Yoꞌoꞌ taxiꞌ rey David ña̱ tyi̱nda̱ni Ndiosí xaꞌa̱ꞌ a̱ ña̱ xatyuunꞌ nda̱ku a̱
Ya̱a̱ ña̱ ni̱ xi̱ta̱ David xaꞌa̱ꞌ Mut-labén, ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
9
Tákuiꞌe Yahvé,
xakaꞌnuꞌ i̱ yoꞌó xiinꞌ i̱i̱n ka̱niiꞌ nimá i̱,
te̱ kaꞌa̱n i̱ xiinꞌ sa̱kuuꞌ ne̱ yivi̱ꞌ xaꞌa̱ꞌ sa̱kuuꞌ tyu̱u̱n kaꞌnuꞌ ña̱ xaaꞌ u̱nꞌ.
2 Tákuiꞌe,
ña̱ nduꞌu̱ꞌ ndi̱viꞌ,
va̱ꞌa̱ va̱ kuni nimá i̱,
te̱ kusiíꞌ va̱ tu̱ i̱ni̱ i̱ xaꞌa̱ꞌ sa̱kuuꞌ ña̱ ni̱ xa̱a̱ u̱nꞌ xaꞌa̱ꞌ i̱.
Xaꞌa̱ꞌ a̱ ja̱a̱nꞌ na kuiiꞌ ka̱ta̱ i̱ ya̱a̱ nuu̱ꞌ u̱nꞌ,
ña̱ xakaꞌnuꞌ i̱ yoꞌó.
3 Kii̱ꞌ ni̱ xi̱ni̱ te̱ ndasiꞌ taꞌanꞌ xiinꞌ i̱ ku̱a̱xi̱ u̱nꞌ ndii,
ni̱ xi̱nu̱ sa̱kuuꞌ ra̱,
ni̱ ndu̱va̱ sa̱kuuꞌ ra̱,
te̱ ni̱ xiꞌi̱ ra̱.
4 Sa̱kanꞌ ña̱ yoꞌó nduuꞌ kuesí,
ña̱ xatyuunꞌ nda̱ku,
te̱ ni̱ na̱kaꞌa̱n va̱ꞌa̱ u̱nꞌ xaꞌa̱ꞌ i̱ nuu̱ꞌ te̱ ndasiꞌ taꞌanꞌ xiinꞌ i̱,
ni̱ xi̱ku̱nduꞌu̱ꞌ u̱nꞌ nuu̱ꞌ tei̱ kaꞌnuꞌ miiꞌ nduꞌu̱ꞌ u̱nꞌ xaꞌndia tyuunꞌ u̱nꞌ,
te̱ nakaꞌán nda̱ku u̱nꞌ xaꞌa̱ꞌ i̱.
5 Ni̱ sa̱ndoꞌoꞌ u̱nꞌ ne̱ tukuꞌ,
te̱ ni̱ sa̱ndo̱ñuꞌuꞌ u̱nꞌ ne̱ xaaꞌ ña̱ ni̱a̱ꞌa,
te̱ ni̱ sa̱ndoyoꞌ xa̱tyiꞌ u̱nꞌ kivi̱ꞌ ni̱a̱ nuu̱ꞌ ñu̱ꞌuꞌ i̱i̱n yivi̱ꞌ,
te̱ köo̱ꞌ kivi̱ꞌ na̱ka̱ꞌanꞌ ka̱ ne̱ yivi̱ꞌ xaꞌa̱ꞌ ni̱a̱.
6 Te̱ ndasiꞌ taꞌanꞌ xiinꞌ i̱ ndii,
xa̱ ni̱ ndo̱ñuꞌuꞌ sa̱kuuꞌ ra̱,
te̱ xa̱ ni̱ ndi̱ꞌi̱ xa̱tyiꞌ ra̱ ni̱ nduxi̱n,
te̱ sa̱kanꞌ tu̱ sa̱kuuꞌ ñu̱u̱ miiꞌ ni̱ ndiee̱ ra̱,
ña̱ ni̱ sa̱nduxín xa̱tyiꞌ u̱nꞌ ndii,
köo̱ꞌ nakaꞌanꞌ xa̱tyiꞌ ka̱ xaꞌa̱ꞌ a̱.
