Yoꞌoꞌ xikán David nuu̱ꞌ Ndiosí ña̱ na̱kaꞌa̱n a̱ xaꞌa̱ꞌ ra̱ nuu̱ꞌ te̱ xaaꞌ ña̱ ni̱a̱ꞌa
Ya̱a̱ ña̱ ni̱ xi̱ta̱ David, ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
12
Sa̱a̱ u̱nꞌ ña̱ va̱ꞌa̱,
Tákuiꞌe Yahvé,
te̱ sa̱kakú kiꞌi̱ꞌ u̱nꞌ nduꞌu̱,
sa̱kanꞌ ña̱ köo̱ꞌ ka̱ ne̱ yivi̱ꞌ,
ne̱ xatyuunꞌ nda̱ku yoꞌoꞌ,
te̱ xa̱ ni̱ ndi̱ꞌi̱ sa̱kuuꞌ ne̱ xatyuunꞌ nda̱ku nuu̱ꞌ ñu̱ꞌuꞌ i̱i̱n yivi̱ꞌ.
2 Te̱ xa̱ miiꞌ ndiꞌiꞌ tu̱n vixi̱ ndatuꞌunꞌ ni̱a̱ xiinꞌ ne̱ yivi̱ꞌ xiinꞌ ni̱a̱.
Te̱ kii̱ꞌ ndatuꞌunꞌ ni̱a̱ ndii,
kaꞌán ni̱a̱ i̱i̱n ña̱ꞌa̱,
ndisu̱ xiinꞌ nimá ni̱a̱ xanini ni̱a̱ i̱nga̱ ña̱ꞌa̱.
3 Yahvé,
sa̱a̱ u̱nꞌ ña̱ va̱ꞌa̱ te̱ sa̱ndo̱ñuꞌuꞌ u̱nꞌ sa̱kuuꞌ ne̱ xtani̱ va̱ kaꞌa̱n tu̱n kaso̱ꞌ ni̱nu̱,
te̱ sa̱ndo̱ñuꞌuꞌ tu̱ u̱nꞌ sa̱kuuꞌ ne̱ xasuviꞌ xiinꞌ miiꞌ.
4 Ne̱ kaꞌán ndii:
“Ku̱vi̱ ku̱ni̱ xaꞌanꞌ e̱ꞌ sa̱a̱ ka̱ kuní mi̱iꞌ e̱ꞌ,
sa̱kanꞌ ña̱ yu̱ꞌuꞌ e̱ꞌ ndii,
yu̱ꞌuꞌ mi̱iꞌ e̱ꞌ nduuꞌ a̱,
köo̱ꞌ ña̱ xaꞌndia tyuunꞌ nuu̱ꞌ e̱ꞌ”,
katyi ni̱a̱.
5 Ndisu̱ kaꞌán Yahvé ndii:
“Xaꞌa̱ꞌ a̱ ña̱ xa̱ ni̱ xi̱ni̱ i̱ ña̱ sandoꞌoꞌ ne̱ yivi̱ꞌ,
ne̱ ndaꞌvi kuuꞌ,
xiinꞌ ña̱ satanaꞌ ndi̱i ni̱a̱ ne̱ natiín ndii,
kuꞌu̱n i̱ vi̱ti̱n te̱ sa̱kakú i̱ sa̱kuuꞌ ni̱a̱,
te̱ sa̱a̱ i̱ sa̱a̱ niiꞌ kaꞌán nimá ni̱a̱ sa̱a̱ i̱ xaꞌa̱ꞌ ni̱a̱” katyi a̱.
6 Kuento ña̱ taxiꞌ Yahvé ndii,
mi̱iꞌ ndiꞌiꞌ ña̱ ndi̱xa̱ nduuꞌ a̱,
te̱ nda̱tu̱nꞌ a̱ nde̱e̱ naa plata,
ña̱ xa̱ ni̱ xa̱ꞌmi̱ꞌ te̱ yivi̱ꞌ nuu̱ꞌ ñuꞌu̱,
te̱ xa̱ ni̱ xa̱ꞌmi̱ ra̱ a̱ nde̱e̱ uxa̱ taꞌanꞌ i̱tyiꞌ.
7 Mi̱iꞌ yoꞌó,
Yahvé,
ko̱to̱ ne̱ ndoꞌoꞌ ja̱a̱nꞌ,
te̱ ko̱to̱ va̱ꞌa̱ ña̱ꞌaꞌ u̱nꞌ nde̱e̱ ndiꞌiꞌ ni̱ kivi̱ꞌ nda̱ꞌaꞌ ne̱ xaaꞌ ña̱ ni̱a̱ꞌa ja̱a̱nꞌ.
8 Ne̱ xaaꞌ ña̱ ni̱a̱ꞌa ja̱a̱nꞌ ndii,
miiꞌ ka̱ te̱ yoo ni̱a̱,
te̱ kaꞌán va̱ꞌa̱ ne̱ yivi̱ꞌ xaꞌa̱ꞌ ña̱ ni̱a̱ꞌa ña̱ xaaꞌ ni̱a̱ ja̱a̱nꞌ.