Ña̱ saniaꞌá Ndiosí nduuꞌ ña̱ niaꞌá yooꞌ sa̱a̱ kuní a̱ ka̱ka̱ e̱ꞌ i̱i̱n yivi̱ꞌ
Ya̱a̱ nda̱tu̱nꞌ va̱ ña̱ ni̱ xi̱ta̱ David.
16
Ko̱to̱ u̱nꞌ yuꞌu̱,
Tákuiꞌe Ndiosí,
sa̱kanꞌ ña̱ i̱ni̱ i̱ xini i̱ yoꞌó.
2 Ni̱ kaꞌa̱n i̱ xiinꞌ Yahvé ndii:
“Yoꞌó nduuꞌ xto̱ꞌo̱ i̱,
ña̱ xakaꞌnuꞌ i̱,
te̱ sa̱kuuꞌ ña̱ va̱ꞌa̱ ña̱ kumiꞌ i̱ ndii,
nda̱ꞌaꞌ yoꞌó ku̱a̱xi̱ a̱,
te̱ naaꞌ köo̱ꞌ yoꞌó yoo xiinꞌ i̱ ndii,
köo̱ꞌ nduuꞌ xa̱tyiꞌ i̱”,
ni̱ katyi̱ i̱ xiinꞌ a̱.
3 Ne̱ xatyuunꞌ nda̱ku ndieeꞌ nuu̱ꞌ ñu̱ꞌuꞌ i̱i̱n yivi̱ꞌ
xiinꞌ ne̱ i̱i̱n nda̱a̱ꞌ nimá nduuꞌ ne̱ va̱ꞌa̱ xna̱ꞌa̱ kuni i̱ xini i̱.
4 Yo̱o̱ ka̱ ndikún i̱nga̱ kiꞌinꞌ ndiosí ndii,
ko̱o̱ kuaꞌa̱ꞌ tu̱ndoꞌo̱ꞌ nuu̱ꞌ kivi̱ꞌ ñu̱u̱ ni̱a̱.
Te̱ yuꞌu̱ ndii,
kä̱ꞌni̱ꞌ i̱ ki̱tiꞌ te̱ na̱soko̱ꞌ i̱ níiꞌ riꞌ nuu̱ꞌ ndiosí,
ña̱ xakaꞌnuꞌ ne̱ ja̱a̱nꞌ,
ni̱ nde̱e̱ kivi̱ꞌ i̱ꞌi̱n ndiosí,
ña̱ xakaꞌnuꞌ ne̱ ja̱a̱nꞌ,
ki̱ë̱e̱ yu̱ꞌuꞌ i̱.
5 Yahvé,
yoꞌó nduuꞌ nde̱e̱ naa ñu̱ꞌuꞌ ña̱ ni̱ ndoo̱ nda̱ꞌaꞌ i̱,
te̱ yoꞌó tu̱ nduuꞌ ña̱ sañuꞌuꞌ yuꞌu̱ te̱ xikaꞌ i̱ i̱i̱n yivi̱ꞌ.
Te̱ yoꞌó tu̱ xitoꞌ sa̱kuuꞌ ña̱ kumiꞌ i̱.
6 Ñu̱ꞌuꞌ,
ña̱ ni̱ ta̱xi̱ u̱nꞌ nda̱ꞌaꞌ i̱ kii̱ꞌ ni̱ ka̱ti̱n te̱ yivi̱ꞌ a̱ ndii,
i̱i̱n ñu̱ꞌuꞌ va̱ꞌa̱ va̱ nduuꞌ a̱,
te̱ nda̱tu̱nꞌ xa̱va̱ꞌa̱ ñu̱ꞌuꞌ ña̱ ni̱ ndoo̱ nda̱ꞌaꞌ i̱ ja̱a̱nꞌ.
7 Sakaꞌnuꞌ i̱ Yahvé,
ña̱ saniaꞌá yuꞌu̱ ña̱ kaaꞌ va̱ꞌa̱,
te̱ tee̱ꞌ nde̱e̱ ñu̱u nduuꞌ a̱ ndii,
sanakaꞌanꞌ nimá i̱ yuꞌu̱ ña̱ saniaꞌá ja̱a̱nꞌ.
8 Xini i̱ ña̱ yoo Yahvé xiinꞌ i̱ sa̱kuuꞌ kivi̱ꞌ.
Sa̱kanꞌ ña̱ nda̱ꞌaꞌ ku̱a̱ꞌa̱ i̱ yoo a̱,
te̱ xaꞌa̱ꞌ a̱ ña̱ yoo a̱ xiinꞌ i̱ ndii,
kö̱o̱ nde̱e̱ i̱i̱n ña̱ ku̱vi̱ ki̱si̱ nimá i̱.
9 Xaꞌa̱ꞌ a̱ ja̱a̱nꞌ na va̱ꞌa̱ va̱ kuni nimá i̱,
te̱ nakuatiaꞌ va̱ i̱ni̱ i̱.
Te̱ nde̱e̱ ñu̱ꞌuꞌ ndeꞌi̱ i̱ ndii,
na̱ndiee̱ꞌ ndiatuꞌ i̱ni̱ a̱.
10 Ku̱a̱tyi̱ ndii nä̱ko̱o̱ xa̱tyiꞌ u̱nꞌ yuꞌu̱ ti̱xi̱n yavi̱ ndi̱i̱,
ni̱ nde̱e̱ tä̱xi̱ tu̱ u̱nꞌ ña̱ ti̱viꞌ ñu̱ꞌuꞌ ndeꞌi̱ yuꞌu̱,
te̱ su̱ꞌu̱n,
te̱ nduuꞌ kuenta u̱nꞌ.
11 Te̱ xa̱ niaꞌá u̱nꞌ yuꞌu̱ nde̱e̱ ña̱ nduuꞌ i̱tyiꞌ va̱ꞌa̱,
ña̱ taxiꞌ kivi̱ꞌ ñu̱u̱ ña̱ kö̱o̱ kivi̱ꞌ ndiꞌiꞌ.
Te̱ sa̱kutuꞌ vi̱ꞌ u̱nꞌ nimá i̱ xiinꞌ ña̱ sii̱ꞌ xaꞌa̱ꞌ a̱ ña̱ yoo u̱nꞌ xiinꞌ i̱.
Te̱ kii̱ꞌ ku̱nduꞌu̱ꞌ i̱ nda̱ꞌaꞌ ku̱a̱ꞌa̱ u̱nꞌ ndii,
nde̱e̱ ndiꞌiꞌ ni̱ kivi̱ꞌ ku̱a̱tiaꞌ nimá i̱.