7 Ndisu̱ mi̱iꞌ yoꞌó,
Yahvé ndii,
yoo u̱nꞌ nde̱e̱ ndiꞌiꞌ ni̱ kivi̱ꞌ,
te̱ xa̱ ni̱ sa̱kooꞌ tu̱ꞌva̱ u̱nꞌ tei̱ kaꞌnuꞌ miiꞌ ku̱nduꞌu̱ꞌ u̱nꞌ te̱ sa̱naꞌmá nda̱ku u̱nꞌ sa̱kuuꞌ ne̱ yivi̱ꞌ i̱i̱n yivi̱ꞌ.
8 Te̱ sa̱naꞌmá nda̱ku u̱nꞌ sa̱kuuꞌ ne̱ yivi̱ꞌ i̱i̱n yivi̱ꞌ,
te̱ sa̱kanꞌ tu̱ ka̱ꞌndi̱a̱ tyuunꞌ nda̱ku u̱nꞌ nuu̱ꞌ sa̱kuuꞌ ne̱ yivi̱ꞌ i̱i̱n yivi̱ꞌ.
9 Yahvé nduuꞌ miiꞌ kakú ne̱ ndoꞌoꞌ xaaꞌ ne̱ yivi̱ꞌ,
te̱ nduuꞌ tu̱ a̱ miiꞌ kakú ni̱a̱ kii̱ꞌ ndoꞌoꞌ nimá ni̱a̱.
10 Tákuiꞌe,
ne̱ xiní kivi̱ꞌ u̱nꞌ ndii,
i̱ni̱ ni̱a̱ xini ni̱a̱ yoꞌó,
sa̱kanꞌ ña̱ näkooꞌ u̱nꞌ ne̱ yivi̱ꞌ kii̱ꞌ xikán ni̱a̱ nuu̱ꞌ u̱nꞌ te̱ tyi̱ndi̱e̱eꞌ ña̱ꞌaꞌ u̱nꞌ.
11 Ka̱ta̱ ndo̱ꞌ ya̱a̱ nuu̱ꞌ Yahvé ña̱ nduꞌu̱ꞌ ñu̱u̱ Jerusalén,
kaꞌa̱n ndo̱so̱ꞌ ndo̱ꞌ nuu̱ꞌ sa̱kuuꞌ ne̱ yivi̱ꞌ i̱i̱n yivi̱ꞌ xaꞌa̱ꞌ sa̱kuuꞌ tyu̱u̱n kaꞌnuꞌ ña̱ xaaꞌ a̱.
12 Sa̱kanꞌ ña̱ Ndiosí,
ña̱ nakán kuenta xaꞌa̱ꞌ ne̱ yivi̱ꞌ,
ne̱ ni̱ xiꞌi̱ ni̱ xa̱a̱ i̱nga̱ ne̱ yivi̱ꞌ ndii,
xitoꞌ a̱ ne̱ kü̱vi̱ na̱kaꞌa̱n mi̱iꞌ xaꞌa̱ꞌ,
te̱ kuäsa̱ꞌ nandoso̱ꞌ a̱ ña̱ kaꞌán ndaꞌvi ne̱ yivi̱ꞌ nuu̱ꞌ a̱ xaꞌa̱ꞌ ña̱ sandoꞌoꞌ ña̱ꞌaꞌ ne̱ yivi̱ꞌ.
13 Yahvé,
sa̱a̱ u̱nꞌ ña̱ va̱ꞌa̱ te̱ ku̱ndaꞌvi i̱ni̱ u̱nꞌ xaꞌa̱ꞌ i̱,
ko̱to̱ u̱nꞌ sa̱a̱ vi̱ꞌ sandoꞌoꞌ te̱ ndasiꞌ taꞌanꞌ xiinꞌ i̱ yuꞌu̱.
Yoꞌó nduuꞌ ña̱ sa̱ndaꞌa yuꞌu̱ kii̱ꞌ xa̱ yoo i̱ ku̱vi̱ i̱.
