Yoꞌoꞌ kaꞌán a̱ ña̱ mi̱iꞌ Ndiosí nduuꞌ ña̱ sakakú sa̱kuuꞌ ne̱ xatyuunꞌ nda̱ku
Ya̱a̱ ña̱ ni̱ xi̱ta̱ David, ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
11
I̱ni̱ yuꞌu̱ ña̱ Yahvé xitoꞌ yuꞌu̱,
sa̱kanꞌ na kuiiꞌ köo̱ꞌ ndiotyun kaꞌán ne̱ yivi̱ꞌ xiinꞌ i̱ ndii:
“Ku̱nu̱ kiꞌi̱ꞌ nde̱e̱ naa xaaꞌ sa̱a̱,
kuaꞌan nde̱e̱ te̱i̱n i̱kuꞌ naꞌnuꞌ te̱ kaku̱ u̱nꞌ”,
katyi ni̱a̱.
2 Te̱ xaaꞌ ña̱ ni̱a̱ꞌa ndii,
tyitaꞌnuꞌ ra̱ yo̱ꞌoꞌ nuu̱ꞌ tunꞌ to̱so̱,
tunꞌ xatia kuxi̱,
te̱ tyiꞌniꞌ ra̱ kuxi̱ nuu̱ꞌ yo̱ꞌoꞌ ja̱a̱nꞌ,
te̱ kiniꞌ ra̱ ne̱ yivi̱ꞌ,
ne̱ xatyuunꞌ nda̱ku xiinꞌ nu̱ꞌ nde̱e̱ xaꞌa̱ꞌ kuꞌu̱ miiꞌ ndieeꞌ si̱ꞌe ra̱.
3 Naaꞌ nde̱e̱ i̱i̱n ne̱ yivi̱ꞌ säxinú ka̱ ña̱ kaꞌán tu̱ꞌu̱n nde̱iꞌ Ndiosí ndii,
köo̱ꞌ xa̱tyiꞌ a̱ ku̱vi̱ sa̱a̱ ne̱ xatyuunꞌ nda̱ku.
4 Yahvé ndii,
ti̱xi̱n yu̱kunꞌ kaꞌnuꞌ su̱ꞌu̱n nduꞌu̱ꞌ a̱,
te̱ ndi̱viꞌ iinꞌ tei̱ kaꞌnuꞌ miiꞌ nduꞌu̱ꞌ a̱ xaꞌndia tyuunꞌ a̱.
Te̱ xitoꞌ ndo̱so̱ꞌ a̱ sa̱kuuꞌ ña̱ xaaꞌ i̱ꞌi̱n ne̱ yivi̱ꞌ i̱i̱n yivi̱ꞌ,
te̱ xiní ndiꞌi̱ a̱ ña̱ xaaꞌ i̱ꞌi̱n ne̱ yivi̱ꞌ nuu̱ꞌ ñu̱ꞌuꞌ i̱i̱n yivi̱ꞌ.
5 Yahvé ndii,
xitoꞌ kuaꞌa a̱ ne̱ xatyuunꞌ nda̱ku,
te̱ xitoꞌ kuaꞌa tu̱ a̱ ne̱ xaaꞌ ña̱ ni̱a̱ꞌa,
ndisu̱ ne̱ xaaꞌ ña̱ ni̱a̱ꞌa xiinꞌ ne̱ xtani̱ va̱ sa̱kakuꞌ tu̱n kuiꞌe̱ ndii,
ndasiꞌ ña̱ꞌaꞌ a̱ xiinꞌ i̱i̱n ka̱niiꞌ nimá a̱.
6 Xata̱ꞌ ne̱ xaaꞌ ña̱ ni̱a̱ꞌa ja̱a̱nꞌ ndii,
sa̱kuunꞌ Ndiosí tu̱ndoꞌo̱ꞌ,
ña̱ nduuꞌ ñuꞌu̱ ti̱keí ndatin,
xiinꞌ azufre ndatin,
xiinꞌ tatyi̱ꞌ i̱ꞌniꞌ xa̱va̱ꞌa̱,
te̱ xiinꞌ sa̱kuuꞌ ña̱ ja̱a̱nꞌ sa̱ndoꞌoꞌ ña̱ꞌaꞌ a̱.
7 Sa̱kanꞌ ña̱ Yahvé ndii,
ña̱ xatyuunꞌ nda̱ku nduuꞌ a̱,
te̱ ndani̱ a̱ ne̱ xatyuunꞌ nda̱ku.
Te̱ ne̱ xatyuunꞌ nda̱ku ja̱a̱nꞌ ndii,
ku̱ni̱ ni̱a̱ nuu̱ꞌ a̱.