaꞌán ndaꞌvi i̱ xiinꞌ u̱nꞌ,
te̱ sa̱xinú u̱nꞌ ña̱ kaꞌán ndaꞌvi i̱.
7 Niaꞌa̱ kiꞌi̱ꞌ u̱nꞌ ña̱ ndani̱ xa̱va̱ꞌa̱ u̱nꞌ yuꞌu̱ ña̱ nduuꞌ ña̱ nda̱tu̱nꞌ xa̱va̱ꞌa̱.
Te̱ xiinꞌ ña̱ ndi̱e̱eꞌ u̱nꞌ sa̱kakú u̱nꞌ ne̱ xinuꞌ nuu̱ꞌ te̱ ndasiꞌ taꞌanꞌ xiinꞌ ni̱a̱,
te̱ nandukuꞌ ni̱a̱ yoꞌó,
te̱ tyi̱ndi̱e̱eꞌ ña̱ꞌaꞌ u̱nꞌ.
8 Sa̱a̱ u̱nꞌ ña̱ va̱ꞌa̱ te̱ ko̱to̱ u̱nꞌ yuꞌu̱ nde̱e̱ naa xitoꞌ u̱nꞌ ndu̱tyiꞌ nuu̱ꞌ u̱nꞌ,
te̱ ti̱si̱ꞌe u̱nꞌ yuꞌu̱ ka̱tiꞌ ti̱xi̱n ndi̱xi̱n u̱nꞌ.
9 Ko̱to̱ u̱nꞌ yuꞌu̱ nuu̱ꞌ te̱ ni̱a̱ꞌa,
te̱ kuni ka̱ꞌni̱ꞌ yuꞌu̱,
te̱ ko̱to̱ tu̱ u̱nꞌ yuꞌu̱ nuu̱ꞌ te̱ ndasiꞌ taꞌanꞌ xiinꞌ i̱,
te̱ xikaꞌ ni̱a̱niꞌ ña̱ kuni ka̱ꞌni̱ꞌ ra̱ yuꞌu̱.
10 Te̱ ja̱a̱nꞌ ndii,
xi̱i̱ va̱ nimá ra̱,
te̱ xtani̱ va̱ ra̱ nda̱tuꞌunꞌ ñuñuꞌ ra̱.
11 Xikaꞌ ndikún ra̱ yuꞌu̱ miiꞌ ka̱ kuaꞌa̱n i̱,
te̱ xa̱ nuu̱ꞌ yuꞌu̱ níániꞌ ra̱,
ndiani̱ te̱ su̱ku̱ꞌ ndiꞌiꞌ ra̱ yuꞌu̱ ñu̱ꞌuꞌ naaꞌ ku̱ni̱ ra̱ ka̱kiꞌi̱ i̱ xaꞌa̱ꞌ i̱.
12 Nduuꞌ ra̱ nde̱e̱ naa kuaꞌa̱ꞌ va̱ lion,
tiꞌ xiꞌí va̱ so̱ko̱,
te̱ ndi̱e̱eꞌ va̱ kaꞌán nimá ra̱ sa̱kuatyiꞌ xiꞌe̱ ra̱ yuꞌu̱.
Te̱ nduuꞌ tu̱ ra̱ nde̱e̱ naa kuaꞌa̱ꞌ lion sa̱va̱,
te̱ ñuꞌuꞌ si̱ꞌe ra̱ níániꞌ ra̱ yuꞌu̱,
te̱ ka̱ꞌni̱ꞌ ra̱ yuꞌu̱.
13 Ni̱a̱ꞌa̱ kiꞌi̱ꞌ Yahvé,
te̱ ku̱ntaꞌanꞌ u̱nꞌ xiinꞌ ra̱,
ti̱i̱n uꞌvi̱ u̱nꞌ ra̱,
te̱ ku̱i̱ta̱ xitiꞌ ra̱ nuu̱ꞌ u̱nꞌ sa̱a̱ u̱nꞌ,
te̱ sa̱kakú u̱nꞌ yuꞌu̱ nda̱ꞌaꞌ te̱ ni̱a̱ꞌa ja̱a̱nꞌ xiinꞌ ityi̱ u̱nꞌ.
14 Sa̱kakú yuꞌu̱ xiinꞌ ña̱ ndi̱e̱eꞌ u̱nꞌ nda̱ꞌaꞌ te̱ ja̱a̱nꞌ,
Tákuiꞌe Yahvé,
te̱ ta̱va̱ꞌ u̱nꞌ sa̱kuuꞌ ra̱ nuu̱ꞌ ñu̱ꞌuꞌ i̱i̱n yivi̱ꞌ yoꞌoꞌ ña̱ xanini ra̱ ndoo̱ nda̱ꞌaꞌ ra̱.
Te̱ xiinꞌ ña̱ vikaꞌ u̱nꞌ ña̱ yoo i̱i̱n yivi̱ꞌ yoꞌoꞌ ni̱ xa̱ vikaꞌ xiinꞌ miiꞌ xa̱va̱ꞌa̱ ra̱.
Te̱ yoo kuaꞌa̱ꞌ va̱ ña̱ xaxi̱ꞌ siꞌe̱ ra̱,
te̱ nde̱e̱ ndoó ndo̱so̱ꞌ a̱ na̱ko̱o̱ ra̱ nda̱ꞌaꞌ si̱a̱niꞌ ra̱.
15 Ndisu̱ yuꞌu̱,
xaꞌa̱ꞌ a̱ ña̱ xatyuunꞌ nda̱ku i̱ ndii,
va̱ꞌa̱ xa̱va̱ꞌa̱ ku̱ni̱ nimá i̱ kii̱ꞌ na̱ti̱a̱ku̱ i̱,
te̱ ku̱ni̱ i̱ ndu̱tyiꞌ nuu̱ꞌ i̱ yoꞌó.