14 Sa̱kanꞌ te̱ ku̱vi̱ kuꞌu̱n i̱ yiꞌeꞌ ñu̱u̱ Jerusalén,
te̱ kaꞌa̱n i̱ xiinꞌ sa̱kuuꞌ ne̱ yivi̱ꞌ ña̱ yoꞌó xataꞌa̱n sa̱kaꞌnuꞌ ndu̱,
te̱ va̱ꞌa̱ va̱ kuni i̱,
sa̱kanꞌ ña̱ ni̱ sa̱kakú u̱nꞌ yuꞌu̱.
15 Ne̱ tukuꞌ ndii,
mi̱iꞌ ni̱a̱ ni̱ koyo̱ yavi̱ ña̱ ni̱ xa̱ti̱a̱ ni̱a̱ koyo̱ i̱nga̱ ne̱ yivi̱ꞌ,
te̱ xaꞌa̱ꞌ mi̱iꞌ tu̱ ni̱a̱ ni̱ xi̱kuꞌu̱n ñu̱nu̱ꞌ ña̱ ni̱ ta̱ndi̱e̱e̱ ni̱a̱ i̱tyiꞌ.
16 Ni̱ xi̱ni̱ ne̱ yivi̱ꞌ yoo nduuꞌ Yahvé xaꞌa̱ꞌ a̱ ña̱ xatyuunꞌ nda̱ku a̱
xiinꞌ ña̱ ni̱ sa̱koyó a̱ ne̱ xaaꞌ ña̱ ni̱a̱ꞌa nuu̱ꞌ ña̱ ni̱a̱ꞌa ña̱ xaaꞌ mi̱iꞌ ni̱a̱.
Selah
17 Sa̱kuuꞌ ne̱ xaaꞌ ña̱ ni̱a̱ꞌa ndii,
ñu̱u̱ ndi̱i kuꞌu̱n ni̱a̱ sa̱a̱ Ndiosí,
i̱kanꞌ tu̱ nduuꞌ miiꞌ kuꞌu̱n sa̱kuuꞌ ne̱ ni̱ na̱ndoso̱ꞌ xaꞌa̱ꞌ Ndiosí.
18 Ndisu̱ nä̱ndoso̱ꞌ xa̱tyiꞌ a̱ xaꞌa̱ꞌ ne̱ ndaꞌvi kuuꞌ,
ni̱ nde̱e̱ ña̱ ndiatuꞌ i̱ni̱ ne̱ ndaꞌvi kuuꞌ ndii,
süu̱ꞌ ndee ndiꞌiꞌ ni̱ kivi̱ꞌ mi̱iꞌ ku̱u̱ ne̱ yivi̱ꞌ xiinꞌ a̱.
19 Tákuiꞌe Yahvé,
ni̱a̱ꞌa̱ kiꞌi̱ꞌ,
te̱ tä̱xi̱ u̱nꞌ ña̱ na̱kuita̱ teiꞌ te̱ yivi̱ꞌ i̱i̱n yivi̱ꞌ ku̱i̱ti̱ꞌ nuu̱ꞌ u̱nꞌ,
sa̱naꞌmá kiꞌi̱ꞌ ne̱ tukuꞌ xaꞌa̱ꞌ ku̱a̱tyi̱ ni̱a̱ nuu̱ꞌ u̱nꞌ.
20 Mi̱iꞌ u̱nꞌ sa̱a̱ sa̱kanꞌ te̱ ku̱yi̱ꞌvi ni̱a̱ nde̱e̱ ki̱si̱ vi̱ꞌ ña̱ꞌaꞌ a̱,
na ku̱nda̱ni̱ ni̱a̱ ña̱ köo̱ꞌ nduuꞌ xa̱tyiꞌ ni̱a̱ nuu̱ꞌ yoꞌó,
süu̱ꞌ ja̱a̱nꞌ ndii,
ne̱ yivi̱ꞌ i̱i̱n yivi̱ꞌ ku̱i̱ti̱ꞌ nduuꞌ ni̱a̱.
Selah