Yoꞌoꞌ kaꞌán a̱ xaꞌa̱ꞌ ña̱ kaꞌnuꞌ Ndiosí xiinꞌ ña̱ kaꞌnuꞌ te̱ yivi̱ꞌ i̱i̱n yivi̱ꞌ
Na ka̱ta̱ e̱ꞌ ya̱a̱ ña̱ ni̱ xi̱ta̱ David, ya̱a̱ ña̱ xitaꞌ ne̱ yivi̱ꞌ kii̱ꞌ xeꞌní ni̱a̱ nduu̱ꞌ uva.
8
Tákuiꞌe,
xto̱ꞌo̱ ndu̱ Yahvé,
yoꞌó nduuꞌ ña̱ kaꞌnuꞌ xa̱va̱ꞌa̱ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ,
te̱ nde̱e̱ ndi̱viꞌ ni̱ xa̱ni̱ u̱nꞌ tei̱ kaꞌnuꞌ miiꞌ nduꞌu̱ꞌ u̱nꞌ xaꞌndia tyuunꞌ u̱nꞌ.
2 Ya̱a̱ ña̱ xitaꞌ ne̱ kuatyi̱ꞌ kualiꞌ,
ne̱ tyityinꞌ ka̱,
ni̱ nduuꞌ ndi̱e̱e̱ꞌ u̱nꞌ,
te̱ xiinꞌ ña̱ ja̱a̱nꞌ tu̱ ni̱ sa̱kaꞌanꞌ u̱nꞌ ne̱ ndasiꞌ taꞌanꞌ xiinꞌ u̱nꞌ xiinꞌ ne̱ xateiꞌ nuu̱ꞌ u̱nꞌ,
te̱ ko̱o̱ taxi̱nꞌ yu̱ꞌuꞌ ni̱a̱.
3 Kii̱ꞌ xitoꞌ ndiaa i̱ ndi̱viꞌ ñu̱u,
te̱ xini i̱ sa̱kuuꞌ ña̱ ni̱ xa̱ꞌa̱ nda̱ꞌaꞌ u̱nꞌ,
ña̱ nduuꞌ yoo̱ꞌ xiinꞌ tiuu̱nꞌ,
ña̱ ni̱ ta̱ndi̱e̱e̱ u̱nꞌ ndi̱viꞌ,
4 te̱ ndatuꞌúnꞌ xiinꞌ miiꞌ i̱ ndii:
¿Yo̱o̱ nduuꞌ nduꞌu̱,
ne̱ yivi̱ꞌ i̱i̱n yivi̱ꞌ,
na xanini u̱nꞌ xaꞌa̱ꞌ ndu̱?
Te̱,
¿yo̱o̱ nduuꞌ nduꞌu̱ na ndiꞌni̱ u̱nꞌ xaꞌa̱ꞌ ndu̱?
5 Te̱ ndee xa̱ku̱ꞌ va̱ te̱ na̱kuita̱ ndu̱ xiinꞌ ángele ni̱ xa̱a̱ u̱nꞌ,
te̱ ni̱ ta̱xi̱ u̱nꞌ ña̱ nda̱tu̱nꞌ kooꞌ tyukuuꞌ ndu̱,
te̱ ni̱ ta̱xi̱ tu̱ u̱nꞌ ña̱ na̱ti̱i̱n ndu̱ ña̱ tiinꞌ kaꞌnuꞌ.
6 Te̱ ni̱ sa̱na̱kuaꞌa u̱nꞌ sa̱kuuꞌ ña̱ ni̱ xa̱ꞌa̱ u̱nꞌ nda̱ꞌaꞌ ndu̱,
te̱ ka̱ꞌndi̱a̱ tyuunꞌ ndu̱ nuu̱ꞌ ña̱ ja̱a̱nꞌ.
Te̱ ni̱ sa̱kuisoꞌ tyuunꞌ u̱nꞌ ndu̱ nuu̱ꞌ sa̱kuuꞌ ña̱ ja̱a̱nꞌ.
7 Naa kuuꞌ sa̱kuuꞌ mbe̱e̱ xiinꞌ sa̱kuuꞌ nuu̱ꞌ si̱ndiki̱ꞌ,
te̱ sa̱kanꞌ tu̱ ni̱ ta̱xi̱ u̱nꞌ ka̱ꞌndi̱a̱ tyuunꞌ ndu̱ nuu̱ꞌ sa̱kuuꞌ ki̱tiꞌ i̱kuꞌ.
8 Te̱ sa̱kanꞌ tu̱ nuu̱ꞌ sa̱kuuꞌ sa̱a̱,
tiꞌ taꞌnuꞌ ndi̱viꞌ,
xiinꞌ nuu̱ꞌ sa̱kuuꞌ ti̱a̱kaꞌ tiꞌ ñuꞌuꞌ mi̱ni̱ kaꞌnuꞌ,
xiinꞌ nuu̱ꞌ sa̱kuuꞌ i̱nga̱ nuu̱ꞌ ki̱tiꞌ,
tiꞌ ñuꞌuꞌ mi̱ni̱ kaꞌnuꞌ.
9 Tákuiꞌe Yahvé,
xto̱ꞌo̱ ndu̱,
yoꞌó nduuꞌ ña̱ kaꞌnuꞌ xa̱va̱ꞌa̱ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ.