Yoꞌoꞌ kaꞌán ndaꞌvi David xiinꞌ Ndiosí ña̱ na sa̱ndo̱ñuꞌuꞌ xa̱tyiꞌ a̱ sa̱kuuꞌ ne̱ xaaꞌ ña̱ ni̱a̱ꞌa
10
Tákuiꞌe Yahvé,
¿ndiotyun na xikaꞌ yoo u̱nꞌ nuu̱ꞌ i̱?
Te̱,
¿ndiotyun na tisi̱ꞌe u̱nꞌ nuu̱ꞌ i̱ kii̱ꞌ yoo tu̱ndoꞌo̱ꞌ nuu̱ꞌ kivi̱ꞌ ñu̱u̱ i̱?
2 Te̱ xaaꞌ ña̱ ni̱a̱ꞌa ndii,
kaꞌán ñuñuꞌ ra̱,
te̱ ndikún ra̱ ne̱ ndaꞌvi kuuꞌ,
ndisu̱ mi̱iꞌ ra̱ koyo̱ nuu̱ꞌ ña̱ ni̱ tyi̱ndi̱e̱e̱ ra̱ koyo̱ i̱nga̱ ne̱ yivi̱ꞌ ja̱a̱nꞌ.
3 Sa̱kanꞌ ña̱ kaꞌán ñuñuꞌ ra̱ xaꞌa̱ꞌ ña̱ ki̱ni̱ ña̱ xanini ra̱,
te̱ kaꞌán va̱ꞌa̱ ra̱ xaꞌa̱ꞌ te̱ yivi̱ꞌ,
te̱ ndioo̱ꞌ i̱ni̱ xaꞌa̱ꞌ kuaꞌa̱ꞌ ña̱ꞌa̱,
te̱ kani̱a̱ꞌa ra̱ xaꞌa̱ꞌ yoꞌó,
Yahvé.
4 Te̱ xaaꞌ ña̱ ni̱a̱ꞌa xaꞌa̱ꞌ a̱ ña̱ ñuñuꞌ xa̱va̱ꞌa̱ ra̱ ndii,
köo̱ꞌ kivi̱ꞌ nakaꞌanꞌ ra̱ xaꞌa̱ꞌ yoꞌó,
Ndiosí,
sa̱kanꞌ ña̱ xanini ra̱ ndii,
köo̱ꞌ u̱nꞌ yoo.
5 Te̱ xa̱ nuu̱ꞌ ña̱ ni̱a̱ꞌa xaaꞌ ra̱ nde̱e̱ ndiꞌiꞌ ni̱ kivi̱ꞌ.
Te̱ xäaꞌ ra̱ kuenta kuuꞌ tu̱ndoꞌo̱ꞌ ña̱ sa̱ndoꞌoꞌ ña̱ꞌaꞌ u̱nꞌ nuu̱ꞌ kuꞌu̱n e̱ꞌ.
Te̱ ndasiꞌ ra̱ sa̱kuuꞌ te̱ xiꞌé xini ña̱ꞌaꞌ.
6 Kaꞌán ra̱ xiinꞌ nimá ra̱ ndii:
“Köo̱ꞌ kivi̱ꞌ ku̱ndo̱ꞌo̱ yooꞌ ña̱ ki̱ni̱,
te̱ ni̱ nde̱e̱ köo̱ꞌ kivi̱ꞌ tu̱ ku̱ndo̱ꞌo̱ e̱ꞌ ña̱ kueinꞌ”,
katyi ra̱.
7 Te̱ xa̱ nuu̱ꞌ kani̱a̱ꞌa ra̱,
uun xini xaꞌanꞌ ra̱,
uun kaꞌán ki̱ni̱ ra̱ xaꞌa̱ꞌ i̱nga̱ ne̱ yivi̱ꞌ.
Te̱ sa̱kuuꞌ ña̱ kaꞌán ra̱,
tee̱ꞌ ndee kaꞌán va̱ꞌa̱ ra̱ xiinꞌ ne̱ yivi̱ꞌ ndii,
xakuuꞌ ku̱i̱ti̱ꞌ ra̱,
sa̱kanꞌ ña̱ mi̱iꞌ ndiꞌiꞌ tu̱ꞌu̱n kaso̱ꞌ ni̱nu̱ ku̱i̱ti̱ꞌ nduuꞌ ña̱ kaꞌán ra̱ ja̱a̱nꞌ.
8 Xikundieé si̱ꞌe ra̱ xaꞌa̱ꞌ kuꞌu̱ ya̱ti̱n ñu̱u̱ kualiꞌ te̱ níániꞌ ra̱ ne̱ yivi̱ꞌ,
te̱ xaꞌni̱ꞌ si̱ꞌe ra̱ ne̱ yivi̱ꞌ,
ne̱ köo̱ꞌ xa̱tyiꞌ a̱ xaaꞌ,
te̱ sa̱kuuꞌ ra̱ níániꞌ ne̱ kü̱vi̱ na̱kaꞌa̱n mi̱iꞌ xaꞌa̱ꞌ.
9 Te̱ tisi̱ꞌe ra̱ nde̱e̱ naa xaaꞌ lion naá si̱ꞌe riꞌ ti̱xi̱n yavi̱ riꞌ níániꞌ riꞌ ki̱tiꞌ,
sa̱kanꞌ te̱ yoo tu̱ꞌva̱ ra̱ te̱ kii̱ꞌ ku̱a̱xi̱ ne̱ kü̱vi̱ na̱kaꞌa̱n mi̱iꞌ xaꞌa̱ꞌ ja̱a̱nꞌ,
te̱ na̱ti̱i̱n ña̱ꞌaꞌ ra̱.
Natiinꞌ ra̱ ne̱ ndaꞌvi kuuꞌ te̱ naꞌiꞌ ra̱ sa̱kuuꞌ ña̱ kumiꞌ ni̱a̱.
10 Te̱ ne̱ xa̱ ni̱ xi̱kuꞌu̱n nda̱ꞌaꞌ ra̱ ja̱a̱nꞌ ndii,
sakaꞌanꞌ ña̱ꞌaꞌ ra̱,
te̱ nakanduꞌu̱ꞌ ndieeꞌ ni̱a̱ nde̱e̱ nuu̱ꞌ ñu̱ꞌuꞌ nuu̱ꞌ ra̱,
te̱ kuaꞌa̱ꞌ xa̱va̱ꞌa̱ ne̱ kü̱vi̱ na̱kaꞌa̱n mi̱iꞌ xaꞌa̱ꞌ koyó nuu̱ꞌ ña̱ ndi̱e̱eꞌ ra̱.
11 Kaꞌán ni̱a̱ xiinꞌ nimá ni̱a̱ ndii:
“Ni̱ na̱ndoso̱ꞌ Ndiosí xaꞌa̱ꞌ e̱ꞌ,
ni̱ nda̱si̱ a̱ nuu̱ꞌ a̱,
te̱ köo̱ꞌ kivi̱ꞌ ku̱ni̱ ka̱ a̱ ña̱ ndoꞌoꞌ e̱ꞌ”,
katyi ni̱a̱.
12 Tákuiꞌe Yahvé Ndiosí,
ni̱a̱ꞌa̱ kiꞌi̱ꞌ te̱ sa̱ndoꞌoꞌ u̱nꞌ te̱ yivi̱ꞌ,
te̱ xaaꞌ ña̱ ni̱a̱ꞌa kaa̱ꞌ,
te̱ nä̱ndoso̱ꞌ u̱nꞌ xaꞌa̱ꞌ ne̱ ndoꞌoꞌ xaaꞌ ra̱.
13 Ndiosí,
¿ndiotyun na taxiꞌ u̱nꞌ saxiooꞌ te̱ xaaꞌ ña̱ ni̱a̱ꞌa yoꞌó?
Te̱ kaꞌán ra̱ xiinꞌ nimá ra̱ ndii:
“Ndiosí ndii,
köo̱ꞌ kivi̱ꞌ naka̱n a̱ kuenta nuu̱ꞌ e̱ꞌ xaꞌa̱ꞌ ku̱a̱tyi̱ e̱ꞌ”,
katyi ra̱.
14 Ndisu̱ xini yoꞌó tu̱ndoꞌo̱ꞌ ña̱ sandoꞌoꞌ ra̱ ne̱ yivi̱ꞌ xiinꞌ ña̱ xaaꞌ ra̱ ja̱a̱nꞌ,
te̱ xaaꞌ u̱nꞌ kuenta xaꞌa̱ꞌ sa̱kuuꞌ ña̱ ja̱a̱nꞌ,
te̱ sa̱ndoꞌoꞌ ña̱ꞌaꞌ u̱nꞌ.
Nuu̱ꞌ yoꞌó ki̱xi̱n ne̱ kü̱vi̱ na̱kaꞌa̱n mi̱iꞌ xaꞌa̱ꞌ xiinꞌ ne̱ ndaꞌvi köo̱ꞌ yu̱vaꞌ siꞌiꞌ,
te̱ na̱kaꞌa̱n u̱nꞌ xaꞌa̱ꞌ ni̱a̱.
15 Ke̱ndoso̱ꞌ u̱nꞌ sa̱kuuꞌ ña̱ ndi̱e̱eꞌ ña̱ kumiꞌ sa̱kuuꞌ te̱ xaaꞌ ña̱ ni̱a̱ꞌa ja̱a̱nꞌ,
te̱ naka̱n u̱nꞌ kuenta nuu̱ꞌ ra̱ xaꞌa̱ꞌ sa̱kuuꞌ ña̱ ni̱a̱ꞌa ña̱ xaaꞌ ra̱,
te̱ nä̱ko̱o̱ u̱nꞌ nde̱e̱ i̱i̱n a̱.
16 Yahvé,
yoꞌó nduuꞌ rey,
ña̱ xaꞌndia tyuunꞌ nde̱e̱ ndiꞌiꞌ ni̱ kivi̱ꞌ,
te̱ nde̱e̱ a̱ma̱ ka̱ kivi̱ꞌ.
Te̱ ni̱ sa̱ndo̱ñuꞌuꞌ u̱nꞌ sa̱kuuꞌ ne̱ tukuꞌ,
ne̱ ndieeꞌ nuu̱ꞌ ñu̱ꞌuꞌ u̱nꞌ.
17 Yahvé,
xini so̱ꞌo̱ yoꞌó ña̱ kaꞌán ne̱ ndaꞌvi kuuꞌ xiinꞌ u̱nꞌ,
xandieni u̱nꞌ nimá ni̱a̱,
te̱ tyunxaꞌaꞌ u̱nꞌ ña̱ kaꞌán ndaꞌvi ni̱a̱ nuu̱ꞌ u̱nꞌ.
18 Sa̱naꞌmá nda̱ku u̱nꞌ ne̱ ndaꞌvi köo̱ꞌ yu̱vaꞌ siꞌiꞌ xiinꞌ ne̱ ndoꞌoꞌ xaaꞌ ne̱ yivi̱ꞌ.
Te̱ täxiꞌ ka̱ u̱nꞌ ña̱ sa̱ndoꞌoꞌ te̱ yivi̱ꞌ i̱i̱n yivi̱ꞌ ku̱i̱ti̱ꞌ,
ne̱ yivi̱ꞌ xiinꞌ ra̱.