Yoꞌoꞌ kaꞌán a̱ xaꞌa̱ꞌ ndee ña̱ kuní a̱ sa̱a̱ e̱ꞌ te̱ ku̱ndi̱e̱e̱ e̱ꞌ vi̱ꞌe̱ su̱ꞌu̱n miiꞌ nduꞌu̱ꞌ Ndiosí
Ya̱a̱ ña̱ ni̱ xi̱ta̱ David.
15
Yahvé,
¿yo̱o̱ ku̱vi̱ ku̱ndi̱e̱e̱ ti̱xi̱n yu̱kunꞌ kaꞌnuꞌ u̱nꞌ?
¿Yo̱o̱ ku̱vi̱ xaa̱ nuu̱ꞌ u̱nꞌ,
te̱ ku̱nduꞌu̱ꞌ ni̱a̱ xíniꞌ i̱kuꞌ su̱ꞌu̱n miiꞌ nduꞌu̱ u̱nꞌ?
2 Ne̱ nduuꞌ ne̱ ku̱vi̱ ku̱ndi̱e̱e̱ i̱kanꞌ ndii,
ne̱ xaaꞌ ña̱ va̱ꞌa̱,
te̱ xatyuunꞌ nda̱ku ni̱a̱,
te̱ ne̱ ndatuꞌunꞌ nda̱ku xiinꞌ i̱i̱n ka̱niiꞌ nimá ni̱a̱ ku̱i̱ti̱ꞌ nduuꞌ ni̱a̱.
3 Te̱ ku̱vi̱ tu̱ ku̱ndi̱e̱e̱ ne̱ ndätuꞌunꞌ xata̱ꞌ i̱nga̱ ne̱ yivi̱ꞌ,
xiinꞌ ne̱ xäaꞌ ña̱ ni̱a̱ꞌa xiinꞌ ne̱ ndieeꞌ ya̱ti̱n vi̱ꞌe̱ ni̱a̱,
xiinꞌ ne̱ käni̱a̱ꞌa xaꞌa̱ꞌ ne̱ xiní taꞌanꞌ xiinꞌ ni̱a̱.
4 Ku̱vi̱ tu̱ ku̱ndi̱e̱e̱ ne̱ kïꞌinꞌ taꞌanꞌ xiinꞌ ne̱ kuäsa̱ꞌ kaꞌanꞌ nuu̱ꞌ xaaꞌ ña̱ ni̱a̱ꞌa.
Ndisu̱ kiꞌinꞌ kaꞌnuꞌ ni̱a̱ ne̱ xikaꞌ nda̱ku i̱tyiꞌ Yahvé.
Te̱ näkooꞌ ni̱a̱ i̱tyiꞌ Ndiosí tee̱ꞌ ndee sa̱a̱ ka̱ ku̱ndo̱ꞌo̱ ni̱a̱ xaꞌa̱ꞌ a̱ ña̱ xikaꞌ ni̱a̱ i̱tyiꞌ a̱.
5 Sa̱kanꞌ tu̱ ku̱vi̱ ku̱ndi̱e̱e̱ ne̱ satatu xu̱ꞌunꞌ ni̱a̱ te̱ kë̱ndiaa̱ꞌ yaꞌviꞌ ni̱a̱ xata̱ꞌ xu̱ꞌunꞌ ja̱a̱nꞌ,
te̱ xï̱ko̱ꞌ xiinꞌ miiꞌ ni̱a̱ te̱ sa̱taví ku̱a̱tyi̱ nianí ni̱a̱ ne̱ köo̱ꞌ ku̱a̱tyi̱.
Ne̱ yivi̱ꞌ,
ne̱ xatyuunꞌ sa̱kanꞌ ndii,
köo̱ꞌ kivi̱ꞌ sa̱nakoꞌ xiinꞌ miiꞌ ni̱a̱ nuu̱ꞌ i̱tyiꞌ Ndiosí.